A tui ve lo tan pawh wake-up call
“MARTIAL LAW” PUANG TURIN PRESIDENT AN NAWR NASA TA!
Dr PC Biaksiama, 18 Dec 20, 5 PM.

PC Biaksiama

Thuhma: America a buai, inthlan a buai, indonain tawpintai a nei lo; ngaihven loh theih si loh, sawt thei si lo; tuipui lem lote pawhin an tui loh chhan ninawm khawpa ti-ri zen ve tho. Party pakhatin dikna kenkawh tumin, Pathian hming lamin Zalenna  humhalh tumin an bei tauh tauh va – an bet zawk mah a; eptu Party lahin Pathian leh an Constitution pawh zah zo lovin thuneihna chuhin engkim an pawngsual; an agenda chu: khawvel thar ‘globalism,’ ‘Communism,’ ‘atheism,’ ‘hurherhna’ - Sodom leh Gomorra  khawvel din tumin, MEDIA dik lo hmangin khawvel pum an run; an bum thluk nasat zia i hriat duh chuan i nitin chanchin thar chhiar leh ngaihthlak kha chik mai rawh. He hun hnuhnung indona hmelhmang hian hmai hnih neiin – Donald Trump-a leh Joe Biden-a te hian a hring a hranin an rawn chang chhuak ta a nih hi. A tu zawk lam nge i hawi dawn? Mi a nileng lo chu ram kilkhawr bera chengte pawh he sual leh tha indonaah hian tumah kan bang thei lo. ‘America indona daih alawm,’ i ti elo? Min hmer tel vek asin.

Kan Pa Pathian pawh khi khawvel ram tina a kohhran mipui maktaduai tam takte tawngtaina chhang turin a awm hle hle thei tawh lovang. Chung lam program erawh chu kan sawi thei lo. Hnuai lam inbuatsaih dan – an thawm mitdelte hriat theih khawpa ri ring erawh chu ringtuten ‘tun lai thil awm dan hre thiama, tih tur leh tih loh tur hre thiam mi’ (1 Chro. 12:32) kan nih theih nan ‘ringtute’ kan inhrilh hriat ve zel a tulna hian min ur thlu ta a ni. 

ENGTIKAH NGE TRUMPA’N MARTIAL LAW A PUAN DAWN?

December 1 khan “We The People Convention” (WTPC) pawl lian tak chuan President Trump-a hnenah ‘Martial law pate’ (limited partial law) puang tur leh, sipai enkawlna hnuaiah a thara inthlanna muanawm, zalen leh thianghlim nei leh turin ngenna an thlen tawh tih kan report tawh kha. Trump-a chuan a chhang let lo. Chumi hnuah langsar takin sipai hotu lian pahnih, Lt. Gen. Michael Flynn-a leh Lt. Gen. McInerney-a te chuan America hi dinhmun hlauhawmah a awm tih hria-in,  President hnenah martial law puang a; ram chhung leh ram pawn atanga buaina siamtute leh ram chhunga an agent rukte hi man a, free and fair election nei tha leh turin an nawr tawh bawk. Mahse White House lam atanga chhan letna a la awm lo. Tun hnaiah Trump-a legal team chhuanvawr tak tak Sidney Powell-i te,  Jenna Ellis-i te, Lin Wood-a te leh an thawhpui dangte atangin thuneihna hmang turin advice an pe mawlh mawlh bawk. 

Tunah hian America mipui zahve zet turte hian President election kha a thianghlim lohzia an hre vek a. Chung zingah chuan Republican-ho chu sawi loh, Democrat mipui zinga 16% zetin inthlanna fel lo a ni tih hi an hmuh dan a ni bawk. 

Martial Law puan hi a hmanhmawh thlak tawh: US Consitution, Article II, section 2, Clause 1 in a sawi danin President hi US Army, Navy leh Air Force te bakah State thenkhata tualchhung sipai (Militia) te hotu lu ber, Commander-in-Chief a ni ang. President-in martial law a puan chuan Constitution te, Supreme Court te, Congress (Senate leh House) te pawh an duty pangngai ti lovin an lo hai (suspend) rih dawn a ni. Ram puma sorkar hnathawk zawng zawngte chuan President thu angin hna an thawk ang. Election buatsaih hna tinreng chu sipaiten duhsak bik nei lovin, party mi leh saten an tihbuai phak lohvin, intihthaihna leh suma in thamna awm lovin, zalen tak leh thianghlim takin mipuiten an duh tak chu tumah hlau lovin an thlang thei ang a; vote tihchinpenna Dominion khawl a awm hek lo vang. Vote chhiar pawhin party agent-ten chik taka an endikna hnuaia tih tur a ni. Mipuiin an duh zawk a nih phawt chuan Bidena chu a tling mai ta law’ng, mahse inbumna leh corruption tel tawh lovin. 

Inthlan a zawh fela, civil administration dinngheh a nih hnuah chuan martial law chu an hlip leh mai tur a ni. Hei hian tuna party pahnih inep tang ut mai, indo (civil war) leh intihbuai chak zek zek boruak hmet daiin, remna leh muanna a awm thei tawh ang. Sipaiho hian chu chu nghakhlel ni awm takin, Inrinna hmasa (12.12.20) a sipai hmunpui President-in a tlawh khan, stadium khata sipai 9000 zet lo thu hmur mai kha an lo ding suau va, khawlaia protester-ho ang maiin Trump-a thlawpin Republican-ho au hla: “USA, USA” tiin an au rual thup thup mai zu nia! 

Tunah hian America rama political party mi te, politiciante leh sorkar hnathawk tumahin rin an kai loh laiin, sipaite chauh khu dik taka thil ti thei tura rin kai an ni ta. Heti khawpa sipai lamin Trump-a an support lai hian, engtikah nge Trump-a hian emergency leh martial law a puan dawn? tih hi zawhna pui ber a ni ta.

HNAWMHNAWK THENFAI A TUL: Kum sawm tam a liam ta. America khawpui Washington DC a milianho rorel khawl chelhtu– politician te, officer lu bawr hote khu America sorkar khalh kaltu leh controltu, an nihna sang chu sum lakluh nana hmanga inhaivur thin, mi corrupt rualho khu Washington Swamp (Washington Hnawmhnawk) an ti a, Deep State an ti bawk. Mi chunga leng, politik chu eizawn nana hmang, America hralhtu, engkim control tum vektu, president leh milian deuh apiang suma an lo haivura, an thuhnuaia dah hmiah hmiah thintu an ni a. Democrat-ho chauh ni lovin, Swamp zingah hian Republican mi, politik chu sum leh paia hlawk tuma bei (career politics) an ni. Heng zingah hian Clinton, Obama, Biden, Pelosi leh sorkar department hrang hranga corrupt rual awmkhawm an ni a. Deep State-a in baptis tawh chu mahni nawmsak uma politik khel an nih avangin ram hralhtu, mi rinhlelhawm an ni. 

Chung hnawmhnawkte thenfai hna chu Trump-a kovah a lo tla ta si a, a va hautak tehlul em! Kawng awlsam hi zawh duh se chuan, hausakna sumin a inhaivur ve thur thur ang a, heti taka dodalna leh beihrawh a tawk bik lovang. Mahse dollar khat chiah hlawhin ram leh hnam hmangaihin hah thikulin a bei fat fat a, hmelma an pung tual tual ta mai a ni. Tichuan, mi hausa te, mi thiltithei tak takte tan sum hmanga tlawn lungawia, a laka tlaktlum theih a ni ve lo tih an hriat tirh atang khan hnawksak an tiin an haw nghal em em a; an beihrawn ta a; chanchinbu leh TV- mainstream news channel zawng zawngin tihtlak tumin dawt thu veivir (disinformation) hmangin thawk pawh la hman lo khawpin kum 4 chhung khan an lo beihrawn tawh a; vawi 25 zet kahhlum tuma beih a tawk tawh bawk a. Kohhran tina Lalpa mite tawngtaina avang leh Lalpa venhimna avang chauhvin tun dinhmun hi thleng thei a ni. Sawichhetuten ama chungchang an sawite kha a nihna leh mize dik emaw kan lo ti a, a dik lem lohzia chu a mize dik zawk lo lang hian a rawn tarlang ta a ni. 

A rinawm em avang leh America a hmangaih em avangin a thawhpuite, duhsak taka hna tha tha a pekten an phatsan ta zawk thin a. Chan chhe tur nia an hriat veleh a thawhpui thenkhatten pakhat khatin an phatsan a. FBI te chu kan ngaihsan vei thin nen, an director Christopher Wray-a chu Deep State mi leh sa a lo ni si a; suma an tham lungawi avangin a hna thawh tur thawk thei lovin, a ek-cheh-thut ringawt.  Georgia governor atana a campaign pui ngat Brian Kemp-a pawhin a pu chu suma hralhin, tihtlak tuma a beih nasatzia kha kan sawi fo tawh a. Inthlana buai state 6 a court judges hote lah chu an hmuiah chithlum tah an nih hlawm avangin dik takin ro an rel thei ta lo. 

Supreme Court-ah Trumpa lam mi 6 lai, lehlam 3 chauh, tiin inhnem nan hman a ni thin a; mahse an chief Justice John Roberts-a lah chu Deep State mi a lo ni si a; a hnen atanga rorelna fel beisei tur awm lovin, Trump-a paihthlak tuma beitu a nih thu attorney LinWooda’n twitter kaltlangin a puang chhuak a. President a nih hnua mi pathum lai Supreme Court justices ni tura a thunluhte ngat pawhin thlawp ngam lovin an lo phatsan a ni a; an lawsuit thehluh mek leh la theh luh leh turah te hian innghahna chin awm lo thei lo ni mahse, hei ngawta innghah chu a thlamuan thlak ta lo a ni.  

Republican Senator hotu ber Mitch McConnell-a lah chuan beisei phak lohvin Biden-a chak zawk anga an puan chu a lo lawmpui vel a, an party hi an chhangchhe khawp mai. Han chhui zelin a nupui hi China mi, Communist party nena connection nei a lo ni reng a. Trump-a tan chuan tu nge rin tlaka rin ngam tur hriat a harin a lu hai thlak awm teh asin! Heti taka an chawkbuai chung hian kawng awlsam - martial law puanga chingfel mai lovin, tih dan pangngai zawhin a la dawh ve char char a. Mahse tunah chuan a kin ta, he a kawng zawh hian hmalam chu la hruai zel mahse, kawng awlsam a ni lo. Pu Trumpuia hian a power, Constitution-in hetiang hun buaithlak bik chinfel nana a lo pek hi a hmang tawh mai tur a ni. Muan sual palh theih a ni khawp mai si a.

Dollar Maktaduai 500 Anchhia: Inthlan hma lawk khan Trump-a vuak thlak nan Facebook neitu pa mi hausa tawntaw Mark Zuckerberg-a chuan Constitution dan kalhin dollar maktaduai 500 a lo thawh hep mai a. He sum hian corruption runpui a keu hawng ta a, an in lei pawp pawp ta a nih hi. India pawisa cheng vaibelchhe 3676 vel hu a ni a. He sum hian vote tihchingpenna namen lo a thlen ta ngei a; he sum lo ei pha ve chinte chu tangka khurah an tla lut nghauh nghauh mai a ni. Bidena hi tling ta se Zuckerberg-a chu ‘King-maker’ a ni ringawt dawn a; an tum dan hi kaltlang ta se, Communism hnuk luttu leh kristianna tiriraltu a ni thei bawk ang. 
Director of National Intelligence Report Nghahhlelhawm chu! Zanin, December ni 18 (USA a chhun lam) hian John Radcliffe-a, Director, National Intelligence (DNI) chuan US inthlanah khan Foreign ram dangte an rawn inrawlh em? tih chungchang report a pe dawn ta. September 2018 khan America inthlan result tibuai tur zawngin ramdang inrawlh an awm leh awm loh DNI in he lam khawih department dangte rawnin, inthlan atanga ni 45 aia tlai lovah report a pe tur a ni, tih Executive order kha Trump-a hian a lo signed tawh a. Vawiin hi a ni 45-na chiah a ni ta a. Radcliffe-a report pek hun chu nghak chhuak zo lo mah ila, Fox news anchor Maria-in a interview-naah te, Catherine Herridge-i te hnen atang te pawhin heng ram pathum – Russia, Iran leh China te hi US election-ah khan an inrawlh ngei a ni tih a lo sawi chiang tawh a (Dem hovin sumin an lo lei emaw ni, a report a thawp sut mai,’ tih tur a awm em lovang chu!). He report pawimawh tak a pek hnua, foreign power-te an rawn inrawn ngei tih report a chian hnuah chuan, Trump-a hian thuneihna chungchuang (extraordinary powers) a neihte chu hmang thei tawhin, a tul dan anga martial law nen a hawlh zawm turin hma a la tawh turah kan ngai thei ang chu!

Democrat MP mualpho: Dik takin, China hian America muhil lai hi an lo zawn bo lo chauh hi a ni tawh a. House a America security lama sorkar thuruk vawngtu House Intelligence Committee a member Eric Swalwell-a, Democrat mi chuan kum 5 chhung zet Chinese nula tawih leh zei hmel tak nen an lo inbelbul hle mai a. A bialnu chu Chinese Communist Party secret agent a lo ni reng mai si a; an thlalak dun te chenin an in man chhuak chiangin America sorkar thuruk hi engzah tak China sorkar hnenah lo pe ru ang maw? GOP House member thlan thar 20 laiin House speaker Pelosi hnenah Swalwell-a hi ban nghal turin an nawr nasa mai. 

Hetiang hian a ni telin mi dik lo te, phiarrukna te hi man chhuaha tihmualphovin an awm zel a. Election hnuah phei chuan  Republican hotute zingah Trump-a phatsantute chu “buichhia laih lohvin a inpuang” tih ang maiin an rawn inlar zel mai a ni. Inthlan result a chiang thei lawk lo te pawh hi Trump-a thenfai tur buichhe-ho phiarrukna pho chhuahna remchang a ni zel mai.

Bidena, vote 306 hmua tling zawk anga Fake News te puan chhan:
Dec 14 a state tin atanga Elector-ten president tur vote an thlak khan, heng state 6 a Democrat legislator (MLA) te vote chauh chhiarin Republican vote an chhiar ve duh lova; dik takin state lian lian 5-ah Republican-ten Senate leh House-ah majority an ni zawk vek si a; minority vote la-in Biden-a chu tling zawkah mainstream news – Leftist media CNN-in a puang a; an hnen atanga thu lachhawngtu zawng zawng an ak rual ta dual dual a ni, Mizoram thlengin. A chuh chak chakin an chuh ni mai awm a ni. A fair lohzia chu, India ramah pawh kan hriat ngai loh, entirnan, Michigan state a an Assembly House (Capitol) a vote thlak tur Republican MLA te kha luh ve phal lovin, an governor thupekin police an lo dantir tlat mai zu nia! Chuvangin Republican Elector (MLA-majority) nei zawkte chuan anmahni Party Hqrs-ah president thlang turin an kal khawm ringawt. Tichuan, Trump-a an thlang vek a, vote 305 an tlin ve bawk. President-a tling turin vote 270 hmuh a ngai a. 

Hetianga tling zawk a chian tak loh avang leh, a chuh helh zawk leh chanchinbu lian neitu lam Left liberal Democrat-ho chuan Biden-a chu President-elect tih mai duh tawk lovin, dan lo bawkin President atana nemngheh tawh angin khawvel puma chanchin puangtu an control theih zawng zawng an puantir ta mai a ni. 

Hemi ching fel tur hian January 6, 2021 ruat a ni a. Hemi niah pawh hian dan zawng zawng bawhchhiaa chuh helh taka hmala reng Democrat ho hian an tibuai leh tho dawnin a lang a. An tibuai khawp ang. Dan angin kal ta se, state buai 6 a mi elector vote ve ve (Dem leh Rep) parallel awmte kha ‘cancel’ ve ve tur a ni a. Tichuan, Congress-ah kalin state tin aiawh mi pakhatin president tur an thlang tur a ni a. Constitution dan ang chuan Trump-a tan leh Mike Pence-a te tan term hnihna hi a inhawng reng a ni. Mahse Dem-hovin an tihbuai leh dawn avangin, a pumpelhna tha ber chu martial law puan mai hi a ni. Martial law puan theihna tura US Danpui awm langsarte chu: The Insurrection Act of 1807 te; The International Emergency Economic Powers Act of 1977 leh Foreign Interference Act, Sept. 2018 te hi chelek theih a ni ang. A hun chungchangah zan ina DNI report pek zawh atang chuan eng hunah pawh beisei theih a ni ta. Amah Trumpa'n kar hmasa lama "Thil ropui tak lo thleng thuai tur" a sawi kha, eng ber nge, he thil hi em ni? Eng tika lo thleng tur nge? Krismas hmain nge Krismas zawhah? tih hi rinthuin kan chhunzawm lo thei ta lo a ni.

Post a comment

Powered by Blogger.