Pathian mit fûkna lam i man thiam em?
MIZO KRISTIANTEN DONALD TRUMP-A KAN LO SUPPORT CHHAN

Dr. PC Biaksiama
24 Dec 20, Christmas Eve.
Donald Trump Pardoned
Mi thenkhat chuan, "Teh chhên a, Trump-a ringawt buaipui mai!” Krismas thuchah sawi tur te pawh i nei na’nge,” min lo ti tawhin ka ring. Mahse indo laiin châng dang a kânsan theih si lo va. Lalpa min hruaina apiang hi kan kalna kawng tura ruat a nih avangin, hei hi kan Xmas thuchah a ni ve mai ang chu. Beramputen beram an vênna ram leh an riahna pûk te chu a hmunah vawi duai lo tlawh tawhin, ran chaw pêkna thlêng hmaah te pawh zu ṭhingṭhi ve rap rap tawh ṭhin mah ila, tun huna Lalpa mit fûkna lam, sual leh ṭha indona hmun – America inthlan boruak kal zel leh Trump-a chanchin lo chu thu dang hla dang a lang rih lo tlat mai. Ni dang angin Krismas pawh kan lawm tlân theih chuan loh hi.

Heti taka Donald Trump-a tan thahnem kan lo ngaihna chhan hi Pathian thu vang a ni; contract engemaw hmuh beiseia ti kan ni lo. Tin, heti taka Mizo ringtuten vei em ema kan lo ṭawngtaipui tlat theihna chhan pawh hi Lalpa hnathawh vâng chauh a ni, tuman duhsakna tlereuh an beisei lo tih man chhuak thei lo te kan la awm thei tho. Mi thenkhat chuan, ‘Mahni ram vei a hun tawh e, America ti reng lovin. Pathian thuchah dang te pawh hi sawi ve tawh la,’ min ti an awm. Ka hrethiam khawp mai. Mahse Pathian thu hi duh hun hunah duhna zâwn zâwn a vei theih ngawt loh, aman min veitir a nih loh chuan. Kan thu a ni lo va, ama thu a ni.

Bible history kan chhui lêtin, Pathian hian hun khatah mi pakhat emaw, hnam pakhat emaw chungah a mit a lo fu deuh thin. Mosia hun laiin Mosia chungah khan Lalpa mit a fu tlat. Josua hun laiin Josua chungah; Davida hun laiin Davida chungah, chutiang zelin. Israel ram zimtea kum 3 chhung Pathian Fapa lo kal khan khawvel pum a huap vek. Tunah hian khawvel pumpui hun inher danglam mekah hian Pathian mit fûkna ber chu Donald Trump-a leh America ramah khuan a ni tlat mai. Chu chuan khawvel pum leh Mizoram hi min rawn huap nghal vek a; sual leh tha, thim leh eng indona, Setana lalram leh Krista lalram indona chu America ramah khuan a innghat mup mai a; chu indonaa hnehna chang zawk zawkin khawvel chungah ro an rel dawn a ni.

Bidenan hnehna a chan chuan khawvel pum hi Illuminati te controlna – mi thei fâl zual mi tlemte kutah, sakhua pawh nei thei lovin, mimal tin zalenna nuai bovin, China Communism ang deuh dinhmunah khawvel pum hi Dictator chak tak hnuaiah a kûn ang a; chu chu Sakawlh hmahruai tur a ni ang. Donald Trumpan hnehna a chan erawh chuan khawvel hian Pathian khawngaihna pawhsei hun hmangin, tun aia Pathian ṭihna leh Chanchin Tha puan darhna boruak zalen a lo inhawng ang a, Communist ram hlauhawm ber China chu a tluchhia ang a, Krista ram a zau dawn a ni. China communist (dragon) puihna khera independent ram beisei lovin, Lalpa Pathian hian keini Mizote hi khawvel puma ama rawngbawl turin min chawisang thei dawn zawk a ni.

Setana hian hun tlemte chauh a nei tawh tih a hai lo va; chuvangin he indonaah hian hnehna chan ngei tumin a leng chhiat theih apiang leng chhiain, bawh chhiat theih dân awm zawng zawng a bawhchhe ta buan buan a; mahse chu chu a tlûk chhiatna tur a lo ni si a. An khingpui Donald Trump-a hi Pathian belruat leh hriakthih a ni miau va; Pathianin a humhalh nasat em avangin, engtianga nasa pawhin eptu Democrat hovin Communist China thiltihtheihna zawng zawng leh tun lai media bumna tinreng hmang chung pawhin, a chan chhe zawkah an chang mek a. Tunah hian an chan chhiat sâwtzia leh ṭanhmun an neih lohzia ringawt kan sawi ta a nih hi.

DONALD TRUMP-AN THIL ROPUI LO THLENG TUR A TIAM CHU?

Kar hnih dawn lai liam tawha a tiam, thil ropui lo thleng thuai tur a tih chu tun thleng hian eng tak ni maw? tiin miten an la inrinsiak a. Hei hi a ni lo maw, tia ngaih theih thil thleng a awm nual tawh mai.

Pakhatnaah chuan, mi tam tak hnenah ngaihdamna a pek hi a ni thei awm e. America president khuan sorkar laka thil sual tite leh jail tang hialte pawh ngaihdam theihna thui tak an nei a. Tun hnaiah Lt. Gen. Michael Flynn-a a ngaidam a; Trump-a tana mi thahnemngai ber zinga mi a ni leh ta. Tun hnai lehzualah mi 15 a ngaihdam leh a; vawiin chanchin thar puan hrang hrangah mi 26 dang a ngaidam leh a. Hemi thâwm hi eptu pawl Leftist media-ten hria-in, a chhuan chhe zawngin, amah leh amah a inngaidam dawn a ni ang, a chhungkua a ngaidam dawn a ni ang, te an lo ti el vel a. Mahse, a chhungte tel lovin, Republican mi leh sa, court-in thil sual tia a ‘convict’ tawhte chenin a ngaidam a. Hei hian GOP party chhungkuaah inlungrualna leh thawhhona boruak pawh a siam that phah beisei a ni.

Pahnihna, Covid-19 hri venna vaccine hmuh chhuah a ni ta hi thil lian tham thleng tura Trumpa lo sawi lawk chu a ni thei awm e. Doctor thiamte leh medical scientist chinchang hriaten, hetiang hri mak tak enkawl leh tihdam theihna vaccine hi a lo berah pawh kum thum liam hma chuan beisei theih a ni lovang, tiin, inti hre takin an lo puang lawk vel kha a ni a. Mahse Trump-a hmalakna leh a kaihhruaina hnuaiah thla 9 chhung lekin vaccine an hmu chhuak ta mai a.Trump-a phei chuan inthlan hma ngeiin sorkarin a pawmpui hman a beisei a; a siamtute a nawr reng bawk a. Mahse inthlanah a chan a ṭhat phah bik lutuk hlauvin Democrat hovin a chelh khawtlai dan zawngin an bei vak a. Inthlan zawh hnuah an peih ta chauh a ni. Tunah hian mipui maktaduai khat velin kar hnih tling mang lo chhung lekin vaccine an la hman tawh a ni.

A dang lehah chuan, eptu Biden-a pawlte vote tihchingpen dan an hmu chhuak chur chur mai hi Trump-a tan chuan hmuh theiha thil thleng lian tham a ni ve thei awm e. New York-a Long Island atanga inthlan dawna ballot paper 288000 vel zet Pensylvania lama phurtu, Dak phurtu driver inpuanna te; Georgia state chhunga vote dik lo (illegal vote) nuai chuang fê an man chhuah te; tunah Georgia State a thuneitu lu ber Senate Judiciary Committee-in Biden-a tlinga an state officialten an lo puan tawh an han sût leh (Decertification) mek te, vote lem leh tak endika thliar hranna ‘vote audit’ an neih meka Trump-a tling zawka puan hmabaka a awm te; Wisconsin state a vote dik lo (illegitimate vote) 200,000 zet hmanga Bidena an lo tihtlinna, an state judge ngeiin a nemngheh tak te, Nevada, Michigan, Arizona leh Pensylvania state a vote chingpen an hmuh chhuah NTD in a report te hi thil thleng lian tham zingah a tel ve thei awm e. Pensilvania-ah phei chuan US Constitution leh anmahni state constitution dan kalhin election thuneituten dan lovin vote nuai 28 zet an lo thlak tih hmuh chhuah a ni a. Trump-a team te hian Supreme Court (SCOTUS) ah hei hi an khing mek a ni tiin Eye Opener news channel-in a report. Bidena lamah hian ṭang ta ila kan dinhmun a buaithlak zawk hle awm e: "Min dang chêp sâwt êm mai, mualphothlak deuh mahse i inpe tawh mai ang u,’ tihna tur a ni tawh a ni, mihring pangngai danah chuan. An zâm chhe tawh a, an thiltih dan hi an chalchâng emaw, thih sual emaw an ang tawh zawk. An vote rûk khawm sate hi chhuh lêt an tawh mek si a!

A dang lehpekah chuan, mi tin ina an sawi noh noh martial law puan hi a ni. US Constitution-in thuneihna bik a pek angin hetiang buaina namênlo kârah hian a duh chuan Trump-a hian a puang thei reng tawh; a duh leh duh lohva thu a ni ta. Tûma sawisel phak pawh a ni lo. Tun thlenga a la puan loh chhan hi, mi rin phak bâka a dawhtheih em vang a ni. A rûka amah dotu Bill Barr-a pawh ṭawngkam ṭha taka fak chungin a thlah liam thei a ni.

Chu bakah kha inthlanah khan America hmelma foreign sorkar pathum, Russia, Iran leh China te an inrawlh thukzia hai rual lohva man chhuahin an awm a. America tihchhiat tumtu China secret agent te USA ah khuan hmun tinah a rûkin an inphûm chhuak vek a ni tih DNI report chiang tak a awm tawh a. Chumi avang chuan martial law tluk tháwthânga chak Trump-a hian a special power hmangin inthlan tikhawlotu Dominion khawl man vek theihna order a chhuah thei reng tawh a. Dan anga a theih chhung chu la kal hram hram a duh a; mahse court lamin an thu leh hla an lo ngaithla duh si lo. A tirah khan vote tihchingpenna nasa tak a awm,’ an tih lai khan: anni chuan, “Chutiang tihchingpenna reng reng a awm lo, khawnge finfiahna pawh in nei em ni?” an ti a. Mahse finfiahna tam tak nen an han theh luh chuan an lo en leh duh der si lo. An lo tawng pawng hnâwl tawp tawp chungin, tun thleng hian Trump-a chuan thuneihna sang a neihte hi a la hmang duh rih lo. Hemi tel lova hnehna kawng inhawng hi a hmu tlang vek niin a lang. Zahngaihna a lantir mek lai hian eptute CNN fake news te chuan Hitler-a anga dictator thuneihna hmang angin a chhe thei ang berin an la puh ṭalh a. Khawvelah mahni ram lal heti taka zah lova, hmusit taka an beihrawn nasat ang hi Isua Krista bak chu sawi tur dang khawvel history-ah hian an la awm lo a ni.

Covid Relief Stimulus Bill $ 900 Billion : Trumpan a Veto dawn. Covid China virus-in kum khat dawn lai a hrêk chauh hnu chuan America ram ropuia mite pawhin chhawmdawl an lo ngai ve tawh viau mai a. Chhawmdawlna sum hrawm erawh a na deuh. Tun maia hman atan dollar tluklehdingawn 900, House-in an pass tawh chu President Trump-a lo remtihpui turin a dawhkan a rawn thleng mek a. He bill turu tak, phek 6000 zeta chhah hi tu tak tak mahin an chhiar lo. Han bih chian deuh chuan covid nena inlaichinna nei lem lo ram hrang hrang Burma, Bangladesh, Pakistan, Venezuela etc. vela an project thenkhat tanpui nan te, Americaah pawh khawi lai institution building sakna tih ang reng vel a ni a. He bill hian America mipui zinga dawng thei chin mi pakhat zelin $ 600 tanpuina dawng tura tih an ni. Dollar tluklehdingawn khat lek pawhin a daih a, a bak dollar tluklehdingawn 899 te chu eng atan zozai nge an tih dawn? tiin Newsmax thu puangtu chuan a rawn zawt khauh mai. Tanpuina hi mi pakhatin $ 2000 tal an dawn loh chuan ka Veto dawn, tiin Trump-a chuan a lo vau lawk bawk.

Franklin Grahaman Ṭan La Thar Leh. USA a Kohhran hruaitute zingah Franklin Grahama tluka 2016 a Trump-a tana mi ṭangkai kha an awm chuang lo vang. Mahse 2020 inthlanah rin anga Trumpan hnehna a chang ta mai lo leh, mainstream media-ten Bidena chak zawk anga an lo vawrh chhuah nasat em avangin Franklin-a rilru pawh an hmin hial a, Biden-a a ṭan vang pawh ni chuang lovin, Trump-a chu tling dawn ta lo anga bumtuten lo tizâmin, dawih âw a lo chhuah ta mai khan USA a evangelical hruaitute a timangang a; theihtawpin an fuiha, a rawngbawl zelna atana pawi tur a ni tih an hrilh a; thawhlawm thawhtu ringtu mipui rilru a tihnat chuan, a Samaritan Purse pawh a kiam duak duak mai ang tih pawh a hlauhawm hial a. Chu chu hriain Franklin-a chuan Dec. 19 khan thu chhuahin Donald Trump-a a ṭanzia a rawn châng thlan thar leh ta a, mi rilru hliam tuam damin a awm leh tawh ang tih beisei ila. Trump-a ṭantu FOX news pawhin Biden-a hi ‘President-elect’ tia an sawi tak zel avang ringawtin tui taka an channel lo thlir thin America mipui rilru na maktaduai engemaw zatin an kalsan phah a; entu mipui an kiam tak avangin NO. 1 dinhmun atangin a tlahniam ta duai a; thlirtu an tam dan azira sum la lut tam thei leh hlutna nei an ni si a, an tawrh phah ta a ni. Heti khawp hian America mipuiah Trump-a hi a tla na a ni.

Inlarna Hmututen Trump-a Tling leh turin an hmu zel. Pathian thu avanga Trump-a buaipui kan nih avangin politic indona chungchangah a phêna Pathian a inrawlh zia mumang leh inlârna kaltlanga hriattirna dawngtute thu leh hla kan thlauh thla thei lo bawk. Evangelical media lam atanga inlarna leh Lalpa aw hria chiang taka kan hriat theih chinah Donald Trump-a hian a term hnihna chelh leh turin an sawi deuh zel a ni. Prophet Selvaraj-a, prophetic ministry nung taka kalpuitu chuan, Pathianin a ruat ang hna thawk zo turin Trump-a hian kum li dang khawngaihna a dawng leh dawn. President hian hnehna a chang reng tawh a, hnehna changin a lo chhuak dawn, tih thu, December 21 khan a puang naqn leh tih Prophetic Alert-in a report. He indona hi Pathian leh Setana indona a nih avangin, thuneitu leh controltu Pathianin hnehna a chan thu Daniel Kolenda chuan Podcast-ah Dec. 19 khan a sawi bawk.

Trumpa’n hnehna a chang dawn (Trump will Triumph) tiin Mark Snider-a chuan November 10 khan US president inthlan chungchang Prophetic Word channel-ah a lo puang chhuak tawh a. (A link ka tarlan ṭhin atang hian facebook-in min lo mana, min block thin avangin ka tarlang ta meuh lo a ni). Tun laia prophetic ministry lama kal na tak Pastor Hank Kunneman-a chuan, “He ram ropui tak President a awm tur hi a rûka rûka thlan tlin hi Pathianin min pe dawn lo hrim hrim,” a ti nget nget mai. Chuvangin thlarau atanga hriatna nghet leh chiang a dawn avangin Bidena hi engti kawng maha hnehna chang turin a ngaihtuah chhin ngai lo reng reng.


Inlarna hmutu dangte pawh thuchhuah hmasa lamah kan tarlang nual tawh a. Sapho ringawt an ni bik lo, kan Mizote zinga Lalpa bêl hnai leh ṭawngtai mite thil hmuh pahnih khat tarlang ve ila. Thenzawla mi Pi Lalduhawmi, thingtlang nu mawl ve tak, ṭawngtai reng mai, khawlaia au reng mai pawhin, “Trumpa hi a tling dawn, i lo thlaphâng ang e. Lalpan Pu Trump-a tan min tawngtaitir nasa lutuk. A boruak tawn leh beitute hi an va rapthlak em em ve; mahse Lalpan hnehna a chang dawn,” tiin a khat tawkin min hrilh reng a. Pitar pakhat, a tu leh a faten a hming sawi chhuah an khap tlat (Pi Kapi ti mai ang), a naupan lai atanga thlarauva hriattirna dawng thin chuan phone-in mi rawn zawng chhuak a: Kar hmasa, Dec. 18, Zirtawpni zan khan a mumang nge, inlarna tih a hre hrang thei lo, zing lam dar 2 leh 3 inkarah chiang tak maiin Biden-a te, Obama te leh an thawhpui hote kha tuiah an lo tla a, tui an lo hâk a, an lo chhuak thei tawh si lo va; chhantu tur pawh an awm lo,” tih thu hi vawi thum ngawt min hrilh tawh bawk.

Conservative news channel lûn tak mai enkawltu leh thupuangtu Dr Steve Turley-a chuan, "Covid chhawmdawlna stimulus Bill buaipuiin President Trumpa chuan a term hnihna a hmang ṭan dêr tawh alawm," a ti hmiah mai.

Post a Comment

Powered by Blogger.