PU ZODINTLUANGA'N CONGRESS TREASURER A NIHNA ATANGIN BANNA A THEHLUT

PU ZODINTLUANGA'N CONGRESS TREASURER A NIHNA ATANGIN BANNA A THEHLUT

Mizoram Pradesh Congress Committee treasurer Pu Zodintluanga Ralte chuan nimin April ni 21 khan treasurer a nihna atanga banna MPCC president Pu Lalsawta hnenah a thehlut a, MPCC president rorel dana a lungawi loh vanga bang a nih thu a sawi.

A lehkha thehluhah hian Pu Zodintluanga chuan, Pu Lalsawta, President a nih hnuah congress party innghahna lungphum sawinghin a ni a, tih chhiat mek a ni tih sawiin, an party rorelna sangin an lo rel ho thin zawng zawngte pawh, President-in mi pahnih khat lek rawnin thutlukna a siam ta fo tih te a tarlang a. District Congress Committee elected office bearer post tih danglam a nih dawnin MPCC executive committee-ah rel thin a nih laiin, nimin maia Aizawl District Congress Committee siamrem a nih pawh khan, eng committee-ah mah rel ho a ni lo tih te, chungte chu congress kalphung a nih loh thute a sawi lang a ni.

Pu Zodintluanga chuan Nomination Committee din a nih dawn khan member inruat chungchangah president-in a rawn lo tih a sawi a, member a duh ang a ruat hnuah telephone hmanga hriattir ve lek chauh a nih thute, tunhnaia member pathum ruat belh an nih khan rawn a ni lova, a hre lo hrim hrim tih te a sawi lang bawk. 

Political Affairs Committee chu thiah tuma president-in hma a lak mek thute sawiin, tha zawk nia an hriat vete ngaihpawimawh a ni lova, chumi piah lamah party rorelna sang, committee te ngaih pawimawh an nih tawh loh avangin treasurer nihna zahawm tak a chelh chuan tangkaina leh hlutna engmah a nei ta lo, tiin, chung avang chuan banna a thehlut ta tih a banna lehkhaah chuan a tarlang bawk.

Pu Zodintluanga Ralte hi Thorang Bialtu MLA ni lai mek niin, Congress Legislature party leader ni lai mek a ni a, congress sorkarah khan Cabinet Minister a ni thin. - VNT