CHHANDAMNA - BO LEH THEI NGE BO THEI TAWH LO?
 Hebrai 6 chhandamna bo theia ngaitute ṭanchhan
Hnungtawlh

~Dr. PC Biaksiama

Kan  "Christian Research Centre" group a nimin lama zawhna kha: Hebrai 6:4-6 leh 10:26-27 hian eng nge a sawi, eng nge a awmzia tih a ni awm e. Chhandamna miin a chan tawh hnuah a bo leh thei nia ngaituten Bible chang an hman rim leh an innghahna pui ber a ni. Hemi hrilhfiah tur hian 2005 a ‘Chhandamna Ropui’ tih bu ka ziah (Revised 2011) bung 9 ami lak tawi a ni. 

BO LEH THEI RINGTUTE ṬANCHHAN
Heb. 6:4-6: “Tin, vawi khat rilru tihvar a, van thilpek tem a, Thlarau Thianghlim chantir a, Pathian thu ṭha leh hun lo la awm tura thiltihtheihna tem tawh zet a tluksante kawng thu zawng – chu mite chu an simna turin siam thar leh rual a ni lo, Pathian Fapa chu anmahni tan khengbet nawn leh a timualpho an nih avangin.”  Hebrai 10:26 hian hemi chungchang tihian a sawi bawk:

 “Thutak hriatna famkim chu kan chan hnua thil kan tihsual luih si chuan sualte tana inthawina a awm tawh hauh lovang a, rorelna hlauhawm tak lo thleng tur leh dotute kâng ral tur thinurna mei kan hmabak a ni mai….” 

CHHANDAMNA BO THEI TAWH LOTE ṬANHMUN 
Lehlamah Pathian chhandamna miin a chan tawh hi a nghet a, a bo thei tawh lo titute chang ṭanchhan tam tak zinga pakhat chu:  Johana 10:28-30. “An hnenah chatuana nunna ka pe a; kumkhuain an boral lo vang a, tuman ka kuta ta mi chhuhsak hek lo vang. Anni mi petu, ka Pa chu, mi zawng zawng aia ropui ber a ni a, tuman Pa kuta ta chu an chhuhsak thei lo vang. Kei leh Pa chu pumkhat kan ni.”
Chhandamna bo thei lo thurin ringtute chu Reformed doctrine ringtute an ni, Calvinist-a an ti a; lehlamah bo leh thei anga zirtirtu Arminian-a zirtirna kalpuitute chu Arminian an ti. Tichuan, mite harsatna leh mutân a nih hre rengin, a chinfel dan kawng kan zawng dawn a ni.
Hebrai 6:4-6 hian ringtu piangthar, chhandamna changtu pawh rinlohna sualah a tlu bo thei a. Hre renga tisual lui, ring duh lo lui tlat an ni a, Isua meuh pawh eng atan mah an ti tawh lo, rintlakah an ngai tawh lo. An rin ber an hnawl tlat si chuan sim ngai nia inhriatna an nei tawh lo, Krista rinnaa hruai kir leh theih tawh loh, kumkhuaa boralnaa lut hmiah tawh tur an ni a, chuvangin ‘rorelna hlauhawm tak lo thleng tur leh dotute kâng ral tur thinurna mei an hmabak a ni mai’(Heb. 10:27). Chutiang a nih chuan Isua chhandamna chang tawh, chatuana nunna nei tawhte pawh rinlohna sualah tluin, an chhandamna chu an hloh lehin, hremhmunah tho an lut leh dawn tihna a ni, an ti a ni.
Lehlam thlir dan chuan: Chhandamna Pathianin a thlâwna a pek dawngtute hi Pathian vêkin a humhim sak avanga bo leh rual a ni lo. Isua ṭawngka chhuak ngeiah hian, a beramte chu keipui sahauhva a hauhna ṭawngkam fiak ṭhak mai kan hmu a. ‘An hnenah chatuana nunna ka pe a’ a ti a. He thilpek dawngtu a beramte chu ‘chatuanin an boral lo vang’ tiin uar takin ‘double negative’ ṭawngkam a hmang a. An chungah engpawh thleng se, eng thil mahin a dâl thei lovang tia a sawina a ni a. A beramte hi eng thil mahin an tlûk botir lo vang tiin, duhthawh tak leh tihtak zetin a sawi. 

He thu a sawi zawh hian Isuan, “Tuman ka kut ata min chhuh sak lo vang,” a tizui lehnghal a; chu pawh la duh tawk lovin, “Tuman Pa kut ata chu an chhuh sak lo vang” tiin, a thu tihngheh nan a sawi nawn leh a. Bible chang dangte ṭanchhan miah lo pawhin, helai chang ringawt pawh hian ringtu dik tak chu chhandamna tibo khawpin sualah a tlu hlen thei tih ngaihdan a hnâwl thla hneh hle. 

HEBRAI 6 HRILHFIAHNA HRANG HRANGTE
Zawhna pawimawh chinfel ngai chu, ringtute chhandamna Pathian hnena him taka awm, tuma chhuhsak rual loh Johana 10:28-30a Isua sawi hi mi ṭhenkhat chuan Hebrai 6:4-6 thu hian a ṭhiat niin an ngai a. Tichuan, chhandam fa chu a duh chuan Pa kut ata tâl chhuak a, rinlohna suala lut lui leh theiin, hremhmunah a intâl lut leh thei angin an puh deuh ni awm a ni. Hebrai 6 hian a tak taka thil awm thei nge a sawi, tâk-dah thil (hypothetical) a inzilhlawkna zawk? Hebrai 6 hian thlarauva piang tawhte thu nge a sawi, Pathian thu leh thlarau hnathawhte chu hre ve zul, mahse Pathian chhandamna ângchhung dinhmun him la chang chuang lo, tlu bo leh mai thei dinhmuna la awmte chungchang a sawina zawk? tihte hi ngaihtuah chet chet ngai a ni. 

(1) Hrilhfiahna pakhatah chuan, Hebrai ziaktu hian chhandamna chang tawh mahse, tibo lehte chungchang a sawina a ni a, chuvangin chhandamna hi a bo leh thei a ni, an ti a. Chuti a nih chuan miin an hloh tawh chuan hmuh let leh ngaihna a awm tawh lo tih a sawi chiang nghal a. Sim leh tura hruai kir leh rual an ni tawh lo, an bo hlen dawn, inchhira simin awmzia a nei dawn lo tih hi Arminian hoten an pawm tel a ngai a ni. A tak takah chuan he ngaihdan hi chu Bible pumpuiin Pathian khawngaihna min kawhhmuh dan nen a inmil thei lo.

(2) Ngaihdan dang lehah chuan, Hebrai 6-in a sawite hi la piangthar tak tak lo, chatuan nunna pawh la chang lo te sawina a ni. Van thilpek te, chunglam thiltihtheihnate kha a temin an tem a tih chauh hi. Pathian thu pawh hriatna satliah chuan an hre ve zel zul; mahse heng van thilpekte hi an la chang tak tak lo. Tem ringawt chuan an la ei tak tak hlei nem. Chutiang dinhmun aṭang chuan an lo neih ve chhun rinna pawh chu an tawlh bosan ta mai a ni ang, tiin an ngai. Piangthar ve anga lang, thlarauva pianna tak tak chang lote dinhmun  a ni lo maw, an ti a ni.

(3) A pathumna chu, Hebrai ziaktuin a sawite hi chhandamna nghet chang tawh ngeite an ni, an bo lo. Tlûk bosan ta anga a sawi erawh chu a tak taka tluk bo tihna a ni chuang lova, suangtuahna thil ni zawka ngaih a nih vangin hypothetical theory an ti. Entirnan, thutak hriatna famkim kan chan hnua thil kan tihsual luih si ‘chuan’... Heta ‘chuan’ (if) tih a hman aṭang hian, a taka awm ni lo, suangtuahna thil a nihzia a tilang a ni. Ringtu ṭha tak takte hi han tlu leh ta se chuan, Isua hi han hnawl leh ta tlat mai sela chuan... ti zawnga a taka awm chuang lo, ‘sela,’ ‘chuan’ hmanga chhuizawmna thil, inzilhna ṭawngkam a ni ber awm e.

Chhuizauna: Hebrai bu hi Juda ṭhenkhat, kristiana inlet tawh, mahse Thuthlung Hlui dan leh serh leh sâng thila hawikir leh mekte hnena zilhlawkna lehkhathawn (warning letter) a ni tih hi hmasanga kohhrante lo pawm dan nghet tak a ni. Tlûksantute chunga rorelna lo thleng tur thuin a  zilhlawk a; chhandamna beisei tlat turin a fuih bawk. 

Chuvangin Juda kristiante zingah Krista zara rilru tihvârna te, van thilpek te temin, Thlarau Thianghlim hnathawh dan ṭhatzia te pawh tem a, an chan ve hial hnuah pawh, Krista Isua chu an chatuan nunna a ni tih la pawm tak tak lo mihring an la awm thei cheu mai. Mizo kristiante zingah ngei pawh inti thlarau-mi em em, ṭawngṭai dam theihna te pawh nei ve hial, Isua hminga ramhuaite pawh hnawtchhuak thei hial, Lalpa, Lalpa ti nazawng hi hmun tinah kan inzep fer fur mai a ni. A lan dan maia piangthar ṭha ber ber ni awm tak, mahse arûka an awmdan dik tak a lo lan chhuah meuh chuan arûka Isua phatsantu lo ni si an nihzia an thiltihin a phatsan tlat si. Hei vang hian a lan dan maia ngaihtuah lova fel taka ngaihtuah turin Bible hian min fuih reng a ni (Joh. 7:24). 

Chuvangin Hebrai ziaktu hian Juda ring tharte hnenah thawhlehna ṭha lehzual, ram ṭha lehzual, leia mi ni lo, vana mi kan nei tawh tih thu a chah a. Chutianga thilpek ṭha zawk dawng a, chan tawh hnu pawha la hnâwl cheu tute chu ‘anmahni tana Pathian Fapa khengbet nawn lehtute’ an nih avangin, insiam ṭha tura tihsim rual an ni tawh love’ a ti a ni. Krista chu chatuan atan vawi khat a thi tawh a, a thi nawn leh dawn si lova.

TLÛKSANNA AWMZIA
Hebrai bung 6-in ‘tluksanna’ (Gr. apostasia) a tih hi Pathian pawh engahmah ngai tawh lova hnawltute dinhmun, Pathian nung bansan te (3:12) dinhmun sawina a ni. Thlarau Thianghlim hnathawh pawh eng atan mah ti lo, thinlung tisak lui tlat, misualte chhandam nana Pathianin a Fapa Isua krawsa a khenbehna pawh engahmah ngai chuang lote dinhmun chu tluksanna vawrtawp a tling. Anmahni tan Pathian Fapa khengbet nawn leh a timualpho an nih avangin, chutiang mite chu an simna turin siam thar leh theih an ni tawh lo. A chhan chu, hre lova tisual an ni lo, hre reng chunga awih duh lova hnawl hmaktute an ni. Chutiang mite chuan chhandamna an chan tawh sa tibo ni lovin, an lo la chang lo reng a ni tih an thiltihin a tilang a, Isua hmusit chungin a chhandamna hi chan theih ni hek lo le! 
Kan Bible hian chutianga sim tura ‘kîr leh theih tawh lohna’ hmun – tluksantute dinhmuna kan tluk luh ve loh nan, Hebrai 6:4-6 leh 10:26-27 hmang hian zilhlawkna (warning) ṭihbaiawm tak min lo pe a ni.  I Timothea 4:2-ah hian thlarau sual leh ramhuaite zirtirnain a hruai bo avanga Isua Krista ‘rinna bansan’ a sawi bawk. Khawvel tawp dawnah hian Danbawhchhepa, boral fapa lo lan hmain kohhranah tluksanna pui tham tak a lo thleng dawn tih Thlarau hriattirin Paulan min lo warning lawk nghal a ni (II Thess. 2:3).

Hetianga Pathian tluksantute hi Mizote zingah an awm thei em?
Awm teh rêng mai. Ka sawi pawp dawn. Tun laia Mizote zinga tluksantu langsâr berte chu tu dang ni lovin, Mizo-Israel-Juda intite hi zu nia le! Kristianna kalsanin Thuthlung Hlui sakhua Judaism-ah an inlet. Juda sa an phun chinah chuan Isua Krista hi an hnawl hmiah mai a ni. Engtin nge hetianga an tih theih? Kristian an nih lai khan an rilru te pawh Chanchin |ha hmanga tihvar a ni vein, van thilpek te pawh an Mizo-pui dangte ang bawkin an tem ve bawka ni lawm ni? Mizoram dung leh vanga Thlarau Thianghlim hnathawh zozaite hi an hai bik lova, engemaw lai chuan thlarau an lo chang ve vak tawh pawh a ni thei e. Chutichung chuan Krista hnawlin, Isua haitu leh khengbettu Judate sakhua an phun duh tlat a. Theihtawpa hneh lêt tumin, Isua hi Pathian Fapa, Judate nghahfak Messia khawvel chhandamtu awmchhun a ni e’ ti pawhin hrilh ila, an ngaithla duh der lo. An ngaisang thei thlâwt lo. Mi satliah ve maiah an dah lui tlat mai a ni. Hetiang tluka Isua Krista khengbet nawn lehtu leh tlanna thisen hmusittu hi an awm thei chuang lovang. Isua hmaia chil chhâk khumin, ‘Thui’ ti chungin Israelah an pem ṭhin a ni!

Hetiang tak maia kan unauten rinna an han bansan (tluksan) thei ta mai hi, a chhan bul tak kan chhut chuan, tun hma pawha a hming maia kristian, Lalpa chhandamna lo la chang tak tak lo, Thlarauva piantharna pawh lo la chang lo an lo ni tlangpui. An dinhmun chhut thui pui zel phei chuan, kohhran mumala awmna pawh lo nei fumfe lo, pawl chhuak rama cheng an nih vanga Pathian thutak leh Chanchin ṭha laimu Isua Krista nena lo la inhmelhriat hauh lo, rinna innghahna bulfûk pawh nei lovin, zirtirna dangdai deuh a lo awm apianga luangthli chhem nghîn an sawi ang maia lo nghing ve nghal lawp lawp an ni. 

Vanduaithlak takin thlarauva piangsualte leh zirtirna ṭenghneng tê tein a bum kual hote hi khawtlangah pawh a chênbeh deuh leh a bâkthlaa khawsa te an lo ni lehzel a, lainatawm tak mai an ni. Amaherawhchu kan ban phaka an la awm chhung leh, khawngaihna huna kan la awm chhung hian, thahnemngai takin Krista hnena hruai kir leh i tum ang u. Isua ring tura an inlamlet duh a nih phawt chuan, ngaihdamna leh chhandamna kawng hi anni tan pawh a la inhawng reng e. (Heng kal sualho, Isua hnawltute ngei pawh hi beidawnna khura an awm a, an mangan tak tak chuan Isua ring turin hruai theih an ni tho. Hemi ka ziak lai ngei pawh hian Thangfala pawla mi thi lek lek tawh pawh, a fate hovin min kova, Isua ring tura theihtawpa kan ṭawngṭaina chu (ka beidawn tawh hnuah) Lalpan a chhang a, zan hnih hnu lekah Isua ringin thlamuangin a thi ta tih a chhungten lawm deuhin min rawn hrilh a ni, bs).

Zawhna pawimawh tak chu, ringtu piangthar dik takte hi chutiang tluksanna dinhmunah chuan an tlu lut thei ang em? Chhandamna chang tawh dik takten Isua an rinna hi an bansan thei  ang em? tih hi dîlchhût thilah han inzawt leh hrâm ila.

Kan sawi tawh angin chhandamna bo leh theia ring pawl Arminian-ho chuan ‘thei ang’ an ti a. Mahse simna tura siam thar leh theih tawh loh,  Pathian ngaihdamna chang leh thei tawh lo tur ang hiala Hebrai buin a ziak hi chu a ni em em lo vang, an ti leh si a.

Lehlamah chhandamna bo thei lova ringtu Calvin-a pawlte erawh chuan mi piangthar tawh, khawngaihnaa chhandamna changtu chuan hetianga sim thei tawh lo khawp dinhmunah hi chuan an tlu lut em lovang, Thlarau Thianghlimin a vawng him tlat si a, tiin ‘Perseverance of the Saints’ an ti a ni. A tawp thlenga rinna a vawn tlatna tak chu chhandamna changtu dik tak, piangthar dik tak leh Thlarauin a vawnhim zia finfiahtu a ni an ti. Krista leh a chhandamna hnawl khawpa mi tupawhin rinna hi a bansan lui ngat a nih chuan, thlarauvah a lo la piang tak tak lova, khawngaihnaa chhandamna pawh hi ama tan a lo la pawm reng reng lo tih finfiahtuah an ngai. Rinna dik tak chu an rahah a lang si a.

A tlangpuia kan khaikhawm dawn chuan, Hebrai 6:4-6 thu hi warning-na anga ngaih tur a ni. Mihlim kalsual hovin, “Mi nu chungah pawh bawk reng mah ila ka chhandamna a bo chuang lo,” an tih ang vel kha chu sawi rik pawh hriat tur a awm tawh âwm lo ve. 

Ringtute hi chatuana chhandamna chang tawh, chatuana nunna nei an ni tih Bible chang tam takin a nemnghet tlat (Johana 3:15-16; 36; 5:24; 10:27-30; Rom 8:35, 37-39; Eph. 1:12-14; 4:30; Phil. 1:6; Heb. 10:12-14; I Pet. 1:3-5). Hebrai 6:4-6 in chhandamna bo leh thei a zirtir anga pawmtute chuan, vawi khat tihbo tawh chuan neih let leh theih a ni tawh lo tih hi helai changin a sawi ang tak hian an pawm tel bawk tur a ni a; an thurin hi a dik a nih hlauh chuan, anmahni nunna ngei pawh hlauhthawn awmin an awm reng dawn tihna a ni a. Tlu lova awm reng an tumna lamah ‘thiltih ṭhata chhandamna thurinah’ tum loh deuhin an lut ang a, Dana thiamchanna lamah, khawngaihna tluk sanin Krista nena inṭhenna thurin lamah tum loh deuhin an inhnûklut leh tho si ang le!

TLUKSANNA NGE HNUNGTAWLH?
Mizo Kristianten ‘tlû’ nia kan puh ber chu ‘zu ruih’ hi a ni. Damdawi rui te, rukruk te, mipat hmeichhiatnaa chetsual te leh lang thei sual tihte hi a ni tlangpui bawk. A ruka sorkar sum ei ru reng, mahse thawhlawm thawh ṭhat avang tea kohhrana tlatlum tak, thil sual ti lo, tlu lo anga ngaih an awm ṭeuh bawk. Dan naranin ‘tlû’ teh nana kan hman chu biakin a inkhawm leh inkhawm lo chungchang hi a ni deuh ber bawk. Mahse chu chu covid avang hian tuman tehna dikah kan pawm duh leh si lovang. (Nge biak ina inkhawm loh chu van rama kal loh tur, kan ti thar leh zawk dawn em ni?) Chuvangin ‘tlû’ kan teh dan pawh hi a inang dawn hauh lo mai.
Tlukna avanga chhandamna bo leh anga sawitute pawh hian chhandam leh chhandam loh inkar ramri hi an kham thei em? Eng chinah hian nge bova kan ngaih a, engchin hi nge bo lo china kan ngaih? Bible hian chutiang ramri chu sawifiahna mumal a nei reng em?
Zu hi sual langsâra kan neih a ni bawk a. Zu in reng chungin Isua ringtu a nih theih tho em? Miin zu a ruihin, Isua a rinna kha a thlah ta ṭhak em ni? Inngaihna suala a tlûk lai khan Isua hi Chhandamtuah a pawm ta lova, a hnâwl ta hmiah tihna nge, buma a awm vang nge, thlêmna a do zawh loh avanga chesual? Piangthar tawh chungin nawhchizawrhnaah a la thawk chhunzawm reng thei em? Entirnan, nawhchizuar pakhat chuan Lal Isua chu chhandamtua pawmin a lo piangthar ve a; mahse a pu thuhnuaia awm a nih avangin chu hna chu a chhunzawm zel lo thei si lova; chuvang chuan a pianthar-chhandamna chu ‘cancel’ a nih phah ang em? Heng thilte hi ṭhenkhat tan chuan sawi hawn pawh thiang lo (taboo) ang hialin kan ngai tih a chiang a; mahse misualte hnen thleng phak chanchin ṭha kan hril dawn a nih chuan a mawihnai tawk china rehbun mai a rem lova, chuvangin heng subject te hi pehhêl lova luhchilh ngai a ni si a.
Tlu nge Hnungtawlh? Heng a chunga mite zawng zawng kan thlirin Bible-in tlûksanna a sawi hi ni lovin, thlêmna a do zawh loh avanga khawvel dan anga awmna te, mahni duhthu anga awm theih lohna thil te, kristian nundan tur anga nun lohna te a ni zawk awm e. Chutiang chu Pathian thuin 'hnungtawlh’  (backslide) nun a sawi hi a ni zawk a. An hnungtawlh avangin Isua hi rintlakah an ngai ta lova, an hnawl ta hmiah tihna a ni chuang lo. Dinhmun chhe tak leh zahthlak taka an awm lai pawhin, KS nena an fawr bo lai pawhin Isua Pathian zia leh Chhandamtu lal awmchhun a nihzia rinna an bansan chuang lo thei. Bosan erawh an nei chiang. Kristian nundan an bosan hmiah. Chhandam hlimna te, Pathian nena inpâwlna (fellowship) an neih ṭhin kha an tlan bosan ta a ni. Inlaichinna (in pafa-na) chu bo êm lo mahse, inpawhna a awm ta lo. Pa fa an inhlat a, an inmihran ta daih mai. Khawlam hla takah, nawhchizuarte zingah a tlanbo ta daih mai. An inkarah daidangtu tlâng lian pui pui – hurna tlang te, rûkrûkna tlang te, eirukna tlang te, ruihhlo tlang te, tisa châkna, mit châkna, damchhung ropuina lem te chuan Pa hne aṭangin mualzapuiin min kârdan ṭhin.

Hetiang zawnga han sawi hian sualna sawinêp a sawi mawite pawh kan ang awm hle. Mahse a theih chin chin khawrh fai leuh a ngai a, a ṭul tawh bawk. Tun thlenga kristianten tluksanna leh hnungtawlhna (apostasy & backsliding) kan la thliar hrang thei lo hian ṭul lo thleng thlenga manganna te, thlamuanna kan neih vena tur kawngah te dâlna kan insiam sak lek niin a lang.

Tlu der, piangthar der: Tun laiah zawlnei der chauh kan tilâr vû tûk a; hmun dangah pawh a in daihzai viau a nia. Tlukna kan tih, hnungtawlhnaa mi an luh hian, piangthar dik leh dik lo chu a thliar hran theih. A inhlîr hrang kan ti zawk dawn emaw ni? Piangthar inti ve mi ṭhenkhat han tlu ve chu, an thiltih dik lohvah pawh thiamchanna tur an dap zut zut mai. Rilrua inthiamlohna nei lem lo hian zu hmun hlimna te an chen rei thei riau. An tlûkna hmunah an ngam chiah mai a ni. Chutiang mite chu a dera piangthar, a dera tlu, an thawh leh pawhin a dera tho leh, ringtu lemchang mai an ni. Lalpa ringtuten chutiang hmun an dai ve erawh chuan rilrua inthiamlohna lian takin a chhun na ngawih ngawih a, nuam an ti thei tawh lo; an ṭhiante nena zu an in lai pawhin an rilru, an thlarau a rûm ṭhin. Nidanga an lo tih thin sualah khan an thla a ngam thei lova, an hlim thei tawh lo. Piangthar tawh tlu pakhat pawhin a ṭhiante zinga zu no dawm pah te hian arûkin a ṭawngṭai ngat ngat ṭhin tih min hrilh. Piang lo na na na chuan ngaihṭhatlohna em em pawh nei chuang lovin zu bawihah chuan an tâng reng mai a, chhanchhuaktu an awm loh chuan an tâng hlum ṭhak mai dawn a ni.

KHAIKHAWMNA
A chunga tlûksanna leh hnungtawlh nun kan khaikhinna aṭang khian ringtu nun awmdan kan hre fiah deuh sawt em le? Tumah hi sual laka fihlîm zo kan awm thei tak tak lo. Lalpa ringtute pawh sual lamah kan lo hnungtawlh ṭhin. Dik takin ringtu nun hi tluk-leh-ding-âwn a ni ber a; kan nunah sual leh ṭha hi a inbuan let zak zak reng mai a ni. Tlu ve ngai lo leh thil sual ti lo nia inhriate bulah chuan mite an ngampa vak lo, an awm peih lo. An chapo, an tlawm lo, an khawng rût mai a ni. 
    
Camping chhuak piangtharte pawh hi an han kal pai chawn chawn a, a tlu leh ta, a tho leh ta, a ṭha leh tawh e, a inchhuih palh leh ta... tih nun kawng an rawn zawh a ni. Ringtu puitling tawhte tan pawh hriatthiam sen an nih loh laiin, thlirtu mimir tan phei chuan a har lehzual. Mahse nau piang hlim engmah hre lo, kal dan thiam lo zir tir an nih hi. 

Hetianga tlûk leh tlâk fawma ringtu nun kal vel lo thlirtu ṭhenkhat chuan, tlûk apianga chhandamna bo lehnghal mai, a sim erawh chuan a hloh tawh nei let leh a, thil a tihsual leh chuan bo leh mai angin an lo thlir a nih chuan - inkaihhruaina mumal kan mamawhzia tilangtu a ni mai. Kan Pathian Lehkhabu Thianghlimin chatuan daih chhandamna nghet a thlawn liau liau va min pek dan hi kan lo la belh chian loh vang a ni ber mai. A pawimawh zawk chu, ringtu hi tlu thei a ni a, a tlu fo bawk. Fel awm em ema kohhrana rawng a bawl mek lai a, miten ṭha kan lo tih em em lai pawhin, sualna zinga senior ber an tih ṭhin Chapona sualah tukhaw hriat lohvin a lo tlu reng thei a; mihring hmuha mawi leh zei taka a chet lai khan, Pathian mithmuhah chuan tenawm em em, nawhchizuarte leh zungawlveite aia ṭha bik chuang lovin a lo awm thei tho tihte hi kan ngaihtuah ngai em aw? Chutiang chu a nih avangin Pathian khawngaihna hi hmachhuan berah i neih mai ang u, kan zavai hian. 
(A sei lutuk hlauvin ui chung chungin ka chhawk ṭhen ṭeuh a. A bua chhiar duh tan Chhandamna Ropui tih bu, bung 9-naah chhiar theih a ni)

Post a Comment

Powered by Blogger.