HLAWHCHHAMNA LEH PHUBA

HLAWHCHHAMNA LEH PHUBA

(Jaguar Land Rover leh Tata Motor phena inphum chu)

- Lalmuansanga Khiangte

Kum 1998 khan India chhul chhuak Car changkang hmasaber TATA Indica chu TATA MOTORS khatih laia Tata Engineering and Locomotive Company (TELCO) hotupa Ratan Tata chuan a rawn pho chhuak hlawl mai a. India chhul chhual Passenger Car hmasaber siam chhuak tur hian a kawng a thui ngei mai. Foreign Company-te nena insuihzawm lova India thiamna ngeia car changkang siam chhuah tum chu lung bang sut ang hlauh a ni.  Mahse an beih fat fat-na chuan rah tha a rawn chhuah a. TATA INDICA chuan mual eng a rawn hmu ve ta a. An siam chhuah hlim ah pawh order 115,000 zet an hmu a.

Hlawhchhamna:

Mahse, helama thiamna neisa ni ta lo chu, an car siam thar chu a leituten an han khalh chho ta chiah a, sawisel tur a lo tam hle mai. An sawi angin a chak tawk lo, AC ah buaina a tam, a tlo lo tih vel a ri ta nawk nawk mai a. India chhul chhuak passenger car changkang hmasaber (first India's indigenously developed passenger cars) a nihna an chhuan ve tawh tehlul nen, hlawhchhamna an tem tan ta a. Kum 1999 chhung khan Tata Engineering and Locomotive Company (TELCO) chuan Crore 500 chuang zet an hloh ta mai a. Shareholder ten Ratan Tata an ring zo ta lo a. Bang mai tura nawrna a na ta hle mai. Tata Groups te chuan passenger car segment bik chu hralh mai an duh ta a.

Zahna:

Ford Company Official pakhat chuan Mumbai khawpuia TATA hmunpui a tlawh tumin passenger car segment bik chu an lei duh mai theih thu a sawi a. Chu mi thu bawhzui chuan Ratan Tata hovin Ford hmunpui Detroit lamah kum 1999 tawp lam khan an zuk feh chhuak ta a. Hlim takin an indawr dawn emaw tih laiin an hmuhsit thu an lo chhak chhuak ta nek mai a. Ford Company hotupa Bill Ford chuan “Engmah hre lovin engvangin nge passenger car siam chhuah sumdawnna in tih ve ringawt. In company hi kan lei sak che u a nih chuan intan induhsakna  tawp khawk a ni ang” ( “why did you enter in the passenger car business when you were not knowing of it. It will be a favor if we buy this business from you.”)a lo ti hrep mai a. Zak leh thinrim takin Ratan Tata leh a naute chu India ram lamah an rawn thlawk haw leh ta a.

Bul tan that lehna:

Beidawng lovin Indica chu an thuam tha ta sauh sauh a. An sawiselna lai siamtha zelin Indica V2 an rawn ti chhuak leh ta a. Indica V2 Petrol, Indica V2 Diesel, Indica Cab etc. an rawn ti chhuak zel a. An hralh hnem ta tial tial a. Hlawkna pawh an tel chho leh tan ta a.

Dinhmun Inthlak:

Ford Motor Company hian an company hnuaia Jaguar leh BMW hnuaia Land Rover-te suihzawmin JLR ((Jaguar land rover Limited) division an nei a. Khawvel-ah pawh Jaguar leh Land Rover car nei phate chu inchuanna tam tling khawpa hlawhtling an ni thin a. Mahse kum 2008 a rawn in her chhuah chuan khawvela lirthei siamtu company lian em em mai FORD chuan sum leh pai-ah harsatna tawkin a tla chhe ti tih ta mai a. Loh theih lovin Jaguar Land Rover Automotive chu sum thuni nu-ah ngaiin an hralh chhuah a tul ta tlat mai a. Kum 1999 a hmusit taka an lo tawng khum tawh TATA Motors hnenah chuan JLR ((Jaguar land rover Limited) division an zawrh ta a. Awlsamtein TATA Motor chuan USD 2.3 Million in an lo lei sak ta a. Ford Company khan JLR kha an hlawk pui lo em em a, sum tak tak an hloh char char lai, an company tlachhe (bankrupt) mai tura a lan laiin an hralh ta a ni.

TATA ten JLR an leina meeting-ah chuan Bill Ford chuan Ratan Tata hnenah “JLR min leisak hi kan lawm em em a, kan harsatna min chhawka, kan tan chuan duhsakna hlu tak a ni” (“You are doing a big favor for us by buying Jaguar- Land Rover”.) a ti let ve leh ta a ni.

A hmaa Ford Company tana sum thuni-nu ni thin kha, tunah chuan Tata Motors hlawkna 80% hi Jaguar Land Rover Division atanga an hmuh a ni a. Thawktu 43000awmin Tax an pek hmaa kum khat chhunga an hlep hi 1500 Million Pounds a ni pha hial tawh a ni. Jonathan Swift khan “Vision chu miten an hmuh thiam ve theih loh, lo thlir lawk thiamna hi a ni a ti a. Ratan Tata hian vision chu a nei chiang a ni.

Tichuan, TATA hnuaia JLR leh foreign company dangte nen an in thlun zawmna zar zovin India ramah car changkang tak tak Tata Harrier, Tata Nexon, Tiago, Tigor, Altroz etc. ten mualeng hmu chhovin vawiin thlengin hengte hi India market-ah an hralh tha em em a. JLR phei chuan ram dangah pawh nasa takin an lirthei siamte an hralh chho ta zel a ni.

A tawp khar nan:

He hringnunah hian hlawhchham chang a awm a. Hmuhsit tawh chang a awm bawk thin. Mahse, beidawng lova bei talh talh apiangte an hlawhtling thin. Inngaitlawm taka nasa taka thawk thinte hian mual eng hmuh hun an nei nge nge thin. Miten min hmusit em tih a pawimawh lova, mitin engtin nge min hmuh tih pawh a pawimawh hek lo. Hmalam pan tumin ke ka pen em? ka beidawng dawn em? tihte hi zawhna pawimawh zawk chu a ni. India ram mi dam lai zinga ka ngaihsan ber chu Ratan Tata hi a ni a. Modern India-ah hian famta President Abdul Kalam nen khan ka mi ngaihsan ber an ni.#MKhiangte

Thubelh: Hei hi kum 2021 chhungin Motivational Article 100 tal ka ziak ang tih thutiam #Project100Article2021 hmasaber a ni. #Project100Article2021_Day1