AMERICA THUBUAIIN SUPREME COURT THLENG TA!
Dr. PC Biaksiama, 10 Dec. 2020 Ningani

State Huaisen Texas hmalakna chu State dang 18 in an zawm tawh!!! Trump-a pawhin a zawm ve ta. Dan Bawhchhia State 4-te Supreme Court hmaa insawifiah turin Vawiin 10.12.20, 3 p.m. (keini zan lai vel) hian koh an ni ta!
PC Biaksiama

A ṭhen tân thu lawmawm, ṭhenkhat tan thu lawmawm lo, (Arpuia lung chhia, Sanghara lung lâwm) chu tunah hian America inthlan dan dik lo thubuaiin a tawng chho mek. Texas state ropui leh thudik ṭan tlattu chuan dan bawhchhiaa Bidena thlangtu state 4-te chu direct-in Supreme Court-ah a khing ta riap mai a ni a. An state milian Attorney General Ken Paxton-a chuan state sorkar aiawhin (official-in) heng thubuai nei state pali- Pensylvania, Georgia, Michigan leh Wisconsin state te hian US Constitution dan kalhin inthlanna an buatsaih a; chu chuan inthlan result a tihkhawloh phah a ni, a ti a; a case chu nimin lamah chipchiar zawkin kan tarlang tawh a.

Tunah hian Republican state 18 laiin Texas state hmalakna hi an zawm ta! State 4 in an puibawm phawt a, chumi hnuah 10, a dawt-ah 17, tunah 18, an pun chak danah hian state dang pawhin an la zawm belh zelin a rinawm. Trump-a pawhin a Legal Team-te nen Supreme Court (SCOTUS) lawsuit hi an zawm ve nghal bawk tih NTD News in a puang. Danin a khap avangin Trump-a ukil rualten Supreme Court-ah direct-in an kal thei lo tih kan hria a (private ang deuh an nih avangin). Chuvangin court hniam zawka hrût kual phawta, an lo hnâwl hnuah Supreme Court-ah an kal thei chauh dawn tih kan sawi tawh a. Texas state hmalakna erawh chu official a nih avangin Supreme Court of the United States (SCOTUS) chu an direct nghal pawp mai a ni.

Texas state meuhin SCOTUS a an thubuai thehluh chu eng tiang leka pawimawh nge ni a, engati nge state hrang hrang 18 laiin intiam ruala hma an lak tak le? A chhan chu hei hi a ni:

Texas state in state 4 thubuai a awrhtirna chhan hi America Danpui kalha inthlanna an neih vang, tih hi a chhan pui ber a ni. A case a pawimawh em avang leh SCOTUS-in an lo ngaih pawimawh em avangin heng state palite hi insawifiah turin supreme court chuan vawiin 10.12.20, 3 p.m. hma ngeiin a ko nghal ta rup mai a ni (keini hunah zan lai pelh hret a ni). Kan hriat tawh angin Supreme Court hi Trump-a lamṭangte nghâwng lenna a ni miau mai a; Democrat control court hniam zawkten duh duhin lo sawisa velin, an thu thlente lo ngaihnêp sak mahse, he court sang ber leh thunei ber hian dik taka ro a rel kan beisei thei ang a; dik lo taka vote lem hmanga Biden-a tihtlin an lo tum dan leh an phiarrukna te chu America mipuite hmaah mualpho taka pho lanin, thutlukna fel tak an siam ngei ang tih a beiseiawm. Heng dan bawhchhe state pali-te hi Trump-a legal team-te hian case rip tak tak 50 chuang zet hmangin an khing mek bawk a; anni khinna ber chu vote tihchingpen nasa lutuk te, Dominion khawl hmanga Trump-a vote Bidena vote anga an chantir duak duak dan te, signature inmil lo te, mitthi tawh vote thlaktir te, a tam mai.

America mipui zingah Trump-a tantu pung zel Inthlannaah thil dik lo a tam lutuk, result dik tak kan hre duh, ‘Stop the Steal’ tia movement siamin, America mipui tam ber khuan thudik hriat an duh tawh a. TV chanchinthar puangtu (Mainstream news) lamten Trump-a chu supporter nei lo zawk leh vote hmu tlem zawk, tling lo zawka an puan dup dup laiin, America ram dung leh vangah Trump-a supporter khawlaiah an inlâr tam tual tual. Engti kawng mahin bumna hmanga Bidena an tihtlin ngawt hi mipuiin an pawm dawnin a lang lo. Trump-a pawhin a pawm lo bawk. Hmanni lawk khan Washington DC ah mipui nuai nga zet tur Trump-a support-tute an pung khawm a. Tun Inrinni, 12 Dec 20 hian chu aia tam, mipui maktaduai tling ngei tur “Maga Million March" an nei leh dawn. Chutih laiin heng state 6 zinga 5 te hi Republican controlled Legislature an nih avangin Dec 14 a state aiawha Elector an tirh hunah state aiawh tur chu Republican mi leh sa hlir an tir dawnin a lang ta bawk.
Fimkhurna tur Thu danga kal hmain, Mizo ṭawnga Youtube a rawn puang ṭhintu Raltiang Ram chuan “Supreme Court in Trump-a Lawsuit a Hnawl” tih thu leh, Trump-a tan zualkona tur awm tawh lo angin a rawn sawi ta mai a. Heti tho hian Tahan Post, 10 Dec 20 hian a rawn post bawk a. Ngaithlatute rilru a ti chi-ai bawk a ni ang, zawhna a titam hle. Chhan fiah loh theih a ni ta lo. Ngun taka an thupuan ngaihthlakin Pensylvania Supreme Court an tihna ni tur a nih loh chuan, Trump-a Lawsuit hian Federal US Supreme Court a la thleng rih lo, tih hria ila. A thlen hmain engtin nge an hnâwl ngawt theih ang? A rêng thuah Trump-a hmakhaw ngaitute leh Trump-a dotute (Bidena lamtangte) report hi chu thliar thiam a hun tawh: heti taka indona karah chuan.

India rama High Court kan tih ang hi USA-ah chuan Supreme Court an tih ve tho avangin hriat sual awl tak a ni reng a. Supreme Court a tam sup sup em avangin America ram pum tana Supreme Court bik sawi nan SCOTUS (supreme court of the United States) tiin kan sawi tawh ang. Dik takin Trump-a lawsuit te hi Pensylvania leh state danga court hniam zawkten pawmsak duh si lovin, SCOTUS a kal lawk thei lovin hei chen hi an tikhawtlai tawh a; a tawpah an state supreme court-in a hnawl ta nge nge a; tichuan court sang zawkah kê an pên thei dawn ta chauh a ni. Tunah hian Trump-a attorney ṭangkai tak mai Rudy Giuliani’n covid hri a kai leh rih avangin, a awm loh chhungin Republic senator ropui Ted Cruz-an Pensylvania case hi chu SCOTUS-ah ka lo dinpui ang e, an remtih chuan, tiin a in volunteer a ni. A thlamuanthlak hle. Chuvangin Pensylvania lawsuit hi SCOTUS-AH an la chai dawn chauh zawk a ni, tih sawifiahna thui tak kan pek phah a ngai ta a ni e. SCOTUS-ah chuan Justice 9 zinga 6 te chu Conservative mi an ni a, an zinga pathumte phei chu Trump-an duhsak taka a nominate an ni nghe nghe.

Biden-a te Pafa Corruption Case China, Russia, Ukraine ram atanga cheng tluklehdingawn tam tak eirua intihausa te thubuai pawh Mainstream News (CNN, BBC, Al Jazeera leh TV channel nei dang etc) ten thup tlat mahse, tun lai hian a nêp deuh zawnga sawi chhuah thar a ni. Hetianga corruption case lian tak mai hi America mipuite khuan an namnûl liam mai dawn lo niin a lang; a hun takah, dan anga an kal dawn a nih chuan, an pafa chungthu rel hun chu a lo la thleng nachêk ang; kan lo ngaihtuah hah a ngai lo ve.

Youtube-in Trump-a ṭantute thuziah block zel an tum Kha US inthlan kha a dik lo, vote tihchingpen a awm, ti zawnga thu chhuah reng reng chu tih bo zel an tum tih youtube chuan thu an chhuah leh tawh tih cnbcnews dot com ('dot' tih hi hmang mai ang. he site hi fb lam hian link share an phal lo. Fin thiam ve a ngai..pcbs) te, NTD ten an puang. Tun lai khawvel chu, chanchin thar puanna media te hian thu an nei em em a; mimal zalenna (freedom of speech) hi an nekchep tial tial mai a ni. Nakin lawkah phei chuan boruaka Pathian thu puan darh theihna – zalenna kan neih ngei tihtawp hi kan hmabak a la ni ngei ang.

Inauguration Committee-in Bidena President-Elect ah pawm lo TV chanchin thar lama kan lo hmuh leh hriat danin Joe Biden-a chu US President atana thlan tlin ‘President-Elect’ anga cheibâwl chiam chiamin, cabinet minister te ruatin, policy te lo zam vel duah mahse, Inauguration Committee chuan a pawm lo tih a chiang ta. He Inauguration Committee-ah hian, Congress member lawk deuh deuh – Democrat 3, Republican 3 ten Joint committee an nei a. Bidena lam, Democrat lam chu Congress Speaker Nancy Pelosi-in a ho va; Republican lam chu Senate Majority Leader Mitch McConnella’n a ho va; Democrat mi 3-in Biden-a President-elect tia pawm an duh laiin, Republican mi 3-in, hetianga inthlan result tling zawk puan tur pawh la awm thei lova, court thubuai awm lai ni bawk si, chuvangin a tu zawk mah President-Elect-a puan theih an la ni lo, tiin an inhnial a;3-3 ve ve an ni si a, thu titlu thei ta hek lo, an hlawhchham ṭhak a ni (Jack Phillips, The Epoch Times, 8/9 Dec. 20 “Inauguration Committee Fails to Pass…Biden as President-Elect).

Mimala Inbeihna Hei, kum thum dawn lai chu tum lawk hauh lovin Donald Trump-a America chanchin buaipuiin, khawvel awm dan hlimthla atan tun huna Pathian mitfûkna a ni tih hriain, ka lo ziak ve thin a; kumina covid hri lên hnu atang phei chuan Lalpan mawhphurhna min pek anih zia hi ka chiang chho zel a. Zoram khawvel miten an lo ngaihchan ber leh an ṭawngṭaisak phah nasa a ni tih hmun tin atangin thu ka dawng reng a. Chutih laiin thenkhat, Bidena lamṭangten, namên lova mimala min beih lêtna leh hmuhsitna nena min chirhthehna te chu pawisa zo lovin, a ṭulna avangin kan la chhunzawm zel a ni. Min lo sawichhetute chu Lalpan malsawm sela, anmahniah sawichhiatna thlarauvin a thawh dan ang chuan, tluang takin min lo sawichhe mai mai se a ṭha ang e.

Mi ṭhenkhatin mahni ram aia ram dang daih buaipui reng mai, min ti awm e. Kei pawh ka inti ve tho. Mahse he hun hnuhnunga Setanan US inthlanna hmanga he khawvela ram lak tuma a chetna hian khawvel pum hi a nghawng nghal vek a, tumah a inthiar fihlim theih bik loh. US president a ṭang zawk tur azirin kan ram leh kan Kristianna dinhmunah thûk takin kua a hreuh dawn tih te hi chu thlarauva mit meng tan chuan hai rual a ni lo. Mahni ram chauha inthlûr bing theihna khawvelah kan cheng tawh lo tih te hi hriat a ṭul tawh a ni. Donald Trumpa’n a term hnihna chelh leh se kan tihna chhan hi kan sawi hnem tawh a. Khawvel puma chanchin ṭha puan darhna hun inhawng se kan tih vang a ni. Communist China-in suma a lei tawh leh remote control hmanga a control tawh, mi corrupt ber Biden-a hi lal se titute hian eng nge an tih chhan hi rawn puang zar ve law law sela; tunah hian Mizo kristiante pawh hi rinna kawngah chuan kan inthliar fel chiang ta viau mai. Engpawh ni se, tun hunah hian khawvel chawk danglam turin Pathianin tu nge a hman a, Lalpa mit hi tu chungah nge a fûk? tih erawh chu i zir chhuak ang u.

Tawngtaina Tur He USA Inthlanah hian khawvel chanchinbu leh media te control vektu Corporate Mi hausa pui puiten Trump-a lam sawichhe char charin, Election pawh inbumna, vote tihchingpenna, khawl mak Dominion tanpuina nen, a thawktute intiam ruala tenawm taka Bidena tlinna tura mitthi vote sing tam tak nena ṭang kawpa, Communist China hausakna leh thiltihtheihna nena hma an la chung pawha, an hlawhtlin theih bik chuan loh avang te, tunah Trump-a lamtangten Bidena te ho thiltih dik loh leh dan bawhchhiatna zawng zawng ngaihtuaha, rorel theitu tur SCOTUS an thlen theih tawh avangin Pathian hnenah lawmthu kan sawi ang. Supreme Court chuan huaisen taka thudik an ṭan tlang ngam theihna tur leh, he inthlana chak zawk dik tak an hmuh chhuah a, he thubuai hi an chinfel theih nan, Pathian hnenah kan dil dawn nia.

Post a Comment

Powered by Blogger.