Rhea F. Miller-i Hla ISUA NEIH KA DUH ZAWK
Hla Phuah Dan Ngaihnawm

"Keia tan zawng nun hi Krista a ni si a, thih pawh hlawkna a ni," Phil. 1 : 21.

ISUA NEIH KA DUH ZAWK

Isua neih ka duh zawk tih hla hi Kristiante zinga hla lar, sak nuam ber te zinga mi a ni a, hre lo kan awm âwm lo ve. He hla ropui tak hi Rhea F. Miller-i phuah a ni a. Hla thluk pangngai anga sak chi ni lovin hla hril (poem) anga a phuah a ni. He hla hril thu țha tak hi zaithiam lar tak George Beverly Shea-a chuan kum 1932 khan lo hmelhriatin tuna kan sak țhin ang hian a thluk a siam ta a ni. 

A phuahtu  He hla ropui tak phuahtu Rhea F. Miller-i hi Martin Ross-a leh Bertha Rossy-i te fanu neih chhun a ni a, kum 1894 khan Brooktondale, New York-a piang a ni. A pa Martin Ross-a hi zungawlvei leh sakhuana ngaigsak ngai reng reng lo mi a ni a. A nu erawh chu a pasalin zungawl vei mah se, Pathian țih em em leh ringtu tha tak a ni thung. Pathian a țih em avang leh a pasal tana nasa taka a țawngțaina avang chuan a pasal Martin-a chuan zu in simin a piangthar a. (Pasal zu in thin neiten entawn a țha hle mai bc) A hnu zelah phei chuan Martina chuan rawngbawlna lam Luhchilhin Brooktondale-a Baptist Kohhran pakhatah Pastor a ni ta nghe nghe a ni. He an lawina Kohhranah hian tlangval fel tak mai Howard Vassar Miller-a pawh a lawi ve a.  Rhea F. Miller-i nen inngai zawngin an innei ta a ni. 

Miller-i pa testimony Tuk khat chu kum 1922 kha a ni a. Kum 28 mi Rhea F. Miller-i  chu Brooktondale-a an chenna in kianga leiletah chuan a tei kual vel a. Chutianga a teikual vel lai chuan a rilruah zu ngawlvei a pa pianthar dan te chu ngaihtuahin a pain a pianthar hlima a testimony a sawi țuma, "He khawvel rangkachak leh lunghlute aiin Isua neih ka duh zawk a, in leh lo țha tak leh pawisain a lei theih thil dang zawng zawng ai pawhin Isua neih hi ka duh zawk a ni", tia a sawi te chu a ngaihtuah chhuak a. Chumi tlaia an ina a haw hnu chuan a pa testimony behchhan chuan hlahril (poem) "Isua neih ka duh zawk," tih chu a ziak chhuak ta a ni. 

A pasalin a boralsan Rhea F. Miller-i pasal Howard-a hi Pathian țih mi tak mai a ni bawk a. Kum 1929-ah New England District-a Church of Nazarene-ah  District Superintendent a ni a. Kum 1939-ah Northwest Nazarene College, Idaho-ah Dean of Religion hna chelh lehin kum 1940-ah phei chuan Church of Nazarene-a an hotu ber General Superintendent nihna a chelh nghe nghe a ni. Vanduaithlak takin Dr. Howard Miller-a hi December 28. 1946-ah Brooktondale, New York-ah a thi ta a ni. 

Pastor fate piano a zirtir R. F. Miller-i hi piano tum thiam tak mai a ni a, a pasalin a thihsan hnu pawh hian piano tum rema Pathian fakna hla saa zai țhin chu a inawm tleina ber a ni. A pasal thih hnu hian a piano thiamna chu rawngbawlna atana hmangin Pastor chenna in a hriat apiangah kalin Pastor fate chu a thlawnin Piano tum a zirtir țhin a, hei hi an lo len huna Kohhran tana an lo țangkai theih a beisei vanga ti a ni. 

Khawvel a chhuahsan ta A kum a lo upa deuh deuh a, sapho zinga natna lar tak Parkinson's Disease chu Rhea F. Miller-i pawh hian a vei ve ta a. He natna avang hian a kut veilam a che hleithei lo va, heti chung hian thei leh thei lovin Pathian fakna hla hrang hrang chu Piano hmangin a la tum țhin a ni. Chutianga bang lova Pathian a fak lai chuan kum 1966 khan a fak țhin Pathian hnenah chawl turin a lei taksa chu  chhuahsanin a fak nin theih loh a Lalpa hnenah a haw ta a ni. 

A thluk siamtu Isua neih ka duh zawk tih hla thluk mawi taka siamtu chu George Beverly Hills-a a ni a. Amah hi kan hre țheuh tawh awm e. George Beverly Hills-a hi zaithiam leh aw țha tak mai a ni a, lehkha zir a chawlhsan hlim, kum 22 lek a nih laiin Insurence Company pakhata Medical Department-ah Clerk hna a thawk țan a. He hna a chelh lai hian a thawhna New York Life Insurence Company chuan sum lama an tlakchhiat deuh avangin an hnuaia thawk te hlawh tihtlem (cut) an tum ta a. Chutiang dinhmuna a din lai chuan a hmelhriat pakhat chuan a zaithiam em avangin Radio Programme pakhata khawvel lam hla saa zai turin a thlem a, chumi kawng a zawh chuan a lar ang a, sum tam tak a hlawh chhuak thei ngei bawk dawn tih a hrilh a. Sum lamah a lo pachhe ve bawk nen, chu thlemna chuan Kristian tlangval, Kohhrana zaia rawngbawl țhin George Beverly Shea-a rilru chu a tibuai tak zet a ni. 

Hla thluk a siam ta, "Isua neih ka duh zawk," a ti ta Chutianga rilru buai taka a awm lai chuan tuk khat chu a nu chuan George Beverly Shea-a chhiar ngei tur chuan Rhea F. Miller-i'n kum 1922 daih tawha a hla hril phuah "Isua neih ka duh zawk," tih copy chu a Piano chungah chuan a lo dah a. Chu chawlhni tuk chuan an kohhrana a zai dawn avangin inpuahchah tumin George Beverly Shea-a chu Piano hmaah chuan a țhu a. Chutia a han țhut chuan a nuin Rhea F. Miller-i hlahril phuah "Isua neih ka duh zawk" tih copy piano chunga a dah chu a hmu a. A hla thu a han chhiar a, ama nun nen a tehkhin a. Khawvel lam hla saa ropuina leh sum tam tak hlawh chhuah chu nge a duh ang Isua hnung zui tih a ngaihtuah a. Chu hlahril thu chuan a hneh em avang chuan a thluk siam a duh ta a. A piano chu a han tum a, a thluk tur chu a rawn kal ta zut zut mai a. Tichuan, "Isua neih ka duh zawk," tih hla thluk chu mawi taka siamin he hla hi hemi ni vek hian an kohhranah chuan a sa ta a ni. He hla thluk a siam hi tun thlengin keini pawhin kan sa ve ta a nih hi.  Hemi ni ațang hian duhthlan tur zawka buai em em George Beverly Shea chuan duhthlanna fel tak a siam ta a, khawvel lam hla saa ropuina leh hmingthanna baka hausak thur thur aiin Lal Isua neih chu a duh a, a thlang ta zawk a ni. 

Isua zui a hlawhtlinpui  George Beverly Shea-a hian Lal Isua a zui chu a thlang fuh kher mai. Billy Graham-a rawngbawlna zuiin khawvel ram hrang hrangah rawng an bawl dun a. Pathianin talent a pek a zaithiamna chu Pathian tan hmang letin zaia rawngbawlna ropui tak a nei țhin a, albam tam tak siamin  hausakpui lawih tham khawpin a hralh țha a, rimawi lama chawimawina ngaihlut ber Grammy Award tam tak dawngin Lifetime Achievemen Award hial Grammy hian an hlan a, Gospel rimawi lama khawvel mi larte hming chuanna Gospel Music Hall of Fame-ah a hming ziah luh a ni a. Guiness World Record phei chuan a zai lai (live) a ngaithlatu ngah ber (maktaduai 220) ah a puang nghe nghe a ani.

Lal Isua ka duh ber i ti ve ang u Keini pawh hi duhthlan turah kan buai țhin em? Lal Isua aiin sum leh pai, khawvel nawmsakna,  eizawnna, ruihlo etc. kan thlang țhin em? Kan Bible chuan "A ram leh a felna" zawng hmasa turin min ti a, chu chu kan zawn hmasak chuan a bak zawng pawh min pek a tiam a ni. Lal Isua neih kan duh zawk phawt chuan Aman kan mamawh ang zelin thil dang chu min pe zel dawn a ni. Heng sum leh pai, hausakna, hriselna, hlawhtlinna, hmingthanna etc. hi nei mah ila, sual thunun kan nih a, kan thlarau a boral si chuan awmze awm lo mai a ni. Khawvel thil aia Isua thlang zawk țhintute hi a tirah hmuhsit, nuihzat hlawh leh tifuh lo angin lang rih mah se a tawpah chuan an lo tifuh leh nge nge țhin. Hawh u, khawvel thil dang zawng aiin Isua neih hi i thlangin i duh zawk ang u. 

Source : Makedonia

Post a comment

Powered by Blogger.