ṬHA-AINAWNI

Phuahtu:- Fam  Vanthanga (1936-1991)
Satu:- Lalenkawli Pautu
Mr.C.S. ✍️
Mizo Lyrics
Hring nuna  tawrhna lo thleng ṭhinte zinga tawrh thiam har êm êm mai pakhat chu "Hmangaihten hmangaihtu an phatsan" hi a ni âwm e. He hla pawh hi hmangaihtu'n hmangaihte a phatsan avânga thinlung keh-sawm aṭanga lo piang a ni. Tlangval zaidam leh nunnêm, music lamah pawh duai lo tak, rimawi chi hrang hrang hneh taka tum thiam Vanthanga chu a hmangaih êm êm, rûn lum nuthai atâna a thlan, kumsûl hnih lai rinawm taka lo inzui tawh, hmangaihnain a pêk theih apiang inpe tawna hlim taka hma lam hun a thlirpui chuan val dang ṭang bêlin khiang a awihsan ta mauh mai le!! Chutah zet chuan; chu tlangval ngilnei leh zaidam tak thinlung chu a keh-chhe ta. Thinlung lungchhia leh khawhar ngawih ngawiha mit tui sûr zung zung chungin:-

1. Dâwn ve teh lungrun kei ka chan,
I ngâi hian chhâwl ang ka uai hnê hnê;
_Ka bang thei lo i zûnlêng ngaih,
_Ṭapin luaithlipui ka nûl reng mai. 
-tiin a chham chhuak ta ruai ruai mai a, a thunawn atân:

Nang ngaia lunglên ka bang dawn lo,
I zûnlêng ngai min han dawn la;
Min tiriang lul suh Ṭha-ainâwni. 
- tiin a  chham chhunzawm ta a ni.  

Chu zân khaw-thiang takah chuan van lam chu a han thlir a, arsi chhiar sen loh lungrual taka êng tuarh mai chu a han hmu a, tichuan:-

2. Enteh lungrun, si-âr lêng zawng,
Lungrualte'n thangvan zawl an mawi e;
Nang pawh lungrun lung min rual la,
Rûn hliap-ah nau ang i nui dûn ang. 
- tiin a hmangaih chu a lama lo kir leha hlim taka rûn hmun lênpui atân a la sâwm ṭâwk ṭâwk mai a, beiseina beidawnthlâk zawng a ni hawt e. 

        A thlanvawng ṭingṭang tukchawp chu tumin; a pindan tukverh aṭang chuan thla êng hnuaiah chuan a hmuh theih chin khawvêl chu a thlir a, rilru nâ lutuk avânga mit tui tla zawih zawih chungin leh a hmangaih chuan kalsan tawh mahse amah tluka a lunglai hnem zo tu an awm lohzia leh a hmangaih chu lo piang ve lo law law se tuna a rilru natnate hi a tawng lo anga, rilru dam takin a awm tur:-

3. Lêng zawng an tam khuavelah hian,
Mahse nang ang min hnêm an awm lo;
Ka hmangaih che a chuai SI lo,
Piang lo zawk la kei ka dam mahna!
-tiin, a hmangaih chu a la au zui tâk lawm lawm a!! 

A hmangaih tluka a thinlai luahtu leh a thinlai deng kimtu chu an awm lova, chu zân khawhar tak,  thli-fîm tleh heuh heuh kârah chuan chu tlangval lungchhia chu a  rûm det det mai a. A ngaihtuahna zawng zawng luah khat ṭhintu,  a khawvel hring nun hrehawm leh harsatna a tawh châng pawha a innghahna, a nun chawlh hah-damna, atân pialral ang maia a ngaih ṭhinin a han phatsan tamai chu mak hi a ti tâwp thei lova, mahse eng ang pawhin phatsanin rinawm lohsan mahse dem zui mai lo chuan hmangaihtu chu hmangaihna vêka rawn chhâng lêt leh tûrin:-

4. Thinlai deng kim, thinlai luahtu,
Ka tân pialral pawh i iang ngei e;
Hmangaihin hmangaih a ngai a,
Hmangaihin hmangaih han chhâng leh teh. 
-a la sâwm ṭawk ṭawk mai a ni.  

A ngaihtuahna chuan kil tin a fang zel a. Zânmu pawh chhin zai rêl lo chuan a nun khawhar leh chau tak, a hmangaih ngaia rûm vawng vawng chuan hnêmtu a ngai êm êm mai a. He khawvela a dam ve chhûng chuan a hmangaih chu theihnghilh theih a inring lo va. A hmangaih zun-zâm chuan engtikah nge a kiansan anga, engtikah nge a hmangaih a ngaihnate chu bang ang tiin a ngaihtuah a. A damchhungin a hmangaih laka a lunglenna leh khawharnate chu bang thei hian a ring lo va, rinawmna vawng zo lova phatsantu tân chuan a thih thlenga rinawmna tiam nawn lehin tihian;-

5. Engtikah nge nang ngaih lunglên,
Puan ang ka hnâwl ni lo thleng tûr chu;
Kei chu i tân inhmang zovin,
Thlafam piallei pawh ka zâl âwm e. -a ti ta thlâwt mai a ni. 

Tichuan, he tlangval khawngaihthlâk tak hi hmangaih dang nei leh tawh miah lovin;  Kei zawng itân inhmang zovin, thlafam piallei pawh ka zâl âwm e, a  tih ang ngeiin  kum 1991 July ni 21 khân hmangaihna chu Martyre puiin pilallei-ah zalh a lo ni ta a ni.

Post a Comment

Powered by Blogger.