USA khu Biden-a hmanga tlu chhe tawh tur nge, Trump-a hmanga din thar leh tur?

Dr PC Biaksiama,
25 Jan 21, Thawhtanni.
Mizo Chanchinthar

Thuhma US President inthlan chungchangah thuhnar inkalh tlat – Bidena lamṭangte leh Trumpa lamṭangte thu a awm hrang a. Bidena lamṭang, chanchinbu lian (main stream media) ten Trumpa chanchin dik tak puangtu media reng reng thu chhuah ve phal lova an hup (censor) sak ṭhin avangin, youtube vela kristian Conservative media-te thu chhuah, Trumpa chan ṭhatna lam hawi, hnawksak an tih apiang hi an paih bosak hmak hmak thin a; chutiang harsatna karah chuan thuhnâr dapin Donald Trump-a leh a hmalakna chanchin hi harsa chungin, min lo sawichhetute karah, nuam sa lo taka rawn chhuah ve leh ṭhin kan ni tih chhiartuten min hriatsak avangin a lawmawm thin e. Tun ṭum thuchhuah chu zawhna a tam hle dawn a, hre chiang intiten dik taka an chhan let atan, affirmative ni lo, questions zawngin kan kalpui dawn a ni.

ZAWHNA HRANG HRANG ??? Tun ṭuma kan thupui turte hi an nêp vak lo: mainstream media- CNN leh an ṭhuihruai TV channel hrang hrangten an thup tlat - America-in tunah hian President pahnih leh, Sorkar pahnih an nei ta em ni? America sipaite hian Trump-a thu zawmin Biden-a hi an pawm lo, zahna pawh an lantir duh lo, tih hi a dik em? Vote rûk khawm leh tihchingpen leh dan tinreng bawhchhiaa, dikna pakhat mah tel lo, zahawmna (dignity) awm miah lova an nawr tlin Joe Biden-a hi sipaiten enga tan mah an ti lo, tih te hi a dik em? Insurrection Act kha puan a ni nge ni lo? Ni lo se, tunah khuan America khu Martial Law hnuaia awm a va ang si em? Sipaiten Trump-a hi president anga pawmin, Bidena hi president atan an pawm lo, Pentagon-ah pawh a ke rawn rap dêk lo turin thu an lo pe em ni? Pu Trump-a hi sipai thlawhnain a zin kual ṭhin a, sipaiten an zah em em, an tih hi a dik em?

Trumpa’n Martial law a puang nge puang lo? Trumpan insurrection act chu a sign ngei a; mahse ram pum hriat leh zawm turin Martial Law kha a tawp thlengin a puang lo ṭum tla ṭhak mai khan USA leh khawvel puma amah lo thlawptute rilru a tihnual rawih mai kha a ni a; ama thuchhuak kha mi tinin an ngaichang ṭhup a; ama party mipuite leh sipai hoten an lo nawr reng bawk a; chuti chunga a puang lo tluan chhuak zak mai a, chân loh khâna a pût chhuak ta daih mai khan keini, USA atanga indirect tala Intel source hmu ve pha intia, confi deuha ama chanchin ziaktute pawh dawthei nih kan chang zo ta a; helaia Bidena lamṭangten tifuh inti takin min kâp lêt nasa ta mai a nih hi. "Last minute change" a awm tlat vang a ni a. Mahse hei hi a hmâwr bâwkna ni lovin, buaina inṭanna tur a ni zawk lo maw?

Fake Inauguration: rinhlelh ang ngeiin maw! A hre chiangten Biden-a inauguration kha ‘pre-recorded mai mai,’ Jan 20 a Washington DC a mi tlemte hmaa an neih hma darkar 11 vel khan Spain ram aṭanga anblo thlir lawk vek theih dan kha eng nge ni le? White House-ah, Oval Office-ah Biden-a leh Kamala Harris-i te hi an la lut nang e maw? Thil hi a mak thei khawp mai. Sipai 25000 rualin DC leh a chheh vel an hual khup mai kha, an inauguration veng himtu tur an ni, an ti na a, an ngampa lo nasa mai. Rinawmna thutiam an neih zawha, Isua hming tel lova liberal pastorin ṭawngtaina a hlan hnu khan Biden-a leh Kamala-i te kha lei hnuai train-a White House pan tur angin an lut bo daih an tih hi a dik em? A hriate chuan Capitol atanga White House panna underground train service a awm lo reng reng, tiin, president leh vice president tharte hian bumna bawk hmangin an inthiar fihlim em ni? Khawi lam nge an pan tak?

A hnua hriat leh danin, Biden-a Oval Office-ah thu a, Executive Order an sign-tir zat zatna pindan kha Oval Office lem (fake) a ni a; thlalaka an lantir danin he Oval Office ni awm taka an lantir hi movie siamtuten lemchan nana an hman thin, California state a Castle Rock entertainment hall a ni e, an ti tlat mai hi, dik lohna hria kan awm em le? Khami tûk khan thil awmdan min zawttute ka lo hrilhfiah danin, White House hi Bidena tan thang leh fal a ni e; aiâwt chhungah a lut dawn tihna a ni mai,’ tiin fiamthuin ka lo sawi lûng lûng a; Bidena hian a lo hre ru kar ni tur a ni (😄) Tichuan, an sawi angin Bidena sorkar hi a hlimthlâ mai, Shadow Government tia an sawi ang hi a ni thei em le? Tun thlenga White House a la luah lo a nih chuan (?), tlan chhe chungin a president tihna a ni dawn em ni? Lehlamah Democrat Far Left firfiakhovin an duh duh tihtir tumin remchang an lo la ve mial mial a ni lo maw le?

USA HI SIPAI THUHNUAIAH A AWM TA EM NI? Sipaiten Bidena an duh si lo, Trump-a lahin a chhuah san rih ta bawk si, officiala martial law puang chiah lo anga sawi theih, insurrection act a hmang tawh nia lang bawk si – sipai puihna tel lo chuan Bidena tan ke pên ngaihna vak awm si lo; khuti neih nuaih khu thil awm dan a nih tak avangin, atira president atana in candidate ve tur Trumpa va sawm chhuaktu Patriot United-te leh Sipai hotute inrawn khawmin a ni awm e (?), Trump-a hnenah zawhna pahnih an pe a: Nang hian mahni indah ṭhain America hi sipai rorelna (military rule) hnuaiah a awm tak tak mai dawn alawm. Nang hi sipaiten an pawm ber leh sipaite control thei ber i ni a, president mawhphurhna la turin i lo kir leh dawn lawm ni? Tichuan, inthlan ṭhatna pawh mumal zawka buatsaih anih hunah democracy dan pangngaiin min hruai leh a ngai a ni, tiin Trumpuia hi an nawr a ni awm e. President inthlak apianga an inhlan thin pawimawh ber pakhat, nuclear bomb chunga thuneihna Nuclear Football an tih hi Trump-a hian Biden-a hnenah a hlan hauh lo tia sawi a ni bawk a, amahin a la kawl nge sipai hnenah a hlan zawk?

The USA Inc. Dissolved a ni: Dik takin, Donald J Trump News Views (official), 22.1.21 a Jim Nash-a sawi dan hian tuna Donald Trump-a Patriotic Party-in America din thar leh an tum dan hi tawi te, fiah taka a sawi hi i lo tarlang teh ang:

“President Trump-a hian Insurrection Act of 1807 a signed a, a hmang (implement) nghal bawk. Chu chuan he ram hi Martial Law hnuaiah a dah tawh tihna a ni. Chuvangin Military-te control-na hnuaiah a awm tawh. Gen. Michael Flynn-a chu ‘active duty’ ah koh let a ni tawh a; a kutah sipai hmalakna (military operation) hi dah a ni. He America controltu ‘The USA Inc.’ hi ṭhiah (dissolved) a ni tawh a. Joe Biden-a hi he USA Inc. corporation dissolved (thi) tawh hnuaiah hian dik lo taka thlan leh nemngheh a ni a, awmzia a nei lo. Thuneihna (power) engmah a nei hek lo. President Trump-a khan military hnenah thuneihna chu a lo hlan daih tawh a ni. Tunah hian, he ram hi London khawpui leh Vatican ten 1871 atanga an lo control tawh The USA Inc. Corporation atanga in la chhuakin, United States Republic thar a rawn piang dawn. United States for America Constitution, (1776 original)-ah kan kir leh dawn. Trump-a hian US Republic President nihna a chelh ang, inthlan ṭhat leh emaw, inthlan hnuhnunga hnehtu a nihna anga puan emaw a ni ang.

Military te hi a tir, 1776 America Constitution hnuaia intiamkamna (oath of allegiance) la te an ni si a; Biden-a erawh chu 1871 Constitution tihdanglam tawh, Corporation (Trump-a president laia tih bo tawh) hnuaia rinawmna thutiam la a nih avangin, an thuthlung pawh a inang lo va. Chuvangin corporate America president chu a lem lem, thil awm tawh lo a nih avangin an support dawn lo a nih chu.

Thupuan chhuahna thar, Emergency Broadcasting System (EBS) hmangin politician man tawh leh hrên mekte hnen atanga inpuanna tape tihchhuah a ni ang. A ram pum huap emaw, state emaw, local level emaw atangin sorkar hnathawk ṭha lo tak takte chu pui thama man chhuaha thenfai hna a awm tura ngaih a ni. Boruak inthlak danglam mekah kan awm a ni; ram hrang hrangah te pawh politik inthlak danglam a awm zut zut tih chanchin thar atanga hriat tur a awm reng. Italy sorkar an bâng tawp tawh a; Poland te, Russia te, Kwait te, Estonia, Netherlands, Malaysia sorkar te an tla tawp hlawm a, German Chancellor Angela Merkel-i pawh a bâng bawk, heng bakah hian sorkar tla tur dang an la awm cheu. Nangni hnam chhantu Patriot-te u, lo ṭang zel ula. He post hmang hian thudik chu puan vek a ni tawh ang. He thuziak chhiartute hnenah Pathian malsawmna ka hlan e,” tiin.

Tu Nge USA Chunga Thuneitu? President pahnih, sorkar pahnih an nei elo? Washington DC a duty sipaite chu president inauguration zawh hnuah pawh la awm zelin, January thla tawp thleng an awm dawn tiin Jan 22 khan X22 in a report. Trump-a tana mi rintlak tak Simon Parkes-a chuan DJT NV (official) a Bitchute@1/121/21 atangin, ‘tunah hian sorkar chi hnih an neih thu a sawi. @donaldjtrumpnewsview pawhin ‘Military is in control. Soon, President will be the 19th President of United States of America,” tiin Donald J Trump-a Inauguration ni tur chu 4th March a ni ang, a ti bawk. 19th president an tih nachhan hi, 1871 hma lam zawng khan US Republic-ah president 18 an lo nei tawh a. Foreign Corporation-in USA a lak hnua mi nen 45, tuna mi hi 46-na a ni. Trump-a hian White House chhuahsan mahse, Bidena lakah a tlawm (concede) chuang lo va, a lehkha hnutchhiahah pawh, “Joe, you know I won,” a ti ngat a nih kha.

Bidena Enchhinna: ‘Bidena hi han president teh reng se, kan lo thlir ang chu,’ ti ni awm taka Trumpa’n a kalsan hnuah Bidena chuan inauguration te pawh chan chawpin, lemchan thilin a bei a; White House-ah a lut ngam lo nge, chan chawp Oval Office atangin hna a thawk a; ni khat ni atangin buaina hlir a thleng chho va. A lamṭang emaw an tih BLM leh Antifa-ten Bidena duh lovin buaina an chawk chhuak a; an ram hausakna siamtu oil industry a khar ṭan nghal a; ni hnih khat chhungin mi sing tam tak eizawnna a laksak a, hna hmu lo a sang telin a siam nghal a. Kristiante tana ṭha lo leh rilru tina zawngin nau tihtlakna a tihluar a, transgender nen, same sex marriage a tipunlun a. Rin ang ngeiin China a rawn huangtau nghal a; Sikkim ramri ah pawh India sipaite a rawn hel nuai ṭan leh ta. Kar khat a tlin hmain Bidena policy chuan mipui lungawi lohna namen lo a thlen a. Mipui nun a rûm a. Ram chhung leh pawn vengtu sipaite leh National Guard te, police te leh mipui zatve zetin an president atan an pawm lo va. Chanchinbu mite hmaah zawhna pahnih khat lekin a chhaih buai nghal mai a. Khawvel ram ropui bera President meuh ni turin a fit lo, a qualify lo tih tlâng hriat a ni a. Sipai thuneihna a ngam lo va; chuvangin, kar khat a chhuahsan hmain ram mipuite leh sipaiten Donald Trump-a chu martial law hnuaiah president mawhphurhna la leh turin an ko leh ta a ni awm e. Chuvangin, Bidena hnuaia ramin a tlukchhiat ai chuan, Trumpa kaihhruaina hnuaia America ropuina siam thar leh turin US mipuiten beisei tur dang an nei chuang lo niin a lang leh ta. Tha lo thlah tawhte pawh i ṭawngṭai uar leh sauh ang u.

Post a Comment

  1. This is a very informative page. I am Tamilrockers. Tamilrockers is a movie webiste you should visit that.
    And Kuttymovies ia also a movie website. Plz support us.

    ReplyDelete

Powered by Blogger.