DONALD TRUMP A LA TLAWM TEUH LO! 
Familia Fanai Lalţansanga

Chepa mahin, “Thangah ka awk ta na laileng,” a tia lawm, thu dik hi ka ziak zel dawn a ni. Truth, nothing but the truth! Mizo upain, “Pachuau sual ang” an tih zawng zawng neih zovin Pachuau kan sual a nih tawh ber hi maw!
DONALD TRUMP A LA TLAWM TEUH LO

President Trump chuan, “Wisconsin vote chhiar ţhat hnu hian President-elect Joe Biden vote hmuh zat hi rinhlelhna lian tak kan nei a ni tih kan lantir (challenge) leh dawn a ni. Wisconsin vote chhiar ţhat kan duhna chhan chu chhiar sual a awm kan tihna a ni lo va, dan dik lova vote ( illegal vote) tam tak a awm a ni tih hmuhchhuah kan duh vang zawk a ni. Vote an chhiar zawh fel hnu, Thawhţan emaw, Thawhleh emaw hian thubuai kan theh lut leh dawn a. Dan dik lova vote (illegal vote) tam tak a awm tih kan haichhuak tawh a ni. Mi lo la bengkhawn reng rawh u, thu kal lam leh haw lam lo ngaichang reng awng che u” tiin Nirinni chawhnu thlang her khan a tweet a ni. He a thuchhuah hnuaiah hian Twitter hotute chuan “This claim about election fraud is disputed” “Inthlanna thil fel lo awm anga a inchhalna hi rinhlelhawm a ni,” tiin hawrawp senin an ţial a, thu dik anga pawm tur a ni lo a ni.

Wisconsin state bial tam tak zinga bial khat - Milwaukee County bial-a vote an chhiar ţhat lehnaah Joe Biden hian bote 132 a hmuh belh leh ta nghal a. Dane County bikah chuan Donald Trump hian vote 68-in hma a hruai zawk thung a. Wisconsin state pum pui vote-ah chuan Joe Biden hian vote 1,630,673 (49.6%) a hmu a, Trump hian 1,610,065 (48.9%) a hmu rih a ni.

Wisconsin–ah Joe Biden-a’n hnehna a chang a, tlinga puan hi Thawhlehni khian Democratic chair of the bipartisan Wisconsin Election Commission-in a nemnghet (certify) dawn a, chu chu conservative ruhkawl pawl, Wisconsin Voters Alliance an tih chuan la nemnghet rih lo turin thubuai an theh lut leh mek a ni.

Inrinni tlai lam khan President Trump chuan Twitter kaltlang bawkin, Pennsylvania chungchang bikah thu dik lo finfiah theih a nih thu a tar lang leh a. “Thil dik lo a awm tih fumfe taka sawi tur a awm a, finfiahna ţha tak kan nei ta, Pennsylvania thubuai chungchangah hian. Mi ţhekhatin chu chu an hmu duh tlat lo a, an haider lui tlat a. Kan Ram humhim tur hian eng mah tih an tum lo va. A lungchhiatthlak tak zet a ni,” a ti.

Pennsylvania thubuai an theh luh chungchangah khan federal appeals judge 3 te chuan Zirtawpni khan thu tlingah ngai lovin an hnawl sak a. Chu achhapah Pennsylvania-a,  universal mail-in voting hmanga  vote lo thleng zawng zawng hnawl tura U.S. Rep. Mike Kelly, Republican  thubuai an theh luh pawh Supreme Court chuan Inrinni khan a hnawlsak leh ta bawk a ni.

Donald Trump leh a ukilte hian Wisconsin biala vote chhiat nawn tir leh tur hian sum a maka maka tam an seng a, US dollar maktaduai 3 lawih an seng  a, mahse an sawi ang he huin eng mah hnehna an chang leh si lo va, sum an seng thlawn a ni. Donald Trump pawlte tan sum tak tak, US dollar maktaduai 2.5 thawhtu Fredric Eshelman, North Carolina chu a beidawngin a inchhir  khawp mai a, a sum thawh zawng zawng chu Donald Trump pawlte hian a pawisa faiin  kir leh se a duh thu a sawi hial a ni.

Trump leh a ukil rualten chauh thubarawha Arizona, Georgia, Michigan, Nevada leh Pennsylvania-a thubuai an theh luhte chu a hlawhchham titih deuh ta vek mai a. An tih leh tur awmchhun chu U.S. Supreme Court for emergency injunctive relief-a thubuai theh luh a ni a. Thubuai an theh luh chuan Justice Samuel Alito-a’n a lo en dik ang a, thu tlinga a pawm chuan US Supreme Court roreltu dang pariat (8) ten an lo bihchiang leh dawn a ni.

US President thlannah hian Supreme Court hi a inrawlh ngai mang mang lo va. Kan la hre ţheuhvin ka ring, kum 2000 US President thlan kha, TV-ah Live in kan en ţhup hlawm kha. Khami ţum chiah khan a ni US President thlannaa Supreme Court inrawlhna chu ni! Florida state-ah vote tla maktaduai 6-ah Republican George W Bush khan Democrat Al Gore aiin vote 537 a hmu tam tawk a, Supreme Court a rawn inrawlh a, vote chhiar nawn a ngai tawh lo tiin Republican George W Bush chu US President atan thlantlin a ni tih a rwn nemnghet ta a nih kha.

Aw le, thu inchuh a lo awmin ngaihdan a inang lo va. Mi ţhenkhatin mi tawng chiam chiam a. “I thu ziak vang hian pawisa engzat nge i hlawh?” te min ti mai mai. Mai mai a! Mi â emaw te min ti mai mai a. Ka mikhual â zawk ha a fing ta zawk an la ti mai thei e. Hunin a rawn hril dawn. Ni ropui chu a lo thleng dawn ta. Mizoram Government High School-a Science zirtirtu, Selection Grade ka ni a, ka hlawh hi a tam lutuk a, sawi pawh a zahthlak! Chu ai maha ropui zawk chu hei hi a ni; Ka hausakna chu LALPA-ah a ni. Sakhuana leh politics in a buak at loh ka ni a. Mizo mipuite hnena thu dik hriattir hi ka kova lum a ni a, ka rawngbawlna a ni.
Zirtirtu hi amah a inzir reng tur a ni a,a, siam thara awmin mi dang tan malsawmna a ni tur a ni.

A formula: Learn + Changed = Effect
Hmanlai thu nuihzatthlak ka han sawi mai mai ang e: Presbyterian ţum khat chu Chawlhni chawhma hunah hian Pastor Chhawnan nuho mittui hrut zawngin Iusa khenbeh thu a sawi a, “Ka Lalpa hi ka lainat em em a ni, a kraws put lah hi a rite m em a. Tita leh Dumaka zai, chartin, dama chiah hnawn lehnghal, ka Lalpa chu an han puttur a, a zo lo va, a tlu leh ţhin. Unaute u, in lainat ve em?” ti lamain no takin ţawngkam thiam takin a sawi a. Nuho chu an ţap tluah tluah mai a. Inkhawm ban chuan in pakhatah hian an ţhu khawm a, an titi hlawm a. An thu ngaihthlakte chu an sawi ho va. Pastor Bana chuan, “Khatianga han sawite chu a hmeichhia hnep hnep em mai, chawhnuah mipa takin ka sawi ang,” a ti sa reng a.
A han sawi ve ta a, “Isua chu Gethsemane huanah chuan a lo tawm ker kawr a, a chhipsamah an han ţham a, an han phih chhuak lawp mai a. A chalah luang tiangin an han vua a le, a ţhen nawi nawi mai a. Kalvari tlangah kraws lerah an khengbet ta zar mai a,” a han ti a. A sawi mipa ţeh ţawh bawk a, nuho chu an mittui a hnai lo hle mai, an ti. ( Reference: Zoram Ngahchhan by Rev. Lalnghinglova, 2nd Editon, 2000, Printed at the Prescom (Publication) Aizawl, p 53)
Mizote hi lungleng thei tak hnam kan ni a, kan rilru leh thinlung nona zawng miin thiam taka Pathian thu nen hmehbela thu an han sawi a, chingal leh saum nen an han bawl phawn hi chuan kan chhia leh ţha hriatna fim (reason) hmang hman lovin kan thle dual dual zel a ni. Science zirtirtu ka nih angin John Locke zirtirna hi ka pawm zawng tak a ni tlat mai.

Religious teaching must never be against reason, and all claims t revelation must be judged by this standard. A chepa kai aţang nge, a hauhuk kai ţang zawkin ka sawi dawn, Trump leh a pawlte thubuai theh luh hi?

Pennsylvania Joe Biden chaka ngaih (projected) a ni a. Trump  leh a ukil rual chuan vote thlak danah dik lo a awm tiin thubuai an theh lut a, a thubuai theh luh hi November ni 21 khan roreltuten an hnawl. Postal ballot 680,000 chu Trump pawlte en phak lova hlaah an chhiar tiin an puh leh a. Hripui a len avangin feet 20-a hlaa awm tura an tih kha feet 6-a hla aţangin vote chhiar lai hi Party agent ten an enpui thei ang tih a ni a. Pennsylvania Supreme Court chuan November ni 17 khan Philadelphia-a election official te hian dan bawhchhiatna an nei lo tih thutlukna a siam leh ta a ni.

Michigan Trump-a bial hima ngaihah Joe Biden a tling tlat mai a. Trump leh a pawlte hian November ni 9 khan thubuai theh lutin vote chhiat laia entuten thusawi avangin thil fel lo a awm niin an sawi a. Mahse, November ni 23 khan official te chuan thil fel lo a awm lo tiin Joe Biden chu tlingah an puang ta tho a ni.

Nevada Joe Biden bawk a tling leh a. Trump leh a pawltue chuan mi 15,000 lai, he state chhunga awm lo ten vote an thlak tih thubuai an theh lut. Mahse sipai te leh zirlai te chu inthlan dawn ni 30 aia hmaa zin chhuakte chu vote thlak phal sak an ni tih dan a lo awm leh si a. An thubuai theh luh chuan awmzia a nei leh ta lo a ni.
Arizona November ni 7-ah Trump leh a ukil rualte chuan dan phal vote tam tak hnawl a ni tiin thubuai an theh lut. An Party agent te leh vote thlaktu mi pahnihin an voting machine a chiangkuan loh thu an sawi an ti a. Arizona's Secretary of State chuan chutiang buaina leh harsatna a awm miah lo a ti si a, November ni 13-ah an thubuai theh luh chu an hnukdawk leh a ni.

Georgia Georgia Chatham County-a vote chhiar kal lai titawp turin November ni 4 khan thubuai theh luh a ni. A chhan leh vang: Georgia Republican chairman David Shafer chuan an party agent pakhatin vote chhiartu hmeichhe pakhatin ballot 50 lai chu absentee ballot la chhiar rih loh zingah a chhung lut tih a tweet vang mai mai a ni a. He thubuai hi roreltu chuan a han ngaituah ta a, finfiahna a awm lo tiin a hnawlsak a.

November ni 4 khan President Trump chuan finfiahna nei si lovin vote thlaknaah inbumna (voting fraud) a awm tih a lo sawi tawh a, “Supreme Court-ah kan zualko dawn,” a lo ti daih tawh reng a ni.

Post a comment

Powered by Blogger.