Tweet Share Share Share Share Share

September 24, 2017
Vanneihthanga Vanchhawng
23rd September, 2017 (MSR) : September ni 21, 2017 (Ningani)-a rul chuk avanga thi, Ramdina Darlak khua chu tun thlengin Rulchuk enkawl thiam nia sawiin a la enkawl mek.
Ramdina hi September ni 20, 2017 chhun dar 11 vel khan Mamit damdawiinah rulchuk avangin a thi a, a ruang hi Darlakah lak a ni a, mahse phum mai lovin Aizawl Tanhril lama awm Rulchuk enkawl thiam nia insawi Ramtinthata chu an chah ta a, a ni hian a enkawl ta a ni. Thudawn danin tun thleng hian Ramdina ruang hi a taksa a la khawng lova, a kawng achin hnuai lam erawh a khawng. Thenkhatin a mar an hmu niin an sawi a, a thenin an hmu lo niin an sawi bawk a. Amah enkawltu erawh hi chuan mar lam thiam a nih loh thu leh a tirteah lo chuan a mar a hmu ve lo niin a sawi.
Tunah hian Darlak a YMA section hrang hrang ten a inchhawkin an tlaivarpui a, zanin hian khaw thenawm ten an tlaivartpui ve leh bawk ang. A enkawltu hian vawiin thleng hi a hun tiam a ni a, vawiin tlai chuan a dinhmun tur a chiang dawn niin Darlak atangin thu dawn a ni.
(Mitthi chhungte ka lainat em em a, Rul chuk avanga thi tawh enkawl dam leh tum hi inbumna mai mai niin kei chuan ka ngai. Tul loah hun rei tak khawtlang an buai phah a, a enkawltu hian pawisa a demand a nih phei chuan tul lo tawp-a sum khawh ralna mai a ni bawk ang.
A marphu an hmu nia sawi hi ka awih ve lo. A khawng lo chungchangah pawh hian, a chuktu rul a zirin rul chuk hlum hi an khawng lo fo. Rul tur khan blood cell a tih keh darh thin vangin thisen a khang thei lo thin. Mizote hian thil kan awih hma lutuk thin hi kan inenfiah deuh chu a tha khawp mai. Rul chuk damdawi hria lah hi kan han tam laileng khawp a. An sawi anga rul chuk damdawi hi awlsam taka siam mai theih ni ta se, khawvel mithiam te hian research hautak tak beiin cheng maktaduai tam tak sengin antivenom an siam kher a ngai lo tawp ang tih te hi ngaihtuah thleng thin ila a tha khawp mai..vnt)
Read more »
Tweet Share Share Share Share Share

September 24, 2017
Vanneihthanga Vanchhawng

23rd September, 2017 (MSR) : Sipai Lak Runpui (Army Recruitment Rally) chu Rajiv Gandhi Stadium, Mualpui, Aizawl (Mizoram) ah December ni 1-6, 2017 chhungin neih a ni dawn. He Recruitment hi Mizoram chhung mi mipa tan chauh a ni ang. Physical test a tlingte tan Written exam ni 28 Jan 2018 ah neih a ni ang.
Rally a tel tur ten Aadhaar Card an nei ngei tur a ni. Aadhaar card tellovin tel theih a ni lo. 
Candidate ten mahniin online registration www.joinindianarmy.nic.in ni 02 Oct 2017 atanga 15 Nov 2017 chhungin an ti tur a ni.

Admit card hi candidate registered te e-mail ID ah ni 16-25 atanga ni Nov 2017 chhungin thawn an ni ang. Heng Admit Card te hi fiah felfai takin laser printer hmang ngeia print chhuah tur a ni. 

Tattoo nei te tan dil buai a ngailo, pawm an ni lovang.

Documents tul zawng zawng copy hnih theuh rally hmunah ken vek tur a ni.
Rally hmunah Admit Card neite chauh luh phal an ni ang.
Thil hrechiang duh tan Army Recruiting Office, Aizawl ah Office hawn ni (working day) ah dar 8 AM to 2 PM chhungin zawhfiah theih a ni a. Telephone number 0389-2351166/2351518 ah zawh fiah theih a ni bawk.
Sipai lak (Recruitment) hi dik leh felfai taka neih thin a ni. Engkim langtlang (transparent) a ni a, computerized niin proprietary software hrang hrang, Biometric Systems, Bar Code Readers and Optical Mark Readers te kal tlanga tih vek a ni.
Read more »
Tweet Share Share Share Share Share

September 24, 2017
Khawvelah hian hnam dangte laka Mizote kan danglamna leh kan Culture țhat bikna em em mai chu Thihna a lo thlen changa, khawtlanga kan intuarpuia, hlaa kan inhnem țhin hi a ni awm e. Hnam dang ten an hnamziaa an neih ve vak lem loh, kan inlenpuia, lusun chhungte hnemna hla !Khawhar Hla" kan tih mai kan sa rual țhup țhup mai țhi hi a ni awm e.

"Han thlir teh u Romei zam karah khian" tih hla hi a lo pian chhuah dan a ngaihnawm khawp mai. Sawi dan chi hrang erawh a tam a, hla inchuh a ni deuh roh a, mi hrang hrang ziak te han chhiarin "hla inchuh" ni lo vin "hla ințawm" tur niawm tak zawk a ni.
*A changtupa Chhunthanga  He hlaa a changtupa ber tih theih chu Chhunthanga a ni a, Leng khua (Saihnuna Sailo khua) a an awm laiin, naupangtêin nupui a nei a, a nupui pawh tleirawltê Lawngthluaii a ni.Tleirawl ngaihzawng innei an ni bawk a, an induh tawnin an inngai em em țhin a. An inhmangaihna tizual turin Lawngthluaii chuan nau a pai leh ta nghal a. Nimahsela an inneih ațanga thla kuanaah chuan Lawngthluaii chu thla ruk mi nau a pai laiin a thi ta hlauh mai a. (Hei hi kum 1932 Favang lai niin an sawi. A pasal Chhunthanga chuan a tuar thiam lo em em mai a, awmngaihna reng reng hi a hre lo a ni. A nupui thi a tawrh nasat em avang chuan khawhar inriak an țin vek tawh hnuah pawh chuan a țhian țha Lalrualan a la riahpui țhin a ni.
*A mumangah a nupui a zawng  Zan khat chu mumang mak tak mai hi a nei ta a. A mumangah chuan Chhunthanga chuan a nupui Lawngthluaii chu Aizawl Bazar mipui zi nuai nuai karah chuan hmu nawlh dawn hian a inhre tlat mai a, a zawng ta vak mai a. Zawng hmu zo lo va beidawng taka Rahsi veng lama a kir leh lai chuan van lam a han thlir chho ta a. Tlang thengthaw nuam em em mai leh mawi em em mai hi a hmu ta a. Chu tlang chung zawl pan theihna Lung kailawn (Step) hi nalh em em maiin a lo indawh chho zur mai a. Tin, tlang chhipah chuan Gate nalh em em mai hi a lo awm bawk a ni.
*An leng dial dial  Chhunthanga chuan chu Lung rahbi (step) awm zui mai chu a zawh chho ta a. Gate a han thlen chuan tlang chung zawl Phul rai dup mai leh nawm hmel em em mai hi a han hmu ta a. Chutah chuan a nupui chu awm ngei dawn hian a hre ta a, hmuh tumin a han hawi vel ta ruai mai a, chutia a han hawi vel lai chuan, a var veka inthuam țhian rual (a țhenin 8 an ti a, a țhenin 2 an ti bawk) hi hlim hmel leh nuam tih hmel em em mai hian Cinemaa Slow Motion ang deuh hian an lo pen rual a, hlim em em mai hian an lo zai a. Chhunthanga chuan an zinga pakhat chu a nupui duh tak, a ngaih em em leh mumang thleng pawha a zawn a zawn țhin a nupui Lawngthluaii ngei mai chu a ni tih a hre ta a. Gate pawn ațang chuan a va au ta vak mai a, "E! hetah a ni maw i lo awm reng? Engatinge min hrilh loh? Ka zawng ka zawng che asin. Daileng pawhin ka kalsan ngam lo che a, ka nghak reng che asin," tiin a au ta vak vak mai a ni. Nimahsela, chutia a nupui a va auh zawh chuan a nupuite chu an inher siau va, an ban an vai a,
"Kan leng dial dial lungrual kimin, 
Kan awi Lalnunnema," 
tiin hla sa chungin an kal liam san ta a.

*Thlafam ngaiin a țap  Chutia an han liamsan ta mai chu a lungleng lutuk chu a tlu tawp a, lungchhe vankaiin a țap ta hawm hawm mai a, a lo țap chhuak ta hial chu a țhianpa amah riahpuitu Lalruala chuan a lo hria a, "Chhunthang, Chhunthang, tho rawh, i zahpuiawm e, engahnge i țah hlawrh hlawrh," tiin a hau va, a va nghawk tho ta a. A han harh chhuah chuan, a nupuite hla sak chu a bengah a la cham reng a, a mutna bula lehkhabu leh pen a la a, sa pahin,
"Kan leng dial dial lungrual kimin, 
Kan awi Lalnunnema,"

tih chu a ziak ta a ni.
*Hla an phuah ta  Tichuan khua a var fel chuan an khuaa hla phuah thiam an Lalpa ni bawk Saihnuna leh zaithiam Liantawna te punin a thute an siamrem a, a thluk te an siam a. Chhunruaii, Zasangi, Lalruala, Kapthawma leh Chhunmawii te ho nen an sa ho ta a ni. Sawi dan hrang hrang a awm a, an Lalpa Saihnuna an pun hmasa a, a puitlin theih ngang loh avangin zaithiam Liantawna an pun belh a, an pathuma an siam tia sawi an awm a, Liantawna te nupa a va pan nghal anga sawi an awm bawk. Eng pawh ni se, mimal siam ni lovin Saihnuna leh Liantawna ten Chhunthanga mumang ngaithla chung leh a thluk țhenkhat ngaithla chunga an siam ti ila a fel ber mai awm e. Saihnuna hi an Lalpa a nih bakah hla phuah thiam tak a lo ni kher bawk si a, a hla buah a chuan bawk avangin phuahtu nihna hi a hauh deuh a. Nimahsela, he hla hi tunlai țawng takin , "Collaboration" niin a lang a, Liantawna nen an hming ziah kawp hi a fuh ber mai awm e. 

Source : Makedonia, 16 Feb. 2014 B Chhangte, Kolasib Vengthar
Read more »
Tweet Share Share Share Share Share

September 24, 2017
Central Sawrkarin nasa taka Corruption do an puan denchhenin kum 1997 khan Mizoram Sawrkar-in chutiang thil sawihona program a siama thusawi turin min rawn sawm a. Vantlang hmaa thusawi ngai lo leh official meeting te pawha thusawi thiam lova ngaih ka nih thu hrilhin ka lo hnar a. Mahse, hetiang huna thusawi tur hian Central Sawrkarin corruption laka fihlim chauh hman tur an tih avangin Pu J. Lalsangzuala leh kei lo chu sawm tur an hriat loh thu an sawi chuan ka remti ta a.

Ka thusawi chu mi’n țha an ti a, chanchinbu-ah te an chhuahin Training Class-ah te inzirtir nan an hmang hial a. Chu chu ka tan fuihna țha tak a ni a.

Thusawi ka thiam loh țhinnna chhan kha official thilah chuan thil tih dik lo sawimamna deuh vek a nih țhin avangin kei dawt sawi ngai lo chuan ka thiam loh zawng tak a lo ni tih ka hre chhuak a. Vantlang hma-ah pawh Politics thil lem lo thlengin thu tak aia a langa mawi, a ngaithlatute ngaihsan tur zawnga thusawi a ni tlangpui hi ka thiam loh zawng leh ka duh loh tak a ni a, chuvang chuan chhiatni țhatni-ah pawh chutiang chuan ka sawi thiam lo va, ka sawi ngai bawk hek lo.
Thu dik sawi tur erawh chuan inrintawkna ka nei ve hle thung a. Corruption do chu kan ram leh hnam mamawh tak nia ka hriat avangin leh chutiang ti tura inrintawkna nei ka nih bawk avangin ram leh hnam tana ka tih ve turah ka ngai ta a.
Hetiang thila ka inhman chuan ka thu khel apiangah ka hriat chin chin, țulna leh țangkaina nei apiang chu ka sawiin ka ziak vek tur a ni ang. Thil ti dik lo zinga an tel chuan ka chhungkhat hnai leh țhian țhate pawh ka sawi/ziak hmaih a thiang lo vang. Chutiang taka ka ti ngam dawn a nih chuan, tih ngei tur, sawi/ziak ngam loh chin ka neih dawn erawh chuan tih loh law law tur tiin keimah leh keimah ka inzawt a. Chawp leh chilhin chutiang taka ti ngam tur chuan ka intiam a, bul ka țan nghal ta a ni.
Tun kum 20 chhung hian corruption dona lamah chuan mar pâtin ka kal ta a. Lehkhabu 8 lai ka ziak ve tawh a, article ka ziak zat hi ka chhin chhiah lo nain 1,000 chuang chu a nih ngei tawh ka ring. Seminar, AIR, TV-ah thusawi hun ka nei zing ve viau tawh bawk.
Hetianga ka inhmanna lamah hian țawng mawi lo ni suh se, ‘hmelma’ ka neih phah hnem viau tawh a. Vanduaithlak takin ram leh hnam siamțhat nana ka ‘target’ lian ber, kan ram hruaitu tam takte chuan ka thu chah a nih dan tura dawngsawng lova, mimal insawiselna-a an lâk tlat avangin harsatna min siam phah nan an hmang fo țhin.
Chutiang zinga langsar ber pakhat chu han sawi ila. Mahni kea din duh tlat mi ni a, chawmhlawm kutdawh dinhmuna din te hi ka duh loh ber a nih avangin vai buh ei lova keima thar chhuah ngei buh ei ka tum tlat a. Chuta tan chuan Tuirial hnâr/kama leilet hmun țha tak Darkhuangah sawn leilet ka siam ve a. He hmun hi chhungkaw 50/60 vel inchawm theihna tur leilet ram awmna a ni a. Sawrkarin Minor Irrigation project liantham tak, cheng Nuaih 80 vel senga, tuikawng km 3 leh tuikhuah lian țha tawk tak an siamna a ni.
Țhian țhenkhatte chuan in hriat ngei tawh turin chawmhlawma min awmtirtu kan sawrkar hruaitute hi ram hmelma an ni ti hial tein ka sawiin ka ziak țhin a. Chu chu huatthu-ah an la ni ngeia ngaih theihin leh min hrêk nana ti ni ngeia ngaih theihin chu tuikawng chu kum 2010 ațang khan an enkawlzui duh ta lo va, an hluihlawn ta a ni tawp mai. Tuikhuaha ruahtui tling chu ka leilet châwm nana a la tâwk avangin kan kham khawp buh chu kan la thar ve ta zel thung a ni.
Tui kawng a pin tâk avang leh hlâwk lo an tih vangin leilet enkawl ve țhin te pawhin an enkawlzui ta lo va, tunah chuan mi pahnih chiahin kan enkawl a ni. Chhungkaw 50/60 vel inchawm theihna tur ram țha han hlamchhiah ngawt mai chu Sawrkar ve-a pumpa tan chuan a pamhmai deuh chuan ka hre țhin. Mahse ei leh bar leh thil pawimawh danga intodelh te, ram tihhmasawna tihchangkan te hi kan hruaituye tum leh duh a ni si lo va. An duh leh an tum ang ngeiin mahni hamhai bak chu tuipui an nei thei ngang lo a ni e.
Kawng dang dangah pawh hetianga ka kalna lamah hian harsatna ka tâwk fo va, mahse, chu’ng chuan ka thil tumah min tibuai lo.
Mimal thilin tu mah ka bei ngai lo va, ram leh hnam khawih thei thila inhmangte chungchang erawh an tlin lohna ni-a ka hriat chu insumkarna leh inthlahrunna nei miah lovin ka sawiin ka ziak pawp pawp țhin. Hetiang ka tihna lamah hian keima mimal tan hlâwkna eng mah ka nei ngai lo va, ram leh hnam tana ka tih theih ve tâwk ti-ah ka inngai mai a ni.
Ka thil tih mimal thila la an tam tawlh tawlha Sawrkara a lian țha țha chungkhat laina leh țhian țhate pawh, ‘a chhang eitute kha doral an chang zo ta..’ tih ang deuha min hlattu-a an țan tâk zelah chuan ka țhianpa leh ka thurawn lakna ber țhin Rev Thansiama hnena, ‘mihring kan nih chhungin hetianga maltlat hi tihdan țha a ni em’ ti-a ka zawh chu, ‘mihring tilawm ila, Krista bawih ka ni lo vang, tih a ni lo’m ni kha?’ a lo tih chuan chakna (inspiration) min pêk belh a, ka kal leh ta zel țhin.
Ram changkanga mite leh kan Pathian thu chuan sual ngawihbopui emaw ngaihhnathiam emaw chu a tih ang thova sual a ni an tih hi kan pawm lo va, ngawihbopui/ngaihhnathiampuitu nih chu mi țha nihnaah kan ngai a, midang thilsual tih sawi chhuaktu chu misualah kan ngai lehling tlat a ni. Hei hi kan rama sual a punlunna leh a ngampat zualna chhan ber pakhat a ni a. He thu pawimawh tak hi Savun Kawrfual bu-ah a ziaktu chuan a chiang thei ang berin a rawn sawi a ni.
Tichuan, ka kalphung pangngai kal zelah chhiah pe lo langsar zualte chu ka han tar lang a. An tam em avangin tar lan vek sên pawh an ni lo va. Cheng Nuai 10 chin chunglam chauh ka har tar lang a ni. A vaia belhkhawm chuan vaibelchhe 50 vel a ni ang. Heti chin pawh hi mipuiin he thil pawimawha AWARENESS kan neih nan a tâwk thawkhatin ka ring a ni.

Chhiah hi ram inrelbawl nana Sawrkar innghahna ber a ni a, a tel lovin eng mah tih theih a ni lo. A pawimawh em avangin khua leh tui țha chuan chhiah a pe tur a ni tih hi khua leh tui țha leh țha lo hriat nana tehfung pawimawh tak a ni a. Pathian thu pawhin chhiah pêk hi a phût a ni.

He’ng chhiah pe lote zingah hian ka țhian țha leh chhung khat hnaite pawh an tel ve tho va. Mahse, a chunga ka sawi ang khian anni venthawn vanga he thil pawimawh tak hi ngawihpui thei ka ni lo va, an hmingte tar lan loh bîk chi pawh a ni lo. Chhiah pek țulzia chu mi tinin kan hriat a țul tlat a ni.
He list hi Taxation Department-ina min pek ang anga ka tih chhuah a ni a. Keimahina ka chhut chhawn a nih avangin dik lo palh te a lo awm a nih chuan hriatthiamna ka beisei a ni. Chhiah pe lote hian harsatna riau an nei te pawh a ni thei a. Chutiang neite chu an awm a nih chuan an harsatna te chu rawn sawi ve se, mipui pawhin thlir dan tâwk kan hre thei mahna.
Hengte hi Departmentin AUDIT ASSESSMENT COMPLETED an tihhnan vek an ni e.
He thilah pawh hian Sawrkar hian a tih tur a ti em, a tih tur ti thei tur chuan a inthuam țha em? tih hi zawhna lian tak niin a lang bawk.
Ram leh hnam insiamțhat nana thil pawimawh tak ni-a ka hriat vanga he’ng hi rawn ti ka nih thu ka sawi nawn leh e.
LIST OF TAX DEFAULTERS AS ON 31.3.2017 UNDER MVAT ACT, 2005.
S/N Name of Firm &Add Tax Balance Unpaid
1. Sena(Jaishi) Store/ Țhuampui Rs. 105,95,384
2. SD Enterprise, Zarkawt Rs. 116,89,517 
3. John Overseas, Zarkawt Rs 203,37,105
4. Lalhmingthanga&Sons,Zarkawt Rs. 23,59,493
5. E.R.Enterprise, Ramhlun Rs. 21,68,328
6. Infinite Space, Chanmari Rs. 19,28,090
7. K.M.Agencies, Chanmari Rs. 21,34,396
8. Hrangbana Business House,-do- Rs 18,64,799
9. United Associates, Chanmari Rs 72,18,858
10. Music Home, Chanmari Rs. 19,85,119
11. C.Rosanga&Sons Chanmari Rs. 62,28,899
12. Vees Communications –do- Rs. 188,06,159
13. Mosia Agencies, Chanmari Rs. 25,32,263
14. H.B.Motors/Lalmalsawma Rs 1855,71,072
15. KhiangteTradeCentre ChaltlangRs 648,96,307
16. ShimnitUtschIndia LtdChaltlangRs 23,08,657
17. LTS Agency Lower Zarkawt Rs. 98,85,732
18. LZ Agency Lower Zarkawt Rs. 55,00,565
19. Bezalel F&F Tiles, Zarkawt Rs. 12,18,659
20. Prahari Canteen, Durtlang Rs.12,40,000
21. Lalmalsawma, Țhuampui Rs 21,49,000
22. Bobby Store, Tuikhuahtlang Rs. 18,57,400
23. Tetea Store, Tuikhuahtlang Rs. 22,19,755
24. K.T.Agency, Bazar Bungkawn Rs. 16,19,695
25. K. Traders, Chawnpui Rs.46,34,953
26. M/SZaiiEnterprise,ChawlhhmunRs.24,48,697
27. BettyStoreLuangmualVengthlangRs.28,73,574
28. KimKimEnterprise,Luangmual Rs.19,07,798
29. M.S.Store, Ramrikawn Rs. 15,17,041
30. Mimi Enterprise,Ramrikawn Rs. 55,80,964
31. Hauva&Sons Zarkawt Rs 48,63,123
32. RRB&D Enterprise Vaivakawn Rs. 62,10,500
33. Valenpa Business Vaivakawn Rs. 10,75,535
34. O.P.Store Saron Veng Rs. 14,59,481
35. Khaia&Sons Vaivakawn Rs. 547,88,570
36. CB Enterprise SeasonComples Rs. 66,75,385
37. Mana&Sons Bara Bazar Rs. 11,58,606
38. LaltluangiEnterpriseArmedVeg Rs. 45,78,562
39. L.N.Stores Chhinga Veng Rs. 13,82,146
40. Mana&Sons,Bara Bazar Rs. 20,15,845
41. LT Store Dawrpui Rs 11,16,308
42. JH Agency Babutlang Rs 30,64,869
43. Buangthanga&Sons BaraBazar Rs 26,29,624
44. Buangthanga&Sons BaraBazar Rs 10,46,624
45. RK Store, Armed Veng Rs 24,00,000
46. OmOmVarietyStoreArmedVengRs104,70,000
47. Jenny Cosmetic ZionStreet Rs 61,83,142
48. Muankimi Store Thingsulthliah Rs 30,42,902
49. Jenny Store,Dawrpui SchoolBldgRs 16,09,500
50. Puii Store, Seling Rs. 22,99,346
51. Daffodils Zion Street Rs. 43,04,300
Read more »
Tweet Share Share Share Share Share

September 24, 2017
India ram zalenna sualtu vawiin thlenga la dam awmchhun India ramin a chhuanvawr leh a ngaihhlut Pu Darthawma kum 97, Chanmari Lunglei chu Aadhaar Card atan thla la turin a hriselna dinhmun in a zir loh avangin Aadhaar card a neih loh chuan Zalenna sualtu a nihna anga hamthatna a dawn te tih tawp a ni dawn avangin LUNGLEI DC hnuai a ADHHAR cell ten a inah kal chilhin am thla an lak sa lai.
Pu Darthawma hian Indopui 2-na ah khan British India hnuaiah Indian Army Medical Corps zawm in Japan Sipai te bei turin Malaysia thliarkar pakhat Penang ah a fehchhuak a. He mi hnua ah hian World War II ah tho hian British sipai do lettur leh India tana zalenna sual chhuak tur in Subhash Chandra Bose a din Azad Hind Fauj(INA) a zawm leh a ni. Singapore Jail bakah Kum 1 leh thla 2 chhung Lucknow leh Chittagong Jail ah te a tan leh hnu in January 15, 1945 ah khan chhuah a ni.
Freedom Fighter anihna angin chawimawina leh ngaihhlutna tam tak a dawng tawh a, nikum kha Mizoram Governor pawhin tlawh chhuak hial a ni.

Written by: Zohmingthanga Sailo
 
Read more »
Tweet Share Share Share Share Share

September 24, 2017 1

Dt. 23rd September, 2017 (Inrinni) khan Aizawl leh a chhehvela "UI HMANGAIHTU" ni a inchhal ten DOG SHOW an buatsaih a. He hunah hian ui chi hrang hrangte kengin an intihsiak tir a, hmanni lawka inla hmangaih taka thingtlang mite UI chhuhsaktute khan dân an bawhchhe nasa hle a ni.
Pakhatnaah chuan : Hlimhlawp bawlna leh intihhlimna atana nungcha leh ransate hman hi dân in a khap tlat a. (Section 22(ii), PCA Act, 1960) He DOG SHOW ah hian an huaihawt tirh ațang khan an ui vulhte hlimna aiin a vulhtute intihhlimna leh huau huau kha an kalkhawm chhan ber a ni a. Lawmman an sem, BIKE te kha show an huaihawt chhan ber UI tan hmanna tur a awm lo a ni.
Pahnihnaah chuan : Ui țhenkhat chu thil ril tak tak hnuh luih tir an ni. Thlalaka kan hmuh ang khian ui pawisawilote chu thil rit tak tak hnuh luih tir an ni a, hei hi ransate chunga nunrawnna leh tihduhdahna nasa tak, dân in a khap tlat a ni. [THE PREVENTION OF CRUELTY TO ANIMALS ACT, 1960, Chapter III, Section 11, (a,d) ]
Pathumnaah chuan : Thlalaka kan hmuh ang hian UI țhenkhat chu chain leh ngawngawrh lian leh rit tak tak awrhtir an ni a, hrui hmanga kaih leh thlunbeh tlat an ni. Tin, UI țhenkhat chu thawmhnaw leh eng eng emaw hmanga chei leh haktir an ni a, heng te hi dân bawhchhiatna lian tak a ni. UI pakhat phei chu thir hmanga a hmui leh a ka tuam sak vek a ni a, hei phei hi chu a case a sang hle. [THE PREVENTION OF CRUELTY TO ANIMALS ACT, 1960, Chapter III, Section 11, (a, f, g) ]
UI te hi mihring anga thawmhnaw ha tura siam an ni lova, a vulhtu ten mawi kan tih avang maia thawmhnaw kan lo haktir thin hi an RIGHTS bawhchhiatna leh palzutna lian tak a tling.
Palinaah chuan : PCA Act, 1960, Chapter V, Section 21 - 27 inkara a sawi angin PCA Act hnuaia trainer in register (Registered trainer) chauh lo chuan "performing animals" an train ve thiang lo. DOG SHOW a ui train inti tam berte kha register loh an ni a, dân hnuaiah chuan an UI an lo train ve ngawt kha dan bawhchhiatna a ni chiang hle.
Tichuan, hmanni lawka mirethei leh hnuaihnung zawkte laka UI HMANGAIHTU intite chuan anmahni dân țanchhan ngei chu a hlawm hlawmin an bawhchhe ta pawp pawp chu a ni a. Heng mite; hleih nei taka ransa hmangaih bik nei leh mahni mihringpuite tibuai duh khawpa inla-hmangaih ho hi kan dodal a hun ta hle. Kan ranvulhte chu mi tupawhin kan ngaina a, intih hmangaih bik vanga mi eizawnna te, midangte nunphung tibuai leh tibahlah khawpa an chetna erawh hi chu kan dodal ngam ve tur a ni.
Ram hnufual kan ni a, eizawnna kawnga ransate kan khawih kual danah dan ang thlip thlepa tih theihloh tam tak kan la nei. Inhriatthiam tawnna tel hauh lova mahni duh zawng zawng lama PAWL hmachhuana kan che dawn anih chuan keini MIZO CHAKAI HMANGAIHTUTE pawhin mi CHAKAI phurh kan chhuhsak nawn ve leh mai ang.

Issued by :-MIZO CHAKAI HMANGAIHTUTE
Read more »
Subscribe to: Posts (Atom)

Contact Form

Name

Email *

Message *

TOM © 2026. All Rights Reserved.
Published by Songate G
Powered by Blogger.