Sunday Pual : Hla leh a phuahtu
KA CHHANDAMTU CHU TAWK TURIN, KUT RUAKIN KA KAL ANG MAW
Charles Caroll Luther-a Hla "Beram No Nunna Bua hming an ziakte chauh an lut ang," Thup. 21 : 27b. 
       
He hla lar tak leh lungkuai tak, "Ka Chhandamtu chu tawk turin kut ruakin ka kal ang maw?" tih hla hi Kristian Hla Bu No. 397-naah dah a ni a. He hla sapțawng ațanga Mizo  țawnga mawi tak maia letlingtu chu Dr. Lalhuta Sailo a ni. 
       
A phuahtu He hla mawi tak phuahtu hi Chanchinbu mi (Journalist) pakhat Charles Caroll Luthera (1847 - 1924) a ni a. May ni 17, 1847 khan Worcester, Massachusetts- ah a piang a. Brown University, Providence, Rhode Island-ah lehkha a zir zawh hnuin kum 1886-ah khan Pastor atan nemngheh a ni a. Pastor nih leh chanchinbu lama ziaktu (journalist) nih a kawp a ni. First Baptist Church, Bridgeport, Connecticut-ah kum 1891 - 1893 chhung Pastor hna a thawk a. Lay Evangelist ni bawkin   kum 1886-a Baptist Minister atana an ruat  Rev. A. G. Upham-an tlangval pakhat piangthar, damloa thi mai turin thlarau pakhat mah hruai lova  a Chhandamtu tawh a huphurh avanga thih a hreh thu a sawi a hriat ațangin kum 1877-ah Luther-an he hla hi a phuah a ni. 
        
Tlangval damlo a piangthar Tlangval kum sawmthum mi, a hun zawng zawng khawvel nawmchenna lama inhmang zo vek mai hi thih ngamin a dam lo va, Pathian rawngbawltu Rev. A.G. Uphama'n a va tlawh a. Min chhandam tur leh kan sualte tleng fai tura Isua Krista thisen a chhuah thu leh chu thisen chuan kan sual zawng zawng a ngaihdam tak thu a va hrilh a. Chu dam lo chuan a sualnate chu a thinlunga inchhir ngawih ngawiha Pathian hnena puangin, a sual te ngaidam turin Pathian hnenah sima inhlanin a tawngțai ta a. Tichuan, Isuan a lo ngaidamin  a thinlungah hlimna, thlamuanna leh lawmna sawi hleih thei loh rawn pein chhandam a lo ni ve ta a ni. 

Tlangval a lungngai Ni rei lotê hnuah Rev. A. G. Upham-a chuan damlo tlangval chu a va tlawh leh a;  damlo chu lungngai leh rilru buai takin a va hmu a. A hlimna leh chhandam nih a inhriatna kha a hloh ta em maw tia mak ti takin, "A thisena chhandam i nih kha i ringhlel ta em ni? Pathian hi i tawk ngam lo em ni zawk?" tiin a han zawt a. Thihna hnaih tawh tak damlo chuan chau tak leh titak em em hian, "Ngam lo lo ve, ka pu,  engmah hlauhawm a awmin ka hre lo. Mahse ka hun kal ta ka han thlir kir hian hrehawm ka ti em atin a ni. Ka chhandamtu chu  thlarau bo pakhat mah a hnena hruai lovin kut ruakin ka tawk ang maw? Ni khat chauh tal pawh a rawng ka bawl lo hian ka rilru a tina em em a ni," a ti ta vawng vawng a. 

Luthera'n hla a phuah ta He chanchin lungkuai tak mai Charles Carroll Luthera'n Rev. A. G. Upham-a sawi a hriat chuan a rilru a hneh hle a, tichuan he hla lar tak hi a phuah ta a ni 
Tlangval dam lo khuma lungngai tak mu mithla chungin a hla thu chu i han chhiar chhuak teh ang : 
1. Ka Chhandamtu chu tawk turin, 
Kut ruakin ka kal ang maw ? 
Ni khat mah a rawng bawl lovin, 
Eng nge ka pek tak ang aw!

Ka Chhandamtu chu tawk tutin, 
Kut ruakin ka kal ang maw?
Thlarau pakhat mah hruai lovin,
Ka tawk dawn, ka Chhandamtu.

2. Thih chu hrehin ka lungngai lo, 
Chhandamtu'n min hruai vangin; 
Mahse, ruaka ka tawk tur hian, 
Min tihrehin ka lungngai.
3. Kum ral ta zawng zawngte kha aw!
Koh kir leh theih ni sela,
Ko kirin, Chhandamtu hnenah 
Lawm takin ka pe tawh ang.
4. Ringtu zawngte u, tho ula, 
Ni a la ên chhung hianin; 
Thihin a nan hma che u hian,
Thlarau bo tan thawk rawh u.

Inen ve ilaPathian rawng bawl lo leh thlarau bo pakhat mah hruai lo hian nang leh kei hian Lalpa Isua hi tawk dawn ta ila kut ruakin kan tawk ngam ang em? Zah nachang kan hre ve ang em? 

Lalpa thupek chu Lal Isuan amah ringtute tih tur a tuk chu Chanchin Tha hrila thlarau bo chhandama, a hnena hruai a ni tlat mai, (Mat. 27 : 19, 20). Kan dam chhung hun tam zawk Kohhran leh Țhalaiah te a rawngbawltu inti chung si hian kan thi ang a, "Nang, thlarau bo engzat nge i rawn hruai?" tiin min lo zawt ta se tukkhum thak lo pui hi kan hiat ang tih a hlauh awm hle  mai. Ringtute tum (goal) pakhat chu vanram a nih rualin thlaraubo hruai a ni. 
       
Thilpek leh țawngțaiin Ram thimah te kalin an țawngin thu kan sawi ve thei lo a ni thei e. Kan awmhmun țheuhah thilpek leh țawngțaiin thawktute leh an thawhna ram mite tan țhahnemngai takin rawng kan bawl ve thei a ni. Tichuan vanram kan thlen hunah kan țawngtainate leh thilpek te hmanga thlaraubo kan mante chuan min lo lawm (welcome) ve dawn a ni. 
Tichuan
"I thilpek hlu tak avangin thlarau boten, 
Lal Isua an lo hmu ta; 
I thilpek hlu tak avangin thlarau boten,
Lal Isua an lo hmu ta, Halleluiah," 
tiin van mipuiten lawm hla an sa ang, tichuan inthlahrung lovin van khawpui i lut tawh ang, thlarau bo Isua hnena i hruaiten hlim takin an lo lawm ang che. 

Mizo ṭawnga letlingtu He hla thiam tak leh nalh taka Mizo ṭawnga letlingtu chu Dr. Lalhuta Sailo a ni. Zosapte Mizorama an awm lai khan Karimganj, Sylhet leh Silchar lama Sap Misdionary te khan Aizawlah chawlh thengthawt an rawn nei fo ṭhin a. Chung missionary te chuan an sa ngun hle a. Zosapte zinga che tla ṭhinten he hla hi an lo hria a, chuta ṭanga rei lo têah Mizo ṭawngin Dr. Lalhuta Sailo hian a letling ve ta nghal a, miten an duhin a lar chak hle a, Zoram dung leh vang a fan chhuak ta nghal a ni. 

Bible chang innghahna "Tin, a fingate chu van êng angin an êng ang a, mi tam tak felnaa hawi kirtirtute chu arsi angin kumkhaw tlaitluanin  an êng ang," Daniela 12 : 3.  - Bchhangte klsb vthr 

Post a Comment

Powered by Blogger.