OPEN SIKUL NIOS AH INBUMNA TENAWM

OPEN SIKUL NIOS AH INBUMNA TENAWM           

- Lalzahawma Kawlkulh  Ni 2.6.2021: Aizawl

NIOS ni National Institute of Open Schooling tihna a ni a. Central sawrkar, Ministry of Human Resources Development hnuaia awm a ni a. Ralkhata pawl 10 (secondary) leh 12 (senior secondary) bakah Vocational Course te zir theihna a ni. NIOS website (www.nios.ac.in) a tarlan dan chuan Regional Centre 19 awmin Study Centre an tih, Accredited Institution (AI tiin kan sawi zel tawh ang) 7400 vel a awm a. Zirlai inziak lut mek pawh maktaduai 4.13 vel an awm mek a ni.

Mizoram hi Regional Centre, Guwahati in a awp a. June 2021-a NIOS website-a a lan dan chuan tunah hian Mizoramah AI 18 a awm; chung zinga 11 chiah an ‘active’ rih a. School an behchhan leh AI Number nen a kimchangin https://sdmis.nios.ac.in/registration/locate-study-center ah hian en mai theih a ni. 

Chutiang Approved AI ah chauh chuan NIOS admission leh class kal leh exam te a tih theih a ni. Aizawl veng thenkhat leh khaw hrang hrangah Approved Study Centre/AI ni lovah NIOS admission leh class kalpui an awm. Hetiang hmanga sum siam hi mi eng emaw zat an awm a; Coaching Centre te tiin mi bumin an sumdawng a ni ber e. Approved AI ho pawh hian a nih dan tur angin an kalpui hauh lova, chutianga Coaching Centre dinte phei chuan dan an zawm lo lehzual.   

Fee Chawi Zat Tur (as on 1.6.2021):

Admission hi online a tihfel a nih thin avangin ‘online fee’ Rs.50 belh tel zel tur. Pawl 10 (Secondary Course) atan a vaiin Rs.1250 (Rs.1200+Rs.50). Pawl 12 (Senior Secondary Course) atan a vaiin Rs.1350 (Rs.1300+Rs.50). Hei bak hi NIOS hnuaiah admission fee chawi tur a awm lo. 

Examination Fee erawh chu Subject pakhat zelah Rs.250 a ni a (Rs.250 x 5 subjects = Rs.1250). Practical keng tel subject ah chuan Rs.120 pek belh a ngai. Hriat tur pakhat chu, admission leh exam form fill up hun pangngai a pelh tawh chuan a chunga kan sawi bakah hian ‘late fee’ chawi belh a ngai thin a ni.   

Heng kan han tarlan bak hi NIOS a chhun luh tur Admission leh Exam kaihhnawih thil eng dang mah pawisa chawi tur a awm tawh lo, a awm belh a nih chuan website ah an dah ziah. Admission Fee chuan registration fee te, study material man te, personal contact programme fee te, Identity Card leh a dangte a huam vek tawh a ni. Fee chawi ngai te chu NIOS website www.nios.ac.in ah en theihin a awm vek a ni. 

Monthly Fee Chawi a Ngai Hauh Lo:

Hei hi Mizorama NIOS buaipuitu te’n in hriat an hlau hle. NIOS website leh Prospectus ah te chiang takin ziah a ni. NIOS Prospectus leh website ah chuan tihian a inziak: “do not pay extra amount for admission and examination over and above the prescribed fee as mentioned in the Application Form for Admission to anyone.”

Mizorama NIOS buaipuitute hian monthly fee an la a, hei hi a dik lo bur. NIOS (chu chu Central sawrkar) in a buaipuitute lawmman tur tlem azawng a pe vek. Chu chu han hausak pui tham erawh a ni lem lo. 

NIOS zirna ah Monthly Fee engmah chawi tur a ni lo. A thlawna zirna tur, Central sawrkarin a buatsaih liau liau a ni e. Monthly Fee hi chawi a ngai reng reng lo tih NIOS zirlai leh chhungkua zawng zawng hian lo hre reng tawh rawh u. 

Khawiah Nge Class Kal Tur?

Personal Contact Programme (PCP) an tih hi Approved AI ah a thlawna kal tur a ni. Subject pakhat zelah class vawi 30 buatsaih hi NIOS inkaihhruaina (norm) a ni a, chumi class 30 ah chuan class 10 chu kal ngei ngai (compulsory) a ni. Amaherawhchu, chumi class 10 chu miin an kal tlinglo palh a nih pawhin NIOS website (FAQ)-a an tarlan angin, exam phal loh phah na tur thil a ni lo a ni. Chutiang bituk zat, a thlawna class (PCP) kal chu a tawk viau a ni.  Open zirna kalphungah hian regular taka class kal beisei tur a ni ngai lova. Regular a class kal thei/remchang lo te tana duan a nih angin mahni in lum atang pawha zirna chhunzawm theih tura ruahman a ni. 

Chutianga a thlawna class kal theih piah lama coaching/tuition kal an mamawh belh a nih erawh chauhvin tu hnenah pawh man chawiin coaching class an kal a rem lohna a awm lo. Chutiang thu erawh chu NIOS zirlaite leh nu leh pate’n an hre lova, hrilh hriat an ni bawk lo a ni; chu chu NIOS buaipuitu te’n mipuite hriat an hlau hle a ni. Chutianga a thlawn (free)-a class a kal theih reng lai chuan, Approved AI ngei ngeiah leh Coaching Centre lem an dinah te chuan zirlaite chuan man chawiin class an kal thin. Sum siam nan liau liau an phuahchawp mai mai a ni. Harh mawlh teh u!

AI/Study Centre te’n lawmman an dawng ve:

Approved AI/Study Centre ah chuan NIOS in a mi ruat Coordinator te leh a thuihhruai an awm vek a. An ni chuan, NIOS atangin hlawh/lawmman chhete (remuneration) an dawng ve a. Zirtirtu in class an lak man te, paper evaluate na man te leh senso dang phuhru turin NIOS hmunpui atangin sum chu an dawng ve thin a, a tam lem lo. Chutiang ringawt chu han thlakhlelh tham leh hausak pui tham a ni lem lo. 

Coordinator te’n “sum kan dawng tlem/mumal lo” tih chhuanlama zirlaite hnen atanga Admission Fee tam uchuak tak leh Monthly Fee phuahchawp an la te hi thil diklo tawp a ni. An buaipui theilo a, NIOS in sum a pek that si loh chuan, zirna chu kalpui loh mai a tha zawk law’m ni? NIOS system hi siam that ngai tamtak a awm ang. Mahse, a system that loh avanga a hrelo te sum laksak an ni mek hi “SUAL” lian tak a ni. 

Mahnia tihfel vek theih a ni:

Home Assignment, chu chu zirlaiten an tih ve ngei ngai, mark pu a ni. Exam leh practical leh chutiang Assignment tihte chu Study Centre/AI kal tlanga tih a ngai vek thung a. Sawi tawh angin, admission leh exam fee pek te erawh hi chu online a tih vek a ni. Hei hi thil harsa a ni lo. Tunlaiah chuan mitin deuhthaw in internet kan hmang vek tawh. Facebook, whatsapp, Instagram, twitter tih vel te khawiha account hawng thiam chuan hetiang thil pawh hi thiam ve vek tur, a ho lutuk. A thiamlo te pawhin a thiam zawkte zawh mai tur; veng/khua tamtaka sawrkarin a din Common Service Centre (CSC) te pawhin an pui thei ang che u (‘CSC locator’ tiin website ah emaw Playstore atanga app download in zawn hmuh theih vek an ni).    

Hriat lohna avanga sum luangral leh thiam lohna avanga remchang laa inbumna ang chi hi reh lul tawh teh se. Mimal takin i tuar ve lo a ni maithei; a ho lam deuh i ti maithei; hlawkna i dawn phah chiam dawn lo; i buaipui peih ve lo maithei bawk. Mahse, a hrelo leh rahbeha awm mekte hrilh hriata chhanchhuah te, mi pamham ho tukdal leh thil dik tih kawngah hian kan zavaiin mawhphurhna kan nei a ni.