A ngaihventute tan
NGAWI ULA, PATHIAN KA NI TIH HRE RAWH U -2

"Hlau suh ula. Awm hle hle rawh u, vawiina LALPAN chhandamna a thawhsak tur che u hi lo thlir ringawt mai rawh u." (Ex. 14:13)

Dr. Pc Biaksiama 
13 Dec 20. Sunday.

Hmuhnawm leh ngaihnawm ber chu Tun laia America ram dung leh vanga thlir ninawm lo leh ngaihthlak nuam ber mai chu - harsat manganna karah America ram dung leh vanga ringtu (evangelical Christian), Conservative Republican mipuiten Lalpa belruat nia an ngaih, an President Donald Trumpa chu a term hnihna atan duh taka an thlan leh an hmangaihzia lantir nan, Pathian faka, khawlai dunga ṭhingṭhia ṭawngṭaia, an ram chu sualna khurpui laka chhanchhuak tura an ri mup mup mai khu a ni.

Hetiang hi tun hmain hriat tur leh hmuh tur a la awm ngai lo. He thu ka ziah lai ngei pawh hian nizan aṭanga an ṭan tawh tukin thlengin Washington DC ah ngei MAKE AMERICA GREAT AGAIN - MAGA rally ropui huaihawtin, mipui nuai engemaw zah an pungkhawm mup mup a, Freedom Plaza mualzawl zau atanga Supreme Court tualzawl pana JERICHO MARCH (Josua hova Jeriko kulh an kal hual ang khan) an kal dual dual mai a, an hotuten thu an sawi a; an ṭawngṭai a, Pathian an fak a. Chung mipui tlimpui chungah chuan an president duh tak leh a thawhpui milian rualten Helicopterin an lu chung lamah an lo thlawh hual reng bawk a, mi sing sâng rualin chung lama bân an vai suau suau mai chu, a hmuhnawm, rilru a tihlim, chung lamah min chawikâng daih mai a ni. Hetiang em em hian America mipuiin an president ṭang lai thlawpna entir a, public rally a neihna apianga "We love you, we love you; Four More..." tia an chawimawi hi an ka awm ngai loh thu mi chinchang hriaten hahipin an sawi ṭhin a ni. Inthlan hma leh a hnu lawk khan nasa takin an President thlawpin mipui an lo pungkhawm tawh bawk a: an tihchhan ber chu, hmannia an president tur inthlannaah vote tihchingpenna hmanga Setana leh a hoten result an rûksak chhuh lêt leh a, America ram ropui din thar leh tura an president dinhmun tihchak a ni. Anmahni eptu Democrat mipui an punkhawm ve chuan -BLM leh Antifa ten invauna, inrikrâpna, thisen chhuahna leh inpawngsualna hmanga mi thil tichhiaa mei leh kât nena an chet duh dan nen chuan a kâr a hla hle mai.

Heta ṭanga thil lo lang chiang tak chu, nawmsakna ni lovin, harsat manganna aṭangin Pathian lam hi kan lo hawi thei chauh a lo ni reng mai! Chu chu kan Pa khian a lo thlahlel ve a, ropui taka an (kan) dilna chhanga a la chhan chhuah dawn tho avangin Trumpa leh a hote khu a han timangang rih chauh a ni. Chutiang kara thil hmuhnawm lo ber ve thung chu, Lalpa mite tuar laia lo nuihsawhtute hmel hi a ni ve thung. Khai le, kan thupui lamah i lut tawh ang le.

COURT THUBUAI A HOT ṬAN Inthlan zawh aṭanga thla khat leh a chanve chhung chu Trumpa Legal Teamten inthlan thubuai courta kalpui tura an buatsaih, finfiahna leh witness za tam tak nena court hniam zawka an tihtur an ti zo tawh a, US Supreme Court a kal thei tura democrat-ho rorelna court hniam zawkten an lo hnawl lai takin, a hranpain Texas state in SC a direct-a hma an lo la ve chu an lo hnawl nghal tih nimin lam chanchin luahtu ber a nih kha. Media ṭhenkhat chuan Trumpa case an hnawl ta, beisei tur a awm tawh lo, ti angin an lo vawrh darh a; chung chu tak tak emaw tiin mi tam tak rilru a tichi-ai a; sawifiah turin zawhna kan dawng hnem hle mai.

Texas State thubuai Supreme Court in a hnawl dan chu state pakhatin state dang election kalpui dan chunga thuneih va tum angin an lo ngaihsak a, "Constitution Danpui bawhchhiain inthlanna dik lo an kalpui a, a result pawh pawm theih a ni lo," tia an thu thlen chu ngaihtuah si lovin, state pakhatin state dang chunga relsak tum angin an lo puh a, an dinhmun "standing" aṭanga tehin a fel lo ve, tih vanga rang zeta lo hnawl sak thuai an ni. Ṭhenawm te chhungkaw thilah ṭhenawm pa inrawlh chu a chi lo ve, tih ang vel a ni ber mai. Hei hian Trumpa legal teamten rip taka thubuai (lawsuit) an kalpui mek hi a hmer tel pha lo; Trump-a team-te lawsuit chu state hrang hranga court-ten an lo chelh khawtlai avangin Supreme Court pawh an la thlen hman lo bawk.

Hetia SCOTUS in Texas state thu thlen, Republican state 23 leh House Republican 126 (America zatve deuhthaw) in an thlawp tlat ni si, case an thehluh chhan êm pawh ngaihtuah hman lo khawpa Supreme Court in pawisa lo leh zahpah lo taka a "merit" ngaihtuah lova a "standing" ringawt thlira a lo hnawl ringawt hi Texas mipuite bakah Republican mipui, Trumpa vote tu American mi maktaduai 74 te pawisak lohna leh zah lohna a ni a, an ngaizam mai mai dawnin a lang ta hauh lo mai!! Trumpa pawh a lawm vak lo a ni ang, "Supreme Court hian engah mah min va ngai lo ve. Finna an nei lova, huaisenna pawh an nei lo a nih hi," (...they really let us down. No wisdom. No courage) a ti chhuak hial a ni.

Hnam Lungphûm a Sawingîng em ni? America hi state 50 te inlungruala inzawmkhawm, state tinin thuneihna sang tak nei, Supreme Court leh parliament nei hrang vek, federal state a inthlung khawm chauh an ni a. Zahpah lo taka hetia supreme court judge hovin Democrat chauh tana ding a, America zahve, Republican hmalakna an raphrual ta mai hian mi tam tak rilru a tina takzet a.

Hetiang zela thil a kal dawn a nih phawt chuan, Constitution leh sakhaw zalenna duh conservative leh duh ve lo liberal ho hi kan khawsa ho thei tawh lo a nih hi, i inlahrang mai teh ang, tih duhtute rilru a chawk tho ta tlat mai a, a pawi thui mai thei. Tlem lai aṭanga an titi leh comment ka lo ngaihthlak hian, Democrat-ho zingah pawh chutianga intihhran duhna rilru pu an awm ve tho va, an thusawi lo hria Republican ṭhenkhat chuan "intihrang daih rawh se," tiin ngaihdan an siam a ni. Chutiang chuan lo inlahrang ve ve dawn se, Republican-ho chuan America ram laili zau zawk khu an chang vek ang a, Democrat-ho chuan khawthlang Pacific tuipui kam dungtluan leh hmar chhak lam Atlantic tuipui kam vel chauh khu an chan tur a ni. Democrat ho hian tun ang zela suahsual rawng an bawl zel dawn a nih chuan Civil War a chhuak lovang, tih tuman an sawi thei ta lo.

Chutianga tualchhung indona chhuak palh thei laka ram leh hnam inpumkhatna humhalha, muanna thlen tur chuan Trumpa khuan ama thuneihna chungchuang Executive Power hmangin Martial Law puang se, sipaite enkawlna hnuaiah inthlanna muanawm leh thianghlim, inbumna leh vote tihchingpenna awm lo, Dominion khawl tel lo, China fake ballot tel lo, poll worker leh endiktute pawh ṭanbik nei lo sipaite an ni thei vek dawn a.

"Free and Fair Election" Chutiang inthlanna aṭanga tling zawk zawk chu mipuiin an pawm lo thei dawn lo a ni. Chuti a nih loh chuan, an buaina khu a thuk lutuk rawh a; eirukna case chinfel ngai a tam bawk si. Thuneihna sang bîk chelek a nih mai loh chuan tunah pawh an hmelma lian ber foreign power, China hian a lo dawlh zo hman ṭep a ni tawh mai si a; Bidena phei chu remote controla China dictator Xi Jinpinga'n a control theih a lo ni reng tawh si a. Tun thlenga Trumpan heti zawnga hma a la la duh lo hi, engemawti taka hnehna a chan theih dan tur hi a hre ru a ni tal ang, ti te an awm bawk. Kan sawi tawh angin Army General pahnih, Lt. Gen Michael Flynn leh Lt. Gen. McInerney te leh mithiam chinchang hria ṭhenkhatin martial law puang mai turin Trumpa hnenah thu rawn an pe tawh a nih kha. 1863 vela America chhim leh hmar inkara civil war awm lai khan, President Abraham Lincoln khan martial law puang lo se, a President term hnihnaah pawh khan a tling lo thei a, American Union of States khu a humhim dawn hauh lo a ni. Eptu Democrat hovin Russia puihnain 2016 inthlanah Trumpa a tling, tiin dawtin an puh a, special investigation lian tham an nei a; an duh lohzia a lo lang a. Chutianga foreign puihna haw ber anga insawi siin, an tlin theihna a nih dawn phawt chuan tunah China Communist sorkar puihnain Bidena khu laltir an la tum fan fan a nih khu. An huangtau em mai a, vauna leh intihṭhaihna leh sum hmanga Bidena ho rorêlna khu do lêt hneh khawpa GOP lam an rík ve deuh ṭhet ṭhet a ngai ve ta a ni awm e.

Chu mamawh thil chu Texas State thu thlen SC in a hnawlna hian a rawn tarlang ta. Hlawhchham rih angin lang mahse, hriat lawk lova SC a lawsuit an rawn rîkpui ṭhuai ngam avangin GOP (Grand Old Party, Republican party sawina) state leh an attorney general rual a rawn vawrh chhuak suau mai a. Tunah MAGA Rally neiin Washington leh America khawpui tam takah kawng zawhin an pungkhawm chur chur mai a. Tun kar lo awm turah hian Trumpa legal team - Rudy Giuliani (covid dam tawh) te, Ellis-i te, Linn Wood te, Sidney Powell-i te leh Ted Cruz-a ten inthlan leh vote chhiar tihchingpenna nasa ber chu witness za tela tam nen, finfiahna evidence te nen Supreme Court-ah an kalpui tawh dawn a. America leh khawvel ram tina kohhranten kan lo ṭawngṭaipui sauh sauh ang a, Lalpan hnehna a chang ngei ang. Texas thil an lo hnawl kha chu a aitechhinna lek a ni a. Pathian huntiam a thlen phawt chuan dotu turte pawhi "Leh" pawh an ti hman lovin a dûk purh mai ang. Rinna tlachham lovin i ṭawngṭai zel ang u; ṭhahnem ngaih luat avanga beidawnga awm tawhte phei chuan tihtak zetin kan ṭawngṭai thei dawn zawk asin.

TU NGE PRESIDENT TUR LE?

Electorten President an Thlan Ni: 14 Dec 2020 TV News leh fake news lam aṭang chuan Trumpa tan hian chance awm tawh lova tla fel der angin i ngai ngei ang. 'Kan pu Trumpa chu kan sûn tawh mai dawn em ni?' tia beidawng aw hriat tur a tam. Chanchin dik lo a lêng nasa. Lehlamah Bidena hi lal tur angin an lo la cheibawl ve reng bawk si a. Thil awmdan chu hetiang hi a ni.

NAKTUK, 14.12.20 Monday hi dan pangngaiah chuan state tina elector hote Washington DC a kal khawma President tur an thlan hun a ni ta. Mahse heng state buai 6, inthlan tibuarchuartute atang hian president thlangtu tur Elector an kal ve dawn em le? Democrat lam chuan, Bidena thlan tlin vek a ni a, tlinga puan leh verify tawh a ni bawk a, tiin an party mi tirh an tum ang. Mahse heng state 6 zinga Nevada tih loh zawng chu an State Legislature (lower leh upper house) te kha Republican party lalna vek a ni a, inthlannaah vote chingpen a tam avangin Trumpa lamin court ah an khing buai mek a ni a; heng state thuneitu 'Law Making Bodies' te hi Constitution in thuneihna a pek angin an state aiawha elector thlangtu tur an ni si a, Bidena lamṭang an thlang awm si lova, chuvangin heng state 5 te atanga vote 73 an hmuh loh chuan Bidena leh Trumpa te hian vote 270 an tlin thei dawn lo ve ve si. Engtin nge an tih tak ang, naktuk mai a ni tawh si a?
Kawng awmchhun pahnih a awm thei Pakhat chu, a tling zawk tihchian a nih hma chu a hun sawn hlat a ni; mahse hun a teptêr tawh avangin ni rei lote chhung chauh an pawt hla thei ang. (Supreme Court hian president leh vice president tur a thlansak dawn si lo va).

A dang leh chu, tun dinhmuna pumpelhna kawng awm meuh tawh si lo chu, US Constitution, 12th Amendment dan angin President chu Congress (parliament) in an thlang mai dawn a ni.

Chu 12th Amendment dan ang chuan, Congress a Upper House "Senate" in Vice President tur an thlang ang; Senator 100 an awm a. Tunah hian Republican lamin senate majority an neih avangin an thlan tur chu Kamala Harris ni lovin, Mike Pence hi a nih hmel e. President chu House of Representatives (an Lok Sabha) in an thlang thung ang. Congress member zawng zawng ni lovin, State tin aṭangin member pakhat ruat tur a ni. Republican lamin State 26 ah majority an ni a; Democrat lamin state 22 ah majority an ni bawk a. Chuvangin state aiawh ngah zawk Republican chuan an thlan tur chu Bidena ni lovin, Donald Trumpa a nih a rinawm e!

Tichuan, naktuk maia thil thleng tur hi kan thlir phawt ang a, eng thil tak thleng dawn ni maw? Heti taka ringtute min ṭawngṭaitirtu Pathian hian thil ropui tak min tihsak dawn tlat a ni, a hun erawh kan sawi thei lo. Ṭawngṭai peih tawh lo te kan awm a nih pawhin Lalpa thilmak tih tur hi chu rinnain i thlir reng ang u. Ṭawngṭai lo thei lova bei ngat ngattute hi Lalpan a tlachham lo hle bawk tih hria ila. Chumi zinga i tel ve a nih chuan vanneih thlakah ngai ang che.

Post a comment

Powered by Blogger.