Russia S-400, khawvela air defense tha bera sawi hi lei duh an tam a. United States lah chuan Russia ralthuam lei apiang chu hrem zel a tum bawk si, ram engemaw zat chuan NATO atanga inhnuhdawh an duh phah ngei ang.
Turkey in Russia S-400 lei a tum vangin US chuan a sanction hmiah mai a. Mahse, Turkey a zám bîk lo hle. Turkish Foreign Minister Mevlut Cavusoglu chuan nimin December ni 17 khan, S-400 lei tuma Turkey hmalakna chu kaltlangpui a nih tur thu a puang ve ta rup mai a. United States in hremna a lekkawh te chu engahmah an ngai lo a ni ber. United States hian engtin nge Turkey chungah hian hma a lak zel dawn nih?
Turkey state 24 TV chuan an Foreign Minister hi biangbiakna neiin, Turkey chuan US in a hrék chungchang hi engmah a ngaihsak lem lo niin a sawi a. Engangin nge US Sanction hian Turkey economy ah nghawng a neih dawn, tih pawh a sawi duh lo.
Kar liamta a US in Turkey chunga sanction a puan zinga langsar deuh te chu: Turkey defence industry hotu 4 te chu US leh a thawhpui ram chhungah engthil mah an khawih ché theih dawn lova. US ram chhungah an lut khapsak an ni bawk. Tin, Turkey Defence Industry kaltlangin lei leh hralchhuah khapsak niin, sum che vel tur tam tak a tibuai dawn a ni.
Tun tuma United States in Turkey a hrékna hi CAATSA dan tlawhchhana US in a thawhpui ram chunga hremna a lekkawhna hmasa ber a ni nghe nghe. Turkey foreign minister chuan, kan thutlukna hi chhut leh kan tum lova, chhut leh tum ni ilang chuan kan tih na a rei tawh ang. Kan thil tih hi kaltlangpui kan tum a ni, a ti.
A sawi zel naah, hetianga ram leh ram in hrékna hi dan kalh a ni. tuna US min hrékna hi kan zirchiang phawt ang a. Hmalak zel dan tur kan hre thuai ang. US leh Turkey inlaichinna hi kan siam tha dawn a nih pawhin thudelhkilh awmin kan inrem tawh ang. Joe Biden hian Ankara lungawilohna hi engtin nge sutkian a tum, tih kan thlir phawt ang, a ti bawk.
CAATSA hi eng dan nge a nih?
CAATSA awmzia chu Countering America's Adversaries Through Sanctions Act tihna a ni. United States tana hmalakna hrisel lo te chu hrékna hmanga dolet zel America chuan a duh a. Turkey chuan a tuar mek a, India pawhin a tuar ve thuai mai thei bawk.
Kan sawi tawh angin, Turkey hi United States in a ho North Atlantic Treaty Organization (NATO) member a ni. NATO hi kum 1949 a din niin, Washington Treaty tia hriat a ni bawk. NATO din chhan ber chu Soviet Union laka US leh a thurualpui ram te himna tura hmalak a ni.
United States thinur chhan
NATO member ni reng si a, Russian ralthuam man to tak Turkey in lei tal a tum hi, NATO dan leh dun palzutna a ni a, United States in action a la hi thil awm tak a ni ve hrim hrim.
Russian S-400 hi Turkey in a kawl a nih ngat chuan NATO ram tam tak tan thil hlauhawm tak a ni nghal dawn. A chhan chu Russia hian Turkey military station leh an thil nei te a hman sak thei dawn a. NATO member a lo ni ve bawk nen, Russia hian NATO thuruk engemaw chen a hriat phah dawn bawk a, fimkhur a ngai hle.
Tin, ram dang himna chu lo dah tha ta ila, US leh Russia hian a rûkin Cold War an kalpui reng a. Turkey leh India in Russia S-400 an leina atang hian Russian Defence Budget hi nasa takin a tanpui dawn a. US tan chuan han welcome chi a ni lo hrim hrim. S-400 ralthuam hi air defence system a nih angin, thil hlauhawm tak a ni lo, mahse a ken tel a behbawm tam tak a awm dawn a. Chung te chu United States hian a hre karh mai a ni.
United States leh Turkey kar thu a chhia
Turkey khawpui chu Ankara a ni. Washington leh Ankara hi hun rei tak an lo inkawp tawh a. NATO hnuaiah kum 70 dawn Turkey hi a awm tawh a, chuti chung chuan an tunlai boruak hi a kal tluang hleihtheih ta chiah lo a ni. Nikuma Ankara in US mi chunga hremna a lekkawh danah Trump Admin chu a lawm lo hle a. Tin Syria rama US leh a hote awmna Turkey in a beih zeuh zeuh avang te khan ram pahnih inlaichinna in a chhiat phah ta a ni ber.
US hian NATO member te chu awlsam takin a ralthuam te a lei tir mai thin a. Mahse nikum khan F-35 jet te chu Turkey a lei tir duh ta tlat lo. A chhan chu F-35 chungchang information eng engemawh hi Russia in Turkey atanga a hriat an hlauh vang a ni.
India tan CAATSA hi a hlauhawm thei em?
Kan sawi ták ang khan, CAATSA hian America hmákhua humhim a tum bur mai a. Trump Admin leh Pu Modi sawrkhar hi an inrem viau mai a. Chumi avang chuan Trump Admin in India chungah hremna a lekkawh lova, Mahse US ah sawrkhar a inthlak dawn nia a lan takah chuan, India pawh a hlauthawng ve deuh niin a lang.
Russia S-400 hi India chuan Crore 39,000 zet sengin lei a tum a. Thil tul tam zawk pawh zawh fel a ni ta bawk. Kum 2018 khan Russian company Almaz Antey Corporation of Russia nen inbiakna an kalpui a. Kum 2021 ah S-400 hian India ram leilung a rap hman beisei a ni.
Hei chauh a ni lo, India leh Russia hian hmalakna tam tak an kalpui a. Tin, India hi khawvela Russia ralthuam siam hmang tam ber a lo ni bawk nen, United States in CAATSA hi a hmang vaih chuan India hian a tuar viau ang. Russia kutchhuak ah kan lung a awi zo bawk si lo, ram hrang hrang kan dawr kual nuaih mai a, US hian thîkthu a tichhe viau chuan Russia hi India hian a kalsan mai a la ngai dawn niin a lang.
Russia siam India in a hman langsar deuhte chu: INS Chakra, kilo class Submarine, Supersonic Brahmos Cruise missile, MiG 21/27/29, Su-30 MKI fighter, IL 76/78, T-20 T-90 tank, Mi-series Helicopter, Aircraft carrier Vikramaditya, te an ni. Heng bakah hian a dang a la tam mai.
CAATSA hnuaiah hian hremna chi 12 a awm a. Heng zinga 10 hi chu a hlauhawm tehchiam lo. Mahse Ram economy in a tawrh pha tur chi 2 a awm.
1. Banking leh Transaction US hian a khapsak vaih chuan, US dollar an hmang thei dawn lo. Khawvel sumdawnna hi US Dollar tel lo chuan a kal thei lo, ti ila kan sawi sual kher lovang.
2. Export sanction: United States hian khawvel sumdawnna, lei leh hralh hi tam tak a thunun a. United States in Export Sanction a puan khum tawh ten economy ah harsatna lian tak an tawk vek.
Turkey leh India hian US atanga hrékna nasa zawk an tawk thut thei reng a. Heng ram pahnih te hian US nge Russia, tih zawhna an la chhang ngei dawn niin a ngaih theih bawk. @TimesofMizoram
Post a Comment