COSMETIC SURGERY HI MIZOTE TÂN A TIH-CHI DAWN EM?

~Dr John Hlychho 
MIZOTE TÂN A TIH-CHI DAWN EM

1. INTRODUCTION
Plastic Surgery tih hi Greek “plastikē” (tekhnē), or “plastikos” tih ațanga lâk a ni a, “siam țha or siam danglam” (to mould/modelling) tihna a ni. Hemi aţang hian “Aesthetic Surgery” (Cosmetic Surgery) pawh a lo chhuak a ni. 

Plastic Surgey hi India-ah B.C. 800 khân Sushruta (the Father of Surgery) chuan a lo hmang daih tawh tih hriat chhuah a ni. India ațang hian Europe, Italy, British leh Khawthlang (Western world) ram zawng zawngah a lo lâr a.  Joseph Constantine Carpue chuan kum 20 chhung zet Indiaa hetiang lam hi a zir hnu-in kum 1815 khân a takin a hmang chhuak. Egyptians, Romans, Greeks te pawhin B.C. 1-na vêlah khân an lo hmang ve tawh bawk.

Kum zabi 20-na a lo inherchhuah khân, a pawimawhzia a lang-chiang tulh tulh a. WORLD WAR I-ah khân New Zealand Otolaryngologist Harold Gillies leh a thawhpuite chu indonaa hliam tuarte enkawl turin US chuan a ruai nghe nghe a, World War II thleng pawh khân an la țangkai hle a ni. 

Kum 1946 khân, Dr. Gillies hian Hmeichhe ‘thil’ chu mipa ‘thil’-ah a thlâk sak theih tâk thu (carried out the first female-to-male sex re-assignment) a puang a! Hemi hnu phei hi chuan khawvêlin Plastic Surgery-ah beiseina sâng tak a nei a, ngaihven a hlawh ta êm êm a ni.

2. PLASTIC SURGERY TUM BER CHU
Plastic Surgery hi chi hrang hrang a awm a. Taksa emaw fuke emaw fuh lo leh mawi lo lai siam danglam leh thup-bo hi a hnathawh pawimawh êm êm chu a ni. Anihna takah chuan, Plastic Surgery lo chhuahna chhan hi chu, pianpui emaw, chetsual vang emaw-a taksa khawi emaw lai ber a nih tur ang ni ta lo (any disfigured part of the body or any physical disfigurement, whether from birth or acquired later), rilru leh taksa-ah ser leh landân hmuh hrehawm êm êm te a siam avanga tih-danglam leh khuh-bo țula hriatna ațanga lo piang leh hman-chhuah tâk a ni ber.

3. HMÊL LEH PIAN DUHTÂWK-LOHNA CHU
“I hmêl mawina îtsîk vangin” tih hla ang deuhvin, kum 40 liam tâ vêl ațang khân, Plastic Surgery hi țangkai lehzualin, Siamtu Pathian (Creator God) ngaihdân pel rawk khawpin khawvêl hian a tuipui ta niin alang. Hetiang lam hna hi, Plastic Surgery pawh an ti satliah lova, “AESTHETIC SURGERY” (Cosmetic Surgery tia hriat lar a ni mah zawk) tiin an vuah ta hial a ni.  

He Cosmetic Surgery hi chuan a țha pangngai, Pathian thilsiam țha pangngai (Natural Beauty) kha, tih-țhat belh tumin, a aia țha zawk leh mawi zawka siam danglam tumin an bei ta a ni (it dare to give finishing touches to God’s most beautiful creation-the human body). An taksa emaw, taksa peng emaw-a an duhzawng ni lo apiang chu an tidanglam ta zel mai a nih chu!

4. COSMETIC SURGERY CHU DUHTHUSÂM A NI EM?
Duthusâm chu ni teuh nâng aw, “a teuh loh mai, a teuh loh mai” tih hla ang kha a ni. Plastic Surgery ti tawh rêng rêng hian, in-enkawl zuina an mamawh a, special cream te, hun leh lum leh vawt leh engkim mai-ah an fimkhur a ngai bik a. A buaithlâk zualna lai ber chu, an invên fimkhur a ngai ta êm êm a, mi pangngaite (plastic surgery ti ve lo te) angin tui te an hmang ve ngawt ngawt ngam lova, lum leh vawt-ah te pawh duh duh-in an awm ve mai mai thei tawh bawk lo hi, a buaithlâk lai ber chu a ni!

Cosmetic Surgery hi chu, Plastic Surgery pangngai, pianpui avang emaw, tawhsual tawh avang emaw-a damchhunga hmuh theih (leh hmuh-theih loh pawh telin) lama ser awm tihbo leh thup-mawi lam kha ni tawh lovin, Siamtu kut-chhuak kha a mawi lohna awm êm êm chuang si lovin, mawi an ti tâwk lova, thiamna hmanga tih-mawi leh-zual an duh ta a ni. 

A tlângpuiin, an hmai, hnâr, hmui, mit, biang, nghawng, hnute, etc. te chu Cosmetic Surgery hmangin an duh dânin an siam danglam ta țhin a ni. Mawi lehzual duh avanga Cosmetic Surgery ti te hi tam tak chuan an mawi-puiin, ti-fuh tak tak an awm laiin, ti-fuh lo, damchhunga ser lian tak in-siam tâ te pawh an awm ve bawk.

5. KA INCHHIR NGAWIH NGAWIH A NI
French mi, Actress hmêlțha tak Emmanuelle Béart chu kum eng emaw zât chhung chu mi tam tak-te ngaihsân rawn leh entawn a ni. Mahse, France-a 36th Deauville Film Festival Opening Ceremony, September 3, 2010-ah chuan Cosmetic Surgery a tih avanga a nun khawngaihthlâk zia leh a inchhir zia a rawn sawi chhuak ta! A inchhir thu a sawi hi a lainatawm tak zet zet, “Profoundly affected by having plastic surgery and would not consider it again… It is a grave act in which you don’t necessarily foresee all the consequences” a ti hial nia!

Ms. Emmanuelle Béart hian ama tawn-hriat ațang ngeiin, Cosmetic Surgery țhat-lohzia sawiin a campaign kual nasa hle a. Kum 2012-ah kha chuan UN Ambassador niin, South East Asia-a  Child Exploitation and Hunger tân nasa takin a campaign a ni.

Hollywood Film Star zingah pawh Leslie Ash, Saffron Burrows, Britt Ekland, Melanie Griffiths, Pamela Anderson, Angelina Jolie leh Meg Ryan, etc. ten an ti ve ngei tih an puang bawk! Nikum 2011-ah khân Britain leh US-a etc., Hmeichhe țhenkhat  chuan an Amul-bâwm (Breast) an siam danglam tirna-ah Company lam ten a țha lo deuh zawk (Cheaper Industrial-Grade Silicon Rather Than The Medical-Grade Silicon) an lo thun sak a ni awm e! An thil thun (Silicon) hian Cancer (Breast Cancer) te a siam theih dawn avangin an buai nasa a nih kha! 

Cosmetic Surgery uar zual ram-te chu, 1-United States, 2-China, 3-Brazil, 4-INDIA, 5-Mexico, 6-Japan, 7-South Korea, 8-Germany, 9-Turkey, 10-Spain an ni. Ram changkang zual France-14na, UK-17na, Australia-21na an ni. Indiaa BOLLYWOOD FILM STAR zingah pawh Cosmetic Surgery hi an uar ve viau a, Katrina Kaif, Preity Zinta, Shilpa Shetty, Priyanka Chopra, Sridevi, Shruti Hassan, Juhi Chawla, Hema Malini, Aishwarya Rai, Madhuri Dixit, etc. ten Cosmetic Surgery hi an ti ve ngeia sawi a ni.

6. MIZOTE TÂN HIAN ENGTIN NGE?
Mizo-te hi kan neih-in a tlin chuan, hnamdang tihdân hi kan la zung zung a. Kan chhiat-pui tâk hial pawh a awm niin a lang. Hmêl țhat te, zei te, nalh te hi duhlo kan awm lo. 

Hnaivai deuh leh tlâwm deuhva a awm hunah chuan, Mizote hian kan ti leh sup sup dawnin a lang. Kan sum neih-in a tlin ve ţan tawh a. Keinin “Engnge ka ei ang a, engnge ka in ang?” kan tih laiin, Mizoram-a Mihausa țhenkhat chuan Ui vûlh tur pawh Foreign ațanga chah thla-in, Rs.1-5 Lakhs chuang man pawh an nei leh nual tawh ni-awm a ni. 

Keini ang Mirethei thil neih zawng zawng (Assets) belhkhawm ai chuan heng Aizawl Mihausa-te Ui man pawh a to zawk tihna a nih chu! Hengte hi chuan an duh chuan Cosmetic Surgery chu an ti thei chiang sa tihna a ni.

Chuvangin, Siamtu min siam dân mawi leh nalh tak (Natural Beauty) duhtâwk lova Cosmetic Surgery kan tih ve hi Mizo-te tân hian a țha ang em? Bible Zirtirna nên a inkalh-in kan hria em? Kan hlâwkpui ang em? Hnamdang leh ramdangah kan hming than phah ang em? 

Kan Nula-tlangvalte hian hnam changkâng leh nei-nungte nupui/pasal an hmuh tam phah ang em? Cosmetic Surgery kan hman avangin ramdanga kan rawngbawlna ten hma an sawn zâwkin kan ring em? tih te hi in-zawt chungin, Plastic Surgery (Cosmetic Surgery Bîk)-in Zofate min luh-chilh tak tak hma hian lo ngaihtuah lâwk ila, i lo khel lâwk teh ang u.

Post a comment

Powered by Blogger.