KUHVA RAH TAWLH HI THIL SUAL TIHNA (CRIME) A NI

~Ruatfela Nu
Kuhva Rah Ro

Thuhma: Kuhva rah tawlh hi thil sual a ni. Part-3 ka ziak zo vek tawh a. Kuhva tawlh leh a kaihnawihin a chhe lama mihring nun leh rilru a nghawng dan ka thlurbing a. Burma atanga kuhva rah rawn tawlh hian Tiau lui a rawn kan hmain thamna hlirin a khat ve em ka hre lo a. Zokhawthar a rawn thlen chiah atang chuan thamna leh bawlhhlawhna hlirin a khat a. He ramri kalthelha dan lo sumdawnna (smuggling) ah hian politician leh official-te pawh an inrawlh tam hle tihte ka hrut tel bawk a. Chanchinbu leh social media-a pek chhuah ka tum mek laiin, Mizoram deng chhuak khawpin kuhva rah tawlh nghawng a rawn lan tak tup tup avangin  thil thleng mek lam ka ziak leh ta rih a nih hi. A pawi lo e. Mihring nun leh rilru a nghawng chhiatna chu a la lang chhuak dawn chauh a, ka’n ziak zel ang chu.

Rorelna inah kuhva rah tawlh chungchang:* Burma atanga India rama lut tur kuhva rah tawlh leh a kaihnawih hi sawrkar laipui leh khawvel hmaa mualpho pui theih dan bawhchhiatna nasa tak a nih avang leh a nghawng chhe tak tak kan hmuh mek avangin rorelna in sanga  khel thama thu lian a nih angin Dt. 25/02/21 Assembly session-ah zawhna a awm ta ngei a. Zawhna zawttu a chiang a, zawhna chhangtu taxation minister pawhin kuhva rah tawlhin mihring nun leh rilru a tihchhiat mek an pawm thuin a chhang a, a pawm a nuam hle a. Amaherawhchu kuhva rah atanga chhiah chungchanga a chhanna erawh a pawmawm loh hle a. State sawrkar ve lem chetdan hi pawm theih a ni lo. 

Hetiangin: 
1. Kuhva rah tawlh hi dan bawhchhiatna a nih avangin chhiah lak theih a ni lo. Agriculture produce hi Mizoram produce a nih loh chuan dan anga lak luh a ni tur a ni a. Exporter in a thianghlim leh hlim loh, natna hrik lakah a fihlim em tih finfiahna lehkha (phytosanitary certificate) a nei tur a ni bawk.
2. Bill of entry hmangin basic custom duty 100% (HS code 0802) an pe tur a ni. Hei hi India-in minimum import price cheng 251 a bituk atanga chhut tur a ni a. He mi hnuah IGST emaw, state chhunga supply a nih chuan CGST/SGST 5% an pe leh tur a ni.
3. A bawlhhlawh em emna chu-Mizoram sawrkar hian dan phal loha ramri kal thelha sumdawng/ smuggler te nen intiam rualin a hminga GST pe turin a ti a, dt 30/10/ 2020 atangin official ang deuha kalpui a ni a. GST pe tur chuan Mizoram thar chhuah a nih a ngai a. MAMCO in Mizoram thar chhuah angin certificate an pe nia sawi a ni a. 5% GST (state 2.5% leh central 2.5 %) a la ta a ni. Hetah hian dan kal palzut mai ni loin, sawrkarin dan palzutte a pui tihna a ni thei ang.

4. Chhiah an lakdan lah chu smuggler te duh danin a rate pawh kg-1 ah cheng 40 hisapin 5% an pe ta a. Motor phurh zat check-tu tur district taxation lamin gate an neih loh vangin (nge smuggler an duhsak vang zawk) truck trip khat cheng nuai 2 man angin an chhut ta a. Motor lian ke 12 nei pawh kuhva bag 100 chauh an phurh tir tihna a ni. 
5. Kuhva rah truck trip khat man hi kuhva grade a zirin nuai 30 aia sang a nih laiin kg-1 cheng 40 chhiah an chhung a, truck trip khat man hi nuai 2 lekah an chhuah ta a nih chu!  
Assembly house zawhna a chhannaah taxation minister khan, chhiah nuai 900 lai hmu angin a sawi a. Champhai taxation department-ah RTI dan hmangin April 2020 atanga kan zawhna chhanna kan nei a. January leh February 2021 chauh tarlang ila: 
Month & Year (January, 2021) SGST (1,36,22,184) CGST (1,30,63,253) IGST (7,30,94,513) Total-GST (9,97,79,950)
(February, 2021) SGST (33,68,150) CGST (30,35,337) IGST (2,51,18,641) Total-GST (3,15,128)

January thla ami hi December a sumdawngte chhiah pek a ni a. February a mi hi January thlaa an pek a ni tih hria ila. Hetah hian CGST hi central chanpual a ni a. Mizoram chan tur a awm lo. IGST hi Central bungrua/service dawngtu state te chanpual a ni leh bawk a, Mizoram chan tur a awm lo bawk. Mizoram chanpual chu SGST hi a ni a, mahse, SGST Mizoram chanpual a ni kan tihrual hian destination hi Mizoram a ni lo a. Tuna SGST lut pawh hi Vairengte atanga an phur chhuah leh chuan Input Tax Credit (ITC) kha B2B a nih chuan a phur chhuaktuin a la claim leh thei a. Chuti a nih chuan SGST pawh khi kan ta tur tihna a la ni chuang lo cheu. 

Taxation minister khan kan state hmuh tur ni hauh lo hmuh angin a sawi a, Assembly house member te leh mipui rilru dik lo taka min hruai tumin min bum (mislead) a ni. Minister hian sawrkar hmaibal phih tumin a twist kual nge, a chhanna siamtu ten wrong information a siamsak zawk? Eng pawh chu ni se, kuhva rah ro truck trip khat nuai 35 leh 40 man cheng nuai 2 vela GST phuah chawp lak a ni chungin nuai 136 lai chu kan hmu ve a nih hi.

Hetiang dan bawhchhiatna nasa tak nena ram inkaihhruai chuan, khua leh tui tha ni turin tumah inbeisei thei lo ang. Ni lawm ni? Champhai district Tiau kam khua V/C leh khawtlang tangrual chuan intih dan entawnin an khaw paltlang kuhva rah phur motor lian te hnenah chhiah an lo la ve zel hi a mak lo e. Khawvel tawnhriat, sawrkar hruaitute chet tawp ang zelin khua leh tuite an che tawp mai dikzia lanna a ni.

Rorelna ina rorel mek laia kuhva rah kara ruihhlo kha: Dan loa kuhva rah tawlh chungchanga zawhna neitu, Pu Zodintluanga, Congress member sawi belh- “Thuthang kan lo hriat danin tukin zing maiah pawh Phunchawngah kuhva rah phur motor atanga ruihhlo (No. 4) tawlhtute police ten an umna lamah silai pawh hmeh puah a ni,” a tih khan ‘Mexico, Afghanistan, Columbia leh dan mumal awm lohna, ruihhlo leh dan loa sumdawngte sapatalna ram kan ang ta hle tih a tilang chiang a. Dan loa ramri kalthelha sumdawnna (smuggling) hi tihtawp a nih thuai loh chuan kan ram dinhmun hi a hrehawm khawp ang.

Ruihhlo (No.4) an man kha cheng nuai 500 man hu zet nia sawi a ni a. Bolero atangin motor lian kuhva rah phura an hlang zo chiah,  kuhva bag kara an thukru lai police ten an nangching a. Truck driver nge bolero driver zawk tlanchhia an umna lamah police ten silai an hmet puak a, an kap hlum tih thawm kan hriat loh avangin an kap fuh lo a ni ngei ang a. Chuti zata tam ruihhlo tawlha inhnamhnawih chu an man ta em tih pawh mipuiin kan hre lo a. Ruihhlo nuai 500 man tawlha inhnamhnawih, bolero leh motor lian kha tu ta nge tih pawh kan hre chuang lo a ni. 

Police Narcotics lamin thup a duh em ni?: Khati zata atan ruihhlo mantu police te chawimawi tlak an ni a. Press conference te neih a, an hnathawh thatte puangzar chuai chuai turah ka lo ngai a. Thehhmeh ang maiin a a reh thap a. Engati nge? Thup an duh em ni? Khua leh tuite hian kan khawpui ngeia sual thil tih liantham thleng hriat ve hi kan phu lo em ni? 

Kuhva rah hnuaia ruihhlo (No. 4) man dang: He article ka ziak lai hian thlalak ka dawng a. Vaipa a ni. A motor car chhunga kuhva bag hnuaia ruihhlo/No. 4 a thuhruk an lak chhuah tir leh, plastic bag dum chhunga mi an phawrhtir lai a ni a. He vaipa hi misitiri a ni a, vai mistiri car nei, kuhva bag hnuaia ruihhlo tawlh thei hi mistiri atana sponsor tu zawn chhuah ka nap e. 

Political party mi leh sa smuggler: Sawrkar phal loha ramri kalthelha sumdawng zingah political party-a inhmang an tam. Smuggler zinga pakhat chu minister pakhat campaigner an ti a, pakhat leh chu CM righthand man an ti bawk a. Tak tak ni maw? Khawlai titi atanga ka thil hriat hi chiangkuang takin, tu minister campaigner nge, CM righthand man an tih chu tu nge, thingtlang, state dang leh ram dang atanga Mizorama lo pem nge an nih, tunah political party-ah eng dinhmun nge an luah, khawi vengah nge an khawsak tih min hrilh duh chu awm sela ka tarlang ngei ang. Ka sawi thin angin smuggler te hi chu khawtlang leh ram rorelnaah inrawlh thuk lo hram rawh se. Chutiang kawngah chuan kan ram leh hnam chhan hi kan bat a ni a. Thate tea awm hi kan zavaia bat a ni bawk.

Ram hruaitu ten smuggler an thurualpui em lo ang a?!  Eng emaw chang chuan kan M.L.A, M.P, minister leh chief minister te hian heng smuggler te hi an thurualpui duh ka ring lo. Smuggler te zawk hian political party  khata an awm ho  vang emaw, MLA election-a an lo campaign pui tawh vang emawa inti hmelhriatin an hmingin ramhuai an hnawt chhuak thin a nihte ka ring a. “M.L.A chumi khami kawmthlangte nilum aipui ka ni a…, M.P naute kan nia…, minister chu mi kha mi campaigner ka ni a…, chief minister vua leh vang ka ni a.., CM righthand man a ni a, a thu vet vet  sin…,” tih vela smuggling-thila tute emaw an lo inla lawk thin a nih chuan ram hruaitute hian an tisual chhiava ang. Hmingthat aia sum tam tak an duh zawk a nih chuan thuhran, sum tam taka aia hmingthat an duh a nih erawh chuan an hminga ramhuai hnawt chhuak thin leh hnawh chhuah tumte an thenfai vat a tha hle ang.  Tun hnaia kuhva rah tawlhtute video clip viral phei kha chu sawi zui tlak loh khawpa zahthlak leh hniam a ni a. Ram hruaitute erawh an ti mualpho hle tho a ni. Khati anga ram hruaitute intitheih nana hmang kha an tam. Kuhva rah tawlh titi hi a ngaihnawm lo hlawm takzet a ni. 

Kuhva rah tawlh pangngai a hlawk hran lo:  Burma atanga Mizoram kaltlanga India kuhva rah tawlh hi, mi pangngaiin sumdawnna tluang pangngaia an kalpuina thang hnih lian vel a ni tawh. Sumdawnna pangngai ang tho hlawk lutuk lo a ni. *Sawrkar hnathawk thlakipa hlawh nei tan hausak theih a ni lo ang tho a ni* tih hi hniak phawi hauh loin ka sawi ngam. Dik taka a nih chuan eng sumdawnna mah hi kum rei lo tea hausak thutna a awm lo. Teirei peih a, thawhrim a, inrenchem a, kum rei tak hnua hausak theih chauh vek a ni.

Chuvangin tunhnaia kuhva rah tawlh hlawk lutuk hi thil theih a ni lo a. Ruihhlo, silai leh gold smuggler ten kuhva rah tawlh hi inphen nan an hmang tih hi a rinawmin a pawmtlak em em a. Assam Rifle ten kuhva rah karah ruihhlo leh ralthuam an thuruk thin tih an puang bawk a. Dan loa kuhva rah a kal tlang theih nana thuneitute thamna petu leh thamna latu pawh an awm  tih pawh ka hria a. Kuhva rah phur kara ruihhlo man pahnih anga finfiahna duhthusam ka la neih loh avangin an hming ka tarlang lo mai chauh a ni.

Mafia, smuggler leh sawrkar milian: Khawvela mafia leh smuggler hausa kan hriatte reng reng an mahni ngawtin an hlawhtling thei lo. Sawrkar mi leh sa, sawrkar milian te nena inthurual an ni thin. 

Khawvela smuggler te hlawkpui ber chu ralthuam, ruihhlo leh gold tawlh hi a ni a. He laiah chuan an thil sual tih thup nan Awke leh kuhva rah tawlh an hmang a (Ram danga smuggler ten an thil sual tih thup nan Awke leh kuhva rah an hmang ve em tih ka hre lo a. Biak inte an sa a, mi retheite an tanpui va vak thin tih chu ka hria). Chutiang thupna chu smuggling hrulah hlawk takin a kal a, mi pangngaiin an khawih ta sup sup thin a. Chu chu smuggler te duhthusam a ni. Tel ve an tam poh leh an thil sual tih hliahkhuhtu an tam tihna a ni a. An thil sual tih a hlawk em avangin mi dangin hlawkna an lo tel ve pawi an ti lo.

Aw le, rorelna ina rorel khawlte hmaah mipui hriat theihin, home minister, taxation changtu ni bawkin 1st March 2021 atanga sawrkarin kuhva rah tawlh tihtawp an tum thu a sawi a. Dan loa kuhva rah tawlh nghawng a chhiat em avang leh ministry of finance reu reuin a rawn chhui ang tih a hlauhawm bawk si a. Ramri hrul khaw V/C zawng zawng deuhthaw an inhnamhnawih bawk nen, MNF party leh sawrkar hi smuggling sorkar tia kan puh loh nan an tihtawp ngei a ngai a, an titawp beisei bawk ila. Champhai district thuneitute pawhin sawrkar duh danin chak takin hma la se la, dan zaha zawmtu, khua leh tui tha kan lo ni leh thei mahna a sin!

Post a comment

Powered by Blogger.