AIZAWL-SHILLONG-GUWAHATI & KOLKATA THLUNZAWMTU ALLIANCE AIR LENGPUIAH SERVICE
October ni 18 atang khan Aizawl-Shillong-Guwahati leh Kolkata thlunzawmtu Alliance Air chu a service tan ta. Union Minister Jyotiraditya M. Scindia chuan Lengpui Tum hmun chu tihchangtlun tura Central-in a chhinchhiah zingah a tel tih a sawi.
'Alliance Air' service tan hi Delhi atangin Union Minister of Civil Aviation Pu Jyotiraditya M. Scindia leh Union Minister for State for Road Transport & Highways and Civil Aviation Gen. Dr. V.K. Singh, leh Mizoram CM Office atangin Health Minister Dr. R. Lalthangliana leh Sports Minister Pu Robert Romawia Royte-te chuan virtual-in an flag off a ni.
Union Minister for Civil Aviation Pu Jyotiraditya M. Scindia chuan, sawrkar laipuiin India hmarchhak state-te a ngaihsak thu leh Mizoram chu India leh Asia chhim chhak ramte thlunzawmtu state pawimawh tak a nih thu a sawi a. Lengpui Airport chu passenger mai bakah bungraw phur thlawhna tumhmun atana tihchangtlun tura Ministry-in a identify zinga a tel tih a sawi.
Khualzahawm Union Minister of State General Dr. V K Singh chuan Air connectivity tha zawk siam belh turin Alliance Air mai bakah airlines dang pawh Lengpui Airport thlunzawm turin hmalak zel tum a nih thu a sawi.
Health Minister Dr. R. Lalthangliana chuan Regional Connectivity Scheme kaltlanga sawrkar laipuiin Mizoramah flight connection thar a siam leh, Mizoram leh Meghalaya inkar direct flight siam a ni ta chu lawmawm a tih thu a sawi.
SYS Minister Pu Robert Romawia Royte pawhin Alliance Air-in Lengpui Airport a lo thleng chu sawrkar laipuiin regional air connectivity tihhmasawnna tura a hmalakna tihhlawhtlinna chhinchhiahtlak tak a ni, a ti.
Alliance Air thlawhna hi ATR72 a ni a. Kolkata leh Aizawl inkar thlawkin, a kar lakah Guwahati leh Shillong a tlawh thin dawn a ni. Thawhtanni, Thawhlehni, Ningani leh Inrinni-ah te a thlawk ang. Alliance Air hi Air India Limited subsidary company a ni a. India ram chhungah an service a ni.
19/10/2021 (MSR) : Vanneihthanga Vanchhawng
Post a Comment