A tak thlen hmain a lem -
AMERICA-AH “FAKE PRESIDENT: FAKE CABINET: FAKE NEWS”

Dr. PC Biaksiama, 20 Dec 2020, Sunday
Chanchinthar

Thuhma: A hmasain ‘FAKE’ tih awmzia chu ‘a lem,’ inbumna tura a lem siamchawp tihna a ni. US inthlan hian a vaw lar hle. A lem a awm chuan a tak pawh a awm thin. Dawt hi chu kan sawi zeuh zeuh hlawm a; mahse mipuite bum nan, a dik lo zawk chu dik zawk; a dik zawk chu dik lo zawk anga puh thlûka, mite bum tumna thu hi ‘fake news’ an ti. Tunlai USA a Leftist-ho politik khelhna hmanrua ber hi zawlnei Isaian kum 2700 zet kal tawh khan a lo sawi tawh a (cf. Isa 5:20). Tichuan, inthlanna chu a ruka rûkin, vote lem hmanga intitlingin, an vote chhiarna khawl chena rukru thei tura duan niin – chûng a lem tling khawm atanga an vawrh tlin chuan tuma la tih ngai lohvin ‘President-elect’ dinhmun an chelhtir a, cabinet minister te an ruattir ta vel a; heng hi ‘fake president, fake cabinet’ tih loh chuan sawi dan dang a awm thei tawh lo.

Mipui thlan dik tak President la awm lai renga, a tling tur zawk la tihchian hmaa lal hran nei ang ziazanga an lo insawngbawl vel chiam hi mahni ram phatsanna leh helna anga (Traitor) Case rip tak siamsak theih an ni. Esopa thawnthua ‘cho-ak arawn hmul invuah’ leh ‘bawnghnute chhip chhuan nula’ an sawi kha a hring a hrânin kan hmu ta a; ‘fake news’ ten an puang dum dum a; chumi chanchin chu ‘mainstream news’ kaltlanga ni tina khawvel chanchin thar kan dawn thin hi a ni ta a ni.

Thuhnar Inang lo Donald Trump-a chungchang dik taka sawi turin heng mainstream news-ten an puan duh loh lam, Conservative leh Christian news channel hrang hrangten a ‘original’ thei ang bera an puan te hi kan thu lakna hnar an ni. Chuvangin, dawt leh phuahchawp hmanga Trump-a sawichhiatna thu leh hlaa khawvel chawmtu pui ber CNN, Al Jazeera leh BBC, MSNBC, ABC, NYTimes etc. te chu innghah nana hmang tawh lovin, America mipuiin tun hnaia an bawh ruih ruih Newsmax leh NTD news channel te bakah, Christian Broadcasting News (CBN) te, One American News (OAN) te, Beyond the Noise te, Frontpage te, Skylinks, Dr Steve Turley te, The Epoch Times etc. te an ni. Chuvangin, ngaithlatuten kan rin duh zawk zawk duh thlan tawh mai tur a ni. Keini chuan Trump-a hawtu ber ber, fake news her chhuahna khawl pui ber CNN leh a ṭhuihruaite thu la lova, Pathian ringtu Conservative news channel atanga thu la ṭhin kan nih avangin kan thu hi a dik zawkin ka ring tlat mai.

He sual leh ṭha indona hi Thlarauva Indona a nih nghal avangin thu dik leh dik lo i hriat hran duh chuan: Fake news chuan a tibeidawng ang che a; ṭawngtai pawh a sawt tawh chuang lo, tiin i thlep hnawk mai ang. Thudik tak erawh chuan harsatna karah pawh beiseina a pe ang che a, bansan mai lovin Pathian hnena tmṭawngtai zel turin chakna a pe ang che.

US Inthlanah Foreign Ram an rawn inrawlh tih chhui chhuah a ni ta. John Radcliffe-a, National Intelligence Director chuan Dec 18 khan US president inthlanah foreign ram hrang hrang, China, Russia leh Iran ramten Bidena tihtlin tumin thiamna (cyber attack) leh sum tam tak hmangin an rawn inrawlh ngei tih finfiahna nen a nemnghet ta. He report hi inthlan atanga ni 45 aia tlai lova report tur tiin 2018 khan Trump-a hian Executive Order a lo chhuah tawh a; a hun chhunga report hi pek a ni. Hetiang a lo nih takah chuan inthlan chungchanga thil fel lo leh dik lote chingfel turin President Trump-a hian a duh hun hunah action na tak takin a la thei tawh a ni tih a Executive Order, section 3, Sep. 2018 han study hian a tichiang. Hun biin a phuar ve lo bawk. Ni 18 zan khan mi tam tak chuan Trumpa emergency puan an lo ngaichang deuh ṭhup a ni. Duh se, Trump-a hian Bidena an tihtlinna Dominion khawl maksak hi endikna, forensic audit ti turin a mantir vek thei reng tawh a ni.

Ram phatsantu man belh zel Tunah chuan US President inthlannaah Biden-a te lamin a rûka America hmelma foreign sorkarte nena an ṭanho dan thuruk hai chhuah a ni ta a. Republican ni ve si, Trump-a duhsakna dawng, Georgia Governor Brian Kemp-a pawh Trumpa tihtlak tumin vote chhiar nawn leh thin mahse a ballot lemte paih phal lova, endik pawh phal lotu, Democrat leh Dominion lamin dollar maktaduai 106 zeta a secretary of state nen an tham nia an sawi kha, a vanneihnain a daih ta bik lo ni tur a ni: tunah chuan China Communist nen connection thûk tak an lo nei reng a, Biden-a tihtlin tuma China puihna dawng nia rinhlelh a ni, sorkar phiarrutu anga man chhuah theihna dinhmunah a ding ta tlat mai. An chungthu rel a nih hunah chuan jail bang zut a hlat vak hmel loh ve.

Kan thuchhuah hmasaah khan Democrat milian Eric Stalwell-a, House Intelligence Committee member pawimawh ngei chu Chinese Communist secret agent nula tawih nen kum 5 zet an lo inzui tawh avangin America thuruk hi Communist hnenah engzat nge ‘leak’ tawh tih hriat phak pawh a ni ta lo, tih kan tarlan tawh kha. House speaker Nanci Pelosi chuan a lo chhan tlat mai lehnghal a. America chhiatna tura Leftist democrat-ho chetna buru tak tak hailan zel a ni. China hi America tan ram hlauhawm ber a ni a, sipai chakna leh economic lama USA hi khûma khawvela chak ber nih a khël nasa hle a ni.

Emergency Powers/Martial Law puang tura nawrna kal zel Report hmasa thenkhatah pawh America mipuite, sipai hotu lal te, politician te leh ama ukilte atang ngei pawhin puang tawh mai tura nawrna a nasat tawh zia kan sawi tawh a nih kha. Tun hma khan US President te khan martial law hi chhan leh vang hrang hrang avangin vawi 68 zet an lo puang tawh tih Wide Angle channel chuan a sawi. America rambuai chingfel tura martial law puang thei tura Constitution-in thuneihna a pek hi sipai lam – army, navy leh air forces te chuan beiseiin an lo inralring reng tawh tih pawh kan report tawh a. Tun thlenga a la puang lo hi, he special powers tel lova dan anga election result dik lo paih thlakna kawng la inhawng chinfelna kawng a la zawh hram hram niin a lang.

Amaherawhchu, thudik dap chhuahna investigation tibahlah tura Democrat lamin kawi tinah harsatna te siamin, anmahni power chu a full ṭhaka hmangin President hial pawh an lo dodal ngat ngat ṭhin avangin, heng vote chhiarna khawl corrupt leh tenawm ber Dominion khawl zawng zawng man a, hup barha endika lipse vek turin President hian a power chu a hman ve tawh a ngai a, Trump-a pawh a nauten an nawr nasa tawh hle (https://dhjmedia com/rich/sidney-powell-on-dni-ratcliffe-election...); https://davidharrisjr.com/steven/its-time-for-trump-to-confiscate-the-voting-machines...).

Dominion Khawl neitute an Mangang Sidney Powell-i an vau. Dominion Voting Machine-in Trump-a vote Biden-a vote-ah a chantir a, a tlin phah thu tlangaupuitu, Trump-a lamṭang, attorney (ukil) thiam tak Sidney Powell-in court-a a put luh avangin Dominion-ho chuan, min timualpho, nasa takin kan tawrh phah a, kan hnathawkten enthlaka zar buai an hlawh phah,” an ti a; Powell-i chuan an company a puhna te chu vantlang hmaah phaa ngaihdam dil turin an phut. He Dominion company te vauna hi Sidney Powell-i te ang mi rorum leh ram hmangaih, danhre mi ni bawk si chuan engah mah a ngaih loh hmel hle. Tunah phei chuan Trumpa chuan Powell-i hi ama legal team-ah a la lut leh dawn tawh bawk. Kar hmasa lam khan he Dominion khawl dik lohzia hi mithiamten an man chhuah tawh kha a ni a; an la man chhuak dawn chauh zawk a ni thei awm e. (https://www.thegatewaypundit com/2020/12/dominion-voting-systems-sends-threatening-letter-attorney-sidney-powell-demands-retraction...)

VOTE THLAK LEH VOTE CHHIAR TIHCHINGPENNA KHAWL AN MAN CHHUAK ṬAN TA Inthlana thil dik lo leh inbumna chi hrang hrangte chu pakhat khatin chhui chhuah an ni ta zel a:-

Antrim County biala vote chhiar thatah Trump-a a tling. Michigan state a Antrim bial (county) ah chuan vote an chhiar tha a, Joe Bidena chak zawka an lo puanna thin kha a ni a. Mahse dik taka an han chhiar chuan Trumpa’n vote 9759 hmuin, Bidenan 5759 chauh a lo hmu si a. An in lehthal leh ta a ni. Mahse hei ngawt hi chuan Michigan state pum result chu a tidanglam pha rih lo, a dang endik zel atangin kan la hria ang. Heti a nih chuan county leh state dang dangah pawh an vote chhiar sa kha a tirinhlelhawm ta zel dawn niin a lang.

Georgia state-ah Vote endik dawn ta Sawi tawh angin, Georgia state Secretary of State, Brad Raffensperger-a chuan vote tla-te kha thuawih awm takin vawi hnih lai chhiar nawntir leh thin mahse, a lem leh a tak a la infin ruih ruih a, Bidena bawk an tichak leh thin a; chu chu a dik ber anga an certify kha a ni a. Ballot paper dik leh dik lo thliar hran ‘audit’ vel kha chu a remti bau lo thin kha a ni a. Tunah erawh chuan hotute leh mipuite atanga nawrna a nasa ta a. Tihngaihna a awm ta ngang lo a ni ang, hreh tak leh mualpho pawh hlau tak chungin an state chhunga ballot te kha forensic audit turin December 16 khan thupek a chhuah ve leh ta tih Eye Opener-in an report a.

A tawp a tawpah chuan vote dik leh a lem an thliar hrang dawn ta a, Trump-a leh Bidena te inthlauhna a tlem si a. Bidena lam tan chuan a hlauh thawnawm hle tawh awm e. Endik phal ta lo se, 'eng nge thup in neih, vote chingpen a awm lo, in ti a ni lawm ni?' tia puh lêt an hlau bawk si. Bidena hian vote 12,670 in Trump-a aiin vote a hmu sang tih a ni a. Vote tla nuai chuang fe hi dan lo anga vote tla a awm a; mitthi tawh hmingin vote sang tam tak a tla bawk a; a vote thlaktu tû tih hriat loh (absentee ballot) sing tam tak a awm bawk a. Trumpuia pawhin, “Georgia atanga ballot papera signature inmil lo nuai chuang awma an sawi ringawt pawh hi endik se, hneh takin ka tling daih thei a ni,” a lo tih thin kha. Dec. 15 khan Trump-a attorney Lin Wood-a chuan Georgia Secretary of State Brad Raffensperger-a leh governor Brian Kemp-a te hian US hmelma lian ber China Communist sorkar nen a ruka inthlunzawmna an neih avangin court-ah a khing dawn a, jail-ah an la tan mai theih thuin tweet hmangin warning a pe a ni. State dangah te pawh vote audit an neih zel theih nan Pathian tanpuina i dil zel ang u. (Powell’s KRAKEN accepted by Supreme Court; Georgia to validate ballot signature/ Eye Opener, 17.12.20)

Nevada state-a trump-a team-te hmasawnna State buai 6 zingah Nevada inthlan tihchingpen dan hi kan la sawi tam lo hle. Dec. 16 khan Senate Hearing an nei ta hial a. Ka mutsan hmain zanlai thleng chu ka lo thlir a. Republican Senator-ho an che ṭha hle. Ka hmuh laia thu zawhfiah tura an koh Christopher Kreb-a chu Cybersecurity & Infrastructure Security Agency-a Director-a tang thin a ni. Namen lova inthlanah thil buarchuar a awm chungin, Krebs-a chuan, ‘he inthlan hi US history a inthlanna him ber a ni,’ tiin Trump-a elsên nan a'n puang chhuak kher a. Thawhpui zui chi a ni lo tih hriain November 17 khan Trump-a chuan a bân zui ta kha a ni a. Senator-ten thu tam tak an zawh hnuin an chairman chuan, ‘inthlan buarchuar zia leh tihchingpen a nihzia i hriat chian hnu hian ‘inthlan him ber i la ti zel thei ang em?’ tia a zawhna chu a chhang thei ta si lo a nih kha. Khami nia Nevada inthlan buarchuar zia Senator-ten USA mipuite hmuh leh hriata an sawi lan zingah –

• Vote 130,000 zet chu dik lo taka thlak a ni.
• Mi 43000 zetin vote an thlak nawn.
• Mitthi tawh 15000 vote thlaktir an ni.
• Vote thlak mi 19,000 te chu Nevada state a cheng an ni lo.
• Address nei lo mi 8000 in vote an thlak ve.
• Midang 15000 zet chu state pawn lam mi an ni.

Nevada vote chhiarah khan Trump-a aiin Bidenan vote 33, 596 hmu hnem zawka record a ni a. Vote endik hna an tih hun hunah namen lovin Bidena hi Trump-a hian a lehpel daih dawn niin a lang. Vote thlak nawn mi 43000 te hian vote 86000 an thlak tihna a ni a, hei chauh pawh hi tihdik ni se Bidena hi a tla chiang hle ang. Dec. 14 khan Electoral College 6 awmna Nevada Republican (GOP) Elector-te chuan Donald J Trump-a hi vote an pe a ni.

Tlangkawmna Beisei aia US inthlan thubuai an chingfel har ta hian mi tam tak rilru a tihnual tawh ngei ang. Fake News lam chuan Biden-a hian electoral vote 306 hmuin, Trump-a hian vote 232 hmu angin, Bidena hi officiala President ni tak tak turin TV leh chanchinbu tinah an chhuah tih kan hria. Mi tam takin Trumpa hi tla dêr tawhah an ngaih phah hial a. Mahse a ni awzawng lo mai. Tun Dec. 14 a elector-te vote thlaknaah khan Republican elector-te vote pakhat mah an chhiarsak ve duh lo ringawt a; hei hi Constitution dan bawhchhiatna chiang tak a ni. He result hi officiala pawm theihva ni lo rêng a. Hei vang hian officiala president tur puan theih a nih tak loh kha, 'Govt of CNN' te tih awm tawk vel a ni. January 6, 2021 a chinfel turin hun dang an ruat leh ta ringawt a ni tih tuma hai rual a ni lo. Hei ngawt pawh hian Biden-a hi President ni tura chiang sa a la nih loh zia a tilang bawk.

US Constitution zirtu danhremi Jenna Ellis-i, Trump-a senior attorney sawi danin, January ni 6-ah hian Democrat leh Republican Elector chungchangah Congress-in Hearing nei turin an thu khawm dawn. House Speaker Nancy Pelosia chu thuneihna nei lovin, member dangte zingah a ṭhu ve tawp dawn a. Senate President, US Vice President ni bawk Mike Pence-an chair lain business a kaihruai ang. Tuna vote ngah zawk anga lo inngai Dem hote hi engtihna mah an ni lo.

Mike Pence-a chuan Constitution-in thuneihna a pek angin thuneihna pumhlum neiin meeting lian a kaihruai ang. Chu Joint Session hmaah chuan Democrat-te leh Republican-te electoral votes, box chhunga char hnan tlatte chu an hawng dawn a ni. Chutah chuan mi tam pawh ngai lovin, House member pakhat tuemaw berin a pawm loh thu ‘objection’ chu chairman, Vice President, hnenah ban pharin emaw a rawn thlen thei a, House member pakhat dangin a lo puihbawm (second) chuan, engkim a danglam nghal vek ang. Everything!!

Chutah le, House leh Senate te chu darkar hnih vel emaw a hrang ve ve a inhmu khawmin an sawi ho ang a, chumi zawhah vote an la ang a. An vote lak dan tur, Constitution-in fing tak leh thlir thui taka hetiang buai hun lo hmu lawk ang maia a lo dah ṭhat khiau angin an kal ang.

Senate chuan Vice President atan Mike Pence a nge Kamala Harris-i zawk, thlang turin an vaiin, member awm zawng zawng (100) in an vote vek ang. Lo inzah ta chiah se Vice President chuan a duhna zawk titling turin ‘casting vote’ a thlak thei ang. A tling tur chu Mike Pence-a a ni ang. A chhan chu, tunah hian Republican lamin Senate hi an control avangin. House-ah thung chuan Democrat lamin majority an la; mahse thil mak tsk mai chu, a member awm zat 538-in thlak vek lovin, state pakhat aiawhin vote khat chauh an thlak thei ang. Chuti a nih chuan, Republican lamin state 30 atangin aiawh an nei thei a, Democrat lamin state 20 atangin aiawh an nei thei ang. State tina ruling party nei tam zawk zawkin vote an nei tam zawk ang.

Hetianga Constitution dan anga vote an thlak chuan President tur Donald Trump-a an thlang nawn leh dawn tihna a ni, constitutionally-in!

Chu veleh Democrat hote, media te, social networks te leh globalist (Han belh hlek ila: patil leh tuai - mawngkawhur hote, Socialist-Communist te, BLM te, Antifa te, abortionist te, fake media te chu buaina siam turin an rawn ri luih luih ang a, buaina an siam ang, namen lovin (Bigly!!!). (Hetianga inthlan hi US Constitution, 12th Amendment-in a sawi dan, issue hmasaa ka rawn tarlan thin kha a ni).


President trump-a hian hetiang hun buaithlak bika hman turin Extraordinary Powers nei mahse, a insum rih tlat a; dik tak leh thuhnuairawlhin amah lo hnawltu tur tih hriat sa reng court hrang hrangah te inthlan tihchingpen a nihzia zual kovin a hrût kual hmasa tê tê a, a hnawng kual nasa hle a. A hnawn kualna lamah rorelna court-ah te meuh pawh politik bawlhhlawh te, thamna leh corruption-in a ram chhung a lo eichhiat tawh avanga rintlak an lo awm tawh lohzia te a hailang zel a; an chhuan tawlawl Supreme Court meuh pawhin an Chief Justice John Robert-a avangin tukkhum chhah an lo chhawn khum ta hial a ni. Tunah pawh hian, Texas state thu an lo hnawl bakah, Sidney Powell-i case pahnih, Arizona leh Wisconsin thubuaite chu an hnawl a, a dangte chu hnaw ve lo mahse tikhawtlaiin, President thar lakluh hma ni ruk, January ni 14 ah an ngaihtuah leh dawn chauh mai a, an suahsual dan hian chin tawk a nei ta lo ve.

Ellis-i sawi zel danin, “Kan ram dintute kha an lo fingin an lo thlir thui em a, nakin engtik hunah emaw chuan hetiang hman ṭul hun a lo la thleng thei ang tih an lo hre tlat a ni. Chuvangin media te bumna leh dawtthute hi ngaithla duh reng reng suh u. Constitution hi uluk takin chhiar la, policy leh tih dan fel tak an lo siam te avang hian, a tawpna chu keimahni tan a lo ni reng mai a ni. Trumpa keh Pence a te tlinna turin Dan hi an lo duang chhuak reng a lo ni.

Tunah hian Biden-a lamtangte chuan mahni inbum chawpin chan ṭha zawk chang emaw intiin min lo nuihsawh vel a ni mahna; mahse i lo thlir ang aw, January 6, 2021-ah chuan a nui hnuhnung zawk kan la hre dawn khawp mai. Kan rin aia nasain Democrat hovin buaina siam leh vak dawn mahse, President Trump-a hian a lo khek khal tawh martial law hi a puang tawh ngei ang tih a rin theih. Chu aia ringtuten kan innghahna zawk tur chu, lei lam thil zawng zawng a ‘fail’ vek hnuah, awm zawng zawng an ral hnuah Lalpa Pathianin kan ṭawngtainate hi a rawn chhang ve dawn tih hi i ring tlat ang u khai, kan hneh ngei dawn, tiin, phur takin, thahnemngai takin Lalpaah chuan i tlu lut zel ang u.

Post a comment

Powered by Blogger.