A THIH CHAMAH A NUPUI HREMNA PUANG DAWN
December ni 9, 2020 zana Dr Laltanpuia (43) s/o John Lianzauva, Kulikawn thihnaah, a nupui Mary Zothansangi chu Court-in tualthattu ngei a nihna nemnghetin, IPC Section 302 leh MLP Act Section 6 (2) tlawhchhanin thiam loh a chantir.
Dr Laltanpuia tualthihna thubuai hi Aizawl Judicial District, Additional District & Sessions Judge, Dr. H.T.C. Lalrinchhana'n a ngaihtuah a, nimin khan thutlukna puangin, he tual thihnaah hian Dr Laltanpuia nupui Mary Zothansangi chu thiam loh a chantir a, a hrem dan tur chu Dr Laltanpuia thih cham, December ni 9-ah puan a ni ang. IPC 302 hmanga thiam loh chantirte chu dam chhunga lung in tan emaw, thi tur emaw thlenga hrem theih a ni.
Also Read Dr. Laltanpuia Chhiat Tawh Chungchanng
Nimina Court thutlukna puan ngaichangin Dr. Laltanpuia chhungte leh Kulikawn khawtlang hruaitute chu Court tualah an pungkhawm a, Dr Laltanpuia thihna-a mawhphurtu hi na taka hrem ni rawh se, he tual thihna thlentu hian Kulikawn veng rawn rap tawh suh se tih leh Dr Laltanpuia thlavang hauhna thu ziak hrang hrang an keng hlawm a ni.
Kum 2020, December ni 9 zan dar 6:30 vel khan Dr. Laltanpuia chu a nupui Mary Zothansangi hian a awmah chemtein a vit a, Dr Laltanpuia hi damdawi inah hruai nghal ni mahse, a hliam tuar lovin hemi zan dar 10:05 hian a boral ta a ni.
~ Vanneihthanga Vanchhawng: 7th December, 2021 (MSR)
Post a Comment