ZIAKTU ROPUI L. KEIVOM A AWM TA LO
(15 July, 1939 - 28 November, 2021)
Nimin December 1, 2021, chhun dar 12 khan Delhi-a a vuina hun an hman rualin a chhungkhat laina țhian țhaten MZP office-ah Pu L. Keivom vuina hun kan hmang ve a. Amah ngainatu leh ngaisangtu mi 70 dawnlai kan kalkhawm a, tluang takin hun kan hmang thei a, a lawmawm kan ti khawp mai.
Pu L. Keivom țhian țha ber pakhat leh a lehkhabu zawng zawng lo chhuahsak (publish) țhintu Pu M.C. Lalrinthanga rokhawlhna avanga a lo kal theih loh avangin a țhianpa thlah nana a thuziak, a hnuaia kan han tarlan hi chhiar chhuakin hun kan țan a.
A Chanchin Tawi:
Pu. L. Kelvom hi unau 13 (Mipa 7 & hmelchhia 6) zinga naupang ber niin July 15, 1939 khan Pherzawl, Manipur-ah a piang a. A nu’n a pai lai ațangin a pa chu khum betin a dam lo va, a pian atanga rei lo te-ah a thihsan ta a. A pa chuan, “Hei kei lah kal mai tur ka ni tawh a. Lalpa’n thlamuan zel che u rawh se, kan fapa hi a hmingah Lalthlamuong ni rawh se,” a ti a (Mizo țawng chuan ‘Lalthlamuana’ tihna a ni).
KEIVOM hi chu an hnam hming a ni a. Tun hma chuan Khawzawl bul, Ngaizawl chhak tlangah khian Hmar hnam zingah Lungtau-ho an awm țhin a. Anni-ho hian Fal (Vawmtlak)-ah Sakei dum (Black panther) an awh avangin kha khua-a awm zawng kha “KEIVOM HO” an ti țhin a. Chuta țang chuan KEIVOM hnam hming hi a rawn piang ta a ni.
Pu L. Kelvom hi High School thleng Pherzawl, Manipur-ah a zir a, D.M. College, Imphalah I.A. 1st Div.-ah a pass a. B.A (English Hon’s) a zawh hnu-ah, Gauhati University hnuaiah M.A (History) 1966 khan a zo va. Kum 1966-67 khan Sialmat Christian College-ah Lecturer ni chungin All India Service ni tura competitive exam-ah tlingin, kum 1967-1970 khan Indian Customs and Central Excise Service a zawm a. Bei chhunzawmin kum 1970 khan Indian Foreign Service (IFS)-ah a tling a. IFS a tlin țum hian an batch-ah European History-ah mark a hmu sang ber a ni.
IFS a nih chhung hian hmun hrang hrangah post a ni a. Kenya (Africa), Jeddah (Saudi Arabia), Wellington (New Zealand), Rangoon (Burma), Milan (ltaly), Male (Maldives)-ah te hian 1st Secretary, High Commissioner, Minister, Charge d’affaires, Consul General tein a awm tawh a. Kum 2002 khan penson-in Delhi-ah ama inah a khawsa ta a ni.
Thu leh Hla Lam:
Pu L. Keivom hi thu leh hla lama tuimi niin kum l3 mi a nih laiin Pherzawl Youngster Athletic Union hla tur a phuahsak a. A High School kal lai pawhin a țhianten Love letter ziahsak turin an ruai țhin. Hmar țawngin Hla a sâwm tel a phuah bakah Article a za tệl a ziak bawk. Tin, lekhabu pawh eng emaw zat ziakin a publish bawk. Mizo țawnga a lekhabu chhuah Zoram Khawvel-1 to 8, Bawktlang Thawnthu, Thuthlung Ram, Pherzawl Titi te a ziak a, Zoram Khawvel-1 phei chu Mizo Acadamy of Letters-in Book of the Year-ah a thlang a ni. Hmar hla tam tak English-in a leh bakah Robindranath Tagore-a ziah ‘Gitanjali’ kha ‘Inhlanna Hla’ title pe-in Hmar țawngin mawi takin a let a ni.
Pu Keivom thiltih ropui deuh pakhat chu Bible pum pui Hmar țawnga letin Genesis ațangin Thupuan thleng type writer-in amah ngeiin a chhu vek a ni. Bible buatsaih leh chhutah hian tumah pȗr lovin a pension chhuahpui pawisa a hmang a. Sam leh Solomona Hlate/Hlathlankhawmte phei chu poetical word bakah rhyme dik tak vekin a dah a ni.
Bible pum pui Hmar țawnga a lehlin bakah Hmar țawnga a lehkhabu chhuah tawhte chu:
1. Hmar Hlasuina (phek 388)
2. Thu le Hla Inlet (phek 377)
3. Ka tukvera inthawk (phek 310)
4. Zangkhawbungbu (phek 310)
5. Nun ram (phek 143)
6. L. Keivom thukhawchang (phek 199)
7. Biethu (phek 392)
Pu L. Keivom danglamna chu - Officer lian ni mah se, tu pawh hian țhian kawm hian an kawm thei vek a. Mi taima tak a ni a, a hriatna te pawh a zau hle a ni. Thil mak deuh pakhat chu - Mizoram ațangin study leave-in Pu Zosiama Pachuau leh mi eng emaw zat kha B.Ed. an training țum, an subject kha harsa an tih deuh vangin College leh University-a a subject pawh ni lo kha note țha deuhin a siamsak hlawm a ni.
Pu L. Keivom nupui Pi Dari kha Registered Nurse a ni a, December 11, 2020 khan chatuan ram a lo pansan tawh a. An fate:
1. Margaret Lalthangmawii: Ani hi London-ah Fashion Designer niin dawr changkang tak a nei a. British Prime Minister nupui thlengin a Customer an ni. A pasal European nen London-ah an inbengbel.
2. Helen Singpui: Newzeland-a an awm lai khan a ram mi pasalah a nei a, Wellington-ah an awm. Politics-ah lutin Wellinglon khawpui (Aizawl Municipal Corporation) kan tih angah hian Deputy Mayor a ni ve tawh. A fate zingah an rama Sipai Officer pawh an awm.
3. David Lalhmingsang: Hony Captain Rev. Lalzirlien Biate fanu nen inneiin Indonesia-ah an awm.
4. James Lalropui: A fapa naupang ber James Lalropui hi International Photo Journalist niin a nupui (American) nen New York-ah an khawsa.
A hun hnuhnung:
Ni 25 June, 2021-a a zing tho chu chau leh ngai awh lova a inhriat avangin thisen test a rawt a. An han kal chuan a chauh viau avangin emergency-in damdawi in lamah an kal a. Doctor-in an han en chuan Low-Haemoglobin (HB)/Anaemia (Thisen nei tam tawk lo) leh Pneumonia natna an hmu chhuak a, thisen an pe nghal a. Chipchiar zawka investigation an han tih chuan a rilpui, a thin, a chuap leh a pumpui-ah Cancer lo awmin stage 4 lai a lo ni tawh a, damdawi inah leh ama inah theihtawpa enkawl zui a nih hnuin a natna chu zual zelin ni 28.11.2021, zing lam dar 5:46-ah chatuan ram min lo pansan ta a ni.
~MC Lalrinthanga Khatla South, Aizawl
Hemi hnu hian hetiang hian thu ka sawi ve ta a ni.
KA ṰHIANPA LALTHLAMUANG KEIVOM KHA
Ka țhianpa Lalthlamuong Keivom, Maripa ti-a ka koh țhinin mual min han liamsan ta mai hi chu tuar thiam har ka ti khawp mai. Ka uiin kan ngai viau țhin dawn a ni.
Maripa nen khan kum 1967-a Lal Bahadur Shastri National Academy of Administration, Mussoorie-a kan awmho ațang khan kan inhre țan a. Chuta țang chuan inthlah lovin kan ințhianzui zel a. Ram hrang hranga ram palai hna a thawhna-ah a khat tawkin phone-in kan inbe fo țhin a. A awmna ram chanchin ngaihnawm tak tak min hrilh țhin a, a bengvarthlak ka ti hle țhin a ni. Ṱhian țha satliah mai ni lovin țhian rinawm a ni a, ka tan chuan a hlu em em a ni.
Mizo țawng ziak dan dik te hi a hre țha ber pawl a ni a. Thuziak lama ka inhman ve ațang khan hriat chian loh ka neih apiangin ka berawn țhin a, ka tangkaipui hle țhin a ni. A ziak dan dik bâkah Mizo țawng pianphung hre fuh ber pawl niin ka hria. English literature thiam tak a ni a. Ṱawng upa zawk hre fuhte hian țawng naupang zawk an zir hian an hre fuh bik țhin tih a ni a. Chu chu Maripa chungchangah pawh hian a dik niin ka hria.
J.F. Laldailovan Mizo țawng a thiam viau bkna chhan pawh kha, a naupan laia Mizo țawng theihnghilh țhak khawpa a awmbona lama Sapțawng țawng hman bera a neih țhin vang kha ni-a hriat a ni.
History-ah a tui hle bawk a. IFS exama European History-a, an batch-a mark hmusang ber a ni khan history-a a tuizia chu a lanchiantir a ni. IFS officer ni-a khawvel ram hrang hranga a awmkualna lamah khan a awmna ram apiang mite history kha chiang lehzualin a zirzui a. An hnam ze dalnglamna te, sakhua an vawn dan danglam bkna te a zir chhuak a. Zoram Khawvel-ah te ngaihnawm takin a ziak a, a bengvarthlak hle a ni.
Mizo hnahthlak insuihkhawm hi a vei ber a ni fo va. Hemi thila a ni tluka thawh hlâwk hi an tam lo hle ang. Indian Embassy, Rangoon, Burma-a Councellor a nih lai khan Rangoon-ah Zohnahthlak Khawmpui a awm a. Chuta a thusawi chuan India Sawrkar thin a khei hle a ni ang, hnathawh tur pawh nei mang lovin, hlawh lâk ve theihna chauh hna, O.S.D.,, Ministry of External Affairs, New Dehi-ah chelhtirin rei tak a tangkhang a ni. A hnu-ah pawh a seniority zira a phȗ tâwk hna pawimawh pệk loh nan an hmangzui ta zel bawk a ni.
Khatiang kha a chunga thil thleng thei a ni tih hrereng chunga Zohnahthlak tana a inpek vena lama a tih a ni a. Tun hnu-ah pawh pawi tihna leh inchhirna a nei miah lo tih hetiang thu kan sawi dun țumin min hrilh nghe nghe a ni.
Kum 50 chuang zet țhian kan nih chhung khan, Sâp thufingin ‘A friend in need is a friend indeed’ a tih ang khan hun pawimawh leh harsa ka tawh changin a rawn inlan fo țhin a. Kum 1989-a ka nupui hmasa ka sȗn khan Simla bul, Salogra-a thi a ni a. New Delhi-a a awmlai a lo ni hlauh bawk a, a vuina hun min han hmanpui a ni.
Technical Course ngaihvena Mizo nula pakhat Chandigarh-a lokal, kan ina chawlhkar khat kan lo mikhual chuan, Delhi-a Maripa ina an inhmuhkhawmna-ah nuamsa taka khawsa ni-a min hmuh thu sawiin ka chhungte Zorama awmte chu an retheih hle si nena thil inhmeh lo tak ni-a a hriat thu a sawi a. Maripa chuan, “Kan khawsak dan a lo changkang a nih chuan Sawrkarin min enkawl dan zulzuia a ni a. Kan hlawh leh kan hamțhatna dawn te chu kan senso nena inbȗk tawk a ni a. Kan senior ve deuh hma chuan tuman hmun danga awm kan chhungte puih theihna kan nei lo. Pu Manzuala pawh chutiang dinhmuna ding chu a ni tih ka hria. A thuhrimin ka țhian țha berte zinga mi a ni a. I rệl duh a nih chuan ka in ațang hian chhuak la, hmun dangah va rệl rawh,” a ti a ni.
He thu ka sawilan duh chhan tak chu Maripa kha thudik țanna leh thu diklo dona lama huaisen tak a nih a lanna a nih kha a ni. Mizote hi mi hmaizah nei nasa tak kan ni a. Kan bulhnai leh kan benghriata thu dik lo sawi an awm pawhin a dik lo a ni tih hrilh aia ngawihbopui mai ching mi kan ni a. Hei hi kan zinga thu belhchian dawl lo a tam viau țhin chhan a ni a. A pawi viau a ni. Rev Thansiama te, Pu A. Thanglura te anga an benghriata thu dik lo sawitu apiang chu cha chhuah nghal zel ang kha kan mamawh a ni.
Maripa khan kan hnam ze țha leh țawng humhalha tihhmasawn nana tih tur țul chu a sawi chiang tâwk hle a. Keini dama la awmte hi a taka chantirtu tur kan ni. Mahse Mizote hian takna hi kan tlachham ệm a, kan insiamțhat loh chuan chutiang chu kan tihhlawhtlin a beiseiawm lo hle si a ni.
Kan sawi fo tawh țhin angin kan Politician/Sawrkar te chu ram leh mipuite rawngbawl tura inpe inti, anmahni rawng an bawl tak hlauh zawk si avanga hausa thȗr thȗr ta deuh vek, mipui tam berte erawh chu rethei tawlh tawlh ta si an ni a. An kalphung dik lo vanga kan ram hi Corruption Kairualna ber lo ni ta hi a ni.
Kan Kohhrante pawh Pathian duhzawnga a rawng bawl lova, mihring duhzawng zawka bawl an nih vanga kan nun hi lo tluchhe ta em em a, natna țihbaiawm pui puiina a bawm nasat ber lo ni ta hi kan ni. Corruption lo hluar tak em emna-ah pawh a mawhpurtu lian tak an ni.
Pathian biak nan ber pawha kan nuam tihzawng, Zai țhup țhup, Lam mup mup, Thusawia au vak vak bâk tihdan dang nei thei lo kan ni a. Hnam insuihkhawm nana beitu, ZORO leh Tlawmngai Pawl dangte pawhin an thil tum tihhlawhtlin nan Zai leh Thusawi bâk tihdan dang an neih kan hre rih lo.
Insuihkhawma hnam ropui ni tur chuan kan Jerusalem kan tih, Aizawl awmna Mizoram hi ram intodelh leh changkangah kan siam phawt tur a ni. Tunah te hian han insuihkhawm ta ila, vaibuh ei kan pung nghal vak emaw a ni ang a, hna hmu lo ni lovin, hna thawk peih lo kan pung emaw a ni bawk ang a, awmzia a awm lo vang.
Pu L. Keivom-an chona lian leh pawimawh tak min hnutchhiah hi hria ila. A suangtuahnaa Zohnahthlak changkang leh ropui a neih hi, a taka a lo chan theih nan tumruhna leh taihmakna hmanrua-a hmangin i thawk ang u. Ani chuan hetiang kan nih theih nana a tih tur chu a ti zo tawh a; a chawl rih tawh dawn a ni.
Zofate kan insuihkhawma hnam ropui taka kan awm theih nana a thawh hlâwkzia chu a hretute vek kan ni a. Zohnahthlak hnam hi a dam chhung chuan Lalthlamuong Keivom hming hi a dai lo vang.
Post a Comment