Thuhma: Lunglei hi Contemporary Mizo Film Industry (ti ve mai ang) ah kan duai lo hle a, filmmaker tha Mizoin kan neih zinga challang tak tak hi Lunglei mi niin Lunglei atang hian House No 109 ata tawh Zoram dengchhuak film tha tak tak engemawzat a chhuak tawh a, Mizo filmmaker tha zinga sawi hmaih hauh loh tur zingah Lunglei pa- Mapuia Chongthu (Leitlang Pictures) leh Malsawma Fanai (Mspace) te kan nei tawh a, tun hnai maia Zoram dengchhuak khawp film tha tak Dengi, I Love You siamtu B. Lalbiakvela leh Ngaihawma Fana ten an rawn belhchhah ve leh ta. Heng kan filmmaker lar te hmalakna azarah hian Mizo movie app changtlung tak pahnih Lersia Play leh Bawmrang TV te Mizo ten kan neih phah pawh hi entertainment khawvela hmasawnna pakhat a ni a tih theih awm e.
Bawmrang TV atanga tihchhuah tum, mipuiin an nghahhlelh em avanga app lamin harsatna namenlo tak a tawrh avanga mi tam takin kan en lawk theih loh he film Dengi I Love You tih hi nizan khan ka en ve thei chauh a, he film hmuhnawm leh hlimawm, lungkuai leh patling pui hnukulh teuh khawpa mi siam thei, zirtir nei tha em em mai hi mahni phak tawka han thai ṭial zui lohah ka ui em a, film lama tawnhriat nei lo leh mo ie critic anga ril tak nilo mah ila ka hmuhdan leh info ka lakkhawm te nen ka han sawi zau dawn teh ang.
Dengi I Love You tih film hi Zu in mimal leh chhungkaw nun a tihbuai theih zia leh hriselna khawihpawitu leh chhungkaw tam tak tidarhtu a ni tih tarlanna film tha tak a ni a, tragic comedy huangah a rinluh theih awm e. A film chanve hmalam deuh thawah nuihna tur tam tak a inzep a, sequence inkalthelh karah romance inzep tel kan hmu zauh zauh bawk. A film chanve hnulamah erawh rilru hah deuh changte, hnuk ti ulh ṭun thei scene engemawzat a awm a, a tawp lam pheichuan a awmnem zawkte mittui a ti tla nasain sawi tawh angin patling pumpa meuh pawh hnukulh lo tura insehruh ṭun a ngai hial mai.
He film hi Lunglei leh a chhehvel a shoot tlangpui niin a lang a, building leh hmunhma dang Director in a thlang thiam viau Photography class a sangin Where leh Thingtlang Tlangval film a sulhnu tam tak lo nei tawh DOP Ngaihawma Fanai sukhnu hmuh a nuam e. Cast mawlh hi a fuh a ni. A changtunu Dengi lema chang Lalrinmawii hi Where ah kan lo hmuh tawh kha a ni a, a role a hneh hle a, a changtupa Ṭhuama lema chang Isaac Chhakchhuak hi film hrang hranga lo chang tawh, acting tha tak niin che tha fu tho mahse tleirawl sual nei lem lo, zu ngawlvei lema a chang thut erawhin a film chawhma lamah duhthu a sam lo deuh em tih mai a awl. Dengi fanu Remremi lema chang Mellisa Lalmuansangi hi naupangte nimahse a acting skills a tha a, Mizo filma naupang kan hmuh tawh zingah a chang thiam ber zing ami a ni awm e. Lalawma leh Pari te nupa lema chang K Vanlalawmpuia leh Rody Vanlalrempuii te performance a tha a, an role an hneh hle. A changtute an zavai maiin an part an hnehsawh em em vek a, acting bikah sawisel tur a vang viau mai. A mal mala kan sawi chuan a sei lutuk ang e.
Dengi I Love You hi ka enzawh veleh Director Pu B. Lalbiakvela leh Director of Photography Ngaihawma Fanai te feedback pein zawhna thenkhat ka zawt a, min chhan danin he film an buatsaih chungchang hetiang hian a sawi.
1. Film buatsaih hi kan ram angah chuan risk lian tak a la ni a, sum leh pai tam tak invest ngai a ni. Sponsorship pangngai tak nen chuan hahdam leh awlsam zawkin film a buatsaih theih a, mahse he project buatsaih nan hian sponsorship pakhatmah an hmu zo lo a, an sum leh pai thawh risk in an hel nuai mawp mawp.
2. Lockdown hmaa shot tan a ni a, Hripui leng khan a ti buai nasa hle a, scene khat phei chu thla 3 danah an shoot nghe nghe.
3. Sawi tak angin Director Pu B Lalbiakvela hian ama puala film a siam vawikhatna a ni a. Firm dang angin hmanrua changtlung zawkte nei lo mahse hmanraw neih ang ang a hmang thiam hle niin a lang.
4. He filmah hian zai a awm zauh zauh a, heng zai te hi midang zai phunrem ni lovin a changtute zai tak tak vek a ni a, Recoording hi Nelson Chawngthu kutchhuak niin Background music zawng zawng hi EFX Audio neitu Mathana kutchhuak niin original vek a ni a, sap ho kutchhuak background music hman tawp ang kha a awm ve lo.
Sawi tak ang khan he film hian chhungkaw tam tak ti rumtu Zu chungchang a focus nasa hle a. Chhungkaw tam tak rum chhan leh zu avanga chhungkaw kehdarhte dinhmun bakah chumi tuartu naupangte dinhmun a tarlang fiah hle. Zuin mihring taksaa hna a thawh tha lo tak te, zuin chhungkaw tam tak economy a tihbuai dan leh leiba tam tak a neih tir phah dan te fiah taka tarlan niin tunlai kan education system hlimthla pakhat chiang taka zeh lan zeuh a ni bawk a, he film hian a goalah nalh takin min hnuklut a, zu ngawlvei tam takin sim phah nan an hman hial beisei ang.
TLIPNA: Mizo film siam hi a hautak chho ve hle a, kan tun dinhmunah sum sen hmu let tura projector hmanga khaw hrang hranga ticket system a chhuah kual kha a rem ta lo va. Remhre takin Mobile phone leh Laptop etc hmanga en theihin App tha tak tak siamchhuakin lei theihin siam a lo ni ta.
Heta mipuiten kan hriatreng tur thil pawimawh em em mai chu heng kan tualchhuak film te kan lo leisak hian film siamtute kan support a, film tha zawk siamchhuak zel turin kan tanpui tihna a ni. Thil manto tak a ni lem lo bawk a, heng film te hi pirate saka username leh password in share kual mai lova kan lo lei ve chat chat hian nasa takin hautak taka film min buatsaih saktute kan pui ve ani tih hi kan hriattel a pawimawh hle a ni.
LINK : https://play.google.com/store/apps/details...
"Keima lei ngei ka en a, i lei ngei i en ve dawn lawm ni?"
- CAST & CREW
- Mellisa Lalmuansangi- Rem Remi
- Isaak Chhakchhuak- Thuama
- K.Lalrinmawii- Dengi
- Sally Hrahsel - Miss Sangteii
- Rody Vanlalrempuii- Pari
- K. Vanlalawmpuia - Lalawma
- C. Lalhmingmuana - Dengi pa
- Lalthakimi- Dengi nu
- Laltleipuii- Zuzuar
- DIRECTION TEAM
- Director – B.Lalbiakvela
- Asst Director – Ding Dingi Pautu
- Director Of Photography – Ngaihawma Fanai
- Camera – Hmangaihzuala Chhakchhuak
- Audio Mastering = Mathana EFX Audio
- Location sound – Renga & ZD Lalduatpuia
- Light – Vanlalhruaia & Lalruatdika
~Gilbert Renthlei
Post a Comment