ZPM in National Party Zawm Dawn Lo - Lalduhoma

National party kan zawm duh tawh lo : Duhoma

Lalduhoma

Aizawl: ZPM Leader Lalduhoma chuan nimina an party chhung inkhawmah tun hnaia Congress party-in BJP nena an sawi zawm chungchang chhangin, national party zawm an duh tawh loh thu leh kumin MLA inthlan lo awm turah thawhpui neih an tum loh thu a sawi.

Tun lai hian ZPM leh BJP sawi zawm tum tlat an awm leh tih sawiin Lalduhoma chuan, MP thlannaah Congress ni lo zawng tangrualin candidate atana Robert Romawia Royte an ruat kha BJP nena an thawhhona hmasa ber a nih thu a sawi. Narendra Modi kha prime minister a nih lawmnaa tel ve tura sawm a nih thu leh NDA zawm ve tur pawha sawm an nih avangin NDA-ah an tel ve ta tih a sawi a. Mahse, BJP sorkar chet dan hrang hrang thlirin Mizo kristiante leh minority tan tel reng chi-ah an ngaih loh avangin kum 2016 khan thuchhuah siamin NDA an zawmna an titawp ta niin a sawi.

Lalduhoma hian MNF-in NDA chu zawmin vawiin thlengin an la tel reng tih a sawi a. MNF nen Citizenship Amendment Act an do tlang emaw an tih laiin MNF MP-in a thlawp zawngin thu a sawi leh ta thung si tih sawiin, “Tunah UCC an rawn ti leh ta a, MNF party hian sawisel reng siin a tan zawngin vote an thlak leh mai ang tih kan hlau hle,” a ti.

ZPM-in national party zawm an duh tawh lo tih sawiin Lalduhoma hian, “Tualto party nih mai hi a tawk a, kan ram tan a hlu ber bawk a ni,” tia sawiin, India ramah hian secular force a lo pian a, MP inthlan leh hunah BJP paih theihna tura theihtawp lo chhuah tawh leh chhuah zel tur an nih thu a sawi.

ZPM leader hian kumin MLA inthlan lo awm turah tumah thawhpui an tum lo nia sawiin, “Lo tum pawh ni ila mi dang sawisak kan ngai lo. Delhi chaknaa innghah kan tum lo va; kan innghahna chu Pathian a ni,” a ti.

Tun hnaia a Guwahati a zin chungchang sawiin, “‘BJP nen an zuk inhmu a, car varah a chuang,’ tih te, ‘Delson-a a kalpui,’ an ti thul. Fate buaipuia kan zinna thu hi Congress party hi ka hrilh zelna chhan tur ka hre lo va, BJP chungchang an hriat duh chuan an thawhpui MNF hi zawt mai se tih hi ka rawn duh a ni,” a ti bawk.

ZPM Working President K Sapdanga nena an inkarah khi awm anga an puhna chungchang pawh sawiin, “Pu Sapa nen kan inkar lah an sawi chawl thei lo va, an sawi nasat poh leh kan inngeih tial tial a, anni sawi then theih kan ni lo,” a ti. - Zozam Times