Pi Sawmtei rangkachak thi bo dan mak tak mai leh a bo dan nalh tak mai a chhui chhuah a nih dan chanchin...
2010 July thla laihawl vel a ni tawh a, nikir ruah pawh a sur tawh in fur lai a ni bawk a, ruah han thla zauh thin chuan boruak pawh a ti nuam viau mai a, ruah a tlak loh erawh chuan khua a la lum mah mah thin a. Khawlai pawh ruah a tlak chuan a berh lai lai a awm ve leh nual thin a. Hetiang khaw berh ah hi chuan han vahchhuah pawh a nuam teh chiam thin lo reng a ni. Aizawl veng thenkhat te phei chu kawng ko te a min nil nial avangin leh khawi emaw lai laiah kawng te an siamthat avangin hmun thenkhatah phei chuan kal hrehawm khawp a berhna te pawh a awm nual mai reng a, tih tur nei lemlo phei chuan vahchhuah pawh thil nuam vak a ni lem lo reng a ni.
Pi Sawmtei te hi an chungin Aizawl veng laili tak pakhatah anmahni inah an khawsa ve a. Fanu pahnih an nei a, a upa zawk Mapuii chu phai lamah lehkha zir in a awm ve a, a nau zawk Kimkimi erawh chu class 12 zirlai ni in Aizawl lamah school a kal ve thung a. Pi Sawmtei te nupa hian fapa a nei lo a , an fanu te pahnih tlawng hi an ni mai a, fapa an neih loh avang hian an fanu te hi a duat pawh an duat viau reng a ni. An mahni chhung hi sumdawng dawrkai a eizawng ni in an pa Pu Rintluanga chuan an dawr lam chu a enkawl deuh chawt a, Pi Sawmtei erawh hi chu chhun lamah chuan an in lamah a awm ber thung. Awmpui nula pakhat, thingtlang lam a an chhungte an in a kum 3 chuang lo awm tawh, nula fel deuh mai Maawmi an tih chu an nei bawk a. An awmpui nula hi zing lama class kal thin a ni in zing lamah hi chuan eirawngbawl vel hi chu Pi Sawmtei hian a lo ti mai thin a, tin Kimkimi pawhin a hman chang chuan a nu hi a theih ang angin a pui ve bawrh bawrh mai thin a ni.
An chhungkua hi hausa lutuk ti a han sawi tur chu an ni lemlo na a, a mi vantlang chunglam, khawsa thei pangngai tak an ni ve a, tin anmahni hi mahni phak ang tawk a kohhran bel chi an ni bawk a, an fanu te pahnih pawh hian mi sawi sep an kai lo viau nghe nghe a. Pu Rintluanga hi chu pa tawngtam vak chu a ni lo a mahse pa fiamthu duh ve tak hi a ni roh a. Pi Sawmtei thung erawh hi chu tawng bawrh bawrh mai, thawk bawrh bawrh mai chi a ni ve thung a. An fanu Mapuii hi chu nula pangngai tak, dam thluam mai leh tawng tam lutuk lo, lehkha thiamthei tak mai a ni a, nula fel ti a sawi a ni ve a. Kimkimi thung hi chu tleirawl harhvang tak, thian ngaina tak mai leh thian pawh kawmnasa, incheina vel pawh uar ve tak mai, mahse inkhawm te leh KTP thil tih vel te chu thulh ngai hauh lo, han sawiselna em em tur awm lo a ni in lehkha pawh an class ah chuan a thiamthei pawl tak a ni thin a, mahse pawl 10 a passed atang khan zirna lamah hian a thlahniam deuh riau mai a, tin a mize harhvang tak pawh a danglam deuh in mahni a room a inkhung che chet a computer vel khawih mai mai a ching ta deuh thung a. A class kal nan hian a nu leh pate hian pawl 10 a pass hlim in scooty an lei sak ve a, class kalna bakah hian lenchhuah zeuh zeuh te pawh a ching ve viau thin a, Oriflame vel leh eng engemaw te hi a tih kual ve thin avangin thawmhnaw man leh petrol man hi chu a nu leh pa te a pawt buai lutuk bik lem lo thung a, a nu leh pa te pawh hian an ring hle nghe nghe a ni.
Pi Sawmtei te in hi kawngpui bula awm ni in concrete in tha pangngai tak mai, chhawng thum a sak a ni a. A hnuailam chhawng hnih hi chhungkaw dang in an luah a, a hnuaiber erawh chu bungraw eng engemaw dah nan an hmang thung a, a chung ber kawng anah chuan anmahni hi an khawsa ve a, tichuan an in chu a vai in kaw li a awm tihna a nih chu. An in hi a tukverh hnuai sir kualah hian 2ft vel a zau a parh a awm kual a, chumi ah chuan pot ah pangpar chihrang hrang te an khawi a, a par lai phei chuan a mawi ve thei hle thin a ni.
2010 July ni 20 tuk chuan Pi Sawmtei chu tuk dang ang bawk in a tho chhuak a, Kimkimi mu chu a kaitho a, choka lam chu a pan nghal a. Hetih lai hian an awmpui nula chuan thingpui a lo lum fel vek tawh in a zing class kal turin a lo chhuak tawh a, hei hi chu an tuktin dan ve reng a ni a. Hmai te an phih a thingpui te an chhuan sat hnu chuan Kimkimi chu a la rawn thawh loh avangin a va kaitho nawn leh a. An chungkua hian room hran theuh an nei hin an nupa room bul chiah ah Kimkimi room hi a awm a, Kimkimi hian a room kawngkar chhunglam a a kalh ve ngailoh avangin Pi Sawmtei pawh hi Kimkimi roomah chuan lut in a sawi nawk nawk a Kimkimi pawh chu khumah chuan a rawn thu chhuak ve ngal a. Khuma a rawn thut chhuah rual chuan “Ehee, ka nu, ka room tukverh darthlalang a keh anih saw,” tih pah in a room a tukverh pahnih awm pakhat zawk darthlalang keh chu a nu chu a kawhhmuh nghal a. A nu chuan “Zan lamah i kalh thalo anga a in vaw keh aniang..” tih pah chuan a va en a, tukverh chu a lo inkalh lo reng lah tak a. “Vawinah a thar in kan lo thlak tir dawn nia,” tih pah in Kimkimi room chu a chhuah san a, anmahni room lamah chuan a lut phei a, Pu Rintluanga mu chu a hma tawh vak loh avangin ava kaitho ve nghal a. Chutah rei vaklo hnuah chuan “ehee, ka rangkachak thi ka hmu miah lo mai....” a rawn ti chhuak ta hlut mai a.
Pi Sawmtei hian rangkachak thi hrawl tha zet mai hi a nei a, mut dawn apiang hian a nghawng ah a mut hlana a reh thin avangin a phelh a, a mutna bul dawhkanah chuan a dah a, zingkarah hian a awrh ve leh mai thin a. Hemi tuk zing pawh hian nidanga a tih dan thin angin an pa a kaihthawh chuan a thi chu han awrh leh a tum a a hmu zo ta tlat lo mai a ni. Pi Sawmtei chu Kimkimi room lamah lut phei in a thi a hmuh loh thu chu va hrilh pah chuan a lo hmuh leh hmuh loh a zawt nghal a. Mahse Kimkimi chuan zana a mut daih thu leh an room lamah chuan an kalh ziah a, a kal loh hrim hrim thu a lo hrilh a, tichuan an chhungbuai ta. Pu Rintlauanga ho chuan an room vel leh inchhung vel chu hmunphiah nen an phiat kual a an zing buai ta sup sup mai a, mahse a thi chu hmuh tur reng reng a awm chuang lo. Pu Rintluanga pek chuan “Nizan i mut hlan in i hralh a ni roh aniang chu mawle,” a lo ti vei boh a, Pi Sawmtei chu nuih pawh a nui duh eih tawh lo. Chutah Kimkimi chuan a room tukverh darhlalang keh chungchang kha sawi chuak in misual an rawn lut anga an la anih a rin thu a rawn sawi chhuak ta nghal a. Chutih lai chuan Pi Sawmtei chuan an awmpui nula Maawmi chuan a la a nih a rin thu a lo sawi ve mek bawk a...An zawn hmuh zawh tak si loh ah chuan Maawmi class bang chu lo nghah phawt a lo zawh chian a tha ber a an rin thu an sawi tlang ta a. Pi Sawmtei mangang chu a vir cheng reng tawh mai a.
Maawmi class kal chu dar 8:30 pelh hretah in a rawn thleng a, inchhung a luh chuan a pi te chung chu an sitting room ah chuan an lo thu thap mai a. Tukdanga an tih dan ang lo tih rukna tak a nei a, inchhung rawn luh pah chuan “ Engati teh thap nge ni a, chaw te in lo ei tawh em...” a rawn ti lut nghal a, a room lamah chuan luh a inthlak fel a tum chu Pi Sawmtei chuan, rawn ko let in, thil awm dan engkim chu a sawi a tin tlang deuh in a thi chu a lak leh lak loh chu a zawt ta nghal a. Maawmi chuan mak a ti zawk kher mai. Maawmi hi nula fel zet mai, Pathian tih mi tak mai leh inkhawm te pawh a hman phawt chuan thulh ngai miah lo a ni in nula in vang tak mai a ni a, chutianga a pi in ringhlel ang duh a thil an zawh takah chuan a hamhaih deuh nen chhan mai ngaihna a hre lo hial tep a, mahse a laka nih loh thu leh chumi tuk emaw a hma zan emaw chuan an room lama a luh lo thu chu a sawi ve a. Chutia a thi ber an hmuh tak si loh ah leh han puh tur ber an awm chuan bawk si loh avang chuan police lama report mai chu a tha in an hria a, tichuan an veng atangin a hla lemlo bawk a, Aizawl Police Station ah chuan FIR thehlut turin Pu Rintluanga chu tukthuan ei kham veleh chuan an car chuan a kal ta nghal a. Kimkimi erawh chu class kal angaih avangin a insiam sawk sawk a class kal tur chuan a chhuak ve ta nghal a.
Pu Rintluanga chuan FIR te a thehluh zawh chuan ASI Lawmsanga leh constable pahnih nen an in lam pan chuan a car chuan an rawn let leh a, an in an ran thlen chuan inchhung vel chu Pi Sawntei te pitu chuan an lo hai let pheng phung mai a. Police an lo thlen takah chuan Pi Sawmtei chuan thil awmdan chu an hrilh zung zung a, tin Maawmi hriatloh lai chuan an awmpuinu a rinhleh thu pawh chu a hrilh tel nghal bawk a. Police ho chuan an in vel te chu ngun takin an han enkual vel a, room hrang hrang te pawh an en vek a. Kimkimi room an en lai chuan Pi Sawmtei chuan a room tukverh darthlalang chu a hma zan lama keh anih thu leh a kalhna a lo in kalh loh thu te, tin thli in a chhem anga a in vawkeh anih a rin thu te a sawi ve nual bawk a. Police ho chuan thil eng engemaw an zawh hnuah Police Station lama thu zawh chian turin Maawmi hruai chuan an let leh ta a.
Chutia Police station lama hruai an ni ta mai chu Maawmi chu a lawmlo angreng hle mai a, a hnuk te pawh a ulh hial ni tur a ni a mitui a tla fap fap reng mai a. ASI Lawmsanga chuan a hma zan a a awm dan te, zinga a thawh hlima a thil tih engkim chu a zawt a, tin a pi te chhungkaw chanchin te pawh chu chiang taka a zawh hnu chuan Maawmi tawngkam leh chezia, a mizia hrim hrim leh mitmeng velah chuan han rinhleh tur chi ni a a hriat loh avangin thupha te chawi chungin an in lamah chuan a haw tir leh ta nghal a. Maawmi lam ai chuan rinhleh dang zawk a nei ta tlat mai a, Pi Sawmtei te in chu belh chian leh a duh avangin chawhnu lamah chuan constable pakhat hruai in an in en chiang tur chuan an va kal leh ta a.
An in an va thlen chuan Pi Sawmtei chuan a lo be sawk sawk a, Maawmi chuan thiungpui te a lo lum sak nghal bawk a, tichuan ASI Lawmsanga chuan an in vel chu duhtawk a a en kual hnu chuan an fanu Kimkimi chu biak ve a duh thu sawi in a tukah Police Station ah amah rawn hmu lawk tur in a hman leh hman loh a zawt ta a. Pi Sawmi chuan a tul anih te chuan sikul te chu ni khat lek te chu a thulh pawh an thulh ve anga a ni mai alawm a lo tih ve takah chuan ASI Lawmsangate pawh chu Maawmi rei vak lo an biak fal leh hnuah chuan an let ve leh ta a. Tlai lama Kimkimi rawn haw chu a nu chuan a tuka Police Station a kal angaih thu vel a lo hrilh chuan Kimkimi chu a lungawilo ta kher mai. “ Keimah min ringhlel emi? An va mawl ve a, ka room atang hian misual an rawn lut pawh a ni thei asin, ka zan mu ka mu nghet thei ropui si,” a ti a a ang tan tan mai a.
A tuk July ni 21 chuan Kimkimi chu a nu chuan Police Station ah chuan a kalpui a, ASI Lawmsanga pawh chu a lo awm ngei a, a fala biak a duh avangin room pakhatah chuan a hruai ta a. Rei fe eng engemaw a zawh hnu chuan an Police tihdan phung pangngai a ni ti in Kimkimi thla chu a lak sak a tichuan a nu henah chuan ni hnih ni thum hnuah chuan a rangkachak thi bo chu an hmuh chhuah theih mai a beisei thu sawi in an nufa chuan a haw tir leh ta a. Pi Sawmitei te chhung chuan a thi bo dan chu an han sawi khawm pawhin a mak an ti kher mai. Kimkimi room tukverh atang chuan misual rawn lut ni ta se hriat awm tak a ni bawk si, tin zan mut dawn in an room kawngkhar chu a kalh thlap zel bawk si a, a thi bo zan pawh hian an room kawngkhar chu a kalh ngei a ni tih a chiang tlat, hei hi Police hnenah pawh khan a sawi reng a ni. Chuti anih chuan engtingnge a bo tak ang. Maawmi kha an ringhlel ngawt tak na a, Maawmi thawh khan amah a la thawh miau loh avangin an room kawngkhar chu chhunglamah a la inkalh tlat mai si a Maawmi tan pawh luh nghaihna a awm chuang lo tih a hre leh hnuhnawh a. A thawh a room kawngkhar a hawn lah chuan Maawmin chu class kal turin a chhuak daih tawh mai bawk si, a tan lakna chance a awm tlat lo. Maawmin a lo ringhlel ngawt mai chu a inthiamlo leh ta hle mai a. Mahse han rinhlelh tur dang a hre bawk si lo. A fanu Kimkimi lah han ringhlel ngawt dawn sela zingah khan a kaitho chawp kha a ni bawk si, a ngaihtuah chian poh leh a mak a ti ta tawlh tawh mai a, inchhung lah an dap hneh ropui mai bawk si....
Pi Sawmtei thi bo tuk atanga a ni li na July ni 24 zan thim tawh hnu dar7:00 velah chuan ASI Lawmsanga leh police constable pahnih hi an rawn lang leh hlawl mai a, ASI Lawmsanga chuan an chhungkua an awm kim leh awm kim loh te an zawt te te a, an lo awmkim lai anih avangin an chhungkaw kim thep thawp lai chuan Kimkimi chu an man a tul tih a sawi chhuak ta a. Pi Sawmtei te chhung chuan mak an ti hle aniang an phu deuh suau nghe nghe a. Pu Rintluanga chuan a chhan leh a vang te chu an zawt a, tichuan ASI Lawmsanga chuan Pi Sawmtei thi bo kha rukru leh misual ina an ruk nilo in an fanu ngei Kimkimi chuan a la a, a hralhru a ni tih a sawi ta tlat mai le. Kimkimi chu a rawn ding chuak hluai a, “Dawt mai mai anih kha, a ru tu ber in hriat theihloh avangin Keimah min puh mai mai a ni, police ho hi in tlaw lutuk engmah pawh in chhui chhuak thei lo,” a rawn ti ta hrep mai a. Chutah ASI Lawmsanga chuan Kimkimi mit taka melh reng pah chuan a kekawr ipte atang chuan lehkha a thil fun a rawn phawrh chuak a, dawhkanah chuan a dah a, Kimkimi hnenah chuan , “ chutia kan tlaw i tih viau chuan kha kha han phelh teh le, “ a ti ta a. Kimkimi chuan kut khur der der chung chuan thil fun chu an phel a, a chhungah chuan a nu rangkachak thi bo ngei mai chu a lo awm ta tlat mai le, Pi Sawmtei te chhung chuan mak an ti tlang kher mai a. Pi Sawmtei chuan “Eheee, ka thi ngei kha anih hi, enginnge in hmuhchhuah dan?” ti in a zawt ta nghal a.
ASI Lawmsanga chuan an hmuhchhuah dan chu hetihian a sawi ta a; Khatia min rawn koh a in in vel kan en kual khan zan in mut hlan in in room in kalh thin avangin in thawh hma chu luh ngaihna a awm lo tih kha ka hre mai a. Maawmi kan police station lama kan hruai a thil kan han zawh vel khan i ringhlel viau na a mahse ani pawh a tan khan in room ah khan i thawh hma chuan luhna hun a awm chuan loh avang leh a mitmeng vel ah tlanchhe mitmeng a pu lo tlat mai a, dawt a sawi ka rin loh avangin in in kha kan rawn enfiah leh ta ngat kha a ni a. Kimkimi room tukverh inhawng leh a darthlalang keh khan min tibuai hman tep a, mahse kha tukverh kha in skirting feet hnih leh a chanve vel chunga inchhuang ni in darthlalang panga a awm a, a tukverh kha a lian in a sang angreng a a darthlalang keh kha a lai tak ami a ni tlat mai a. Mihring reng reng hian kan hma zawn ah thil kan ziak dawn emaw, perek kan kilh dawn emaw, tin thil kan chhu dawn emaw anih chuan kan mit zawn vel bawrah hian kan ziak in kan chhu tlangpui thin a. Tin a darthlalang keh them kha inchhungah a tla lo a, pawnlam in pangpar khawina laiah a tla vek tlat mai a. Amah a thli vanga in vawkeh chu ni se a darthlalang keh kha inchhung lamah a tla teuh tur a ni tlat. Chuti anih chuan darthlalang kha inchhung lam atanga chhut keh ni in a chhu keh tu chu in chungkaw zing ami ngei an ni tihna a ni a, he thil hi misual tih anga lan tir tumna a ni in a lang tlat mai a. Chuti anih chuan darthlalang chu a lai tak ami chu a chhukeh tu mit zawn vel anih chuan Kimkimi san zawng nen a inang tlat mai a. Tin in tukverh hnuai sir parh vel hi mihring kal theihna tur chu a ni na a, a hma zan velah ruah a sur nasat avang leh in kawt vel a diak bawk avangin mi kal awm chu ni se chirh emaw chhete tal a kai tur a ni anga mahse chirh kai a awmloh bakah kawngpui atang hian han pakai mai phak a ni tlat lo bawk.
Tichuan rinhlelh tur dang in inchhungah an awm tak loh avangin Kimkimi chanchin hi Maawmi ka zawt chiang ta a. Tun hma deuh chuan lehkha thiamthei tak anih thu te, pawl sawm a pass hnu a a mize inthlak ta te leh room a in kharkhung a computer leh phone a khawih reng thu te, tin tleirawl harh vang tak thin a nguai tak riau thu te chu min hrilh ve ta a. Tichuan Kimkimi kan koh khan a tawng hmang velah a thil sawi a inmillo zeuh zeuh a awm bakah , thi bo kha misual ruk ngei, ama room tukverh atanga rawn lut ina an lak ni ngei a min ngaih tir kha a tum riau mai a. Mahse misual kuthnu chu ni thei in ka hre si lo a, misual tih ni ta se thildang man to tak tak in inchhung ami pawh lak tel awm tak a nih bakah in room chhunglama in kalh tlat ami chu misual tan pawh lak ngaihna vak awma ka hriat loh avangin Kimkimi lamah chuan ka in sawr bing ta zawk a. Tichuan ama lak ang turah kan dah chhin a, lo la ta se khawnge a tih ral ang tih te ka ngaihtuah a, a ni ang rual chuan tu emaw chhungkaw pangngai khatiang thi man to lei ngam tur kha va zawrh ta se an lo ringhlel ngei in a rinawm si a, chuvang chuan khawi rangkachak chherna ah emaw tlawm deuh hlek a a hralh ka ring ta a. Tichuan Aizawl a rangkachak zawrhna hrang hrangah chuan a thlalak keng chungin rangkachak thi a rawn zawrh leh zawrh loh chu kan zawt chhuak ta vek mai a, tichuan Aizawl te hi chu a la zau lo bawk a thil reng reng hi chhui peih chuan chhuina tur hi a tam vak lo a rangkachak chherna dawr pakhatah chuan cheng sing nga man tur vel chu sing khat vel lek in an lo lei sak a, kan rawn lak sak leh ta a ni. In fanu hian i thawh tawh hnu in room kawngkhar i hawn tawh hnu si khan choka a thingpui vel i va siam lai khan in roomah lut in a pa muthilh lai si hian thi chu ava la ta a, a room ah lut leh in a lo muhil der leh ta a ni, a ti ta mai a. Kimkimi tan chuan sawi tur a vang ta kher mai le.
Pi Sawmtei chuan , “ Anih kan fanu hian hetiang hian engvanga ti duh nge ni ang...ani hi chu rinhlelh nachang reng reng ka lo hre hleinem?” ti in an zawt leh hram a. ASI Lawmsanga bawk chuan; Kimkimi hi a chanchin ka lo hriat dan in tun hma chuan lehkha thiamthei tak a ni a, a result pawh an class ah chuan a tha ber pawl ani thin a, mahse pawl sawm a pass hnuah adanglam ta vek mai a, zirna lamah a tlahniam nasa a, tin a mizia leh nungchang te pawh a inthlak in tleirawl harhvang tak thin kha a lo nguai ta hle mai a, hetiang hi tunlai tleirawl damdawi ti ho mizia chiah mai a ni a. Tin a damdawi man tur te, a thawmhnaw hak man to tak tak man tur te leh a scooty petrol man tur thleng a a mamawh avangin hetiang thil hi a tih a lo ngai ta a ni. Ka rindan chuan damdawi man leh thawmhnaw man vel ba a nei nual anga chumi rulh nan chuan a ti a ni ang, an ti zui leh nghal zat a.
Chutah Kimkimi chu a rawn tho chuak a, a nu hma a thingthit pah chuan tap zawih zawih chugin, “Ka nu, Police pa sawi kha a dik vek, ka lak dan a sawi pawh kha a dik. Pawl sawm ka pass hnu a scooty min lei a thian hrang hrang ka kawm atang khan damdawi ka ti ve tan a, a tir chuan a mum eng eng emaw ka hmawm ve thin a, mahse a lo rei deuh khan a mum hmawm ngawt chu duhtawk lo in No4 in ka inchiu chho ve ta a, a man a to si a, a chang leh ka ba a, a chang leh thil ka hralh a, Oriflame vel ka tih ve a ka hlep hi chuan engmah a daih si lo a, damdawi tih tur ka mamawh bawk si a chuvangin he thil thlalo tak hi ka tih phah ta a ni...khawngaihtakin min ngaidam thei angem? a ti ta ngawih ngawih mai a. A nu chuan A sim dawn chuan an ngaihdam theih thu chu a hrilh a mahse FIR an thehlut tawh si a Police chuan an man tho a ngaih thu a sawi a. Chutah tak chuan ASI Lawmsanga chu a rawn tawng chhuak ve leh a, “ A sim dawn tak tak a in in ngaidam dawn anih chuan a nu leh pa in ni a in thu thu a ni a, mahse hetiang ho hi chu an thu sawiah hian an ding nghet duhlo khawp mai a. Chutih lai erawh chuan a case hi court lam te kan la thlen lo bawk a, a nu leh pa in in duh anih chuan FIR hi chu kan cancel leh anga a ni mai a, mahse bond te sign in ti leh tawh miah lo tur in intiam se, a ti leh anih chuan inngaihdamna awm tawh lo se a tha ang ka ti ve deuh,” a lo ti ve a. Pu Rintluanga pek chuan ,"Tunlai tleirawl ho thu intiam te chu a rintlak meuh dawn emawni le, an bialpa te hnena rinawm tura an intiamna ang deuh hi a ni mai anga..." a lo ti nui vur pek a, Pi Sawntei a rawn meng rang hman kher mai le.
Pi Sawmtei te nupa pawh chuan ASI Lawmsanga rawtna chu tha an tih ve avangin Kimkimi chu ti leh tawh miah lo tur a intiamkamna bond te an sign tir hnuah chuan Police ho te pawh chu lawmthu an hrilh a, ti chuan Police ho chuan an haw san ve ta a. Tichuan Pi Sawmtei rangkachak thi bo dan mak tak mai chu ASI Lawmsanga thil chhut thiamna azarah ni reilote chhungin chhuichhuah in a lo awm ta a ni.
“ I fa te eng ang mi nge an nih hrechiang rawh...” BigDaddy Hmahmatea.
HE THUZIAK LO CHUAH TAN DAN: Ti hian ka ngiahtuah vang vang a, Mizote hi thuziakah kan lo tui chho ve ta hle mai a. Saptawng ami thu ziak tha tak tak te kan letlinga, tin article tha tak tak te kan ziakin thu ngaihnawm tak tak te pawh kan lo ziak nasa ve ta hlawm hle mai a. Thawnthu mahni irawm chhuak te pawh kan ziak nasa ve tawh hlawm in hmangaihna lampang ngat phei hi chu he groupah ngei pawh hian phuahchawp tha deuh deuh hmuh tur a lo tam ve ta hle mai a. Tin lehkhabu ang pawh hian Fiction tha deuh deuh kan lo nei ve ta teuh mai a. Heng kan fiction stories/novel neih ho te hi a tlangpuiin hmangaihna lampang te leh nun kaihhruaina lam, zirtir tum nei ran te, Pathianthu lama nun kaihruai thei ang chi te, ram leh hnam lam hawi deuh te pawh an ni hlawm a, a ngaihnawm pawh a ngaihnawm hlawm nangiang e. Mahse in ti teh ang, hmangaihna lam ni lo, zirtir tum nei em em lo mahse fiction ngaihnawm tak leh chhiar tlak tak ang chi hi kan lo la ngah lo hle mai a, mi dang ziah sa based deuh hlek te an lo ni hlawm bawk nen. Chuvangin hetiang ang fiction ngaihnawm tak si in kaihhruaina ang em em ni si lo hi tha tak leh ngaihnawm takin a ziah ve theih tho ani tih entir nan tuna ka thu rawn ziak hi keima PHUAHCHAWP liau liauin ka rawn ziak ve a ni e. A settings leh location te erawh hi chu a tak tak vek ka hmang thung a. Mi tang thenkhat hming ka rawn tarlan hmasak te pawh khi atak tak vek an ni a, mahse a tlanchhak te leh an tlanchhuah dan te erawh hi chu ka phuahchawp liau liau an ni e.
