Thawhlawm
Kan Kohhrante kalsualna tak pakhat chu Thatchhiat Theology-a an innghat a, Thatchhiat Theology-a min chậwm zel a, min chhῠm hmin hi a ni a. Pahnihna chu Sum an ậtchilh ta hi a ni. Kan ram Corruption Kairualna ber leh Natna Ṭihbaiawm pui puiina a bawm nasat ber kan ni reng hi heng kan Kohhrante kalphung diklo vang hi a ni. Sum ậtchilh thu hi pawi khawih nasa bertu a ni a, sawizau deuh ila, kan Kohhranten sum an lakluh tamna ber, Sawma Pakhat Pệk thu hi han thlῠr deuh ila a ṭha ang e.


Thuthlung Hluiah chuan Sawma Pakhat pệk tur tih thu a awm tih kan hria a; Thuthlung Tharah erawh chuan chutiang sawina a awm lo. Chuti chunga kan Kohhranten Sawma Pakhat pệk ngaih pawimawh taka an neih chhan hi i han zir chiang dawn teh ang u.

Thuthlung Hlui hunah kha chuan Levia chi puithiamte kha temple enkawltu, hmunphiah te nen lama thawktu an nih avang khan hlawh an neih kha a ṭul ngei a. Mahse, Sawma Pakhat Pathian tậ han tih ngawt mai hi chu Zawlneite sawi ni mahse, an duhthawh mah mah emaw tih tur a ni. Pathian chu Thlarau a ni a, mihringten chaw, thlai leh eitheih thil dang kan ei angin a ei ve lova in theih thil a in bawk hek lo. Kan kan thil thar leh kan thil neihte hi a mamawhna tur a awm lo. Thilpek a phῠt a nih mial pawhin lawmthu sawina bak a ni lo vang. Abrahama hnen aṭang khan Pathianin phῠt a nei lo va, lawmthu sawi nana a pệk a ni tih kan hria. Jakob-a pệk chhan pawh chuti bawk.

Anni thilpệk tehrệng pawh kha Pathianin vana a lậk chhoh thu kan hre lo va. A dawngtuten ậwm an tihna-ah an hmang ta mai ṭhin a ni. Hei tak hi kan belhchian ngai chu a ni. Pathianin lawmthu sawi nana a hnena thil kan pệk a phῠt a nih chuan chutiang thilpek chu engpawh lo ni se, a mamawh loh vek an nih avangin he leia a duhzawnga kan hman atan a ti tihna a ni ngei ang. Muslim-te hi Thuthlung Hlui thu ringtu ve tho an ni a. Sawma Pakhat pawh hi an pệ a. Mahse, an thilpek chu an puithiamten kawla an duh ang anga hmang lovin, mirethei ṭanpui nan an hmang nghal vek ṭhin a ni. Chu chu tihdan dik leh ṭha a ni a. Pathian duhzawng pawh a ni ngei ang.

Keini ve thung chuan miretheite hnena pe nghal vek lovin kan Kohhran hruaituten an kawl a. A tam ber chu Kohhran leh anmahni intihropui nan leh intihnawmsak nan an hmang ta ṭhin a. Chu chu a dik lo va. Chu chu kan sawisel chhan chu a ni. A chiah chiaha phῠta pệk hi chu a Pathianzia lo bawk. Malakia kha a lo tunlai politician deuh anga Puithiamte lawmzawng sawi nachang a lo hre deuh pawh kha a ni mai thei asin. Congress-a ka awm ve zawk lai khan Committee liana kan sawihona-ah Pu Sawta nen kan sawrkar chuan Chief Minister pawhin motor pakhat bậk a kawl lo vang tih rawtna kan siam a. Kan pawmtlang tawh emaw kan tih lai khan, Minute a’n ziah dawn meuh chuan kan Secretary khan, ‘CM tan chuan pahnih tal maw le’ a ti a. Sawrkar an han siam a, Minister a nih tậkah khan a lo inhmakhua thiam emaw ni, kan tih ṭhin te kha min hriat chhuahtir hial a ni.

Engpawh ni se, kan innghahna chu Thuthlung Thar a ni a. Chutah pawh chuan Lal Isua zirtirna laimu, Lalpa Ṭawngṭaina min zirtir, Tlangchunga Thusawi leh Tehkhin Thu 30 min hrilh-a kan hmuh te hi an ni a. Lal Isuan ka thuzawmtute chauh vanramah an kal ang a tih khan heng a thusawite-a tih tur min hrilh te kan zawm chauhvin vanramah kan kal ang tihna a ni. Lal Isua khan a hran a hraia Sawma Pakhat pe tur kan nih thu a sawi lo. Kan thilpek chu engpawh ni se, engzat pawh ni se kan thinlung aṭanga chhuak phal tak leh lậwm taka pệk tur a ti a ni. Tuna Sawma Pakhat leh thawhlawm dangte pawh kan pệk dan leh kan lậk dan, kan hmanna thlengin Lal Isua duhdan nena inpersan deuh vek an ni.

Hemi chungchanga Pu Lianhmingthanga thuziak hi a dikin a ṭha hlawm ệm a, ka’n lachhawng ang e.
1. Thawhlawm ip zawng zawngah “tangka sum ngainat hi sual tinreng bul a ni” tih hi hawrawppuiin, kan ziak ang a. Envelope-ah “sum thianghlim chauh thawh tur – eiruk sum emaw, kut tling lova sum lak luh emaw reng reng thawh a thiang lo – chutiang thawh lui an awm a nih chuan kohhranin mawh kan phur lo vang a, a thawhtute’n mawh an phur ang. Sum thianghlim lo thawhtute chu an chung a pik ang a, sum thianghlim thawhtute erawh chu malsawmin an awm ang –Thawhlawm reng reng hi a thianghlim tur a ni a, a thawhtute thawh chhan leh an thawhna rilru pawh a thianghlim tur a ni.. Hlan thianghlim chawp ngai reng reng thawh loh tur, a thianghlim sa chauh rawn thawh tur” tiin kan ziak thlap bawk ang….

2. Thawhlawm ipah chuan heng thute hi chiang takin a inziak khat tlat ang a. thawhtute hming leh thawh zat ziahna tur hmun a awm lo vang.

3. Thawhlawm chu Lalpa tana pek a nih chuan kan peka berin a lo hriat chuan a tawk em em a, midang lo hriat ve zel kher kha a ṭul lo. Kan duhsak zawngte chu eng eng emaw kan pe fo va, midangte kan va hrilh ve kher zel lo ang bawk hian, Lalpa hnena kan pek pawh midangte lo hriat ve kher zel a ṭul lo. Social media-ah mi thu post kan lo share darh chiam chiam anga kan thawhlawm thawh zat te hi midangte hriat tura lo share darh chiam chiam chi pawh a ni lo.. Tlawmngai pawl thil emaw, NGO thil emaw a ni lo va… Lalpa nena kan inkar thil liau liau a nih vangin, kan pek zat chu ani berin a lo hriat chuan a tawk em em a ni.

4. Thawhlawm thawhtute leh an thawh zat te tarlanga, a thawh tam apiang chung lama an hming daha, a thawh tlem apiang a mawnglama an hming dah bawka, mi zawng zawng chhiar tura mi thawhlawm thawh zat lehkhabu-a tarlan ṭhin te pawh hi tihtawp vek a ni ang.. Chutiang tih vel chu a pathian thu ber loh avangin. Mihlimho ṭawngkam nalh deuh han hawh lawk ila “a mihring nambar tlat”. Mihring nambar mai mai a ni.

5. Kan Lalpa Isua’n he mi chungchanga a sawi te hi i han ngaihthla thung tawh teh ang u. "Chutichuan, mi hnena englo i pệkin, mi vervekten mi fak an hlawh theihna tura, inkhawmnainahte, kawtthlerahte an tih ṭhin ang hian, i hma-ah tawtawrậwt hamtir suh. Tih tak meuhvin ka hrilh a che u, an lawmman chu an hmu zo tawh. Nang erawh chuan mi hnena englo i pekin, i kut ding lamin a tih chu i kut vei lamin hre suh se, i englo pek chu a rῠkin a awm theih nan. Chuti chuan, i pa a rῠka hmu ṭhintu chuan a rῠl ang che.” a ti a ni.. He thu, kan Lalpa Isua zirtirna hi kohhranah kan inzirtir uar hle tur a ni. Kan Lalpa Isua hian mi hnena kan thilpekte chu a rῠka pe tura min zirtir a nih chuan, Pathian hnena kan thilpekte phei chu a rῠk lehzual tur a ni. Kan hmaah tawtawrậwt hamtir chiam chiam tur a ni lo, chuti lo chu, “an lawmman an hmu zo tawh” a tih kha kan chan a ni mai ang. Chuvangin, thawhlawm thawhtute leh an thawh zat chu tlangzarh tur a ni lo… eng anga rῠka thawh pawh ni se, Lalpa’n a hmu vek thova, a rῠl tho tho dawn, mal a sawm tho tho dawn! Bible mil zela kal hi a tha ber!

6. Kan kohhran hruaituten pulpit-a an sawi duh tawh loh, “tangka sum ngainat hi sual tinreng bul a ni” tih thupui hmangin thla tin, chawlhni hmasa ber apiangin Pathian thuchah sawi ziah tur a ni bawk ang a. Chhung tin sum lak luh dan leh hmannate chu a thianghlim tur a ni tih te, thawhlawm thianghlim thawh chungchang te leh kristian nun thianghlimna te kan inzirtir uar hle thin ang.

7. Lalpa hian thilpek hlan thianghlim chawp ngai a duh lo, a thianghlim sa a duh tih hi kan hriat reng a pawimawh. Hlan thianghlim chawp ngai sum bawlhhlawh ai chuan, sum thianghlim sa thawh mai chu Lalpa tan a lawmawm zawk daih ang a, amah kan zahzia lanna a ni bawk ang. Israel-te lakah pawh, Lalpa’n ran an hlan tur chu sawisel bo a phῠt. Sawisel kậi reng reng chu an hlan tur a ni lo. A mitdel te, a ruh tliak te, a silawng te, pận nei te, tangseh te leh a phậr te chu an hlan tur a ni lo. Lalpa’n a duh lo a ni. Engtin nge kan Lalpa’n a tih kha? “nangni in thianghlim tur a ni, kei ka thianghlim si a” a ti a ni lo’m ni? Chuvangin, kan Pathian hian thil bawlhhlawh pệk a duh miah lo va, sum bawlhhlawh pệk pawh a duh bawk hek lo. Rilru bawlhhlawh pu chunga pek pawh a lawm lo. Chutiang bawkin, keini pawh hi miin thil bawlhhlawh deuh deuh min pe fo se la kan lawm miah lo vang. Chuvangin, Lalpa hnenah hian sum thianghlim chauh kan hlan tur a ni.
8. Financial campaign pawh hi rinna-a ke pện nena inkawkalh tlat a nih vangin tihtậwp tur a ni. Thawhlawm thawh tam tura campaign vak vak te, mi phῠt vak vak te hi a Pathian thu lo. Pathian a lawm chuang lo, sum lama duham vang mai mai a ni. “Jehova Jireh” tih hmiah mai tur. Pathian thu hi awih hmiah hmiah zel mai ila, Lalpa a che zel mai a ni. Hmangaihna leh duhsakna avanga pệk pawh ni lo, a nawra innawr chhuah leh, loh theih loh anga ngaia, pệk ngei ngei tur a ni tih vanga thawmlawm thawhte hi Lalpa tan lawmna tur a awm lo.

9. Thuthlung Hluiah kha chuan, sawma pakhat an pek loh chuan Pathian ta an rῠksak a ni – pek ngei ngei tur a ni a, sawma pakhat pek kha a bata bat a ni a, tih ngei ngei tur a ni. Nimahsela, tunah chuan Thuthlung Hlui hunah kan awm tawh lo va, Thuthlung Tharah hi chuan sawma pakhat pe ngei ngei tura min tihna a awm tawh lo!

10. Sawma pakhat a ni emaw, ni lo emaw lam a ni tawh lo. Thuthlung Thar chuan, thinlunga tum ang zela pe turin min zirtir a ni. Chutah pawh Lalpa’n a duh chu, hlim taka pệk a ni tlat! Lậwm tak, lungawi tak, hlim taka pek Lalpa’n a duh a ni.

11. Tun laia sawma pakhat pek ngei ngei tur ti-a midangte zirtirtute chuan Thuthlung Hlui zirtirna an la vawng nung zel duh tihna a ni mai a. A nih rau rau chuan, sabbath te serh law law se la, sabbath an serh chuan, an serh te tan ve nghal law law bawk se la, tin, ran thisen pawhin inthawi leh zel bawk se la.. chu nen chuan engmah danglamna a awm lo! Chuti taka sawma pakhat pek chu, loh theih loh anga an ngai tlat a nih chuan Thuthlung Hlui nunah khan kir leh se la a ni mai ang! Thuthlung Hluiah chuan inkhawmpui te kha zậwlneiin a hnệ a ni a, inkhawmpui te pawh hi bansan ang hmiang. Vawksa, kaikuang, chakai, chengkawl te pawh ei loh tur a ni ang chu.

12. Kan kohhrante kalphung chu a tawi zawnga sawi chuan kan rilrem zawng apiang chu Thuthlung Hlui-a mi pawh ni se, tih ngei ngei turah kan ngai a. Kan rilrem loh zawng a nih chuan Thuthlung Hlui ami a ni emaw Thuthlung Thar ami a ni emaw kan haiderin kan ngaihthah hmiah ṭhin tih hi a ni. “Sabbath tih te, serh tan tih te leh zawlnei tih vel lam chu Thuthlung Hlui hun kha a ni a” tiin an hnawl a, sum duh vang leh thawhlawm a tam theih nan erawh chuan Thuthlung Hlui lamah an kir leh vut vut lawi si a nih hi!

13. Thilpek hi a tam leh tlem, a len leh tệt lam aiin pekna thinlung hi a pawimawh ber a, a hlu ber bawk. Hmeithai rethei tak kha chuan sawma pakhat mai a ni lo, sawma sawm a pe tawp mai a ni. Mi hausaho thawhlawm nen kha chuan dere pahnih kha khaikhin tham pawh a ni lo. Nimahsela, kan Lalpa Isua khan thawh tam berah a puang tho tho! Pệkna thinlung hi a ni, a duh ni. Pe tam nih duh vang te, lansarh nih duh vang te, fak nih duh vang te-a pệk hi Lalpa’n a hre vek tho tho – pekna thinlung hi a thianghlim tur a ni – hmangaihna thilpek a ni, Lalpa’n a duh ni! Kan peka hi Lalpa a ni. Kan pekna thinlung leh kan pek zat chu amah hian a lo chhinchhiah fel thlip thlep tih hi hre mai ila, mi zawng zawng lo hriat ve kher a ṭul lo.

14. Kan Lalpa Isua’n Pharisai vervekho, sakhaw chukchuho a hauh hrep khan, “pudina te, mohuri te, zira te sawma pakhat in pe ṭhin a. Dan thu pawimawh zawk, dikna te, zahngaihna te, rinawmna te in ngaihthah si ṭhin! Chu’ng chu asin in tih tur ni, a dangte tih ṭhulh chuang lo vin” a ti a.

15. Hetah hian, kan Lalpa Isua’n, dikna te, zahngaihna te leh rinawmna te hi sawma pakhat pek aiin ngaih pawimawh hmasak zawk tur a nihzia chu a sawichiang khawp mai. Dikna te, zahngaihna te leh rinawmna te palzuta, ngaihthaha, sawma pakhat pệk tluk tluk ringawt chu a duhzawng a ni hauh lo! Chu chu a ni, he a thu sawi awmzia chu ni. Chuvangin, dikna leh rinawmna nei chuang si lo va sawma pakhat pek ringawt te hi Pathian chhaihkawlhna mai mai a ni. Dikna leh rinawmna nunpui chunga sawma pakhat pek chu a sual lo thung. Kan Lalpa Isua’n, “Chu’ng chu asin in tih tur ni, a dangte chu tih ṭhulh chuang lo vin” a tih awmzia hi chu, “ringtu nun dan tur dik takin nung hmasa phawt ula, chu chu thilpekin zui rawh se” tih a ni.. Thilpek aia duh hmasak leh phῠt hmasak a nei a, chu chu nun a ni. Tichuan, ringtu nun dan tur rệnga nun hnu-ah, thilpek chu sawma pakhat pawh, pakhat kher lo pawh a ṭha vek. Nimahsela, ui chung leh pek loh theih loh anga ngaih vang pệk te, bata ruata, pek ngei ngei tur anga ngaih vanga pệk chu bible-a thuthlung thar zirtirna a ni tawh hauh lo!

16. Nimahsela, chutia sum thianghlim chauh kohhrana thawh tura kan inzirtir uluk viaua, sawma pakhat hi pek ngei ngei tur a ni tawh loh va, thawhlawm thawhtute hming leh an thawh zat pawh tarlan tawh loh tur a nih chuan Zoram puma Zollywood monthly fee chu a lut tlem hle tawh dawn tihna a ni ang a. Chutia thawhlawm a tlem tak duak avang chuan in lo zam mai tur a ni lo. Thil kal dik ṭanna tur chiah a ni zawk! Heti hian tehkhin ila, tuna zoram puma Zollywood monthly fee zawng zawng belhkhawm hi cheng vaibelchhe 10 ni ziah ta se, sum thianghlim chauh thawh a niha, thawhtu hming pawh a lan tawh loh avangin vaibelchhe 5 ah lo tla hniam duai ta se – chu thianglimna avang chuan Lalpa a lawm ang a, mal a sawm zawk hlauh ang a. Sum thianghlim leh thianghlim lo chawhpawlh vaibelchhe 10 aiin, sum thianghlim hlang vaibelchhe 5 chuan a thawk hlawk zawk daih dawn a ni. A chhan chu Lalpa malsawmtlaka a thianghlim tawh vang a ni!

17. Tichuan, thawhlawm reng reng chu fimkhur tak leh uluk takin a hmanna tur kan duang vek ang a. Mihringte ngaiha ropui leh mawi tur mai mai-ah chuan kan inrenchem hle ang a. Chanchin Ṭha hrilna lamah leh mirethei leh mi harsate tanpuina lamah kan hmang nasa ber ang. Biak in reng reng, sum tam tak senga, man to pui pui khera sak a ngai lo. Tisa mita ropui leh changkang leh mawi ringawt zawngin kan sa tawh lo vang. Ṭha pangngai ve taka sak chu kan duhtawk mai ang. Biak in ro tak, ropui bawk si ai chuan, biak in man tlawm zawk, Thlarau Thianghlim chenchilh ngei, mipuite tana malsawmna tling biak in neih chu kan ngai pawimawh zawk ang.

18. Tunah hi chuan biak in hi a ropui thei ang ber leh a changkang thei ang berin, mawi leh nalh thei tur ang berin kan insak siak a ni ber tawh a. Ṭhutphah lah a dῠp nuam thei ang berin. Chu pawh chu la duhtawk mai lovin “air conditioner” te kan dah zel bawk a, a nuam thei ang bera inkhawm kan tum hi a ni ringawt tawh! Chuti fakauva man to leh changkang leh a nuam thei ang bera kan thuam chung pawh chuan, darkar khat lek inkhawm pawh rei kan ti leh lawi si! a han lem tak em!

19. “Kan biak inah hian, Pathian awmpuina leh Pathian inpuanna a lo thleng nasa ṭhin si a, inkhawm pawh kan kham thei lo, darkar 2, darkar 3 chhung tal inkhawm ang u” ti ni ila chuan, thutphah dup nuam pui pui phahin,“ac” te chu hmang ila a ậwm e. Nimahsela, darkar khat lek pawh rei kan ti a nia. Ṭhenkhat an muthlu lawp lawp a, ṭhenkhatin phone an sik neuh neuh bawk a. Chuti chunga, a nuam thei ang bera inkhawm kan tum hi, Lal isua hnung zuitute tih dan tur a ni hlawl lo. Ni tin mahni hrehawm pawisa lo va, mahni kraws pu-a zui chu hlat tak kan ni! Kan kristian dan leh kan rawngbawl dan hi a rapthlak zawk hial a ni!! Nawmsak hi kan va han tumin, hrehawm hi kan va han hlau tak ệm!! Khawvel thila changkậnna lamah kan tuihậl huam huam a, Pathian thutak lamah erawh chuan kan tuihậl leh miah si lo! Kan Lalpa Isua hi hmana a lo kal ang khan Zoramah hian lo kal ve chiah se la chuan, min va han ankhum nasa phiar phiar dawn tak em! Pharisaiho a ankhum aia nasa daih khan min ankhum dawn tih hi a chiang reng!

20. Kan biak in sakna rilrute hi, Lalpa ropui nana sa pawh kan ni lo, Lalpa nen nung taka kan inpawl nana sa pawh kan ni hek lo. Mahni intihropui nan, mahni pawl ropui nan mai maia sa kan ni! Chuvang tak chuan, kan biak inah te hian Thlarau Thianghlim hi a tῐ zo vek tawh – a ro zo vek tawh! Chuvangin, Lalpa thlarau hian chhuahsan daih ta pawh ni se a mak miah bawk lo vang. Keiniho hian min chhuahsan leh chhuahsan loh pawh kan hre ngut lo vang! Kan kristian dan han chῐk tak tak hi chuan Pathian tel lo pawhin kan inkhawm mup mup duh tho vang!

21. Dik tak chuan, khawvel thila changkan leh ropui kan chak em avanga sum pawh duh ta em em kan ni a. Chu chuan thawhlawmah duhamna min neihtir a, duhamna chu mi lem biakna a ni tih bible-in min hrilh. Tichuan, sum thianghlim lo pawh pawisa tawh lovin, financial campaign kan nei leh mup mup thin a, a thawh tam tam a tlatlum tlum an ni ta mai reng a!

22. Kan sawi tậk anga kalphung thara kan kal hunah chuan kohhran kalphung tha lo tak mai chu hnehin a awm tawh dawn tihna a ni ang. Thawhlawm a lo thianghlim tawha, mihring lam an lansarh tawh loh chuan Thlarau Thianghlim pawh ṭi tawh lo vin, a rawn langsar thung tawh ang a, a rawn inpuang ngam tawh ang a, kohhran boruak reng reng chu a nung em em tawh mai dawn a ni.

23. Thawhlawm thawhtute leh an thawh zat tarlan tawh miah lo tur a nih rualin, thawhlawm lo lut reng reng, a zat leh a hmanna zawng zawng leh hman zật te thlengin, a kil kệlhin, eng hun pawha a duh duh en theih turin tarlan a ni thung ang. Mamawh viau lovah leh pawimawh viau lovah chuan sum hman a ni lo vang.

24. Sum chu tam tak pawh ni se, Lalpa’n mal a sawm loh chuan a thawh tur a thawk thei chuang lo va, tlệm tệ pawh ni se, Lalpa’n mal a sawm chuan nasa takin hna a thawk thei zawk a ni. Thawhlawm a lo thianghlim tawh chuan Lalpa a lawm ang a, mal a sawm bawk ang a, daih zai zawk leh, Pathian ram pawh a lo zauh zawk nan kan hmang thei ang.

25. A nihna takah chuan, sawma pakhat a ni emaw, ni lo emaw, a pawimawh ber chu keimahni hi kan ni a, kan nun hi inpumpek tur kan ni. Pathian tan ṭhahnem kan ngai tak tak a nih chuan, sawma pakhat pek ngei ngei tur ti-a campaign chiam chiam ringawt lo hian, inpumpek tur kan nihzia te auchhuahpuiin campaign chiam chiam zawk ila. Thawhlawm tam zawk innawr chhuahsak tum ber lovin, nun tak tak hlana, inpumpek turin campaign uar zawk ila a hlậwk ang. Keimahni ber kan inpumpek tak tak tawh chuan kan neih zawng zawng hi Lalpa tan kan ui tawh lo reng reng ang a, sawma pakhat tih vel mai mai te chu a nệp lutuk tawh zawk ang a, a tam thei ang ber pek kan chak zek zek tawh mai ang a, chu chu inpumpek nun chu a ni.

26. Mahni inpumpek phal tak tak mang si lo va, pek loh theih loh anga ngaih vanga sawma pakhat lek pek mai mai hi Lalpa’n a lawm miah lo! kan pawisa ai chuan keimahni hi min duh zawk chiang alawm. Keimahni ngei hi, ama tan inpumpek ila, chu chu a duh ber.
27. Hetiang tihdan kan sawi hi, a tak taka tihhlawhtlin theih vek, harsa miah lo a ni. Hetiang hi ringtute tihdan tur reng pawh a ni zawk. Tuna kan sawi anga kan tih duh leh duh loh chu Pathian thu kan nunpui leh nunpui lo va innghat, kan duhthlanna a ni.

28. Engpawh ni se, tunah hi chuan khua a la var lo em mai a, kan kristian nun te hi a dazat ropui mai si a. Chuvangin, hetiang taka ringtu nun dik leh thianghlimna te hi chu beisei chi a la ni lo. Hetiang hian kohhran hi an kal thei rih lo hrim hrim. Politics a bawlhhlawh ang chiah hian, kohhrante pawh hi kan bawlhhlawh ve tho bawk a. Sum thianghlim leh thianghlim lo inchawhpawlh niaih nuaih pawh kan pawm duh zel tho a nih hi. Chu chu kohhran hruaitute hian hre reng mah se, an pawisa miah lo. “an sum lak luhna te chu keini’n kan va hriatpui tawh hlei nem” tiin an kut an sil hmiah! Lalpa tan sum thianghlim kan hlận em tih lam chu an vei lo. Thawhlawm hi tam hle se an duh ber a ni mai.

29. Tun lai khawvel leh tun laia kohhran pawl hrang hrangho hi chu an kal kalin kal vel mai mai rih dawn. Pathian thutak aiin, khawvel ropuina leh sum an um nasa lutuk tawh a, tihngaihna an awm tawh lo a ni. Ni hnuhnung, hun khirh tak kan thlen tawh avangin kohhrante pawh hi rinna lama hnungtawlh duai duai tur leh, dal telh telh turah ngai mai ila, kan ngai sual lo vang. Chuvangin, belh tur dik tak, Lalpa chauh bệla, mahni nun ṭheuh inenfiah a pawimawh ber. Mi tih vanga ti ve ringawt, mi tih loh vanga ti lo ve ringawt nih te hi a hlauhawm tawh! Mite’n engtin nge min ngaih ang tih ai chuan, Lalpa’n engtin nge min ngaih ang tih te hi i ngai pawimawh zawk ang u.

Kan Kohhrante hian an Thatchhiat Theology kalphung hi bansana Lal Isua zirtirnate a taka kan zawm theih nana min kaihhruai hma chuan kan chhe zel ang a, kan chhe zual zel ang.
Kan Kohhran hruaitute hi Harh chhuak hmasa phawt rawh se.

@Michael Lalmanzuala
Next
This is the most recent post.
Previous
Older Post

Post a Comment

Powered by Blogger.