CNN-in DONALD TRUMP-A  HNEHNA CHAN DAN TUR
 - a sawi ta hial mai le!!!

Trump-a dotu ber  CNN chuan Legal (court) leh Danpui, Constitution sawi danin, hetianga thil a kal chhoh zel chuan Trump-a hian President nihna hi a chang leh dawn tlat mai,' tiin Fareed Zakaria, CNN a thu rawn puang ṭhintu (anchor-man), Liberal Far Left lama an mi ruh tak chuan CNN thlirtute hriatah, an rin loh zawng tak maiin a sawi tlat mai!. A sawi dan  tlangpui chu hetiang hi a ni:-

"US President thlan dan hi a khirhkhân riau va, vote hmuh tam ringawt pawh tlinna a lo ni chuang lo. Court (legal) leh Constitution kalphung thlirin, President Trumpa tan inthlana chak vang ni si lova tlinga puan theihna kawng a kawk tlat mai. Tuna an inchuhna Swing state 9 zinga 8 hi Republican-ho control a ni a. Vote chhiarah  Trumpa tling hmasa zawk a, a hnua Bidenan a khum lehna kha  Trumpan vote tihchingpen vang lek a ni, tiin court thubuai a awm ta si a. Heti hi chuan  Electoral Vote 270 an hmu thei dawn lo ve ve a. Hemi chingfel tur hian parliament, House of Representatives in president tur an thlan mai a ngai dawn a ni."

"House in president tur an thlan dawn chuan, an zavai 538-in  thlang lovin, state pakhat aiawh turin member pakhat chauh ruat tur a ni a. Tichuan, state 50 zingah Republican-in State 26 an control laiin Democrat chuan State 23 chauh an control si a. Chuvangin Trumpa hi Danpuiin a sawi angin inthlana hnehna chang si lova tling zawk tur a ni tlat mai," a ti a ni.(https://youtu.be/3bj5v48RMi0).

Hetiang hi  mithiamte sawi dan a nih thu vawi hnih chu kan rawn tarlan ve tawh kha. America Danpui lo duang chhuaktute khan Pathian finna an lo hmang tih hai rual a ni lo. Kum zahnih zet liam taa an dan siam khan tuna Democrat-ho rawn chet buan buan dan tur hre lawk ang maiin Danpui hmangin an lo chingfel sa daih tawh mai! Bumna leh rûkrûkna hmanga President nihna pâwngsual  chu a lo theih hauh loh a nih hi - ministry lem chan vak mai lo chu.

Trumpa tlin theihna kawng 2-na: Court thupek hmangin. Vote tichingpen state 6 court-te chuan Trumpa case hian engtiang pawhin evidence nei ṭha mahse, hnial thlak rual lohva witness-te inpuanna za têl awm mahse, an court reng reng khu political party line a kal vek an nih avangin an pawm dawn chuang lo, . Supreme Court a lut turin court hniam zawkte hi paltlang tho a ngaih vang chauhva an tih a ni a, democrat lalna court hniam zawkten an lo hnawl vel khu a pawi lo zawk, thuneitu tak tak awmna Supreme Court  kailawn an lo siamsak ang leka ngaih a ni.

(1) Trumpa lamṭang tamna Supreme Court-in vote tak leh a lem thliar hrang turin Order lo pe ta se, chu ringawt chuan state tin deuh thawah Trumpa a titling nghal ang. (2) Dâka vote a maktaduai têla tam an thlak, a neitu dik awm leh chuang lo 'absentee ballots' an tih ringawt hi endik ta se, emaw, signature inmil lo, siamchawp ringawt hi thliar hrang ta se, Bidena vote hmuh a kiam thla duai ang a, vote dik chin aṭangin Trumpa a tling vek ang. (3) Dominion khawlin Trumpa vote an nuai bo emaw, Trumpa vote Bidena vote anga an chantir te, Bidena vote an phuahchawp hi endik vek ni ta se, Trumpa hian vote electoral vote 400 chuang zet a hmu thei dawn a ni.

Bidena'n tlin theihna chance a nei ve em? Nei ve e, khînga kan sawi tak vote lem te, vote tihchingpen te hmangin hnehna a chang thei. A dang lehah chuan, Trumpa leh a pawlte hian sawi buai lovin pawmpui ta se, kan tlâwm e, ti thei ta se, Bidena tan hnehna chan theih a ni bawk. Mahse chungte chu lehthal leh vek turin Trumpa ukil (attorney) rualin finfiahna za têl, ṭha elkhên te nen court tinah an che a, America ram puma Republican mipuite khuan he inthlana Democrat-ho bumna tinreng khu an hre vek a, pawmzam rual niin an hre lo va; a ram pum mai khu ṭhelhmih theih loh politik meipuiin a la tuam mup mup a nih khu.

KRISMAS PRESENT MAW? Tun laia God TV a Supernatural program kalpuitu leh Lalpa zawlnei lo kawm ṭhintu ber pastor senior Sid Roth-a chuan Trumpa chungchang Pathianin a lo hmuhtir fo Prophet lar tak Robin Bullock-a video a tichhuak a. Robina chuan inlârnaah:-

"Nambar tam em em mai hi ka lo hmu a, tui ang mai hian sang takah a lo chîm chho zawt zawt mai a, chu tui chu Trumpa hi a lo ni a. Chumi zawhah chuan hnuai lama nambar lo tla hniam thla vang vang, Bidena chu ka lo hmu leh a. Thil mak tak a ni. Ka mang a ni lo, Inlarna (vision) ngei a ni. Lalpa chuan -

Tun hi ka miten hnehna hla an sak hun a ni, huai takin zai rawh u; tichuan khawvel miten ka thutiam ka hlen dawn tih an hriat nan. Ka mite u, zai rawh u, fakna hla sak hun a ni. In hnehna hla sak chu mite hriat tham lo ni rawh se. Thlan aṭangin ka chhan chhuah tawh che u hi. Awm lo ang hial te pawhin min lo ngai a, Krismas-ah hian engmah ti thei lo turin min ngai em ni. Tun hun atana ka koh chhuah in nih hi. Ka mite u, lungngai tawh suh u. Thil ka ti dawn asin, nangni chu ṭawngṭai tawp mai rawh u. Kei pawh ka lungngaih loh chuan, nangni pawh lungngai suh u. In rin phak loh thil tih tur ka nei a nia, hlim takin awm rawh u. Kan la nui tlang vek dawn asin," a ti a. Ni danga rilru naa tliak ve hnâp tawh Sid Roth-a pawh, phûr em emin Kristmas thilpek ṭha ber ka pek dawn che u avangin ka
phûr hle a ni. Amaherawhchu, rinna in neih a ngai, tiin, "Eng chen nge rinnaa i kal ngam?" tiin chona a siam nghal bawk.

Thingtlang nu thusawi. He inlârna chungchang ka lo buaipui mek lai hian thingtlang lam nu mawl, Lalpa tana tlangau reng mai, bâng lova Trumpa tana ṭawngṭai ṭhin ka farnu a lo lut ve hlawl mai a. 

"E khai, e khai, a neitute an turu lutuk, an tawrawt ka ti tawp. Mahse a beitute an mualpho zel dawn. Dik lohna a hai lang zel ang a, diknain a siam ṭha zel ang a, tichuan diknain hnehna a chang ang. Tuna America rama thil thleng khuan khawvel a huap tlat a, kan khawvel awmdan hlimthla a ni miau mai. Kan thlarau dinhmun hailangtu a nih bawk khu. He buaina hi Pathian hnathawh tho a ni. Lalpa chuan hun a tih hunah buaina hi chu a chingfel mai ang.

Tunah hian Trumpa puala ṭawngṭaina hi a la tawp thei lo. Anmahni ramah pawh mi ṭhahnem fê in an la ṭawngṭaipui zel. Trumpa pawh a la zâm reng reng lo, Lal Isua mi a nih tlat avangin. Heti taka Lalpan ṭawngṭai tura min la tih avang hian, misualho lal tum ve te laka kan chhiat vek hi Lalpan a la remti miah lo," tiin a puang tawp tawp a. Kei pawh chu, "Nang pawh lawng khalhtu atan Lalpan a la ti che. Mi chirh thehte chu lo tawk mai mai rawh. Dodalna tel lovin engmah a tih tak tak theih loh. Mahse dodalna karah hnehna kan chang ang," tiin a rawn ṭul lut tawp tawp mai a ni. Tihtak nangialin Trumpa zar ka lo zo ve a ni awm e,  ṭhahnemngaia ṭawngṭaitute hian min rawn hre ve fo a nih chu.

Tlangkawmna America buaina khu sual leh ṭha indona, Setanan thil ṭha lo leh bumna tinreng hmang a lalram din tuma a beihna a ni a. Ringtu thlarauva mitkeu tawhte chuan khu khu Thlarau indona, van indona  a ni tih hriain, zâm mai lo leh tha thlah lovin, Setana lalrama chang mai tur do dâlin Lalpa hnenah ṭawngṭai kan bâng thei lo. A tir aṭanga tun thlengin Lalpa ram tana ṭawngṭai kaichhan sawmtua Lalpa min kohna ka dawn miau avangin khawdang ka hawisan hman rih lo a ni. Heti taka America leh khawvel ram puma ṭul ti em ema Donald Trumpa tana ṭhahnem min ngaih tirtu, min ṭawngṭai tirtu Lalpa hian hnehna ropui a chang a, khawvel mipui mithmuhah a rawn lang chhuak thuai dawn. Hre thiam lo leh hmu thiam rih loten min lo nuihsawha, chirh min lo thehte hi, lungawi takin kan chan tawk a ni tih kan pawm. Ânchhia min lawhtute zawng zawng,  Lalpa hmingin mal kan sawm e. 

Mahse kan tihchhan lamah kan chiang: Krista hnehna kan puang zel dawn a, a chhiahhlawh, a hriakthih Donald Trumpa hi a kotu kohna hlen chhuak turin a term hnihna atan Lalpan he lungngaihna chirhdûp hmun aṭang hian a châwi chhuak leh dawn. Hmasang aṭangin Lalpan thil ropui a tih dawn reng rengin awlsam taka ti lovin, ama miten harsat manganna namên lo an paltlang hmasa ṭhin. Tunah hian lei mihringte zingah tu chungah nge Lalpa Pathian mit a fûk? He thlarau indonaah hian eng posi nge kan lo lâk ve tih aṭang hian eng ang Kristian nge kan nih? tih hi Lalpan min fiah mek a nih hi.

Post a comment

Powered by Blogger.