TUNLAI THIL AWMZIA

Dr PC Biaksiama, 28th Nov 20

Iran Top Nuclear Scientist Thah a ni. News channel hrang hrangin an puan danin, nimin zirtawpni, 27.11.20 khan Iran khawpui Teheran bulah Dr Mohsen Fakrisadeh-a chu ama car-a kawngpuia a tlan lai chu mi tu tih hriat lohten an lo ambush a, a hliam tuar lovin a thi. Iran Foreign Minister Zarif-a chuan Israel sorkar chu he thila mawh phur awm ber niin a sawi. Israel sorkar lam atangin engmah chhan letna emaw a la awm lo.

Dr Mohsen Fakrisadeh-a hi Iran sorkarin nuclear bomb siam chhuahna tura “Amad Project” hotu lu ber (main architech) a ni. He an nuclear scientist ropui ber tihlumtu hi tu tih la hre lo mahse, Iran sorkar hotute chuan he scientist thattute chungah ‘khawpui ri ang maia van boruak atanga nasa thama phuba lak’ an tum thu puangin an inhrosa kuk kuk.
Iran Nuclear Scientist
Engvangin nge Israel an rinhlelh nghal? Chhan a awm thei ang. Arab ram zinga Israel hmelma lian ber leh Israel ram tihchimih tuma, mei leh kata tihborala vau rengtu chu Iran sorkar hi a ni. Theihtawpin nuclear bomb siam chhuah tumin hma an la a; Obama Hussein-a US president a nih lai khan nuclear nei ram dangte nen Iran Nuclear Deal (inremna) an lo siam a; Trump-a lo lal khan Iran-in nuclear bomb a siam chhuahna tur kawng chu tihtawp sakin, Iran nena inremna chu a chhu chat a; Iran economy chu hrek zuiin an Silchar kawngpui chu a khar pinsak bawk a; mahse Iran sorkar chuan eng anga harsatna karah pawh an intih-pa ve-na tur leh Israel a vaukhanna tur bomb siam tur chuan a ruk talin hma a la zel a. Chung lam atanga bomb chhiat phak loh turin an nuclear khawl chu lei chhungril thuk takah an bun a. Trump-a leh Israel Prime Minister te chuan engtikah mah Iranin nuclear bomb a siam chhuah theih lohna turin an vil reng bawk a. Mahse, tunah Biden-a hi lo lal ta se Iran nena inthlunzawm leh a tum run mai si a; chumi hmaa chet khalh chu a hun a ni mahna. An khawlpui bunna hi lei chhungril ni mahse, Israel chuan tih dan a thiam tho va; a thawktu mithiam scientist chhuak vakte hi tun hma pawh khan a lo phil zeuh zeuh tawh nia sawi a ni. Dr Mohsen-a pawh hi tu kuta thi nge tih chu hriat ni lo mahse, khawvela secret agent hlauhawm bera an sawi Israel Mossad-te hian an vai-sairaw-kherhin an lo perh zeuh em ni le?

US Supreme Court-in Cuomo a vaw thla. New York state-a Democrat Governor  Chris Cuomo-a, tuk tina CNN channel-a Trump-a sawichhiatna sermon nei ziahtu, chuan ama state chhungah rip zawka logdown tuma kristiante biak in khar a tum leh zel chu duh lovin Roman Catholic leh Orthodox Juda sakhaw hotuten court-ah thlenin, he governor order hian sakhaw zalenna a kalh a ni, an ti a. Supreme Court member 9 zingah Chief Justice John Robert-a ber zawk chuan liberal Democrat member 3 te lamah a tang a; tichuan 4-4 in an inhneh tawk reng a; chutih laiin hmanni lawka liberal judge thi ta Pi Ginsberg-i thlaktu atana Trumpa ruat Justice Amy Coney Barrett-i khan Conservative (Rep) lamah a vote ve ta (5-4); tichuan Democrat Governor awmhlei ber dan siam chu an vuak thlaksak ta a ni. An ukil rawih, Christopher Ferrera chuan, “vantlanga puipunna leh eizawnna thil te chu ‘loh theih loh’ anga ngai a, vantlang hriselna chhuan lama sakhaw biakna kharsak leh hrêk bik zawngin governor-te hi an inluling tawh tur a ni lo,” tia Supreme Court thuchhuak chu a tarlang a ni. Dam lehna chance 99.8% nei reng Covid-19 hri hminga an nuai ral ṭêpna atangin sakhaw zalenna chu chhanchhuahin a awm leh ta,” tiin Ferrara chuan a sawi a ni. (theepochtimes.com/Cuomo-dismisses-supreme-court-ruling-against-church-lockdowns-as-irrelevant_3595)

Amaherawhchu, chief justice Roberts-an amah appointment petu Republican president George W Bush-a party Republican  phatsana, liberal lama a vote ve hian ngaihtuahna a tithui hle. Hmanni inthlan hma lawk khan Pensylvania-ah vote tihchingpenna tur remchang dan a han siampui tawh a, Republican-te chuan an ei lo tawh hle a nih kha. Pi Barrett-i hi Supreme Court-ah lo lut hman lo se thutlukna pawh an lo siam thei dawn lo a ni. Hetiang a nih chuan he chief justice hi GOP (Rep) te tan innghahna tlak a ni dawnin a lang lo, tuna inthlan thubuai court-a kal mekah pawh hian. Robert-a hi democrat mi hausa pui puiho hian sumin an lo lei tawh em ni le? Hmanni lawk pawh khan Georgia state governor leh an secretary of state (Republican ve ve) te kha democrat (Dominion) lamin sum tam tham taka an lo tham lungawi tawh thu kan tarlang tawh a. 

Ngaihtuahna kal zelah chuan, 2016 a Trump-a in candidate laia tuman a tlin an rin loh laia Pathian hnen atanga a tlin tur thu lo hrilhlawktu (zawlnei) Mark Taylor-a khan, Trump-a hian SC judge 5 a ruat dawn tih a lo sawi lawk a. Thenkhat an bâng (pension) ang a, thenkhat thihna avangin; ṭhenkhat an thiltih dik lo man chhuah avanga judge ni tlak lo khawpa hmingchhe taka paih thlak an awm dawn tih a lo sawi lawk tlat mai a. Tunah hian 5 zingah 3 a ruat tawh a, a bâk 2 te hi tuna ding laite atanga thlak tur a nih hmel si a. Engtin nge ni dawn? tiin ngaihtuahna a vâk kual lo thei lo a ni.

Donald Trump-a Chungchanga Thu Leng vak inang lo pui pui. Trump-a hian inthlanah hnehna chang lo zawk ang hian Americaa chanchinbu lian zawng zawng zaa 90 zet leh, an hnen atanga thuhnar lachhawngtuten khawvel pumah an tidarh a. A takah chuan kha inthlanna result kha a buarchuar em avangin officiala puan theih a la ni lo. Tu nge tling dawn sawi theih a la ni lo tih hi ngaihtuah  duh tan chuan a chiang reng. Lehlamah, Joe Biden-a chak zawk anga an sawi uar viau hi chanchinbu leh media lam thu a la ni rih zel. A chak leh chak loh chu, heng inthlan thubuai kal mek hi chin fel a nih hunah a chiang mai ang. Thudik anga mi thinlung hneh tura an lemchanna, cabinet minister  tur te pawh a lem an lo chang duh hrim hrim a nih loh chuan, tun hi zawng a la hun rih lo. 

Trump-a pawhin, Bidena hi a tling a nih chuan ka kian em em ang, White House pawh hi ka chhuahsan ang, tia a sawi chhuah  kan hriat fo hi. Mahse chu thu a sawi avang chuan ‘Bidena a tling zawk a, kei chu ka tling lo ve,’ a tihna anga media-ten an sawi zawm zel hi chu a ni lo deuh. A hmaa kan sawi tawh angin, Biden-a transition-na tur sum pawh, a tlin uk hmain Dem-ho chuan a nawrin an nawr buan buan a, zahna hi an thleng pha lo reng reng a; a titunu Administrator Pi Murphi-i chu kutthlakah te an vau vel a. Chuti reng renga hmeichhe chunga kutthlaka an vau reng avanga Trump-a pawhin, 'lo ti vel mai mai rawh se, keini pawhin court-ah kan fight mek alawm,' a tih tawngkam zahve chu lain, tlawm ta zawk angin an titlangthang ta kha a ni a. Mahse mi tam takin an lo zâm phah tho mai, an thu dawnna a zirin. 

Trump-a tawngkam dik tak chu, “Chak takin full speed-in  hma kan la mek a. Hetiang ballot siam chawp leh Dominion hmanga America politik chanchina inthlanna corrupt ber hi kan pawm ngai lo vang (... will never concede to fake ballots and Dominion) tia a thusawi chu fake news te chuan an chhuah duh leh hauh si lova. (Engpawh ni se, i thu hriatna hnar hi Biden-a lamṭang nge Donald Trump-a lamṭang, tihah hian lo teh tawh mai rawh – indo laiin thulai a sah theih loh, a tualdawih theih bawk loh). Keini chuan atir atangin a tawp thlengin, he Lalpa mi ruat, tawngtai mi, President Donald Trump-a hi kan dinpui zel dawn a; mi thenkhatin Biden-a lama an ṭang tlat hi an tih âwm tak an ti-ah ngai ve mai ila!

Tunah part 2 ah kan kai ang. Heti chin duh tawk tan tawp tawh mai tur a ni e. 

Part II

PENSYLVANIA INDO-PUI. Tuna state 6 inchuh zinga lian leh electoral college 20 awmna, a sahrang lian berah tun dinhmuna thil awm dan tlangpui chu hetiang hi a ni:
Mizo Chanchinthar

He state-ah hian inthlanni, 3 Nov. tlai dar 8 thlenga vote tla an chhiarah Trump-a chuan hma a hruai hle a. Mahse state danga mite ang bawka chhuanlam engemaw siama a ruala an tihtawp a, thawktu zawng zawng vote chhiarna pindan atanga an chhuahtir chhung khan, building hnung lam atangin Biden-a vote hlang kha hmun hrang hrang atangin motorin an phur lut a; an han chhiar leh khan state 6 atangin Bidenan Trumpa kha an khumtir leh vek tih kan sawi fo tawh a. Trump-a legal team-in thubuai an thlen chu Dem-ho control-na he PA state court hian a lo hnawl ta a. Mahse hei hian Trump-a lamṭangte chakna hmun Supreme Court a luh theihna kawng a hawng a lo ni ta a. PA court-in a hnawlna chhanah vote tihchingpenna lian tham a awm lo, finfiahna pawh an nei tha tawk lo, tih a ni a. Mahse Americaa court judge te hi political appointment vek an nih avangin ṭan lam nei vek an ni a, an hnawlna chhan hi finfiahna a awm lo ve, tih aiin politic thil a nih vang a ni, finfiahna (evidence) a tam zia chu an hêkna thute hi lo tarlang ila:

1. Pensylvania statea vote nuai tam tak chu Republican mite hmuh lohva Democrat-hovin an duh dan dana an chhiar a ni, tih Jack Phillips chuan a sawi. 25 Nov khan PA state legislature hmaa Public Hearing an neihnaah Trump-a legal team, Judy Giuliani-a hote chuan inthlan buarchuar dan an sawi a; witness-ten thu an sawitir a. Justin C Kweder-a, Republican party aiawha vote chhiar endik tura duty pakhat sawi danin, vote chhiarna dawhkan atanga feet 10 atanga ft 200 vela hlaah min awmtir a. A hlat em avangin an ballot chhiar kha a dik leh dik loh ka va hmu pha lo a ni, a ti. Sawisel ngam pawh an ni lo; an bul hnaia va kal kha an phal lo reng reng, a ti. A lo berah pawh ballot paper 5000 vel scanner khawlin a chhiar theih loh chu an siamchawp lehnghal mai niin a sawi (Jack Phillips, op cit). 

PA state chhunga witness dangte pawhin chutiang bawk chuan an sawi. Kim Peterson-a chuan feet 20 vela hla atangin vote an chhiar dik leh dik loh a hriat theih loh thu te, hmun thenkhatah chuan endiktute pawh an awm loh thu te, hnaivai deuh atanga thu hriat tuma an zawh reng rengin, vote chhiartuten an lo hau hrep a, an lo vau a, an vote chhiar dan dik leh dik loh endik an phal reng reng lo, tih thu chu poll observer, Public Hearing a witness a kohte chuan an sawi deuh theuh a ni. State official-te erawh chuan an puh angin vote tihchingpenna thil engmah a awm lo; in pu Trump-a hian a hneh lo tih hi a pawm duh loh vang mai a ni, tiin PA Democratic Secretary of State Kathy Boockvar-i chuan ngaithla duh lovin a hnawl mai a. Pensylvania-ah hian Democrat ho chhiar danin Biden-a hian vote 80,000 velin Trump-a aiin vote a hmu sang a ni. Tunah hian GOP – Trump-a lamten hma lak an tum dan thlir ve thung ila:

Pensylvania GOP in hma an lak dan. Pensylvania state governor leh secretary of state te hi Democrat ve ve ni mahse, an state legislature – upper house Senate leh lower house, House of Representatives te hi Republican ve ve-in an control (majority) na a ni a. Heti taka inthlan a buarchuar a, a buaipuitu official lam (elected member) ni ve loten heti taka an inti-thu a, election dan an bawhchhiaa fair lo taka Biden-a an tlintir hnuah chuan, an muhil an lo harh chhuak ve ta! Inthlan hma lawk te khan an state court-in inthlan dan thar te kha an lo siamchawp vel a. Inthlan ni 3 hnu, ni 6 Nov. thlenga mail-a ballot la dawn theih angin Supreme Court chief justice John Robert-a hovin (Constitution kalh zawngin) dan an lo siam chawp a; chu tak mai chu corruption hring chhuaktu lian a lo ni si a. Court hi dan siamtu an ni lo, dan hrilhfiahtu leh hmangtu an ni; dan siamtu tak chu Legislature, elected member-te an ni si a.

 Tichuan PA state Legislature, Senator, Doug Mastriano chuan, “State Legislature – Senator-te leh Congress-men te hian kan thuneihna kan hauh let leh dawn,” tiin he PA state atanga Electoral College 20 awmna chu Trump-a lamṭang mi an ni tur a ni, tiin thapui thawhin, December 14-a Washington DC ah EC-ho inhmuhkhawmna turah an aiawh EC member thawn turin hma an la dawn ta. (Kan hriat thiam danin, Mizoramah hian thlan tlin ni ve lo Chief secretary ho hian kan state court-thuneitute nen state aiawhin ro hran rel tum ta se; kan mi thlan chhuah State Legislature – MLA leh Minister-ho zawng zawng hian, ‘kan thu lovin engmah in ti thei lovang,’ tiin inep ta se, chutiang chu a ni. Thuneihna lamah thlan lal leh thlan ni ve lo official-te kar chu hla tak a ni. Thlan lal ve tho Democrat legislature memberten lo hnial dawn se, vote lak hunah a chak zawk Republican-te thu a tlang ngei tura a ngaih a ni. Pensylvania State Legislature-ah hian (Upper house) Senate-ah Republican 29: Democrat 21; (Lower House) Houses of Representatives-ah Republican: 113; Democrat 90 an awm. (PA State Senator Moving to Have Legislature Appoint Electors: Friday, 27 Nov. 20)

Hmanni, November 25 a Gettysburg, Pensylvania-a Public Hearing an neihna rah chhuah a ni. Khatah khan Trump-a legal team Rudy Giuliani te khan thiam takin inthlanah vote tihchingpen nasa lutuk, Republican mite tel ve phal lohva vote an chhiar dan te, vote lem hmanga dik lo taka Biden-a an tihtlin dante leh, thuhretu witness-te thusawi kha an lo ngaithla ve reng a. Chuvangin hetianga thil dik lo tam lutuk inthlanna hi pawm theih a ni lo, tiin, Biden-a chak zawka an lo puan tawh chu, (26.11.20 a kan sawi tawh angin,) Pensylvania Commonwealth Judge Patricia McCullough-i chuan hnukkir turin thu a pe ta tawp mai kha a ni a; ‘STOP NOW’ a ti a nih kha. (The Epoch Times, Evening Edition, Nov. 25, 2020).

A hmaa kan sawi tawh tho, he PA state chhunga inthlan dan dik lo Trump-a team-ten an ngaimawh zingah (a) Philadelphia khuaah ballot 680,000 dan lo leh endiktu (Republican lam) awm lova chhiar a ni. (b) Pittsburg khawpuiah ballot dik tawk lo 15,000 zet chu duh duh hming puttirin vote an thlaktir ringawt. (c)  Polling hmun tam takah Republican endiktu (poll watcher) te awm ve an khap tlat. Mitthi tawh 6400 vel vote tir an ni bawk.  FOX news in a puan dan chuan, he state pawimawh ber maiah hian ballot paper lem te hi a dik atanga thliar hran a nih hun hun chu mualpho taka tlawm tur an awm hmel a ni. (“TRUM WILL WIN” President trump Legal Team: PA COURT GRANTS HEARING on PA Ballots, News Now  from FOX, www.youtube.com). Democrat-ho hlauh ber, vote lem leh a tak thliar hran a nih chuan, Bidena vote 80,000 vela chak zawka an lo chhiar pawh hi Trump-a hian vote dik takin a lehthal leh thei dawn a ni. Chutiang tur chuan Supreme Court-in a rel turin thehluh mek a ni e.

Tlangkawmna A sei leh ta viau mai. Ka inthlahrung ve tho. Tunah hian, dik lo taka vote lem leh tak, mitthi vote paih, dik lo dangte thliar fel theih a nih chuan state dang 5-te atanga Donald Trump-a tan beiseina a la sanzia kan la tarlang ang. Bidena tana beiseina awm ve tur chuan, an thiltih dik loh thup tlata, engmah fel lo a awm lo, tia ṭan tlat te, president ni tur anga Bidena lemchanna cabinet siamchawpte hi a tak anga pawm tlat a ni awm e.  Thawhtan issue, 30 November 2020-a chhuak leh turah State 5 danga hmalak mekna a beiseiawm zia tarlan kan tum ang. Trump-a aiawha inthlanna dik lo chhuitu, nu turu tak mai, Pi Sidney Powell-in Georgia leh Michigan state a hma a lak dan leh vote eirukna khawl DOMINION hmanga Democrat-hovin Trump-a vote Biden-a vote anga an lo hruai bo zel dan - inbumna rura chanchin chipchiara a rawn lipse dan ngaihnawm lehzual kan ngaithla dawn nia. Lalpan malsawm rawh se.

Post a comment

Powered by Blogger.