“Hmanah an duh lo che, aw ropuiin leng tawh ang che.”

Donald Trump 2021 Election

Dr. PC Biaksiama,
3 March 21, Nilaini.

A hmelmaten an sawisela, an sawichhiata, dawta sual tinreng tia an puhna kâra Donald Trump-a mizia leh a hmel dik tak lo lang chiang ta zel chu: mi dik leh mi rinawm, corruption laka fihlim, pa inngaitlawm, dawhthei, mi huaisen, a thutiam tawh tipuitlingtu, a ṭul chuan engkim huam leh tuar tlang ngam – US politician zingah amah tluka America hmangaihtu an awm lo. Presidenta a ṭan lai ngei pawhin amah ngaisangtu mi sang tam tak chuan America President ropui ber nia vawi duai lo an lo puan tawh ṭhin a ni. President term hnihna tura inthlana hneh taka tling ni mahse, a hmelma Democrat Left-wing ho leh Fake media leh Big Tech ho ṭangrualin suma inthamna, inbumna leh dan bawhchhiatna tinreng hmanga kha election result a rûka an rûk chhuah tak meuha, anmahni candidate Joe Biden-a president ni tura an nawr tlin lai khan, Donald Trump-a chuan a power hmangin martial law puangin thuneihna a kengkawh chhunzawm thei reng a; mahse tuar pawh huam zawkin rukru pa Biden-a chu lalṭhutthleng a kian thei tlat mai te kha khawvel mak tih a hlawh a; tun thleng hian America mipui zahve zetin an President-ah an la ngai reng tho va; America sipai chak leh thiltithei – Military te phei chuan he rukru pa Biden-a hi an president atana pawm duh lovin, chibai pawh bûk duh lovin, Donald Trump-a hi an Commander-in-Chief atan an la vuan tlut mai a.

A khingpui pa hnenah lalṭhutthleng a ken hnua, mi pangngai ve mai (ordinary cituzen) a nih tawh hnu pawh hian, a zin kualnaah Biden-a chan phak loh, America President-te an chawimawina Air Force One thlawhtheihna ropui ber – lal in thlawk thei an tih hial chu, military-ho ta a ni si a, an mi ngaihsan zawk Trump-a zin kual nan an la pe zar zar mai a ni awm e. Tun Sunday mai pawh khan, Republican party-ten Orlando khawpui, Florida state a Conservative Political Action Conference (CPAC) in khawmpui an neihnaa thu a sawi dawn te khan, Trump-a chenna Mar-a-Lago, Miami nena a inhlat vak loh vei nen, tlai sumo service a chuan phei ve mai na phak lekah khan, Military te chuan Trump-a chuanna turin AF-1 an rawn thawn vang vang a ni. (Bidena erawh chu fake AF-1 siamchawpah a chuang ve ṭhin). Trumpa'n Hall chhunga thu a sawi lai te khan piah lawk airport-ah chuan AF-1 kha a inhung ruau mai a ni. Chu pa mak tak mai chanchin ṭhenkhat chu tun ṭum hian kan thlir ve dawn a ni. Chumi kan sawi zel hmain Biden-an thla khat zet sorkarna a chelh chhunga a thiltih dan manganthlak zia hi lo thlir hmasa ila.

Biden-a Administration: Mipuiin an lâwm em? Teuh lo mai! Inthlan hma khan Biden-a vote-tu America mipui tam tak khan Biden-a mizia tur an lo hre reng reng lova; tun hmaa Democrat president te ang tur emaw an lo ti mai a. Mahse a tir aṭanga a hmalak dan an han enin ngaihṭhatna tur engmah a ti lo. An buai nghal luai luai. Hna hmu lo an pung tual tual. President a nih hmain Covid hrilêng te chu tireh nghal thei turin a insawi a; president a nih hnuah engmah tih theih a neih loh thu a sawi nghal. Mipuiten Bidena an lo thlang hrim hrim hi an inchhir, mahse inchhir a sawt tawh si lo. Thla khat leh a chanve chhung hian Donald Trump-a thiltih ṭhat te a ṭhiat char char ringawt mai a ni.

A hmasain, dan lova America ramah ram dang mi sang tam tak ni tina an lo luh rûkna Mexico ramri hungna bang, Trumpa’n mel 500 vel lai a lo hung tawh hna kal lai chu a titawp hmiah a, heta thawk mi sang tam takte eizawnna chu a tawp nghal hmiah a. Tunah hian Mexico leh Central America ram hrang hrang aṭangin drugs leh mihring tawlhrutu te, gang rualte, a thei apiang ni tinin Americaah covid test nei lovin an lut ta hum hum mai a. (Bangladesh aṭanga Chakma lo lut hum hum, an vote duh vanga kan politicianten pawi an ti miah lo ang mai hi a ni a). Kan Mizo ṭhalaiten hna an hmuh loh laia vai hovin hlawh tlem zawka an rawn thawk zel ang mai an ni a. Trumpa policy-ah chuan phalna nei lova lut rû-te ṭha taka a lo control vek tawh kha, a khawlo leh zo tawh. USA leh Canada ram insumdawn tawnna tur Keystone Gas Pipeline lian hnathawh lai Bidena’n ngaihtuah chiang hlei lova a han cancel ringawt mai chuan, chuta thawktu nuai tel hna hmu lova a siam nghal bakah, Canada sorkar a tilawm lova, USA a state ṭhenkhatte pawhin an dodal nasa a ni. Trump-an office a chhuahsan nia gas man chu dollar 2.23 a nih laiin, Bidena’n kar 6 office a chelh hnua gas man chu dollar 2.87 ah a sang chho daih hman.

Tun Sunday CPAC inkhawmpuia Trumpa’n Biden-a record a sawi dan chu: “President awm tawh kan hriat phak chinah thla khat chhunga chhiatna thlentu lian ber a ni, a ti. Trumpa’n “America first” a ti a, Bidena’n a policy hmangin “America last” a ti thung; mahni ram mipuite aiin ramdang, globalist policy a kalpui avangin. Trump-a chuan Bidena policy chu – “anti-family,” “anti-economic,” “anti-peace,” “anti-wall,” tiin, dan lova ramdang mi drug smugglers te, child smugglers te USA a a luhtir ruih ruih avangin Biden-a chu *‘ram chhung himna atana mi hlauhawm a ni,’ a ti. Democrat lawmaker pawhin Biden-a border policy hi ram chhung tana thil ṭha lo leh him lo a ni tih a puang hial.

Kar hmasa khan Joe Bidena chu Vice President a nih laia Ukraine rama Burisma company chuan US dollar 900,000 Bidena hnenah thamna a lo pek thu, Ukraine Criminal Court hmaah puan chhuah a ni a; Trump-a tih ni se, khawvel puma chanchinbu an luah khahtir vek mai tur; mahse Left-wing mainstream media te chuan an thup tlat mai a ni, tih Official Charlies Ward show chuan a sawi.

Bidena foreign policy ber mai hian khawvel sorkarte nuih a ti za. Trumpa’n Israel a duhsak em em a, malsawmna leh hmuingilna a dawn mek laiin, Bidena chuan Israel do zawngin policy a kengkawh a, Palestinian hote nen ang khat rengin a en a; Trumpa’n inremna siam pui tlaka a ngaih loh Israel hmelma Iran nen nuclear inremna siampui leh a tum a; hei hian Arab ram lian leh hausa Saudi Arabia te, Israelte leh Arab ram dangte a tithinur hle a. Dik takin Bidena Middle East policy avangin USA chuan a zahawmna leh a ṭhiante a hloh ta. Sawi tawh ṭhin angin, Asia khawchhak lamah lah chuan China chuan Bidena, president corrupt ber leh suma an lo lei tawh chu pawisa tawh hek lo, an inluling tial tial a; Trump-a a awm tak loh veleh China fuihpawrhin Myanmarah sipai sorkarna a lo ding leh ta a; tunah hian Myanmar ram khawpui tinah zalenna sualtu mipuite leh sipaite an innawr tawn ta reng mai a; ralthuam nei ve lo mipui tam tak thi leh hliam an awm tawh a; Burma ram pumah thisen a luang ta a ni, ni tinin. Trumpa awm lo zet chu, khawvel a buai ta rum rum mai le.

January 6 Thubuai: Tu Mawh Nge? Thu hlui leh kan hriat tawh ni mahse, Donald Trump-a an impeach nawn lehna chhan bera an sawi chu Trump-a supporter-ten Jan. ni 6 a US Capitol building an luh chhuah a, Congress rorel lai an tihbuai a, tukverhte an chhut chhiat kha, Trump-a fuihpawrh vekah an puh vang a ni. Chuvangin dan bawhchhiain president a nih tawh loh hnuah pawh an impeach ta reng reng a nih kha. Amaherawhchu, Senate a an debate khan Nancy Pelosi kaihhruai Democrat-ho chu namen lova tihmualpho an nih kha. Khang Trump-a ṭantu mipui pawisawi lote zingah khan thil sual ti tur leh Capitol building bei tura kaihruaitute kha Democrat misual BLM te leh Antifa lo inphûm rû an ni tih man chhuah an ni. Chung zinga hmalatu ber John Sullivan-a phei chu Capitol building chhunga an thiltih dan thlalak la tura an lo tih sa a ni a, CNN leh NBC ten $ 35,000 ve ve, a vaiin $ 70000 (India cheng nuai 50 vel) an lo pe reng a lo ni a, an pekna receipt te thlengin man chhuah a ni! A awmzia chu, fake news hotu CNN khan namen lova Trump-a fuihpawrh ang leh kha buainaa mawhphurtu ber anga a an lo puanga, a finfiahna anga thlalak an lo tarlante kha, anmahni zawk ruahman lawk a lo ni reng si a! An inchachhuah mualpho awm teh asin. 2018-19 a an impeach-na chhan, Russia puihna avanga tling a ni, an tihte kha, kum hnih chhung investigation bei bur bur mahse, a hektu lam, miten ramhuai pitar tia an sawi huai huai House Speaker Nancy Pelosi-te rilru chhiat vang mai mai a ni a, dawta inpuhna mai a ni tih laihlan a ni. Dik takin Trump-a president chhung zawnga Democrat hovin an puh chhiatna zawng zawng deuh thaw kha Dem-ho phuahchawp vek a lo ni a. An suahsual dan hian chin tawk a nei lo reng reng. Setana role luahin a chhun a zanin an hêk char char mai a nih kha.

Fake Media te thu veivir dik lo chu Trum-a chanchin kan lo hriat hmasak te kha a chhe zawng hlira mainstream media (fake news) te puan a lo ni a; mahse harsatna kara, nitina an hek nuaih nuaih chunga Trumpa mize dik tak lo lang chu dawhtheihna, hriatthiamna, hmangaihna, midangte chhiatna thlentu nih aia mahni'n tuar mai a huamna te, ṭawngṭaina ngainaa Pathian ṭih mi a nihzia chu a rawn lang chhuak ta. Entirnan, ama party Republican hotu Mitch McConnell-a chu Trump-a impeach a, politik field-ah tho leh thei tawh ngai lo tura Pelosi nena ṭangrual kha an ni a. Mahse duh angin an hek thla leh thei ta si lo. Trump-a dinhmun a invâwr san daih laiin McConnell-a chu mipuiin ‘phatsantu’ an ti ta huai huai mai a. A dinhmun a chhe dawn tih a hriat veleh Trump-a chu a be tlawn leh a, mipui ngaihdan pel rawk khawpin Trump-a chuan a lo ngaidam leh thei ta mai a. McConnell-a awmna state Kentucky chhungah McConnell-a dinhmun tlahniam tawh, point khat chauh ni tawh chu, Trumpa'n a lo support vang ringawtin zan hnih khat thil thuah point 20 in a zuang sang leh dawrh mai a ni. McConnell-a hi Trump-a tan rinawm zel tak maw? Ka rin dan chuan, ‘teuh lo mai,’ remchang a hmuh veleh a phatsan leh dawn, tih hi a ni.

Democrat Governor Cuomo Mualpho New York state governor Andrew Cuomo-a, Democrat mi chhuanvawr leh Trump-a dotu langsar tak chu tun hnaiah hmeichhe lakah a mualpho nasa hle a, a hna aṭanga bang tura nawrna pawh a nasa. Tun ṭum chu political party eptu Republican lamin an dem pawh ni lo, ama party Democrat politician lam aṭang zawkin a chet dan chu ‘êm êm a’ an ti ve tawh a ni. Office-a ama hnuaia thawk hmeichhe pahnih, Lindsey Boylan-i leh Charlotte Bennett-i te lakah mawi lo tak taka a lo chet dan te, an duh lo chung a lo ‘kiss’ vel te, mutpuia a lo thlêm thute an rawn inpuang vek a. Cuomo-a chuan an puhna te chu sawinep tumin, fiamthu mai a ni e’ tia insawifel a tum a, za lo takin nuih liam mai a tum vel a; mahse heng hmeichhia a lo khuaikhemte hian an ngaizam mai mai si lo va; tunah hian a chungthu rip tak ngaihtuah turin investigation pawh a kal mek. Hetia an buaipui lai hian hmeichhe dang, Anna Ruch-i pawhin a laka Cuomo-a chet dan leh sex hmanpui a tum dan te a rawn report ve bawk. Heng bakah pawh hian hmeichhe dang dang engzat chungah nge mawi lo taka a lo khawsak tawh tih hi, a unaupa Chris Cuomo-a thawhna CNN te chuan thup mawi tum mahse, mi titi luahtu ber a ni ta.

Hetia hmeichhe laka thubuai a neih hma hian Governor Cuomo-a hian covid-19 thihna avanga thil tihsualah hmingchhiatna namen lo a lo nei tawh a. Covid-19 thihna chungchangah engkimah Donald Trump-a mawhchhiat zawnga hma a lak lai khan, ama thiltih dik loh avangin New York state chu covid thihna tam ber a ni a; Nursing Care-a dam lo dangte enkawlna hmunah covid hrikaite a admit ṭeuh avangin, nursing care-a dam lo chak tawh lo awm saten an vei phah a, an thih phah hnem em avangin mitthi zat an thup bo ta ringawt a; mahse a hnuah puan chhuah a ni leh tho si a. Tichuan, Democrat governor chhuanawm taka an ngaih, 2024 a President election a Democrat ticket a din ve hial in beisei kha, tunah chuan thubuai serious tak tak awrhin, mualpho takin a hna aṭangin a bâng dawn nge, paihthlak a ni zawk dawn, sawi theih a ni ta lo. A thawhpui, rukru president Biden-a pawhin a pui thei ngût emaw chu!

Report hmasa lama kan sawi tawh angin USA a state lian leh hausa ber nia sawi ṭhin California state governor Gavin Newsom-a, Nancy Pelosi vahpa, Democrat pawh mipuiin a policy kalpui dan an duh loh em avangin bâng turin signature campaign an bei vak a; an mamawh zat mi nuai 15 vel chu an tlin tawh a ni awm e. California khu Democrat party chakna ni ṭhina ngaih a ni na a, dik taka free and fair election neih ni ta se, Republican hi an tam tawh zawka rin a ni. California state-ah hian Republican hi chak ta se, Trump-a dotu mi langsar pui pui awmna a ni a; entirnan, Big Tech-ho - Amazon, Google, Twitter, FB etc. te hmunpui Silicon Valley awmna a ni a; an capital Los Angeles te chu Hollywood film industry hmunpui a ni bawk a; heng mi suaksualho tawmkûk – America ti-corrupt-tu berte awmna hi han nuaiin han nawp ve thei tawh sela tih hi nghahhlelhawm tak a ni.

TRUMPUIA DINHMUN NGELNGHET CHHO ZEL 2016 President inthlanah sumdawng hausa, politik la khel ngai lo Trumpa kha beisei phak lohvin a tlinga, president a han ni nghal ta mai khan an party a mi senior zawkte thîkna a chawk thova, tla se pawi an ti miah lo va. Hei vang hian House-ah leh Senate-ah Democrat-ho an ṭanrual ṭhap laiin Republican zinga mi engemaw zatin Trump-a an phatsan zel mai a ni. Supreme Court-ah pawh a dang chuang lo. Trumpa’n Supreme Court justice ni tura a duhsak leh a ruatte ngei pawhin an phatsan duh tho va; ama Vice President ngei leh a la kawppui tur Pence-a lehzel pawhin America leh khawvel hmaah a phatsan duh tho va. Mahse Donald Trump-a mize ropuizia chu, thuneihna duh se, mipuite leh sipaite pawhin an nawr huai huai laiin, martial law puana thuneihna sang ber la chelh reng thei a ni; sipaiin an ngainain an zah si. Mahse, a chhan leh vang ber hriat lohvin, lalṭhutthleng kha tling lo zawk tih hte reng chungin Bidena kha a kian thei tlat a ni.

Trumpuia makna em em chu, President dinhmun kiana ama ina a haw ta kha, a hma ai mahin a lâr ta hluai mai hi a ni. Lâr sa phei chu a ni e; tunah hi chuan mipuiin an ngai, an thlahlel, White House a lo kir leh thuai turin an ṭahawh ngawih ngawih a ni ber. Ama fan ruhkawl zual QAnon an tih te, Patriot an tih pawl te leh proud Boys te chuan naktuk, March ni 4 hian president anga lo kir leh turin an beisei hial; chu erawh chu a ni em dawn em ni? kan ti a. Bidena sapatâl nasa lutuk leh Democrat-ho han inchhekarbâwm vel hmu peih lo hian Trump-a lo kir leh hun hi an thlir a, an nghakhlel a ni. Republican mipui tam ber khuan an president angin an la ngai tlat a; a awmna Florida state khawpui, Miami tuifinriat kam, Mar-a-Lago chu mi tam tak chuan White House dik tak angin an ngai.

Engtikah nge Trumpuia a lo kir leh dawn? Sunday, Feb. 28 zana an inkhawmpui lian CPAC-a a thusawiah khan Trump-a chuan 2024 inthlanah a in candidate leh mai theih thu chu a thawi thamin a puang tawh a. Mi tam tak rilruah erawh chuan, “2024 zawng a hla em mai, tiin, tun thla hnih khat chhung ngeia sipaite chakna nena lo kir leha, he danbawhchhepa (illegitimate president) rawn paihthla tur hian mipui lam ‘We The People’ ho chuan sipai hotute hnenah pawh lehkha te an thehlut tawh a ni. Tihchhan pawh an nei ṭha fê mai. Kha inthlana vote tihchingpen vek te, dominion khawl dangdai tak mai an lo control avanga vote tikhawlotu te, rorelna court zawng zawngin dan palzûta thuneihna inpe chawpa, covid hrí chhuan lama state lawmaker-ho kalkâna Democrat ṭan thatna tura dan an siamchawp te, Constitution vawng him tura din Supreme Court-in an hnena thubuai thlen, en pawh en duh lova an lo hnâwl tawp zel avang te, rorel khawl sang ber Congress-ah ama thawhpui bul ber Mike Pencea’n a phatsan lehzel avanga a tling lo zawk Bidena tlintir anih avang te bakah, kha inthlanah khan Joe Bidena tih tlina, Trump-a tihtlak a nih theih nan foreign ram hrang hrang – Italy, Germany, Spain, Iran, Russia leh China te an inrawlh tih intelligence report a awm a; China rama chhut ballot paper maktaduai engemaw zat hmanga Bidena vote tlin a nihzia te pawh fiah iara man chhuah a ni a. Mahse heng thudik (factual evidences) te lo endik turin thuneitu zawng zawngin tukkhum chhah an chhawn khum vek avangin, sipai chakna Military Tribunal chiah hi DIKNA hmu chhuak theitu tur leh thil dik lo man chhuak theitu tur THUNEITU AWMCHHUN a nih tak vang a ni. Khang inthlan thubuaite kha rel fel lohvin awm reng ta se, USA chu inthlang ram, democracy a ni si a, mipuiin an mi duh tak thlang chhuak thei lo turin khatiang tihchingpen theih Election System kha engtin nge rintlakah an ngaih tawh ang? Inthlang lovin awm reng ta se, Communist sorkar anga Dictator hnuaiah an lut mai dawn em ni? Heng thil zawng zawng ngaihtuah hian, America ram leh an Constitution leh an Democracy humhima humhalh tur hian – Military an chet chhuah mai loh chuan an kal zel dan tur hi a chiang ta lo ve!

Amaherawhchu, keini ringtu Kristian, Donald Trump-a tana ṭawngṭai fan fantute chuan leia roreltute chunga innghat lovin, Vana Lalber, Rorelna Ṭhutthlenga Ṭhua khi rawn inrawlh turin kan dil zel dawn. Kan dilna angin a la che chhuak rih lo. Dil tura min titu hian thingtlang kilkhawr ber ber a mite chenin ṭhahnem kan ngai tlang anm a, a chhan chu, min turtu hi mihring ni lovin, amah Thlarau Thianghlim a nih vang a ni. Tlai ngai lo Lalpa Pathian kan nei a. Ani chuan a hriakthih, a mi thlan Donald Trump-a hi hun a tih hun hunah a chet chhuahtir leh mai dawn, tih ring tlat chungin, i la ṭawngṭai chhunzawm zel ang u.

Post a Comment

Powered by Blogger.