UI HNÊNAH THIL THIANGHLIM PE SUH

Dr. John Hlychho

Dr. John Hlychho

1. UI A TIH HI TUNGE?
Ui chungchâng hi “Nawhchi zawrh man leh Uicho man rawn la suh u” tih Post-ah khân ka sawi nual tawh a. Hetah chuan a tlângpui chauh sawi ta ila. Bible-in Mihring, ramsa leh thil hming a sawi-lan te leh, an chanchin (story) kan hmuh-te rêng rêng hian awmzia leh sawi-tum 2 a nei thei a- A NGIAL-A-NGAN (literal sense) leh TEKHINNA/ENTIRNA (allegory/figurative) te an ni.

A pahnih-a inkawp (both literal & allegory) sawi-tum nei a awm tho laiin, a tlângpuiin pakhat zâwk zâwk hi Bible-in min hrilh tum a ni tlângpui ţhin (Isaia 1:21, 57:3, Ex.11:7, 22:31, Ex.16:31-33, Deut.23:18, Hos.2:4-5, Amosa 7:17, 1Lal.14:11, 21:19, 23, 1Kor.6:15-16, Thup.17:1-16, 19:2, etc.).

Tehkhinna atân chuan, “Ui” (dog) hi “Mipa inzuar”(Male prostitute), “Pathian awm ring lo” (Atheist), “Zirtirna Dik lo thehdarhtu” (False teacher) leh “Ringlo-mi leh Pathian ngaihsak lo” (Unbelievers) sawi nân bâkah, “Hmuhsitawm, Hnuaihnung, Engmah ni lo, Tlawm, Inngaitlâwm leh Inphahhnuai” entirna leh sawi nân pawh “Ui, Uicho, Ui-thisawn,” tih te chu Bible-ah hian hman a ni bawk (cf. Deut.23:18, Sam 22:16, 20, Isaia 56:10, 1Sam.17:43, 2Sam.3:8, 16:9, Mat.7:6, Phil.3:2, Thup.22:15, etc.).
Lal Isua hian, Pharisai-ten an dinhmun leh rawngbâwlna ropui tak Pathian duh dân-a hmang lova, midangte tihchhiatna turin (amah Lal Isua ngei pawh an tihhlum phah) an hmang zâwk tih a hria a, a vei viau a, he Tehkhin thu hi a sawi niin alang.
Tichuan, Lal Isua’n khauh takin min warning a, “Ui hnênah te thil thianghlim chu pe suh u; Vawk hmaah te in tuikeplungte paih hek suh u, an chil chhe hlauh dah ang a, Tin, hawiin an tai thlêr dah ang che u” (Mat.7:6) tiin. Sawi tawh ang khian, heta UI leh VAWK a tih-te hi mihring ranvulh pangngai (animal) a sawina (literal sense) bâkah, Rawngbawlna or Chanchin Țha or Kohhran thilserh engah mah ngai lo sawi nân (figurative) a hmang nghal bawk a ni.

Chuvangin, Ui hnena “sa thianghlim, inthawina sa” pe lo tura thurawn leh a hlauhawm-zia a sawi hi keini Ringtute tân hian engnge a ENTIR ni ang? tih hi zir-chhuah kan tum dâwn a ni.

2. AN TAI-THLÊR DAH ANG CHE U!
Lal Isua’n, “an tai-thlêr dah ang che u” a tih hian, Ui leh Vawk nihna dik tak (nature of dog & pig) chanchin min hrilh-in, warning min pe tel nghal a ni.

Ui leh Vawk, etc. chu a tlângpuiin, a ruala an awm chuan, sa emaw, chaw emaw, an duhzâwng tak thil engemaw han pe ila, an inchuh a, an insual ngei ngei ţhin. Hei hi Lal Isua’n tehkhinna remchâng takah a hmang ta a ni. Temple-a inthawina atâna Ran an rawn hlân te chu Puithiam-ten hâlral tur chi an hâl ral a, ei tur chi an dah hran hnu-ah, paih tur chi a lo la châmbâng ve leh a, hengte hi paih satliah mai lovin Ui (or Vawk etc.) hnenah an pe ţhin a ni. Ui hnêna sa an pêkna chhan hi Sakhaw thil leh Hriselna lam thil nên-a inzawm a ni e, an ti.

Ramsa-in sa a seh te, inthawina sa-a a Sa-chhia, mihring tâna ei tlâk loh-te chu Luikawr leh Bawlhlawhpaihna hmuna an paih mai mai chuan mihring tân hri ţha lo a thlen theih dâwn avângin, Ui hnênah hian an pe ta ţhin a ni (cf.Ex.22:31). Tichuan, Puithiam (Levia chi)-ten Inthawina sa Ui hnêna an pêk hian, an fimkhur erawh a ngai hle a. Ui chuan “sa chu sa thianghlim, inthawina sa a ni” tih a hrethiam ve lova, zah nachâng emaw, ngaihhlut nachâng pawh an hre lova. An sa inchuhna lamah, anmahni leh anmahni an insual buai a, a petu pawh chu an hliam phah hial ţhin a ni.

Chuvangin, thil ţha tak pawh, ngaisâng lo tur hnênah leh hmang ţangkai thiam lo tur te, zahder nachâng leh ngaihhlut nachâng hre lo leh, a Duhsaktu leh petu chunga lâwm nachâng pawh hre lo leh mawhchhiat duh mai tur mihring hnênah chuan, rawngbâwlna, chanvo, nihna, thil ţha leh ropui pêkin awmzia a nei lova, pêk miah loh tur a tihna a ni. A Dawngtu tân a ţangkai lova, a Petu tân pawh thil ţha lo tak a thlen theih zâwk dâwn avângin pêk loh tur a ni.

3. HRUAITU PIANGTHAR LO AN HLAUHAWM!
Fakna hlaah kan sa fo ţhin a, “A chhang eitute kha dorâl an chang zo ta” tiin. He hla thu tawi-tê hian, thu tam tak a sawi thung. Lal Isua khân, Zirtir 12 a thlang a, kum 3 chhung teh-meuh, a thlûm a âl ei za-in, a chhun-a-zânin an in-zui a. Mipuite hriat phâk loh thuril leh ropui tam tak a hrilhfiah hlawm ţhin a. Lal Isua beisei dân chuan, Rawngbâwltu hmantlâk takah an chhuah ngei a beisei ngei ang tih a chiang a ni.

Mahse, thil mak tak mai chu, a ke-bula ţhu ţhin, a bula khawsa, Sum-vawngtu hiala a ruat, kum 3 chhung zet a chhun-a-zâna a hruai, a Zirtir Juda Iskariota khân a phatsan a! Puithiam-te hnênah Tangka 30-in a hralh ta mai a nih kha! Lal Isua rilru nât dân tur hi sawiin a siak awm lo ve! Chanvo leh Rawngbâwl hna ropui, sâng leh pawimawh tak chelh tura “ZIRTIR” atâna Juda Iskariota a lo thlang ta kher kher kha chu, pawi a tiin a inchhir vawng vawng ngei ang tih a chiang a ni. Mahni lam in-enfiah nachâng hre lovin, Juda Iskariota hi kan lo dem viau palh ang e.
Tunlai Kohhran hruaitute zingah hian, Pastor leh kohhran-ten kum tam tak an lo zirtir, Biak In-a (Lal Isua bula khawsa) Chanvo ţha leh sâng tak chang pha, langsâr taka rawngbâwl ţhin, Lal Isua’n Sum-vawngtu (Kohhran hnârkaitu & dihmun pawimawh luah) atân hiala a ruat, MAHSE, Juda Iskiota anga a remchânna hmun apianga Lal Isua phatsan a, Lal Isua hralh leh mai ţhin hi Rawngbâwltu eng zât tak awm ang maw???

Juda Iskariot ang Rawngbâwltu Piangthar lo-te hian anmahni thlarau an in-tichhia a, Lal Isua Kohhran leh Ringtute tân pawh mi hnawk-sak leh mi hlauhawm an ni ţhin. Hetiang mite hian Lal Isua Hna (Jesus’ Mission) leh Kohhran Rawngbawlna leh Hmasawnna (Church’s Mission) an dâl-in an ti-ţhuanawp nasa ţhin a. An awmna apiangah Setana’n Hmanruaa hmangin Kohhran leh Thlarau mite a tiduhdah a, hârsatna a siam sak a, Lal Isua Kohhran leh Thlarau mite an rûm ţhin a. Tirhkoh Paula’n ţap chunga an chanchin a sawi kha hetiang mite hi an ni ngei ang tih a rin theih a ni (Phil.4:18-21).

Pastor ka ngaihsân tak 2-te Testimony ka ngaithlâk hian rilru a khawih-in ngaihtuahna ava kal thui tehlul êm!!! Lalpa ropuina turin an hming nên lam sawi ila a pawi lovang chu maw. ICI Kohhran Pastor 2, Rev. Ramchuoilo Vârte chuan Pastor a nih aţanga kum 3 hnu-ah chauh a pianthar thu leh, rilru hâh taka Lalpa Zânriah Sacrament a ţheh ţhin thu, ama sawi ngei ka hria a ni!
Tin, Hlaphuah thiam lâr tak, a Hlaphuah-te ICI Choir leh Lalruotmawii-ten an sak lâr tak, Rev. H.P. Rûnremthanga pawhin, Pastor a nih hnu kum engemaw zât hnu-ah a pianthar chauh thu, Saihaa rawngbâwla a lo kal laiin a sawi bawk! Zoram Kohhran-ah hian Rawngbâwltu piangthar lo engzât tak inphûm-ru ang maw!?

A chunga Pastor 2-te Testimony aţang khian, Rawngbâwltu piangthar lo, a pianthar dân Testimony sawi tur pawh nei lo, Testimony-te phuahchawp mai mai hi a lo awm theih viau ang tih hi a chiang ta hle mai!? Hetiang mite hian Kohhranah Hruaitu nihna-te an chelh a nih phei chuan, Kohhran ţhanmawh bâwk, Thlarau Thianghlim hnathawh dâltu lian tak, Thlarau mite ti-lungngaitu leh Ringlo mite zingah pawh Kristian-te hmai ti-bâltu an ni ngei ngei dâwn a ni. Engtin nge Kohhran-in kan tih ang? Kan zawng chhuak ang a, Kohhran-ah Rawngbâwlna, Chanvo leh Nihna kan pe lo ngam dâwn em?

4. I PIANGTHAR TAWH EM?
Lal Isua’n, “Tu pawh an pian thar loh chuan Pathian ram an hmu thei lovang” (John 3:1-21) a lo ti tawh a. Keimahin “PATHIAN KA HRIA, A RAWNG KA BÂWL” ka tih aia pawimawh zâwk daih a awm. Pathianin min hria em? A rawng ka bâwlna-te hi min hriat-pui em? Pathian mi hriat ka ni em? tih hi a pawimawh ber chu a ni.
TV leh Lehkhabu aţangin US President Donald Trump mimal chanchin, leh a chhungte chanchin thlengin ka hre viau! Donald Trump chanchin ka hriat viauna hi uanpui leh chapopui tlâk a ni lo. Trump-a hian mimal takin min hre ve em? Inzawmna kan nei em? tih lai tak hi a pawimawh lai ber chu a ni zâwk. Trump-a nên-a inzawmna nei, a ţhian ţha leh hmelhriat ţha ka lo nih chuan, chu chu  chapopui tham tur chu a ni zâwk ang.

Lal Isua kan rinna avânga kan nundân pumpui a lo inthlâk a, Lal Isua tâna kan inpêk pumhlum tâkna hi, “PIANTHARNA” kan tih hi a ni a. Helai thu hi a Țawngbula lamah chuan, Greek “gēnnēthe anōthen” hman a ni a, “Chung lam aţanga hrin or Pathian aţanga piang” (born from above/born from God) tihna a ni. Hei hian, Pathianin a tih-danglam leh an nundân leh rilru put hmang a thlâk sak lam a sawina a ni ber. Lal Isua ringtu nihna leh dinhmun thar hi Țawngkam hrang hrangin Lehkhathawn Ziaktuten an hmang a.

Hmangaih Johana chuan, PIANGTHAR a tih kha a sawifiah leh deuhva, “PATHIAN HRIN” Greek. Gegennēmenos ek tou Theou (having been born of God) a ti tawp ta (1Joh.3:9, 5:18).  Tirhkoh Paula chuan, “Thil siam thar” a ti ve thung a (2Kor.5:17), “Pathian mi hriat or Pathian nen-a inzawm tlat,” Greek. gnontes theon (having known by God) tih te-in a vuah a (Gal.4:9). Tirhkoh Petera chuan, “Chi chhe thei lo laka piang thar” tiin, a quality ţhat-zia a sawi tel nghal a (1Pet.1:23). Hmangaih Johana leh Tirhkoh Paula chuan, “Pathian chi, Thlarau chenchilh” tiin an vuah bawk (Eph.1:13-14, 1Joh.3:9).

Chuvangin, “PATHIAN MI HRIAT I NI EM? LAL ISUA’N A HRIA CHE EM? LAL ISUA NÊN IN INZAWM EM???” tih Zawhna hi a pawimawh ta ber a ni. Lal Isua hian a ngaihdân hi a sawi-chiang thei khawp mai, “Tupawh, ka lama ţang lo chu mi do a ni. Tupawh, mi lâk-khâwmpui lo chuan a tidarh a ni” a ti tawp mai a ni (Mat.12:30, Luk.11:23).
Lal Isua hmangaih-te hi i hmangaih-pui ve em? Lal Isua hi i hmangaih tak tak em? A Zirtirna angin rawng i bâwl em? Bible-in min hrilh angin i nung chiah em? tih te hi han in zâwt teh le??? Mite hmuh lai leh hmuh-theih chin-a i thiltih lam kha ni lovin, i rilru chhungril ber aţanga i thiltih leh i nun dik tak kha, nangmah leh Pathian chauhvin in hria a, “Simon, Johana fapa, hengte ai hian nangin kei min hmangaih zâwk em?” (Joh.21:15) tih hi han chhang teh le?

(Excerpted from Dr.John Hlychho, BIBLE-A THU HAR, 2019, pp.327-333).

Post a Comment

Powered by Blogger.