LALPA CHETNA A LO LANG ṬAN TA! Media Indona Karah

LALPA CHETNA A LO LANG ṬAN TA!

Media Indona Karah 

Dr PC Biaksiama 26th Nov 20

Tukin ka zing tho chu California leh Washington DC leh State dang atang te, Sydney (Aus) atang te leh he inthlan boruak lo thlir ve rengtu Aizawl veng hrang hrang atanga Trump-a chungchang latest update lo thlirtute atangin Trump-a team-te hmasawnna chanchin thar leh lawmawm tak tak ka dawng char char a. Tarlan vek sen rual a ni lo zawk a.

Pathian hnathawh lo lang ṭan mek  han thlir phei chuan min tiphûr lehzual. Mi ṭhenkhat ngawi renga lo ṭawngṭai mial mialtute atanga thu lo thleng chu, mi pakhat chuan: “Lalpa a che tawh a nia aw, Pu Biaksiama,” a rawn ti a. Pakhat leh chuan, “Lalpan he indona hi a hneh tawh. Dil ringawt lovin, Setana hi thu pe tawh turin min ti. Hnehna kan chang tawh; ka ṭawngtai dan pawh min thlaksak tawp mai,” a rawn ti a. Hei hi Trump-a tana ṭawngtaitute pawhin kan hriat a ṭangkai hle dawn a ni. Heng fake media hrang hrangte hi Isua Krista hmingin kan phuar tawp tawp tawh dawn a; heng thu dik lo ngaithlatute pawhin pawm tlak leh tlak lo kan thliar tawh ang. He indona hi Lalpan min lo hnehsak tawh reng a nih chu!

Manipur lam atangin vision hmutu pakhat chuan Trump-a dinhmun a tha lam a hmuh thu mi rawn hrilh a; mi dang leh chuan, “Trump-a hi kan lo chhuang lutuk ang e aw. Lalpa hnena ngaihdam dil a ṭul tawh hial zawk ang,” tih pahin “Dan pawisa loten misual an ṭan a, dan zawmtute erawh chuan chutiang mite chu an dodal thin,” a rawn ti zui a. Hmanni khan India mi zawlnei pahnih Priscilla-i leh Prophet Selvaraj-a ten Trump-an hnehna a chan tur thu chiang faka an puan kha kan lo hre tawh awm e. Chung bakah pawh Trumpan hnehna a chang dawn tia vision hmu tam tak la awm mahse, duh tawk ila.

A LEI RÛT LAMA THIL THLENG THAR

(1)  Pensylvania state in Bidena chaka an puan tawh leh, nemnghehna ‘certification’ an lo pek hmanhmawh tawh chu, Pensylvania Commonwealth Judge Patricia McCullough-i chuan thil fel lo a awm avangin,  thubuai chinfel tura ngaihtuahna (Public Hearing) neih hma chuan, State Governor te, an Secretary of State te leh state official-te chu 2020 election result lo ‘certify’ lo turin thupek a chhuah ta. Lo pawmpui zawnga an thiltih reng reng titawp tura a hrilh bakah, hemi chungchangah engtin mah lo bawhzui lo turin thu a pe. Kawng danga sawi chuan, ‘STOP NOW’ a ti a ni. ( The Epoch Times, Evening Edition, Nov. 25, 2020)

Report danga kan hmuh danin, President Trump-a Legal Team hmalakna avangin Judge-in he state inthlan result ‘certification’ chu a chelh ding leh ta. A chhan nia lang Dr Steve Turley-a sawi danin, he state chhunga Biden-a hoten namên lova pui thama vote an lo tihchingpen chu man chhuah a nih leh tak avangin endik a ngai ta a ni. (BREAKING: President Trump Legal Team in Pensylvania, Judge Halts Certificate; PA EXPLODE! Judge BLOCKS Vote Certification as SHOCKING Details of Voter Fraud EMERGE!!! (Httpas://youtu.be/sRhWGbnA1-Y)

Nimina ka ziah tawh, ka chhuah leh hman lohah chuan, Pensylvania state-ah hian Biden-a chuan vote 71,000 in hma a hruai nia tarlan a ni a. Mahse – (a) Philadelphia khuaah ballot 680,000 dan lo leh endiktu awm lova chhiar a ni. (b) Pittsburg khawpuiah ballot dik tawk lo 15,000 zet chu duh duh hming puttirin vote an thlaktir ringawt. Chung thiltih dik lo hmutu (witness) te chuan an la tifiah dawn. (c)  Polling hmun tam takah Republican endiktu (poll watcher) te awm ve an khap tlat. Endiktu awm lovin Dem hovin duh tawkin vote an tichingpen a nih kha. Tunah hian an chungah rorelna a lo tla ve dawn ta tak tak em ni le? FOX news in a puan dan chuan, he state pawimawh ber maiah hian ballot paper lem te hi a dikte nena thliar hran a nih hun hun chu mualpho taka tlâwm tur an awm hmêl a ni. (“TRUM WILL WIN” President trump Legal Team: PA COURT GRANTS HEARING on PA Ballots, News Now  from FOX, www.youtube.com). President ni tur chuan Biden-a leh Trump-a hian Pensylvania hi an hneh ngei a ngai lehzual ta a ni. Democrat-ho hlauh ber, vote lem leh a tak thliar hran hun kha a thleng dawn ta em ni? Kar hnih kal tawha Supreme Court-in Inthlanni tlai, 3 Nov. 8 p.m hnua vote lut belh zawng zawng (Biden-a an tihtlinna) te kha thliar hran tur tia a thupek kha a ni nghe nghe.

MICHIGAN: He state-ah hian Biden-a chu vote 150,000 in hma a hruai a. Hetianga Trump-a aia vote a hmuh tam theihna chhan lian deuhte chu:

*(a) Inthlannaa duty (poll workers) te chu inthlan hma khan in bum dan an lo zirtir lawk a ni. (b) ral khata vote thlakho (absentee ballots) te ballot paper te kha a date an lo tidanglam (an back date). (c) vote thlak nawn an tam lutuk (d) dâka vote thlaktute hming ziah (signature) kha endik a ni lo.

Heng thil dik lote hi a hmutute ngeiin chhechhamna hnuaia an thuziah phek 234 a chhah atangin finfiah theih vek a ni. 

WISCONSIN. Hetah hian Biden-a chuan vote 20,000 in hma a hruai. (1) Dâka vote thlak an khap thung. (2) A hmuna vote thlak thei lo tur (absentee ballots) tan  dilna form a ngai. (3) mi sang tam takin chutiang dilna form tel lovin ballot an thlak. (4) computer software in Trump-a vote Bidena vote-ah an chantir tih man chhuah a ni.

GEORGIA. Hetah hian Biden-a chuan vote 12,670 in hma a hruai. (a) Trump-a campaign teamten  mitthi tawh vote thlak tam tak an man chhuak. (b) Atlanta khawpuiah inthlan leh vote chhiar endiktu tur Republican mite awm ve an phal lo. (c) Dekalb country ah dik lo takin vote 9256 lai Biden-a an pe ringawt. (d) Endikna (audit) atangin Floyd leh Fayette county-ah vote chhiar loh 5000 zet a lo awm.

Georgia state-ah hian vawi hnih vote an chhiar ṭha tawh a, Bidena chu chak angin an la lantir zel a. Hemi an tih theihna chhan chiang tak mai chu – vote siamchawp leh a lem, Bidena vote te chu a tak (genuine vote) atanga thliar hran an la phal chuan loh vang a ni. Vote chhiar ṭhat lehnaah pawh a lem leh a tak la chhûn finin, Trump-a lam polling duty-te lo endik ve phal leh chuang lovin, an hmuh chian phak lohna ral khat feet 10 vela hlaah te an awmtir leh tho va; state official rinhlelhkai te bawk an chhiar tir leh a; an chhiar ṭha leh hi dik takin an tider vel mai mai nia ngaih a ni. Kan sawi tawh angin an Secretary of State, Brad Raffensperger-a kha Republican mi ni mahse, Juda Iskariota angin, a pu Trump-a chu sum vanga phatsanin, Dem-hovin sum tam taka an lei tawh kha an ni a. Ngaih ṭhatawm lo tak bawka an vote chhiarah Bidena chu chak zawka puangin nemnghehna ‘certification’ an pe leh ta a nih kha.

Mahse boruak a inthlak danglam dawn. Georgia Governor Brian Kemp-a chuan vote dik (legal vote) chauh chhiar tur a ni, tiin President Trump-a lamah a ṭang leh ta tlat mai. A lem mai ni lova, vote dik leh dik lo an thliar hran hunah tu nge landslide winner chu kan hre mai dawn a ni. *Election hi a rûka rûk bo chi a ni lo!! tiin America khawpui tam takah khuan “STOP THE STEAL” movement kalpuiin, protest movement a kal mup mup reng mai a ni.

NEVADA Chanchin Thar. Nevada state court-a roreltu Judge chuan Republican-ten vote tihchingpen nasa tak a awm tia thubuai an thlen chu December 3 khian a lo ngaihthlaksak (hearing) dawn a ni. Engtiang takin nge Democrat-ho chuan kha inthlanah khan bumna hrang hrang hmanga an tih dan lo hretu leh mit ngeia hmutute thupuan chu America mipuiin an lo hmu thei dawn a ni. Heta ṭang hian ballot siamchawp an lo hnawh luh rûk dan chu a chiang tawh ang a, Democracy innghahna lungphum pui ber inthlanna dik lo tihdikna kawng a inhawng dawn a ni. (Mark Meadows @MarkmMeadows

Biden-a an chaktir dan tenawm ber mai kha. Bidena hi a mimalin kan dem ngawr ngawr lo. A pawlte Democrat-ho, thiangzau hulh mai, tu mitmei mah veng lo, pawisak leh tumah zahpah nei lo an ni tih khawvelin a hre tawh a. November 3, Inthlan ni tlaia vote thlak an khâr thlenga vote tling khawm an chhiarah khan Trump-a chu a tling vek a; mi tam takin hnehna an lo puang hman a nih kha. Mahse email-in, a rûkin  state tina vote chhiartu Democrat-hote kha inbe tawnin, hei kan hneh dawn lo tlat mai, tihdan chi danga tih a ngai a ni, tiin Plan-B an apply ta a. Engtin nge an tih?

Office an khâr vek a, tumah awm an phal lova; a tuka hna an han ṭan leh chuan, mak tak maiin khawi atanga lo kal nge tih hriat loh Biden-a vote hlir mai a lo vûm leh ta thûr mai a. Trump-a chu state tinah an chaktir leh ta. Vawi khat ve ve an chak; vote tla pangngaiah Trump-a a chak phawt a; ballot paper chhut chawp leh siamchawp, mitthi sang tam takte hming te hmangin, Bidena chu an uite te leh an zawhte te chenin president an thlantir ta a ni. 

Biden-a hi President a nih huna a thil tum chu : Sakhaw Zalenna khap beh a ni. Sakhuana hi inhuatna lo khâwi ngamtu a ni, a ti mauh mai le.

VOTE CHHIAR NAWN LEH AUDIT. Trump-a legal team Rudy Giuliani-a te, Jenna Ellis-i leh Linwood-a te chuan state tina vote an tihchingpen ringawt hi endik ni se, vote dik zawng zawng chhiara, a dik lo leh siamchawp leh a lem zawng zawng hi chhiar tel ve loh ni se, state tinah Trump-a hi hneh tak (landslide) in a tling vek ang an ti. Tunah hian state tin deuh thaw-ah vote chu an chhiar ṭha leh ngei a; mahse a chhiartute kha Democrat-ho bawk, Republican mit tan khawih ve an phal leh chuang si lo va; court thuneihna sang Supreme Court order pek tan a ngai dawn a ni. He inthlan hrep chu, a ṭhenin bumna an hmang a, a ṭhen chu lunghnur takin an insiam a ni ber mai. Chu ai maha lungchhiat thlak chu, ballot dik leh siamchawp, a lem leh a tak chhûn finin an chhiar leh ringawt a; an thliar hran chuan a dik chin aṭangin Biden-a a tling zo dawn si lo; endik (audit) a nih loh chuan vote chhiar ṭhatin awmzia a nei dawn bawk si lo. 

Trump-a pawl ṭhenkhatin an pu leh an pawl an phatsan bawk. Georgia state-ah chuan an official pawimawh pahnih Governor Brian Kemp-a leh an Secretary of State te chu Republican mi ve ve an ni; mahse Democrat hovin sumin an lei a; dollar maktaduai 106 in an tham lungawi tih kan sawi tawh ṭhin a. Hei vang hian vote an chhiar nawn pawhin endik (audit) an remti tlat lo. An governor chuan, “Republican mi ka ni a, hetia kan chak ta lo hi pawi ka ti hle mai,” tih thu a han sawi lehnghal a. Trump-a tan chuan a na awm ngeih ngawih hle mai. 

Mahse, tunah hian Georgia state, vawi hnih lai vote chhiar tawh, an governor pawhin Trump-a ten nemnghehna (certification) la pe lo tura an ngen chung pawha a certify luih talh hnuah, Georgia State Legislator (an MLA rual) in Full Audit turin an demand ta tlat mai le!! Voter-te signature inmil lo endikna ringawt atang pawhin Bidena hi an paih thla thei dawn a ni, tiin Dr Steve Turleya’n a sawi (HUGE! Georgia Orders Ballot Audit as Sidney Powell RELEASES the KRAKEN, 25 Nov, 20).

Sidney Powell-i, attorney, Trump-a legal team ni ṭhin khan, tunah chuan ṭhahnemngai lehzuala hma a lak theih nan mual hran aṭangin, independent-in, zalên takin he US inthlanna bawlhhlawh lutuk lipse vek tur hian hma a la ngar ngar mai. Ukil tha fahran leh experience nei ṭha chuan he election-ah hian namen lova nasain vote tihchingpen a awm a ni, tiin finfiahna lian tham neiin a insawi. Ani chuan a sang bi mai ni lo, a nuai bia vote tihbo duak theihna, Trump-a vote tling khâwl sa Bidena vote lama chantir thut theihna khawl turû tak mai, Democrat lamin vote rûk tum râna vote chhiar nana an lo hman DOMINION khawl hnathawh dan lipse vek thei khawpin finfiahna a nei khiau mai. Kha president election result  lehthal vek thei khawpa finfiahna turu tham (a deluge of evidences) neia insawiin, Biden-a tlinna hi chutiang khawl inbumna hman vang mai a ni, a ti a. Tichuan, state hrang hranga court te leh Supreme Court thlenga pu lut turin a inpeih ta.

NIMIN LAMA THUTHAR HLUAI, VAWIINA AWMZE NEI TA LO CHU

Bidena’n President-ah; Cabinet thar a ruat. Trump-a pawhin a tling lo tih a inpawm tawh. White House a chhuahsan dawn, etc. etc. tih thuthang, nimin piah, 24.11.20 khan CNN kaihhruai fake news hrang hrangin an puang darh nasa mai a. Trump-a lo support thintute pawh an tlan chhe zo ta emaw tih tur a ni. Zawhna ka dawn tam ber chu: “Kan pu Trump-a chu a chak ta na nge?” “Hei, kan ṭawngtaina hi a hlawhtling dawn ta lo em ni?” “Biden-a maw President ni dawn ta?” “Trump-a pawhin hnehna a chang ta lo tih a pawm fel ta, Biden-a tan hmun kianin ‘Sorkar thar inthlakna tur (Transition) atana senso pawh sorkar sum sanction a ni tawh” tiin chanchin tharah puan a ni tawh, chanchinbu hrang hrangah nen.” Hei hi thu dik a ni em? tia mi tam tak rilru chi-ai te aṭanga zawhna chu chhan sen loh ka dawng mawlh mawlh mai. Chhanna leh hrilhfiahna tawi chu nimin khan ka post darh tawh a. Chanchin chiang zawk leh tuna Trump-a leh Biden-a te dinhmun update chu a tlangpui kan tarlang chhunzawm a ni.

Thil awmdan nia lang chu: Mainstream news-ten Joe Biden-a chu President a tling zawk tura an cheibawl thu kan sawi zing tawh a; mahse engmah officiala puan la awm si lo, fake president ang leka a awm reng mai chu, Democrat-ho chuan sorkar hotu General Service Administration (GSA) Administrator Pi Emily Murphy-i chu an nawr ta chiam a; an vau bawk a; a tan a him ta lo hial a ni tih  Trump-an a lo hriatin, ‘Sorkar inthlakna tura Biden-a te ‘Transition team’ te chu “An tih tihin lo ti vel mai teh se; keini pawhin Court-ah tan kan la mek alawm,” tiin green signal a pe ta a. Chu transition senso atan chuan dollar maktaduai 7.3 vel hman theihna a sanction tir ta a. Lehkha a ziahah Murphy-i chuan, hetiang hian transition sum senso atana sum sanction hian a tu zawk candidate mahin election-ah hnehna an chang tihna a ni chuang lo, tiin a sawi chiang. Joe Biden-a leh Donald Trump-a te hian an party-te riruatna (project) ah mai lo chuan hnehna chiang an la nei lo ve ve; cabinet minister te hial lo ruat vel mahse, tun dinhmunay chuan lemchang ang lek a la ni e. A tak ram engmah a la thleng lo. Zahna ram an thleng pha si lova, choâk âr-âwn hmula invuah chawp an sawi ang lek a ni. Bidenan hnehna a chang, an tihna state ṭhenkhatah te pawh vote chhiar ṭhat a la ni ta zak zak si a. Hun pangngaiah chuan December 14 ah electoral college ho kalkhawmin President tur chu officialin an puang chauh dawn a; mahse court case avang hian ni dang anga sawi chian theih a la ni chuang lo. 

Tihian Twitter-ah Trump-a chuan a sawi zui a: “Chak takin full speed-in  hma kan la mek a. Hetiang ballot siam chawp leh Dominion hmanga America politik chanchina inthlanna corrupt ber hi kan pawmpui ngai lo vang (..will never concede to fake ballots and Dominion) a ti zui a. (Trump says he will never concede to Fake Ballots and Dominion” by Tom Ozimek, 24 Nov 20, The Epoch Times (Newspaper). Heng thudik tak hi mainstream news, CNN, BBC, Al Jazeera etc. aṭang chuan i hmu hauh lo vang, thudik an thup tlat.

Fake News-in a ni lo lovin Thu an lo lavûng. Trumpa’n transition sum sanction paha ‘an tih tihin lo ti mai teh se,’ a tih chin chiah chu lavûngin “hetiang inthlanna corrupt ber hi ka pawmpui (concede) ngai dawn lo” a tih chu sawi ri duh lovin, an duhna chinah CNN-te leh an thuihruaite chuan an ṭhuai bung a, khai le, “Trump-a pawhin a chak lo tih a pawm ta, a tlawm ta,” tiin duh hawi zawng zawngin mi rilru tihnuala tizâm turin thu an vawrh vir kual vel ta mai a. Zawhna a tamin ka chhang ṭauh ṭauh mai a. A chang leh ngamtlak deuh te chu, ‘I thu hriatna hnar hi fimkhur tawh rawh,’ ti tein kan inhrilh nawk nawk mai.

Fake News HQRS hual a ni. America president inthlana fake news her chhuahna lian ber, khawvel news channel-ten an copy chhawn ber ni bawk si, mi hausa tawntaw (billionaires) Big Tech an tihte control tlat Atlanta khawpuia CNN Hqrs. building kawtzawlah kar hmasa khan  Republican mipui thinrim chu pung khawmin: hetiang dawtthu leh inbumna thu dik lo ringawt tichhuak tawh lo tura hrilhin, thusawitute leh mipuiin an au khum. Tun hmaa Republican lamṭang, CNN aia thlirtu ngah zawk FOX news chuan tun hnaia Biden-a lam ṭang an tihchhuah avanga rilru na Republican mipuite chuan an kiansan duak a; number one dinhmun atangin number 3 or 4 velah a tlahniam daih. Chuvangin Trump-a lam hawi news channel Newsmax te, NTD te leh OAN lamah an pakai ta thung.

Khai le, hun hnuhnunhah kan awm tawh a ni tih entirnan, Pathian ṭihna nei lo leh dawtthu leh inbumna hmanga US President inthlanna result rûkbo (stolen election) hmanga Joe Biden-a liberal-leftist- Democrat-ten sorkarna siam tuma, tuna lem an chan mekna thleng hian Pathianin mal a sawm dawn nge dawn lo, khawvel puma Kristianten Lalpa hnena an ṭawngṭaina hian awmzia a nei dawn nge dawn lo tih chu kan lo thlir mek a ni.