Tweet Share Share Share Share Share

September 18, 2017
Vanglaini,18.09.2017: India rama infiamna pawl lian ber leh hausa lawr lak Board of Control for Cricket in India (BCCI) chuan, Cricket Association of Mizoram (CAM) chu an hnuaia full member ni turin a ziak lut ve dawn ta. Mizoram rual hian North East state dang panga - Meghalaya, Manipur, Sikkim, Nagaland leh Arunachal Pradesh-te pawh full member-a pawm an ni dawn.
Tun hnai khan Supreme Court-in a ruat Committee of Administrators (COA) leh north east aiawha telte hi New Delhi-ah an inhmukhawm a, CAM aiawh hian generalsecretary Mamon Majumdar a tel a ni. Mizoram team hian kumin aṭangin BCCI hnuaia age level tournament under 16 leh under 23 an khel thei ang a, kum thar aṭangin India rama state cricket inelna sang ber leh ngaihhlut ber Ranji Trophy an khel ve thei tawh dawn a ni.
BCCI hnuaiah hian India hi zone hrang hrang panga - North Zone, South Zone, Central Zone, East Zone leh West Zone-ah te ṭhen hran a ni ṭhin a, COA hoa inhmuhkhawm aṭang hian zone thar pian belhin North East Zone dah thar a ni a, Mizoram pawh he zone thar hnuaiah hian a awm tawh ang.
Eng nge a lawmawmna?
BCCI hnuaia full member-te chuan inelna sang ber Ranji Trophy thlengin an khel thei a, hemi hnuaiah hian associate member awmin anni hi chuan age level tournament bak an khel pha ngai lo. Mizoram hi tun hmain BCCI hnuaiah associate member pawh a ni pha ngai lo a, state chhungah cricket khel tawk awm mahse state pawna inpho chhuahna hun ṭha hmuh ngaihna a awm ngai lo. Tunah chuan associate member hi bawh kanin full member nihna an chang dawn a, India rama cricket inelna level sang ber thlengin Mizo ṭhalaiten an tem ve thei tawh dawn tihna a ni.
Heng bakah hian Mizo cricketer-te tan India team thlenga tel theihna leh India rama ngaihhlut em em Indian Premier League (IPL) thlenga inlan theihna hun ṭha a inhawng ve tawh dawn tihna a ni.
Hlawkna a awm em?
Ranji Trophy leh Under 23 inelnaah hian state aiawha khel player-te hian match fee Rs.40,000 inkhelh apiangin BCCI aṭangin an dawng ziah a, Ranji Trophy bikah hian season khatah a khel tlem ber team-in match 6 tal chu an khel ziahah a ngai a, match 6 chiah chhungin tla fel ta se October - December chhungin match 6 hi an khel kim vek hman zel a ni.
Under 16 leh 19 state inelnaah hian nikum season thleng khan player tinin match khatah Rs.12,000 an dawng ziah bawk. BCCI hian an revenue hmuh aṭanga 26% hi season tinin player-te hlawh atan an dah ṭhin a, tun hnaiah Star Sports nen vaibelchhe 16,300 man inremna thar an siam leh avangin kum thar aṭang phei chuan player-te hlawh hi a let chuanga pung chho tura ngaih a ni.
International level-ah phei chuan player-te hlawh hi a sang hle a, Test match vawikhatah player-te hian nuai 15 an hlawh a, One day international-ah nuai ruk hlawhin T20-ah nuai thum an hlawh thung.
Player chauh em ni hlawk dawn?
BCCI hnuaia association-te hian nasa takin ṭanpuina season tin an dawng a, BCCI sum dinhmun a zirin an ṭanpuina dawn hi a inang lo. A tlangpuiin full member chin chuan an budget leh mamawh dana zirin season tinin vaibelchhe 50 chuangte an dawng ṭhin, hengte hi state chhunga cricket hmasawnna atana hmang ṭhin tura beisei an ni.
Domestic inkhelah hian Umpire (Emerging Panel) chinin ni khatah Rs. 20,000 an hlawh a, Umpire pangngaiin nikhatah Rs. 15,000 an hlawh thung a, Match Referee-in Rs 15,000 an hlawh bawk a ni.
Read more »
Tweet Share Share Share Share Share

September 18, 2017
✍ Kimajongte

Delhi lama zin ve zeuh zeuh tana chu, țumkhat chu leihnuai bazar an tih fo chu hmuh châk hrim hrim vangin ka va kal ve a. An sawi ang êm êmin Pallika Market chu pui ka ti tehchiam lova. A dangdai ve hrim hrim tih a ni mai a. An Shopping Mall lâr tak 'Ambience' lamah chuan ka phei leh ta zâwk a.


Image result for jesus on the crossAmbience Mall chu a lo pui rem rem khawp mai! A chhungah chuan ka lût ve ta a. An thawmhnaw zawrhte chu Branded vek an ni a. Levi's, Park Avenue, Allen Solly, Lee, Provogue, Wrangler, Spykar, Pepe Jeans..
Mite awmdan chu ka thlîr reng a. Vai milian hausak hmêl pui puite chuan an duhzawngte chu Price Tag pawh en lêm lovin an pawtthla mawlh mawlh a, ațhen chuan cash an pe a, țhenkhat chuan Card an Swipe zeuh mai a. An che vêl ringawt pawh chu ka tan chuan hmuhnawm a tling a!
Kei, neih thinglungkhâwng takmeuha kal ve tan chuan an thil zawrhte chu khawih chhin ve ngam chi pawh ani in ka hre ta lova; rualawhnain ka lo khat a, vanduai ka inti ngawih ngawih a; ka tê chem chem ani ber mai!
ICI Pastor Rev. Ramlalchawl Sermon hmanga Pu Buonglienkung hla phuah hmangin, min kalsan ngailo Lalpa chuan min rawn hnêm ta a:
Khawvelah hian chhuan tûr nei lo mah ila, hmun leh hma nei lo mah ila, "Ka lungawina LALPA a ni"
Heng mite neih ang zawng zawng hi nei ve lo mah ila, an neih ve loh ISUA ka nei a, ka tan a tawk ani!_
Ka chhuak nal nal a, hlim êm êmin Mizoram House lam chu ka pan ta a. Lal Isua nêna retheih hi a lo hrehawm love!
'Aw Lal Isu, nang chauh lo chu
Vanah khianin tunge ka neih?
Leiah pawh hianin nang lo chu
Ka duh tu dang mah an awm lo!'

(Pu Kima Jongte hi tunah SP Lunglei a ni mek. Fb a khawih ngai lova, Pathian thu tha tak tak a ziah thinte ama remtihnain MSR ah hian rawn post thin kan tum ang..vnt)
Read more »
Tweet Share Share Share Share Share

September 18, 2017
✍ Kimajongte


Kan tlangval lai, han ti ve khanglang ila, a la reilo hlê na-a; khatih hunlai kha chuan hmeichhe chhaih chîng pâwl tak ka ni ve thova. Khatih hunlai kha chuan, hmeichheho hnênah, "I kekawrtê ka hmu" kan tih ringawt pawhin min ûm duâi duâi a, hnute lian nihte kha an zak țhîn a. Mipaho pawh, a rûktêa kan star te bulah chuan kan lâi zo vek a, kan sen țun țun țhîn a, indem fiâm ringawt pawh kan insual phah lek lek țhîn kha a ni a. Bazar chêp laiah tu hnute emaw kan kîuvin a nêk palh pawhin hahîpin țhiante kan hrilh a! Tûnlaiah erawh chuan, zahtheihlohna leh pawisak lohna a hluâr a, rei tak pawh inngaizawng hman lova chesual kan tam tual tual a. Biakin hawnga inneih te hi thil vang tak, Kohhran leh mipui tan pawh thil sawi nuam a lo ni ta reng mai!
Kan nulât tlangvâl thianghlimna hi inneih zana kan kawppui hnena kan thilpêk hlu ber a ni a, thilpêk secondhand inhlui kan tam tawh viau mai, kan pung tual tual lehnghâl, a pawi a ni.
Pathian duhdan ngei a, Kohhran hriatpuina Dan Thianghlima inneih ngei hi Christian chhungkaw bulțanna pawimawh tak a ni, tih hi kan hriat reng a pawimawh a ni. Inrûk kan sam lutuk te hi aw! Rûk rûka chhungkaw din chu a bilhah a tho lo phawt mai!
Hmingthanna, lârna leh luck te hi keini chuan kan han zo lo hma êm êm khawp a!
Kristian tlangval entawntlâk Kaka nun hi a tâwi thei ang berin ka han sawi ang e:
Brazillian midfielder Ricardo Izecson dos Santos Leite, a tawi zâwngin Kaka hi Brazil khawpui Brasilia ah April 22, 1982 khan a lo piang a. Kum 15 mi lek a nihin professional footballer a ni tawh a. Kum 18 a nihin swimming pool-ah a chesual a, a nghawng ruh auh vangin damchhunga zeng hlen thei a nih laiin, maktak maiin a dam leh a. A tidamtu chu Pathian a ni, tih a hre chiang êm êm a. Chuta țang chuan, Pathian țih mi a lo ni ta a. Football khawvêlah a hming a lo thang zêl a. Serie A Foreign Footballer of the year nihna 2004 leh 2006 te, Champions League Best Midfielder 2005 nihna te, Top Scorer 2007, European Footballer of the year, World Soccer player of the year, FIFA World Cup Best player, FIFA World Cup Player of the year nihna te a khum tawh a. Kum 2002-ah pawh khan Brazil chu World Champion nihna a lâk pui a nih kha. Sawi tam ngai lovin, a hausa tâwk ang tih chu a hrîat a ni. A sum lâkluh ațangin sâwma pakhat pêk loh a nei ngai lo! Khawvêl ram hrang hrang nulaten an bâwm nasa ang tih pawh a hriât reng mai. "Sex City" kan tih khawpui lian ho zingah tlawh loh a nei lo. Kaka nun ațanga țhalaite entawn tlâk dang leh pakhat chu hei hi a ni - a tleirâwl lai ațang tawha a bialnu Caroline Celico nên kum 2005 khan Dan Khatna ngatin an innei a nih chu!
Amah Kaka țawngkam ngei hi a Sâpțawngin ka rawn dah chhin ang e : "Cars and women, things like that, have never been important to me. My family, and my belief in God and Jesus are things which determine my life. I do want to live my life the right way, and live my life close to God." (A Mizo tawngin : Motor, hmeichhia tih vêl hi ka tan an pawimawh ve ngai lo. Ka chhungkua leh Pathian leh Isua ka rinna chu ka nun hruaitu a ni a. Ka nun hi dik taka hman ka duh a, Pathian hnaiha nun ka duh a ni).
Hunpui lo thlengin Pathian a țihna a ti nêp ve mai mai ngai lova, hmingthanna emaw hausaknain a tleirâwl ngaihzawng Caroline-i dinhmun a ti derthâwng ve hek lo. A rinawmna chu Pathian lakah leh mihring lakah a pangngai reng; a va ropui êm! Keini ve ngawt ai chuan thlêmna tlûkpui tham zet zet a tawng nasa âwm si a aw!
Țhalai duhtak, KTP i ni emaw, ȚKP, SAY, PYD, etc. etc., a eng a pawh chu lo ni la, Kaka ang hian, "i vanglai hian i siamtu hre reng ang che".
(Nizan lamah Pu Kima Jongte thuziak tawi pathum MSR-ah ka rawn post tawh a, mite chhiar leh hlut a hlawh hle mai. Lunglei SP ni mek Pu Kima hian a thuiziak te hi regular takin min rawn share thin a, pakhatmah paih lovin ka la vawng tha vek niin ka hria. Mi tam zawkte chhiar atan ka it pui em em thin a, FB a khawih ve ngai loh avangin ama remtihnain group-ah hian a khattawkin rawn post thin kan tum dawn a ni..vnt)
Read more »
Tweet Share Share Share Share Share

September 18, 2017
Mizoram KAWNG CHHIA15th September, 2017 (MSR) : MPCC President Pu Lal Thanhawla, Chief Minister chuan "kawng chhiat chhan bul ber chu MNF te an ni a, vaibelchhe sang tam tak awmna National Highway te chu an kuta awm atan an it avangin, defence ministry-a an dil vang a ni" a ti.
Vawiin MPCC Political Session-ah thu sawiin Pu Hawla chuan "kumin chu ruahtui tla a tam avangin lo hal hun pawh kan bituk hleithei lo a ni a. Kumin chhung ringawtin kawngchhia leh leimin avanga kawngpui hnawh, lirthei kal theih loh thenfai ngai hmun 984 bakah kalkawng bal hmun 81, retaining wall chim 94 leh culvert chhia hmun 83, kan chhiar theih chinah ringawt pawh a awm a a ni" a ti. "Heng hi siamtha turin cheng vbc 30 vel kan mamawh niin department lam hotuten an sawi a. Kawngchhiat chhan bul ber chu MNF sawrkar khan tualchhung contractor te hnenah 3% an lak thin chu a hlawk em avangin vaibelchhe sang tam tak awmna National Highway te chu an kuta awm atan an it ta tlat a, defence ministry-ah PWD kuta awm turin an dil a, kan hriat ve meuh chuan thil an lo ti fel vek tawh a, chu chu kawng chhiat chhan bul ber chu a ni" a ti.
Pu Hawla chuan nimina MNF ten bandh an siam chungchang chu sawiin, “Kan hlawtling hle, mipuiin min thlawp tha an tih chu, lo bawchhia awm ta se, dahthat mai ching ho kha an nih avangin an bandh hi a hlawtling lo thei lo, bandh hrim hrim hi sawrkar hnathawk zawng zawng leh dawrkai ten an dawr an khar vek dawn chuan an hreh lem loh avangin tupawhin siam se a hlawtling duh hle thin a ni" a ti bawk.
Vawiina MPCC Political Session-ah hian MPCC President, Pu Lal Thanhawla chuan mithar 32, Pu Sangzela Tlau leh a thiante Congress-ah a lawmlut a, MPCC Telephone Directory a tlangzarh nghal bawk.




Read more »
Tweet Share Share Share Share Share

September 17, 2017
Image result for mizoram sainik logoAll India Sainik School Entrance Examination (AISSEE) hi kum tin January thla a Pathianni hmasa berah neih thin a ni a. Academic Session thar 2018-2019-ah hian Entrance Exam dilna leh Exam kalpui dan tih danglam ani dawn a.
January 2018 atang hian AISSEE dilna form fill-up leh exam hi OMR hmanga kalpui tur a ni a. Dilna form (OMR) leh a fill up dan tur (instructions) hi diltu ten prospectus; sample question papers leh answer sheet keng tel te nen a rualin an la chhuak thei dawn a ni. Diltu chuan dilna OMR form hi online in emaw, internet atangin emaw an download thei a, fill-up hnuah dilna man demand draft-a siamin Sainik School Chhingchhip-ah thawn tur a ni. Dilna form-ah hian nu leh pate Aadhar Card number ziah tel tur a ni a, dilna form hi Sainik School Chhingchhip-ah lei theih a ni bawk ang. Admit Card hi internet atangin download theih a ni ang.
Class-VI Entrance atan hian question paper pakhatah exam neih a ni ang a. Exam hun chhung hi Minute 150 niin a hnuaia Subject tarlanahte hian exam neih a ni ang.
Sub -- No.of questions --Total Marks -- Duration(Minutes)
A. Maths 50 - 50 - 60
B. GK(Science &Social Studies) -- 25 -- 25 --- 30
C. Language -- 25 -- 25 -- 30
D. Intelligence -- 25 -- 25 -- 30
Total : 125 --- 125 --- 150

Entrance exam hi OMR answer sheet pakhatah chhan vek tur a ni a. ‘Intelligence’ question paper bik hi exam tan atanga darkar hnih hnuah chauh sem chhuah tur a ni ang.
Interview leh Medical Examination tura koh ni tur chuan Entrance Exam-ah hian subject tinah 25% leh a pumpuiah 40% hmuh tlin angai a ni.
2018-2019 Academic Session atana AISSE Exam hi January Ni 7, 2018 (Pathianni) ah neih tura ruahman a ni.
Zawhfiah duh neite tan Sainik School Chhingchhip Phone number 07630010072 -ah emaw, email:sainikschoolchhingchhip@gmail.com ah emaw,ngaihven theih a ni e.
Source: dipr
Read more »
Tweet Share Share Share Share Share

September 17, 2017
KAN LUSEI ȚAWNG I HMANGAIH ANG U
> A lova luat: Hei hi tunlaiin kan hmang dik lo nasa hle. "A lova luakchhuakin eng thil mah hi tih a țha lo," te kan ti vel mai mai, a dik lo nasa hle. A OVER a kai tawh a ni. 'A lo va luat' tih hian a dik táwk em em.
> Zawhna zawt: Hei hi kan hmang dik lo leh bawk."Zawhna a pe," te kan ti leh nulh țhin. 'Zawhna a záwt a,' tih zel tur. Zawhna hi inpek chi a nilova, a zawha inzawh chi a ni e.
> Thu sawi: "Thu tawi têin ka'n tiri ve lawk teh ang," te kan ti țhin bawk."Thu tâwi tê-in ka'n sawi ve lawk teh ang," tih tur a ni. 'Thu' hi a tiha tih rîk chi a ni lova, a sawia sawi chi a ni leh bawk.
> Ko: "Pu Thanga inah comiti neih a ni," te kan ti thla zen mai bawk."Pu Thanga inah comiti koh a ni," tih tur.'Hnatláng' te pawh hi a neiha neih chi a ni ngai lova, a koh koh țhin a ni.
> Kái: 'Vawiin chu awfis ka kal lo vang," te kan ti țhin. Sap ho 'go' - ina kan țawng a eichhiat zinga mi a ni."Vawiin chu awfis ka kái lo ang,' tih țhin a ni. Tun hma chuan, awfis te sikul te, dàwr te an kai țhin. "I pianthar loh chuan Vanram i kái lo ang,'' tih a ni bawk. Khi'ng zawng zawng khi English chuan "Go" tih a ni vek a; mahse, thil danga 'kal' kan hman țhin loh ang takin 'KÁI' tih vek țhin a ni.
> Vawiin: Hei hi țhenkhatte'n an ti 'Vawin' awlsam leh mai țhin bawk. A dik lo."I" hi tih double ngei ngei tur a ni."Vawiin" tih ang khian.
> Mitthi: Hei pawh hi kan ti singular leh țút țhin bawk.T khi a double ngei ngei bawk tur.'Mitthi' tiha ziah ang khian.
> Nakkum: Hei pawh hi ziah uluk tur.K khi tih double zel tur.
> Nakkun: Hei pawh K hi tih double bawk tur.
> Pángngãi: Hei pawh NG hi ziah double (nawn) bawk tur.
'Lungngai' te pawh.

> A zawng zawngin : Hei hi kan hmang uar hle. Kan hmang dik lo."A pumpuiin, a vaiin, Theihna zawng zawngin," tih tea hman țhin tur a ni."A zawng zawnga inpumpék tur ania," te kan ti mai mai, a dik lo nasa hle.
> A hrim hrimin: Hei pawh hi kan uar zet mai. Film letlingtute pawh hian an ti,'A hrim hrimin' vek mai. A țha lo hle."A thuhrimah(in)" tih țhin tur a ni."A rêng réng thuin" tih țhin a ni bawk.
> Lu met: Hei hi kan hmang dik lo deuh vek hlawm ta mai. Țhangthar te hian "Sam mêt" kan ti ta vek mai. A dik lo.LU MÊT tih vek țhin a ni. Lu mêt, Lu buk, Lu țuak, Lu kawlh, Lu kir" tih vek tur. English-in "Hair cutting" an tih avangin "Sam mehna" tihna a ni kher lo,"Lu mehna"(Hair cutting) tih zel tur a ni.
> Tarmit vuah: Hei hi TARMIT BUN tiin kan sawi ta fo mai.A dik lo leh bawk."Tarmit vuah" tih țhin tur a ni.
> Lawmthu sawi: "Lawmthu kan sawi e," tih țhat mai turah,"Lawmthu sawi kan ba tak meuh meuh a ni"/"Lawmthu sawi kan ba nasa hle," te kan ti mai mai tawh. A țha lo hle.Lawmthu sawi a hun tawh pawha lawmthu sawi mai ta lova, kan bat thu leh kan duh thu kan la sawi chauh mai țhin hi chu a zia a záng lo hle. Hei hi chìn tam loh tur. Lawmthu sawi a hun tawh chuan kan bat thu leh kan duh thu sawi kual sawi kual tawh lo khan kan duh a kan bata kha fel taka sawi tawh mai tur a ni."Lawmthu kan sawi tak zet zet a ni"/"Kan lawm hle a ni," tih fel mai țhin tur.
> I lo...ila: Hei hi kan hmang dik lo nasa em em mai leh bawk."I lo țawngțai ila," /"I lo ding ila,",te kan ti vel mai mai. A dik lo."I lo țawngțai ang u,"/"I lo ding ang u," tih țhin tur a ni. "ila" hi kan hmang duh dawn a nih chuan a bula 'i' hi paihin,"Lo țawngțai ila,"/"Lo ding ila," tihin a dik thung."I" a bul kan țan a nih chuan"u"/"aw" emaw hian a zui ngei ngei țhin tur a ni."I lo țawngțai ang u,"/"I lo țawngțai ang u aw," tihin.
> Vawiin Chhun: Hei hi "Chhùnin" tia hmang kan awm leh țhin. A dik lo."Vawiin chhùn" tih țhin tur a ni.
> Zanin: Hei hi 'Vawiin zan' & 'tun zàn' tih kan chíng thar leh ta hle. A dik lo."Zanin" tih țhin tur a ni. English-in "tonight, this night" an tih kan lehlin niin a lang. English-in "this night, tonight" tih ni raw sek sek, Mizo țawng chuan,"Zanin" tih a ni.
> Tukin zing: Hei hi kan hmang dik lo leh bawk."Vawiin zing" te kan ti leh mai mai țhin."Tukin zing" tih țhin tur."Vawiin zing" tih hi chu "Tukin zing" tih sawifiahna a ni.
> Túkțhuan: Hei hi "Zing chaw" te kan ti leh ta vek hlawm mai."Túk țhùan" tih țhin tur a ni.
> Zan riah: Hei pawh hi 'Tlái chaw' kan ti vek tawh mai bawk "Zan riah" tih tur a ni leh bawk. Chhùna chaw kan ei erawh "chhùn chaw" tih erawh a dik ve tlat thung."Chaw chhùn" tih a dik bawk.
> Hmangcháng: Hei hi HMANG PHUNG ti an awm leh ta. A dik lo. HMANGCHÂNG tih vek țhin a ni. KALPHUNG a awm a, Tihdan phung a awm leh a, NIHPHUNG tih a awm leh bawk."HMANGPHUNG" tih erawh a awm lo.
> Ha nâwt: Hei hi țhenkhatte'n "Ha sil" kan ti leh tawh "Ha nâwt" tih tur a ni.Ha kan nâwt a, lú leh thawmhnaw kan su a, kut kan sil a, hmai kan phih țhin a ni. Heng hi English chuan,"Wash" tih a ni vek. Mizo chuan hman dan phung hrang hrang kan nei. A chunga entirna ang khian.
> Kahpup : Hei hi naupang silai lem lem mau te tak tê kutzungchal tia vela siam a ni. "Kahpuk"tih chîng kan awm leh țhin. A dik lo leh bawk. KAHPUP tih tur a ni.
> Hnuhnung : Hei hi "Hnu hnûng" tiin kan ziak deuh fur ta hlawm mai, a dik lo. "Hnu hnung" tiha 'Hnung' laia thlûk sei an dah țhin hi dah loh tur. Kan zo-sap ho Mizo țawng mai mai a ni.
>Te tak tê : Hei pawh hi kan hmang dik lo nasa leh hle. 'Tê tak tê' tia ziah kan chîng leh tlat bawk. "Te" tih hmasa zâwk chungah hian thlûk sei dah loh bawk tur. Hei pawh kan Zo-sap ho hri kan kài chhàwn leh bawk.
> Tawitaw : Thing chi khat a rah leh zîk no an ei țhin hi 'Taitaw' tih loh tur. TAWITAW tih țhin tur.
> Sunhlu : Hei hi SINHLU an ti bawk. Dik kawpah ngai mai ang. Pu Buanga khan a Lushai- English Dictionary-ah khan ang khatin a dah tlat mai si a, kan pi/pu te khan an lo hmang kawp țhin a niang e.
Read more »
Tweet Share Share Share Share Share

September 17, 2017
BUNG (1)
Then (10)-na
TIRHKOH TAWNGTAINA THUAH SARIH – (chang 9-14).
Ch. 14. “…amahah chuan kan tlanna kan hmu a ni – kan sualte ngaihdamna chu.”
Tlanna tih hi a man pekna atanga tlan chhuahna a ni a, Thuthlung Thar thurin bulpui ber a ni hial awm e.
Thuthlung Hlui lama entîrna atâna inthâwina leh hrilh lawknate khan Krista Kalvari inthâwina kha an entîr vek a.
Kalvari maichâm chungah khan a takin chung entirnate chu a lo thlengkim ta vek a.
Tlanna tia an lehlin thu mal pathum atanga lak chhauh chu hetiangte hi an ni:-
AGORAZO (dawrpuia lei): - Hei hian a zirtîr tum ber chu, sal dawrpuia lei, tihna a ni.
Rom 7:14-a, “…sual bâwia hralh tawh” tlan chhuah lehna a ni a, a thuk zâwk chuan, “Thihna atanga tlan chhuah” lehna tihna a ni (Ezk. 18:4; Joh. 3:18,19; Rom 3:19; Gal. 3:10).
Chutiang anga tlanna man atân chuan tlantu (Krista Isua) thisen chu hman a ni, aiawhtu a nih avangin (Gal. 3:13; 2 Kor. 5:21; Matt. 20:28; Mk. 10:45; 1 Tim. 2:6; 1 Pet. 1:8).
EXAGORAZO (dawrpui atanga lei chhuah): - Tlansate chu zawrh chhâwn leh tura tlan chhuah an ni lo va, hralh leh mai mai tûra tlan ni lovin, chatuan atâna tlan chhuah an ni.
LUTROO (thlah dul): - Man pekna atanga (avânga) zalentîrna tihna a ni (Joh. 8:32; Gal. 4:4,5,31; 5:13; Rom 8:21).
Tlanna chu inthâwina leh thiltihtheihna atanga lo awm a ni a (Exod. 14:30), Kristan a man a pe a, Thlarau Thianghlimin ringtuah chuan tlan a nih tawhzia a hriattir a (Rom 8:2,16); chuvangin, Kristaah chuan kan tlanna kan hmu a ni.
Paula vekin, 1 Kor. 6:19-ah, “Mana lei in ni tawh asin, chuvângin in taksaah chuan Pathian chawimawi rawh u,” a ti a ni.
“…kan sualte ngaihdamna chu.”
Ngaihdamna hi mi sual lote chungah a awm ngai lo va, thil tisualtute erawh chuan ngaihdamna an mamawh thin a ni.
Heta ngaihdamna a tih hi Pathian dan bawhchhiatna atanga ngaihdamna a ni.
Eph. 1:7-ah, “A khawngaihna chu Duhtakaah chuan a thlawnin min pe a, a thisen avangin amahah chuan kan tlanna kan nei a ni – a khawngaihna ngahzia ang zêla kan bawhchhiatnate ngaihdamna chu,” tiin.
Adamaah khan mi zawng zawng hi suala chhiar vek kan ni a, thil tisual tawh vek anga ngaih kan ni (Rom 3:10,23).
Sual fate dinhmuna ding kan nih avangin thil sual titute kan ni vek a, tumah rêngin, “Thil ka tisual lo,” kan ti thei lo (1 Joh. 1:8,10); tin, Pathian hmaah mi fel kan awm thei hek lo (Rom 3:10).
Amaherawhchu, Krista thisen tlanna chuan kan sualte chu ama chungah nghatin a la kiang ta vek a; tin, Pa lung a tiawi a, kan tâna suala chhiar a lo ni ta zâwk a (2 Kor. 5:20,21).
Tichuan, min tlan chhuak mai pawh ni lovin, kan sualte leh kan bawhchhiatna zawng zawngte chu min ngaidam ta vek a.
Krista thisen tlanna a awm hma kha chuan, Thuthlung Hlui huna ringtute khan an aiawhtu atân ran thisen hlanna an nei thin a.
Chu chuan Krista thisen tlanna lo la awm tur chu a entîr a, chu chu lo thlîr lawkin, maichâm chungah an sual aiawhtu atân ran an hlan thin a, tichuan, an sualte chu haider sakin an awm thin a ni (Rom 3:25; Trih. 17:30).
Kalvari Kraws maichâm chunga Krista tlanna thisen leh taksa kha khawvêl sual aia pek a nih chinah erawh chuan, ‘haider’ mai pawh ni tawh lovin, ngaihdam a lo ni ta a ni.
Tin, chu ai maha thuk zâwk a la awm a – Bible hmun dang kan thlîr chuan, ngaihdam mai ni lovin, tlanna avangin ringtu chu thil tisual ngai miah lo angin, thiam chantîr a lo ni a.
A aia Isua chu mi suala chhiar a lo nih tak avangin, ringtu chu sual nei lo leh tisualtu ni lova, thiam chang dinhmunah Pathianin khawngaihnain a hlang kai ta a ni (Rom 5:18b; 8:1; Tirh. 13:38,39) – Kan Lalpa leh Pathian chu fakin awm rawh se. Amen.
Rev. Dr. Lalthanliana (F)

Read more »
Subscribe to: Posts (Atom)

Contact Form

Name

Email *

Message *

TOM © 2026. All Rights Reserved.
Published by Songate G
Powered by Blogger.