ENG NGE IN NGAIHDÀN?
- James Ramdinmawia

James Ramdinmawia

MBBS hi Doctorate Degree a ni lo. Medical Practitioner / Physician an nih chuan "Doctor/Dăktâwr" tia koh an ni. Mahse title nei ta anga an inngai vek mai hi chu a mak ka ti deuh. MD (Doctor of Medicine) nei chin hi chuan title angin hmang se Doctorate Degree a ni miau a, a inhmeh thlap mai. Tin, Ph.D (Doctor of Philosophy) neite'n an hming bula "Dr." an dah pawh hi a dik thlap, Doctorate Degree an nei miau a. Chutih laiin MBBS pass dek dek a, a Dăktâwr hnà thawk leh mang si lo-a IAS/MCS zawm leh ta daih te, Business lam khawih ta daih te leh Politician ni ta daih te'n an hming bula "Dr." an dah vung mai hi chu ka lo îp deuh țhin.

BE (Bachelor of Engineering) leh B.Tech (Bachelor of Technology) Degree nei, a Engineer hna thawk lova sumdawng ta daih te, Civil Service lama lut ta daih leh Politics khèl ta daih te'n an hming bula "Er." an dah vùng mai pawh hi a inhmeh lo.

"Rev./Revd" leh Kohhran "Upa" Title pawh hi Kohhran thil ni lo-ah hian kan chelek riau mai a. "Rev./Revd (Reverend)" phei chu kan ngaihsan Sapho tihdan han sawi ta law law ila. Puithiam hna, hna zahawm a nih avangin Pastor-te hi Kohhran mite’n “Reverend (Mi Zahawm)” tiin an ko-in an hming an ziahsak ţhin. Anmahni-in an hming an ziah erawh chuan “Rev./Revd” tih hi an ziak tel mang lo. Mizoram-a Kristianna rawn thlentu Pu Buanga (Rev. J.H. Lorrain) leh Sap Upa (Rev. F.W. Savidge) te thuziak, lehkhabu leh Dictionary thlengin hmuh tur a la awm a, “Rev.” tih hi an hming bulah zu dah ve ngai miah lo a. “J.H. Lorrain” tih leh “F.W. Savidge” tih chauhin an hming an dah mai ţhin. Kan Mizo Pastor-te ve thung erawhin Kohhran leh mipuiin “Reverend” kan tih hun pawh an nghak zo lo nge, anmahni zawk hian “Rev./Revd (Mi Zahawm)” tih hi an hming bulah hian an dah zung zung mai a ni!

“Prof. (Professor)” hi sawi kai leh ta ila. “Professor” tih hi hna hming a ni phawt. University leh College-a zirtirtu Senior mithiam bikte kaisànna Post hming a ni. Kaisanna a nih rualin Direct Recruitment a awm bawk, mahse Direct Recruitment-a tling tur chuan Professor-a Associate Professor (tun hmaa Reader kan tih ţhin kha kum eng emaw zat an ni tawh tur a ni tih te, Published Work eng zat nge a neih, Orientation, Refresher Course leh Seminar eng zat nge a attend tawh, Paper eng zat nge a present tawh tihte en tel vek a ni.Professor ni tur chuan Ph.D (Doctor of Philosophy) an neih ngei ngei a ngai bawk. Professor puitling an kai hma zawnga an hming bula “Dr.” dah ţhinte kha Professor-a an lo kaisàn tàkah chuan Academic huang chhungah “Prof.” tih hi an hming bulah dah a lo ni ta a ni. Mahse, Kohhran leh Activity dang zawng zawnga “Prof.” title an chhawm ta zel mai hi a felhlel deuhin ka hre ţhin. Entirnan, “Upa Prof. Thanga” han tih te hi a va rem teh ţeuh lo e aw!

Mizo zinga kan Professor Senior chawl tawh pahnih, Prof. R. Lalthantluanga leh Prof. C. Nunthara te kha NEHU-a Professor an nih lai khan Shillong Mizo Church-ah Kohhran Upa an ni ve ve a. Kohhran huangchhungah chuan “Upa Dr. R. Lalthantluanga” tih leh “Upa Dr. C. Nunthara” ti khan an hming an ziakin an lam mai ţhin. A inhmeh thlap mai! India Prime Minister hmingthang Dr. Manmohan Singh pawh kha Punjab University-ah Professor puitling a ni tawh a, Professor hmingţha leh mithiam bikte’n an chelh ţhin UGC (University Grants Commission)-ah Chairman te a ni tawh bawk. Mahse kum 1991-a Prime Minister PV Narasimha Rao-in Finance Minister ni tura a sawm luh thut hnu-a Politics-a a chàm zui zel hnu khan a hming bulah “Prof.” an dah kan hre ta miah lo! “Dr. Manmohan Singh” ti hlirin ţhangtharte chuan kan hria! Amah phei chuan “Manmohan Singh” ti tawpin a hming a ziakin a sawi ţhin! Eng nge i ngaihdàn ni vè le?

Post a Comment

Powered by Blogger.