Dec 15, 2025(MSR): Pu C. Lalramenga, kum 49, Pu Rammanga (L) leh Pi Ngunhleizingi (L) te fa, Champhai District a Farkawn chhim veng, (Theirekawn) a mi chu nimin nimin zing dar 5:00 vel khan an chenna In-ah hliam tuarin a thi a, a thih danah thil fel tawk lo a awm ni a hria-in nimin khan a ruang hi Farkawn Damdawiin-ah Postmortem a nih hnu-ah nimin tlai khan vuiliam a ni.
Farkawn VCP hnen atanga kan palaiin thu a dawn danin Pu C. Lalramenga hi Inrinni khan Myanmar lamah kalin Farkawn VDP ten ringhlelin a lo hawng lam an lo chang a, Inrinni zan, zan rei tawhah Zu fun engemawzat kengin an man a, Village Defence Party (VDP) ten thu an zawhfiah hnuah an chenna Inah motorin an hruai a, nimin zing dar 5:00 vel khan a boral zui ta a ni.
A chhung ten he thihna-ah hian thil fel tawk lo, thihna khawpa kut inthlakna a thleng ni a hriain Police-ah FIR an theh lut a, Farkawna Police duty te bakah Dungtlang leh Champhai atangin Police tam zawk Farkawnah kalin Pu C. Lalramenga ruang chu Farkawn damdawiin-ah Postmortem Examination tih zui nghal a ni a, Police te chuan Farkawn VDP mi leh sa (7) te thu an zawhfiah hnuah thu zawhfiah zui atan Dungtlang Police station-ah an hruai a, vawiin khan Champhai district court-ah hruai an ni
Boralta Pu C. Lalramenga hian fapa pakhat leh fanu 4 a kalsan a, a nupui nen an awm hran lai niin tunhma lama ruitheih thil vanga an khawtlang hruaituten an lo zilhhau tawh hnu a ni tih thu dawnna chuan a tarlang. @MSR
Post a Comment