KUHVA RAH RO TAWLH HI THIL SUAL TIHNA A NI

KUHVA RAH RO TAWLH HI THIL SUAL TIHNA (CRIME) A NI- PART-2

-Ruatfela Nu

Mi pangngai chin chuan Burma aţanga India-a kuhva rah tawlhin mihring mimal nun, khawtlang, ram leh hnama nghawng ţha lo a neih mek leh a neih zel theihte an ngaihtuahin an hlauthawng a. Kuhva rah ro tawlh hi smuggling a ni a, a tawlhtute chu smuggler an nihzia leh a nghawng (impact) lam ziak turin min ngen hlawm a. Vanneihthlak takin khawchhak tlangdungah hna avangin thla thum chung zet ka zin kual a, kuhva rah ro tawlh leh a kaihnawih zirchian pahna hun remchang ka nei hlauh a, an mi ngenna zahawm tak pawh ka ziak theih phah a. “Kuhva rah ro tawlh hi thil sual tihna (crime) a ni” tih ka ziak ta a. ‘Sawrkar a ngawih reng chuan a chawtani nen lam kan a ziak zel ang a, eng emaw tih pawh a la ngai mai thei’ tiin sawrkar ka vaukhan kha a ni a. Mizoram chief minister emaw, home minister emw, chief secretary emaw leh director general of police emaw ten kuhva rah ro tawlh titawp tura hma an lakna thawm engmah ka hriat loh vangin ka ziak leh ta a nih hi.

Tin, dated 13/11/2019-a Ministry of Home Affairs, Department of Border Management-in Manipur leh Mizoram chief secretary te he smuggling ti tawp tura thu a pek leh Champhai bawrhsap, (district magistrate)-in dan loa kuhva rah tawlh leh a nghawng tha lo taka vanga dated 15/12/2020 atanga thu leh awm hmaa kuhva phur bik tana kawng a khar sutna a awm lo a nih chuan ministry-ah emaw, law court-ah emaw zualko a ngai ngei dawn a. He sualna ka dodal vanga ka nunnain a tuar hial a nih pawhin ka thihchhanah “kuhva rah ro tawlh leh a kaihhnawih” tia ziak a ngai ang.

Article feedback leh a chawtani: Kha article thluaithlumna ka hmuh/dawn let zinga pahnih chuah tarlang ila. Ka hmelhriat pakhat chuan- “kuhva rah ro tawlh ve turin nuai 100 ka invest a, motor lian lei tumin ka dawr mek bawk a. I article avang hian ka inhnuk dawk vek. I duh chuan ka hming pawh tarlang rawh. Min hre teuh ang” a ti. Ni e, keipaw’n ka hria. A sawi dik ang tih pawh ka ring bawk.

Mi zawng zawngah hian thil tha tih duhna chi a awm vek a. Chu chi chu kan thinlung lei thaah hian a mu mai mai a. A chhan pawh keimahni ngawta ti lo a, thanlen tir tura theihna kan neih loh vang a ni. Mihring mimal tina chi tha kai tho tur chuan inhrilhhriatna (awareness) kan dawn a ngai a. Sakhaw lehkhabu awm a, fuih/ziltu an awm bawk a. Mihring changkang leh mi nunsang chuan awareness chu an pawm thin. Nun hi sumah ni loin nunah an teh a, a tha lam kawng zawh turin a tha lo lam an thlauhthla ngam thin a ni. Hei hi kuhva rahro tawlh duh leh lo pa thinlung lei ţha aţanga chi lo to/ţiak chu a ni.

Pahnihna- “Khatiang tak kha a lo ni ang tihngaihna reng reng ka hre lo. Ramri kana sumdawnna pakhat ve maiah ka lo ngai a sin. Mahse khatiang taka i hre chiang a nih si chuan i ziak hma khan CM emaw, sawrkar hotu lian emaw sawipui hmasa la a dik ka ring. Dik tak chuan thil tha ka duh in ti a, hria in-inti bawk a, ziaka ram hruaitute beih nan inhmang a, hmaichhanah tawngka ngeite hian in thil hriat leh hmuh hi sawipui ve thin ula…” min ti zek a. Kuhva rah ro tawlh chungchanga ka thil hriat CM sawipui tumna ka nei lo chu ka inchhir rum rum a ni. Hetah hian thiamthu ka sawi mai a ni ang chu.

Kawmchhak nu sualzia sawi dawn chuan kawmthlang nu felzia sawi a ngai: CM Pu Zoramthanga hi chutianga ram leh hnama thil tha lo thleng mek titawpa tura ngen/sawipui chi a nih leh nih loh ka hre lo a. Pu Lal Thanhawla CM lai kha chuan ram leh hnama thil tha lo thleng titawp tur emaw, tihtawp a theih loh pawha a tih ziaawmna tal zawng turin ţum 4 lai ka luh chilh a. Kan inhnial a, taipawng zawrh zawrhin ka hnial pawng pawng ţhin. ‘Sir, he thil kher hi chu nang aiin ka hre zawk’ te ka tia! “I hre zawk ang chu, a field a thawk i ni tlat a lawm” a ti ve mai ţhin a. 2013-2014 a hmeichhe tleirawl eng emaw zat, ruihhlo ngawlvei (drug addict) ni hauh lo, ngo an duh luat vanga eng damdawi emaw ni (chhul lam damdawi a ni awm e) ei vanga overdose-a an thih zawih zawih khan ka mangangin ka luh chilh a. ‘Sir, i khua leh tuia mi, hmeichhe tleirawlte zingah thihna rapthlak tak a thleng mek a, he crisis hi a te lo a nia, hma i lak nghal a ngai. Hei chutiang zat chu thi ka chhinchhiah theih a ni’ ka’n ti bawrh bawrh mai chu- rang takin a concern department a phone kual zung zung a, a hoin press meet an nei nghal a ni. Kar khat hnuah ka thiltihte avanga lawmthu min rawn hrilh leh pahin, “Mi fak leh bultumtu nih (credit) lah i hlawh der si lo a… ţul nia i hriat thilah chuan i duh hun hunah min rawn hmu rawh” a ti. Ka hna atan intiamkamna mumal tak lo nei lo ila chuan a hnung ka zui duan duan awm e.

Serlui B Hydel Project compensation chungchangah a bungalow ah ka hmu a, pawnah media hoin min chang ţhup a, ka hmanhmawh si. Pi Rii a lo ţawng ve a, “Lo ţawng ve suh” ka ti a, a nui huk. Inquire Commission din turin ka ngen a. Rang zetin “Chairman atan tunge i duh” a ti a, a aia rangin “SL Sailova I.A.S (retired)” ka ti a, a din nghal. Hun dang lehah, “Ka pu, naupang pawngsual leh a kaihhnawih hi high level-a sawiho i huaihawt a ngai, prosecution lamah chinfel ngai a awm,” ka’n ti leh thawr a, a huaihawt a, khatih laia law minister a smart bawk a. Rah ţha tak a chhuah. Kum upa (senior citizen) leh rualbanlo te hamţhatna chungchangah ka hmu bawk a, ka beisei ang chiahin hma a la ţhin. Keima tan ka mamawh lo tih a hrechiang thlawt a ni.

Congress sawrkar kha ka bei nasa ţhin hle a. Mahse, CM PS te hnena “Chutiang khatiang chungchangah CM ka be duh a, min biak tir phal em le?” ka tih apiangin, “Ka pi, lo vuan la, a biak theih leh theih kan han ngaichang ang e aw” an ti ţhin a. Ka be thei ziah a, ramhnuk khawih thil a nih ţhin avangin hmaichhanah kan sawi zui dun ngei ngei bawk.

CM Pu Zoramthanga hian khawtlang, ram leh hnam nuna harsatna thleng mek sutkianna zawng ho tura civil society thawhpui leh an thurawn lak lam hi a ngaihtuah phak ang em? ‘Mipui awka hi a ngai pawimawh ang em?’ tih ka hre lo a. Min hmu duh ang em tih ka hre lo lehzual!

Nikum khan CM Pu Zoramthanga PS te hnenah appointment ka dil a, ka hmuh duh chhan pawh kuthnathawktute tan a nih thu ka hrilh tlang a. Covid-19 vanga hmuh theih a nih loh thu min hrilh a. E le, ka ti mai a. CM hmuh ka dil aţangin thlaruk zet a liam ta a, min pe dawn lo a ni mai thei a ni. Kuhva rah tawlh chungchanga harsatna thleng mekah pawh hmuh dilin awmzia a neih ka ring lo. A cabinet zinga mi ngeite pawhin an hmu thei lo fo tih thuthangte a awm a. Tin, thuthang/khawlai titiah CM hi kuhva rah ro tawlhtu, smuggler-te nen an inhnimhnai hle tihte a awm a. Thuthang mai mai ni lul rawh se. Kuhva rah ro tawlh hi dan bawhchhiatna lian tak a nih avangin CM meuh chu hun reilote chhunga khilama aţanga kan unau rawn pem thla, kuhva rah ro tawlh vanga hausa thut thutte huhang hian thunun awm lo tak a ni a. Ramri kalthelha dan loa sumdawnnain a influence loh ka beisei hle bawk. Tun dinhmun leh hun lo la kal zel tura a nghawng tur hi a ţha lo takzet si.

A nghawng hlauhawm ber tur: Tangkain engkim a sikthlukna ramah hian, smuggler ten kohhranah thawhlawm, a nuai tel telin an pe bawk a. Thawhlawm a pung thur thur. Kuhva rah tawlha sumdawng hmeichhe pakhat, Baptist kohhran miin thingtlang khaw Presbyterian kohhranah cheng nuai 2 a thawh a, lawm takin an pawm tih thawmte a awm a. Kohhran chu chunglam chinfel tur a nih vangin ngaihkhatah ngai ila. Thil thleng thei hlauhawm ber chu- kuhva rah tawlh leh a kaihhnawiha inti hausate hian an tangka hmangin khawtlang, ram leh hnam hruai hna an kherh ngei ngei ang. Politics field-ah an zuang lut ang a, MLA leh minister an la rawn ni lo ang tih tunge sawi thei? Kan political party te lah hi vote leh tangka sum duh vek an ni a. Chakma vote pawh an duh tih ang thoin, dan loa tangka ngahte chu tupawh ni se, an tangka ngah chhan chu smuggling vang pawh ni se, an party-ah an tlaktlum tir zel ang a, party unit hruaitu atangin block leh headquarters-ah an lut ang a, tangka ngah vang liau liauin MLA candidate chu an tan ngasa a ni mai.

Khawvel tawnhriat ţha lo tak chu dan loa sumdawng hausa ten, an hausakna sum leh pai hmachhuana ram inrelbawlna vawnfung an chelh thei/ ţhin hi a ni. Burma ramah hun rei tak sipai rorelna avanga (tunah pawh a thleng mek) inrelbawlna chhiat vangin a chhunga cheng mihring ten nung khawchhuak turin engkim an tih a ngai a. Chutah chuan ‘thamna’ chelek a ngai nasa hle a. Chu chu smuggler ten Mizoramah an practice zui a nih ngat chuan, kan ram dinhmun chu Colombia, Mexico, Afghanistan-a drug lord/cartel ten rampum an thunun ang leh Latin America ram ţhenkhat, Cocoa aţanga ruihhlo siam chhuakte ang khu kan hmabak a ni ang.

Burma mi hi ka haw ve ngai lo. Mizoram mipui ten an huata hnawhchhuah vek an tum lai pawha thih ngam lu pua an aiawha ding ţhin ka ni. Mahse, smuggling hmanga inchhek lian ten rorelna an rawn chan emaw thuk taka an inrawlh emaw hi chu a dik lo. Mizorama awmsa ten dan lova thil an tih a rorelna an chan a dik lo ang chiahin hmun danga kan unauten dan lo va thil an rawn tih a rorelna an chan emaw thuk taka an inrawlh emaw hi a dik chuang lo. Unau kan nihna te, harsatna tawk nasa an nihna hi dan lova thil tih theihna tur licence pawh a ni tlat lo alawm.

Thuneitute u, hmuhsit leh nuihsawha kan awm loh nan kuhva rah ro tawlh leh a nghawng hi inngaihtuah chian a ngai. Hna avanga Mizorama hnam dang awm, Assam Riffle hotu, police hotu leh custom & central excise hotu bakah a tawlhtu, smuggler te ngei gei pawh hian Mizoram leh a chhunga cheng hnamte hi min hmusit lutuk phah ang e.