Rev. Vanlalzuata hla
EMAU KAWNG DAI REH LEH KHAWHAR
Hla phuah dan ngaihnawm
EMAU KAWNG DAI REH LEH KHAWHAR

"Kan hnenah awm ta che, khua a tlai dawn ta a, ni pawh a tlak dawn tawh hi,' an ti a. Tichuan, an hnena awm turin a lut ta a." Luka 24 : 29

Emau kawng dai reh leh khawhar takah tih phuahtu hi kan Kohhran Presbyterian Church, Synod Pastor te zinga Pastor chhuanawm ber pawl ami Rev. Vanlalzuata  phuah a ni. A hla phuah dan leh a chanchin ngaihnawm tak te i han sawi teh ang. 

Pian leh murna  Rev. Vanlalzuata hi a pa Thangzuala, a nu Nuchhungi a ni. Pu Thangzuala te nupa hian a zawnin fanu pakua an nei a, fapa nei thei dawn tawh lo tura an inngaih hnuah kum 1954 September 24 khan Thinglian khuaah Pu Vanlalzuata hi a lo piang a. A nu pi Nuchhungi chu a lawm em em a. "Van Lal chuan min lo zuat a nih hi," tiin a hmingah *"Vanlalzuata,"* tiin a sa ta a ni. 

Zirna lam An chhungkaw khawsak harsat avangin Pu Zuata hian dan pangngai angin Sikul a kal ve thei lo va. Middle Sikul chin chu a ûte leh chhungkhat laina hnai dangte bêlin Thentlangah te, Chhiahtlangah te leh Lungphoah te a remchan dan ang angin a kal kual a. A chang chuan private-in a exam a, Chhiahtlang High School-ah pawl sarih a pass hnu chuan Lungpho High School Headmaster-in a khawngaih a, chawhma bak a kal thei dawn lo tih hre chungin Lungpho High Schhol-ah a admit a. Hlo thlawh pahin  private-in a zir char char a. Matric exam dawn thlengin thlam tapchhak mei eng chu a zirlai chhiarna ber a ni. Matric chu kum 1977 khan Lungpho High School hmingin private-in a pass a ni. Matric a pass hnuin  Aizawl Theological College-ah a kal a. 1975-ah Presbyterian Kohhran Upaa thlan niin 1976-ah nemngheh a ni. 
       
Nupui fanau Tlangval kum 24 mi a nihin Kohhran Upaa thlantlin  a ni a. Rullama KṬP Conference-a Biak Ina thu a sawi laiin Nula pakhat lo lut a hmuh chu Pathianin a nupui atana a ruat nia hriatna a nei a. Chu nula chu Thanzami (Zami) a ni a, Khawbel khua ami a ni.  Ni 26, 10, 1976-ah Thanzami nen chuan an innei a, fa 5 an nei. 

Aizawlah Theological College a kal Pathian rawngbawl hna thawh chu a châk ber a nih avangin Aizawl Theological College-ah B. Th. zir a tum a. An chhungkaw harsatna chu a hre reng a. Amaherawhchu a nu leh pa te leh a nupui leh a unaute pawhin a thil tum chu Pathian kohna ngei nia ngaiin harsatna awm apiang chu tawrh an huam thu an sawi a. Khawsak harsat pangngai bakah B. Th. a zir kum chu Ṭhingtam lai a ni a. Chuti chung chuan a nupui Pi Zami chuan a hrisel lo viau chungin B. Th. a zir theihna tur a nih phawt chuan bahra laih pawh a huam thu a sawi a ni. Kum 1978-ah khan Aizawl Theological College chu a zawm ta a. A nupui pi Thanzami pawh chuan bahra chu a laih phah ta tak tak a ni. Ama sawi dan takah bahra laih kha a châk vak lo nain hrehawm a ti ngai lo va, mi tam takin bahra laih tur hmu lo va hlawhchham chang an neih fo ṭhin laiin vawi khat mah a hlawhchham ngai lo a ni. 

A chhungte khawsak harsatzia an hrilh Pu Zuata Theilogical College-a a awm takah chuan an chhungkaw khawsak harsatna chu tlang hriat a ni a. Bialtu Pastor Rev. Lalvena, Lungpho khuaa awm chuan Pu Thangzuala te chhungkaw khawsak kalphung en turin pa pakhat a tir a. Ani chuan Thinglian khuaa kalin Pu Thangzuala (Pu Zuata pa) te chhungkaw khawsak harsatzia chu mit ngeia a hmuh hnuah Aizawlah kal nghalin  Theological College-ah Pu Zuata chu a va zawng a. An chhungkaw harsatna hriaa B. Th. zir ai chuan ina haw a, a nu leh pa te a ṭawiawm chu thil pawimawh zawk nia a ngaih thu a va hrilh a. Pu Zuata chuan tihngaihna dang vak a awm lo a ni tih hriain an khaw lama haw zai chu a rel ta nghal a. 

Tum ruhna nei tharin B.Th. a pass ta Hawna tur motor zawnga a chhuahna lamah Pu J. Saplalmawia nen an inhmu a. Pu Saplalmawia chuan a u J. Romandinga chu nupui fanau enkawl ngai te kalsanin "Thihchilh ngamin  Catchist hna ka zu zir dawn a ni," tia Imphal pana a kal thu Pu Zuata chu a hrilh a. Chu thu a hriat chuan Pu Zuata thinlung a dêng nghal zawr mai a. Pathian thu chu thih chilh ngama zir tur ni ngeia ngain rilru nghet tak puin Theological College lam chu panin a kir leh ta a. Chumi ni aṭang chuan a rilru chhungah Pathianin hna a thawk ngei a ni tih loh rual lohvin zirtirtute thusawi apiang chu a hriatsa vek tawh ang maiin a rilruah a cham nghal ta hmiah hmiah mai a. Exam-na apiangah a tiṭha bera ṭangin kum 1983 khan B. Th. chu a pass ta a ni. 

Thihna ngei tur vawithum a pumpelh Pu Zuata hi Pathianin a rawngbawl tura a ruat ngei niin a lang. Dan narana  mi pangngaiin an thih phahna ngei tur anga ngaihah vawi thum a nun hi chhanhimin a awm a ni. Ngentianga a awm.lai khan khâmah thing a sat a. Thing tlu tur chuan a tlukpui a. Khâm kar zawl deuhah a tla a, thing erawh chuan delh lovin a thlawh thlak san a. Nikhaw hre lova a awm chu in lamah an zawn haw a, rei lotêah lo harhin a ṭha ve leh mai a ni. Pro Pastor a nih lai khan zanah Theological College a zu tlawh a. Thimtham hnuaiah Coridor tawpa a pen sual lum thla chuan a thlang lam ft. 20 dawn laia hlaa Choka bang chu a zu deng dawt a. Chingchang engmah hre lova a awm chu College zirlaiten an bawihsawm a, a ṭha leh nghal mai a ni. Bawngkawn Pastor a nih lai khan Biak In hnatlangah in chung aṭanga Syntex tuizem an lak thlak tur chu kawtzawl aṭangin lo dawm tura a ban a phar laiin tuizem khaina hrui a chat a. Tuizêmin a tlak khum bâkah a tlukna lamah cement chhuat char laiah a tukkhum a sawh a, damdawi in ICU-a an thlenpui  aṭanga rei lo teah ṭha takin a harh chhuak leh a ni.

Rawngbawltu ṭha leh fiamthu duh Pu Zuata hi Pathian rawngbawltu ṭha, Pathian thu sawi thiam a nih bakah fiamthu thiam tak a ni bawk a, a bula awm hi a hlimawm thei hle a ni. Vawi khat pawh a Scooter-in a nupui Pi Thanzami a tlukpui a, a bân te a tina deuh a. A ṭhianten an fiamna chu chhângin, "Mi nupui tlukpui ai chuan mahni nupui tlukpui chu a him zawk a ni lo'm ni?" a ti thên mai a ni. 

Hna thawh Pastor-in Lungpho bialah te, Lunglei-ah 1987 - 1997 chhung a awm. 1998 atangin Editor, Synod Literature & Publication Board-ah te a thawk a ni. 
Hla lo pian dan Lungpho khuaa a awm lai hian inrinni vawi khat chu  Chawlhnia Sunday Sikula zir tur hla a lawrkhawm laiin thli a lo thaw vuk vuk a, ruah mal a lo tla a; tukverh kawngka a khar dawn lai chuan bawng, vawk leh kelte an lo tlan hawng chu a hmu a; "Ran â te tak ngial pawhin an himna tur in lam pan nachang an hria a, keini mihringte hian kan himna tur Isua pan nachang kan hre tak si lo va," tiin a ngaihtuah vawng vawng a. Chutih lai tak mai chuan a thinlungah Luka 24 : 28 thu a lo lang a. Chu Bible chang a han keu dawn lai chuan "Emau kawng dai reh" chang khat leh a thunawn hi a thluk nen lam a dawng ta a. Phuah zawm a han tum a, mahse a hlawhchham a. A Bible chang chhiara Kleopa te țhian dunin an hnena riaka khawsa ve tura Isua an sawm kha a han ngaihtuah a, tichuan chang 2 & 3-na a dawng leh ta a, tichuan a hla phuah chu a lo khawr pum thei ta a ni. Amah chuan "Ka phuah a ni lo, Lalpa min pek a ni," a ti. 
Hla thu chu:
1. Emau kawng dai reh leh khawhar takah,
Khualzin pahnihte khawhara an kal laiin;
Tlai khua lo ngui, zan thimin a nang dawn a, 
Isua an sawm, tlai khua varpui turin. 


Kan hnenah awm ta che, khua a tlai dawn ta e,
Tlaini kawla a liam dawn hi; 
Tlai khua i var za ang, Emau dai rehah hian, 
Chhun ni a liam, zan thimin min nang si. 

2. Sawmtute hnar ngai lo Lal Isua chu, 
Tichuan an hnenah chengin a awmpui ta a;
Thlamuanna reh thei lo chu hnutchhiahin, 
An hnenah chengin a awmpui ta a. 

3. Kei pawh tunah ka sawm che Lal Isu,
Ka khawvel damlai ni a tlak hma ngei hianin; 
Min awmpuiin tlai khua min varpui ve la, 
Ka thlarau, lo nghak rawh, i Lal Isua. 

He hla hi Z. A. Kapmawia'n All India Radio-ah 1980 -1990 bawr chho khan thiam leh mawi taka sain a record-a, hla thlan hun Programme-ah thlan a hlawh char char țhin hle a ni. /- bchhangte klsb vthr

Post a comment

Powered by Blogger.