YOUNG FELLA HI
Ziaktu: Vanlalsanga Tochhawng
Ṭhang thar ṭiau zât ral tawh chinah khan; an hunlai a an lo ngaihsan leh kûrpui zaithiam mi tam tak Zo hnahthlâk te zingah sawi tur an lo awm tawh a. A bik takin; Pu Lallianmawia te, Pu Lalṭanpuia te, CFLA te, Pu R. Vanrammawia te, Pu Lalṭhakima te, Pi Lalsangzuali, Pi Daduhi te leh Pi Routmawii chenin an ni ang. Sawi hmaih theih loh Pu Vanlalsailova te pawh kha an ni ang. Kan sawi bâk mi dang pawh tam tak an la awm ang.
An hunlai hre pha leh, an hunlaia awm ve te tân chuan tunlai zaithiam tam tak hi thiam lo tihna a lian fo dawn a. Kan hunlai taka min deng na em em tu an nih vangin, lar hunlai nei tena a den fuh ve loh tan chuan an zai, an chevel hi sava hrâm tluka ngaih lohna a lian sawt viau mai bawk a. Routmawii a ni emaw, Sailova hunlai pawh khan, a duh a ten an duh em em a. A duh lotu te tan phei chuan an hming lam ringawt pawhin luak ti chhuak khawpa hne awm an tling a. A duh tu leh duh lotu boruak inkâr zau tak hian boruak lian tak an neih zia a ti lang ṭhin a ni.
Chutiangin; Mizo music industry rawn ṭhang zel chuan Western lam rawng a kai chho zel a. Zo Centimental thlûk ten min kian san hret hret a. Ti deuh delh delh thlûk a liam a. Rap music ngainatna chuan kum zabi 20 hnu lama mi te a déng na hle a. Vincy a rawn lâr a. AZZ, Rd and the 3 rappers ten min awi a. Chutiangin Michael M Sailo a te. Anni ho zûna uaina in tawp chin a lo nei a. Lilzo a rawn lâr leh a. Boruak na takin Zoram dung leh vâng mai ni lo, Zo hnahthlak tawh phawt awmna hmunah chuan "Leng leng, lung a leng e mai" tiin kan su dual dual a.
Chu chuan rimawi ngainatna a ti zual a. A thawm an reh a. Kan rin loh leh beisei loh tak maiin; kum la naupang tak mai Young Fella chuan Zoram mipui te chu zing dar 6 ah min kai tho a. Zing dar ruk aṭangin min awi chho ṭan a. A dan a rawn dang leh a, chutah; rûk min han ruk pui leh a. Chutah zet chuan tu nge Young Fella hi tih in zawh a ngai ta lo. Zoram hmun tinah kum 2019 aṭang khan a hla thu ten Zoram hmun tin a fan chhuak a. Naupang te te in hla an chham zuah zuah a, rang tak takin min zai pui chho ta.
Zaithiam kal hmasa te anga boruak lian tak neiin a awm lo na in. A hla erawh zaithiam kal hmasa te aiin internet khawvel vangin a ṭhang chak a. Fan chhuah lohna inchhûng pawh a nei lo. Nu leh pa tam takin amah hre lo mah ila, zai pui lo mah ila. Kan tu leh faten an tuipui, an sakpui, an ngaihthlak tam ber a lo ni chho a. A tel tawhna reng reng hla ten Millions view an kai thuai thuai a. Mi mal taka a record neih mêk hi tumahin an la khûm zo lo chu a ni e.
Hla a tih chhuah tawh ringawt pawh hi 60 chuang a ni a. Chung zing aṭang chuan hla 40 chuangin millions view a nei tling ringawt te hi, kan ngaihsan loh lai pawha dah hniam theih loh a nihna chu a ni ta ve ang. Chûng a hla millions view zinga a viewer ngah dan indawt 10 chauh hi i han en lawk teh ang aw.
1. Duhaisam : 2.2 crore (Hei hi Mizo hla a viewrs tam ber a ni)
2. Pasal ṭha : 1.7 Crore.
3. Hmangaihna dik lo : 1.5 Crore.
4. Hriat ka duh : 1.5 Crore.
5. Zan lalnu : 1.4 Crore.
6. Zing dar 6 : 1Crore.
7. Vala : 97 laks.
8. Val sinior : 87 laks
9. Kha ni kha : 84 laks.
10. Tawnmang :81 laks.
Khing te khi hriat ka nei lo. Ka ngaithla ve ngai lo iti a ni mai thei. Chutiang chuan sawi suh. A chhan chu mi nuaih chuangin an ngaihthlak leh hriat, ngaih hlut leh ngainat mek hre lo a awm kha zahna chang hriat a ṭha. Kan tunlai ṭhalai te leh tleirawl ten eng nge an ngainat tih i hriat loh phei chuan anmahni enkawlna kawngah i hlawh chham nghâl tihna a ni tel bawk ang. Amah ngaihsân loh vang hrima, 'ka hre lo' lo tih tlatna rilru te hi a hrisel ngai lo.
Hmanlai hla hlui Cover a neih ve pahnih; Lallianmawia Pachuau hla "Nun hlui ngaiin" tih pawh; a Original leh mi dang cover tu aiin viewer a ngah a, tunah hian 37laks lai mai view tu a nei a ni. A sa thiam ber ni lo mah se, mi te duh rawn leh ngaihthlak tam ber a ni leh ang lawi a. Hmâr hla hlui, 'A tlawm taluo' tih hla pawh, ti deuh phel phualin a rawn cover zeuh a. Thawk leh khatah rawn viral chiam nghalin, zaithiam dang ten an rawn cover ve sup sup a. Mahse, anni sak ang ema view tu ngah an awm chuang lo. Kha hla khan tunah 24 Laks view tu a nei leh daih tawh a ni. He ta ṭang ringawt pawh hian dah hniam theih loh a nihna pawh a lang chiang awm e.
Icon boruak lian leh vung tak karah pawh hla rawn ti chhuak in, kan Icon member ṭhenkhat te ai chuan ngaihthlak ala hlawh a. A hla tih chhuah zât an la ti chhuak thei miah chuang lo. Icon ho aiin zaina tur platform a nei chhe bik reng reng chuang lo a. Icon boruak vung tak karah boruak la nei zêl thei khawpa stage a ta neih zel thei te hi amah ti hlutu anni zel a. A zai danah leh a hla thu lam ten zo ṭawng a pawngsual chang tam ṭhin mah se. A hla thu ten zo ṭawng an tihausa a, thu leh hla lamah ṭhangthar te tan thil tam tak a hnut chhiah tawh a ni.
Mimal chawimawina tam tak dawng tawh a ni a. A dawn theih zawng zawng a dawng ta emaw tih tur a nih lai hian zai thiam erawh a ni hauh lo tih pawh amah ngei pawh a inpawm. Mahse, mahni irawm chhuak ngei mai. Mi ta comission kual vel lo anihna hian a hlutna a pho chhuak a. Zo fate mai ni lo, khawvel hian mahni Originality(kutchhuak) hi kan ngaisang a. Mizo zaithiam kan ngaihsan kan sawi tak te hi mahni hlaphuah ngei sa lar tute an ni deuh vek.
Mizo music industry lama inhmang mêk tam tak hian hei hi hre rawh se. Young fella nun aṭanga an zir chhuah tur chu; a mawi emaw mawi lo emaw dâwn hmasa lo in. A dik emaw dik lo emaw thlûk hmasa lovin, mahni ngeiin hla siam ila. Mi ta cover kual vel mai mai lovin, kan tuipui leh thiam zawng lam hla a nih chuan mahni irawm chhuak a nih ngei hi a ngai a ni.
Thih leh dam inkarah tih hla mai mahin Zoram a den chhuah chhan chu a phuahtu ngeiin a sak vang a ni. Anihna takah chuan; tun laiah ; K. Hminga kan duh em em chhan te hi mahni phuah ngei sa a nih vangin kan ngaihven a. A lar mai a ni. Chutiang zelin, rap fahrah te te in millions view nei a min awih zawk fo chhan chu anmahni phuah ngei a nih vang a ni. Mi hla cover kual den den zaithiam tam tak tak te hian ropuina teh chiam an nei lo fo. Mahni irawm chhuak ngei hmanga millions view nei thei turin ṭan la sauh sauh teh u khai..
Post a Comment