A ninawm tawh em? Delete mai rawh aw.
TRUMP-A TAN TIH TUR DANG A AWM TA LO!

Dr. PC Biaksiama,
14 Nov. 20, Monday
times of mizoram

• Emergency/Martial Law puang tura nawrna a nasa!
• Action lak nan hun Tam a awm tawh lo – Act or Perish???
• “I ram i chhan dawn nge i boralpui dawn?” tia au aw engtin nge a chhan dawn?
• Peaceful means zawng zawng a khawlo zo vek – SCOTUS chenin!

TRUMP-A HI A CHE TAWH MAI DAWN NGE A MUANG SUAL DAWN?
• Ni danga  secret agent chhuanvawr ni thin CIA te chu Trump-a phiarrutu-ah an tang zo ta si a. President inthlana a ruka enthla turin an Server khawl hmangin Frankfurt, Germany atanga an lo enthlak ruk te chu sipai tha chi-ten an man nawk nawk a; CIA leh US army inkahna te hial a awm phah a...an director te chu Obama kid hlui kha a la ni leh ta nghal… 
• America ram chhung buaina chingfel tura an uisathiam chhuanvawr FBI te lah chu, duhsak taka Trumpa’n director atana a appoint ngei Christopher Wray-a te chu Trump-a tla se titu-ah zu tang thei a! Biden-a leh a fapa Hunter Biden-a ten China, Russia leh Ukraine atanga an pawisa eiruk dan zawng zawng tarlanna, receipt te, an thu inthawn te leh document hlira khat Hunter-a Lap Top an man atangin a chiang vek a. Chu chu FBI chuan an office-ah an kawl ru reng a, an thup pui tlat a. Inthlan hma te khan vawrh chhuak ta se Biden-a te pafa hi jail bang zut thei khawpa criminal/eiruk lian lutuk case arh tur an ni a. Tunah hian an la kawl reng a, chhuanlam engemaw an siam vel mek.

• Department of Justice a an hotu lu ber Attorney General atan Trump-a chuan mi rintlaka a ngaih leh duhsak taka appointment a pek William Barr-a chu a pu mal chunga chuang chunga a pu chhiatna tura phiarrutu a lo ni reng a. A pu chhiatna tura phiarrutu Hillary te, Obama te, Bidena te leh Democrat lu bûrhoten Trumpa paihthlak tuma – 2016 inthlana an bihthlak ruk dan te, Hillary-in Obama hnuaia Secretary of State hna a thawh laia a thil sual tih thup bo nana a email message 33,000 a tihbo hmak, bo leh lo te, Russiagate thubuai Dem-hovin an siam sak, Special Investigation an neih, dawt thu ringawt lo ni ta site chhui chhuak tura Durham Investigation report te chu pe turin Trump-a hian Wm Barr-a chu a hrilh a; ani chuan, “Inthlan hma chuan report peih a ni lo vang,” tiin a lo chhang. Inthlan hnuah thla khat leh a chanve a ni leh tawh, ‘Hei le’ tih a la tum chuang lo. A pu lung a ti-awi lo tih inhre mah se, a hna lian chelh chu a bansan phal chuang bawk si lo, tun thlengin. Trump-a tan chuan a thaw-ipik thlak a ni.

• Supreme Court lah chu rin an lo ang der mai si lova. Heng inthlan tihchingpen nasa lutukte hi an hmu ve vek a, a hre chiang ber tur pawh an ni a. State court hrang hrangin lo hnawl thin mahse an tum ram Supreme Court a la awm alawm, member 9 zinga 6 kan nei e, tia lo inhnemna zawng zawng lah chu hman nia Texas lawsuit an lo paih chhuah dan khan beisei tur an awm lohzia a tichiang hle mai. Texas state thu thehluh kha court-in hearing mumal pawh nei lovin an hnawl tawp. Trump-a legal team thuah hnihte case lian, an “Lawsuit” pui ber a la lut dawn alawm,’ ti ringawt mah se, a reltu tur lam kha sumin an lo lei tawh nge, an lo vau zam nge, engtizia nge duhsak taka hmanni lawka Trump-a ngeiin sawi tam tlangrel hlawh phah hiala mi 3 a ruat hote khan an phatsan dial mai le, chhan leh vang tha awm pawh ni si lova? tih zawhna a lian ta. 

• {Mahse aw, an vaia hnawl fithlak tawp hmain ngaihdan dang a awm thei tho. Trump-a te lam game khelhna a ni ve thei. Hmanni legal teamah pawh Rudy Giuliani leh Sidney Powell-i te kal hrang ta daih khan rilru a tichi-ai hman viau va; mahse an case kha sir hnih atanga bei turin, ruang chaicheh anga hem thlak an tumna a lo ni a. Tuna Trump-a nauten Texas case phatsan anga an lang pawh hi, a pawimawh hun taka chet lak an tumna a lo ni thei. Hmanni lawka a duhsakna dawngtute khan chuti maiin an phatsan hlen ring lo an kat ve nuk tho. Eiru tur ang chuan anni tal chu i puh nghal ngawt lovang. Rudy-a leh Powell-i te case a la nung tha vat vat e.} 
• Court hnuai lama judge te, governor te leh Secretary of state te leh election officialte reng reng kha mi hausa billionaires lian pui pui, Soros, Bill Gates, Big Tech an tih Twitter te, Facebook te, Google etc. ten a leiin an lo lei deuh vek tawh hi a lo ni a. Entirnan, Trumpa ngeiin thahnemngai taka a campaign pui  ngei Georgia governor Brian Kemp-a te chu phatsantu –‘ a chhang eitute kha doral an chang zo ta!’ tih ang mai a lo ni zo ta. E khai, America ram lo tawih tawh zia hi sawiin a siak lo. Dikna a fam ta. Engtin nge mi corrupt pui pui zingah Trump-a hi tun thlenga a la din theih zawk le? Pathianin a bik taka a humhim leh khawvel puma kohhranten an tawngtai puina vang ni lo se, tun dinhmun hi thleng thei rual a ni lo vang.
• Vawiin, December ni 14 hi dan pangngaiah chuan state tin atanga Elector-te kalkhawma an president thar tur thlang tura Washington DC a kal khawm tur an ni. Tukina Rainbow thupuanah khan state 30 atangin kal tur an in report tawh tih a sawi a, a bak 20 an la awm a; chung zinga inthlanna state buai 6 te phei chu court case nei an ni si a. Engtin nge ni dawn? An zinga state 5-ah te khan Biden-a tling angin an secretary-ten puang ngawt mahse, a thunei zawk, an state legislature-te kha GOP sorkar an ni tlat, an power hman an tum nasa khawp mai lehnghal. Zan in hian (anni tan chhun) kan hre chiang thei chauh dawn. Anni state 5 atang hian Pro-Trump elector-te kha rawn tir ta vek se Trump-a chu a tling a ni nghal mai. Bidena tan chance a tha lo zawk. Vote 6 awmna Nevada state kha chu Democrat lalna a nih avangin chuh buai ta lo ila. A chhe berah lo inti—bam ve ve ta pawh ni se, ‘plan A’ lo fail ta se, ‘plan B’-ah chuan, House of Representatives in President an thlang dawn tihna a ni a. GOP in state 26 an nei a, Democrat-in 22, a vote nei tam zawk GOP-in Trump-a hi an thlang mai dawn tihna a ni. Biden-a tan chance a awm meuh loh thu pawh kan sawi zing ta. Zanin thil thlengin a hril dawn a ni. 
• Inthlan a buai, court thubuai a la inthuah thip tep tup bawk. Roreltu lam lah rintlak ni ta bawk si lo. Officialho lah Democrat lamin sum leh vaunain an tihthaih zo. Hetih laia sawisel kai ve lo leh kut thianghlim putu awmchhun chu Sipai – Army, Navy leh Air Force te chiah an ni ta.

MARTIAL LAW PUANG TURA NAWRNA Trump-a hi a seltute sawi anga pa ti phet phut, fimkhur lo, mi bumro leh pawisak nei lo an tih nen hian a inhmeh lo tual tual. Election a Democrat-ho phiarrukna te kha hre lo a ni lovang; mahse a tha zawnga thil kalpui tum hram hram mi a ni a; mahse khati em ema tenawm leh inbumna nasa a ni ang tih kha a hisap piah lam a ni ve tho awm e. Eptu Leftist-ho engti kawng zawng pawha power chuha, pawisak nei reng reng lo, lehlamah sum, lehlamah invauna leh intihthaihna kalpuiin America ram khu an vaubet a ni ringawt tawh a. Court-a thuhretu ni tur pawhin venghimtu pek an nih loh chuan an vauzam zel mai. Republican mipui nuai tel inhmuhkhawmna rally-ah ngat pawh tibuai turin Democrat-ho chuan an pawla firfiak rual BLM leh Antifa-te an tir thin a; an intihbuai phah thin.  Inthlannaah khan foreign ram, abikin China a rawn inrawlh chian zia lah chu National Intelligence Director John Radcliffe’an interview-na lamah a puang chiang hle tawh bawk a. Dik takin mainstream media ho hian Donald Trump-an sipai hmanga America awpbeh a tum, tia China Communist propaganda hi mipui awihtir turin thu an vei virtir mek a ni tih attorney Lin Wood’an a sawi. Chuvangin, heti khawpa buaina namen lo chingfel tur hian dan ding pangngai chuan President tan pawh tihngaihna dang a awm ta lo a ang hle mai. 

Media in engkim an control Heng media chunga roreltu Facebook te, Twitter te leh Google atangte hian Trump-a support zawnga thu chhuah reng reng chu an delete hmak hmak mai. Tuna ka thuziah avang te hian engtin nge min rawn tih let dawn ka hre pha hauh lo. Risk kan la tak meuh a ni. Min block fo tawh a. Mainstream media CNN, BBC, MSNBC, Al Jazeera leh an control theih khawvel media te hian Bidena chan titha zawng leh Trumpa sawichhiatna bak engmah an sawi ta bawk si lo va. Chuvangin news black-out an sawi ang kha a thleng ta mek a ni a; local-ah lah Bidena lamtangte atanga chirhthehna kan tawng hnem telh telh bawk.
• Inthlan result lah chu Dem-hovin bumna hmangin an ru bo va. Khawvela inthlanna bawlhhlawh ber chu ram changkang ber USA-ah a thleng a. Chu inthlanna dik lo tia court lama an zualkona zawng zawng chu lo ngaihthlaksak duh lovin an lo hnawl zel a. Bidena family corruption leh criminal act te erawh chu mainstream media zawng zawngin an thupsak tlat bawk si. Sorkar department pawimawhte atangin beisei tur an awm tawh bawk lo va. Hetiang hi America ram dinhmun kan hriat phak chinah a la awm ngai lo. Mawhphurtu tan chuan engemaw tih a ngai ta a ni. Muan sual pawh awm thei a ni bawk. 

TRUMP-A TAN TIH TUR KAWNG DANG A AWM TA LO Hetiang khawpa thil a thlen avangin – engkim a chhe vek a, a khawlo vek. Hetih karah hian dan anga thil kaltir la tum dem dem chu atthlak mai, sawtsawhlawtna awm lo  a ni ta. Kan sawi tawh thin angin 1863 vela civil war lai khan Abraham Lincoln-a khan America mipuite an in vaw phel tak ngial dawn a, martial law puangin inthlan a buatsaih a; a hun laiin miten fak lo mahse a hnuah chuan a tih tur dik tak tia ram leh hnam humhimtua ngaih a ni leh vek tawh. Tun laia America ram awm dan hi second civil war chhuak anga ngaih a ni; thil thleng theia ngaih loh kha a thleng hmiah hmiah mai a ni. Tun inthlanna result kha America mipui tam zawk khuan an pawm lo; Democrat mi pangngaite zingah pawh a fel lo ti an awm tho. Sipai hotu lu-te meuh pawhin Martial law puang turin Trumpa chu an nawr nasa tawh a. Trump-a tana thahnemngai attorney chhuanawm Sidney Powell-i ngei pawhin theihtawpin ‘lawsuit buaipui mahse, a case dikzia finfiahna bu chhah pui pui eng zat pawh nei se, court-a roreltuten an lo en duh si loh chuan beiseina a sang thei lo. Pastor-te leh Bishop-te meuh pawhin President hnenah chuan ‘engemaw a tih a ngai’ tih thurawn an pe tawh tih Rainbow pawhin a rawn puan kha. Hreh chung pawhin, ram leh hnam chhanchhuahna tur leh, chhiatrupna lo thlen hma ngeiin Trump-a hian sipai thuneihna (martial law) a puan mai loh chuan, pehhelna kawng a vang tial tial mai. Tih tur dang a nei tawh lo. Amah leh a chhungkaw tan pawh a risky lutuk ta. A muang sual palh ang tih a hlauhawm ta ber a, kan tawngtaipui pawh a ngai hle a ni.

• Martial law a puan chuan tuna US Constitution te, Supreme Court leh State court te, sorkar hnathawk te reng reng pawh sipai thuneihna hnuaiah an awm vek ang a, party thila pawngpawrh vak te, BLM leh Antifa movement te a reh dak tawh ang a. Law and order zawng zawng sipaiin an kenkawh dawn avangin nun a him zawk ang. Tuna inti lal em em, mainstream news te, media – Big Tech ho control face book te, twitter te, google te leh chanchinbu lam reng reng thuneihna hi lak kian vek a ni ang a;  tuman sorkar duh loh zawng an chhuah thei lovang. US President chu sipai zawng zawng - army, navy leh air forces te chunga thuneitu ber – Commander-in-Chief a nih avangin President thuhnuaiah engkim a awm ang. 
• Martial law hi hreh chung pawha Trump-a hian a puan mai a ngai niin a lang ta. Pumpelhna kawng dang awmin a lang lo. Sipai thuneihna hnuaiah party duhsak bik nei lovin President thlanna free and fair election an buatsaih ang a; chuta an thlan chhuah apiang chu – Bidena pawh ni se America mipuite khuan lawm taka an pawm tur a ni tawh mai. A tak takah phei chuan, zalen taka America miten inthlanna thianghlim nei ta se, Biden-a leh Trump-a te khuan vote engzat teh fakau nge an hmuh tih dik taka hriat hlan a nghahhlelhawm ber awm e.

• Engtiang takin nge tawngtaina chhangtu Pathian a rawn chet dawn kan hre lo va. Mihringin a tih theih ang chu a tih ve phawt a ngai fo ṭhin. Mihring tih theih bakah Pathian hi a chuang fo zawk a ni. Pathian hnathawh hi tawngpawng nghah tawpa ti fuh ta lo an tam. Rilrua ruahman lawkna tha leh fel a awm erawh a ngai. Thahnemngaia tawngtaituten Thlarau Thianghlimin Donald Trump-a a luah khah tlat a, Chung lam leh hnuai lam venhimna nen, Pathian finna hmanga ro a rel theih nan te, tih tur dik tak a hun taka huaisen leh remhre taka a tih theih nan kan tawngtai dawn nia. Lalpan ropuina chang rawh se.

Post a comment

Powered by Blogger.