TIMES OF MIZORAM

Assam Forest and Environment Minister Pramila Rani Hrahma chuan Kazingranga National Park chu khualzin mite tlawh theih turin Thawhṭanni khan 2017-18 season atan a hawng.

He hun hi Agriculture Minister Atul Nora, Assam Tourism Development Corporation (ATDC) chairman Malla Baruah leh mi pawimawh eng emaw zah in an telpui a ni. Brahma chuan Forest Department chuan kumdang aia thla khata hmaah he park hi a hawn thu a sawi. Kum dangah chuan November ni 1 aṭanga April 30 thleng hawn a ni ṭhin a, tuna sorkar thar hian October 1 aṭanga May 30 thleng hawn turin thuchhuah a siam a ni.

Brahma chuan puja vacation a inṭan a, chawlh lai hian  nu leh pa ten an fate hruai hi an duh a, chuvangin Park hawn hma hi an titlu ta niin a sawi. Tunah hian Bagori leh Kohora range chiah an la hawng a, range dang pawh hawn chhunzawm zel a nih tur a nih thu a sawi bawk.

Kaziranga hi kumin chhung hian tuilian in vawi hnih a tibuai tawh a, hmun hrang hranga chhiatna thlengah ramsa 430 in nunna an chan tawh a ni.

Park enkawltuten an sawi danin Kohra range ah hian 25% vel chiah hi jeep leh sai hmangin a la kalpawh theih a, Bagori range pawh jeep chauhin ala kal theih a ni. Kaziranga hi khawvela samak ki khat awm tamna ber a ni. A park hi Sq.km 430 a zau a ni a, UNESCO World Heritage Site a ni bawk. 

Rural Development department chuan nimin aṭang khan Kolasib-a Parish Hall-ah Regional SARAS Fair 2017 an buatsaih a, Cooperation minister Vanlalawmpuii Chawngthu-in a hawng.

Vanlalawmpuii Chawngthu chuan, sorkar hmalakna hrang hrangte hlawhtlinna chu mipui kutah thui tak a innghah thu sawiin, sorkarin kawng a kawh­hmuhah rinawmna leh taimak taka bawhzuia thawkte chu an hlawhtlin ṭhin thu a sawi a, "Mi­zo­ram chu ringtu tamna, inkhawm tam hnam leh Pathian thu hre hnam kan ni a, rinawmna hi kan nunpui tur a ni," a ti.

Ṭanpui tlaka taima leh rinawm a pawimawh thu sawiin Awmpuii chuan, "Dil chhuah leh sawi chhuah ringawt ni loin, a thawh chhuah hi kan uar tur a ni," a ti.

Kolasib DRDA project director Lalnunhlua'n a sawi danin, Kolasib-a SARAS Fair hi a vawi thumna a ni a, Kolasib hi Aizawl tih lohah chuan district headquarters zinga SARAS Fair buatsaih hmasakna ber a ni. Fair-ah hian stall 50 a awm a, Mizorama RD Block hrang hrang aṭangin self help group-te'n an thil siam leh thar chhuahte an pho chhuak a ni.

Mara hmeichhe pawl, Mara Chano Py (M.Ch.P) chuan Siaha-ah State Bank of India (SBI) branch thar hawn phûtin nimin aṭang khan tiam chin awm loin SBI Siaha Branch bulah lungawi lohna an lantir (picketting) ṭan.

MChP hruaitute sawi danin, kum 1983-ah SBI Saiha Branch din a ni a, mipuiin Siahaa bank an dawr ber a nih avangin tunah chuan a chêp tawh hle. November 8, 2016-a Rs. 1000 leh Rs. 500 note tihthih a nih hnuah leh, kum 2016 tawp lam aṭanga sorkar hnathawk zawng zawngin bank aṭanga an hlawh lak vek aṭang phei chuan bank hmunhma leh thawhtute'n anmahni dawrtute an dâwl zo tawh lo lehzual hle a ni.

SBI Saiha Branch-in Mizoram district headquarters dangte aiin customer an ngah zawk nia sawiin MChP chuan, "A chhan chu MADC staff SBI kaltlanga hlawh la ringawt pawh mi 2,000 chuang an ni a, ṭhenawm khua, Lawngtlai district hnuaia awm khaw tam takin Siaha an hnaih zawk avangin SBI Saiha hi an dawr ber a ni," an ti.

SBI customer-te harsatna sukiang turin pawl hrang hrangin vawiduailo SBI hotute an lo sawipui tawh ṭhin tih sawiin, "Mahse, mipui harsatna sutkian nana hmalakna reng reng hmu tur a awm lo," an ti a; MChP Gen.Hqrs hruaitute pawhin July 14, 2017-ah SBI Manager leh Deputy Manager-te kâwmin, September 2017 ral hmaa branch thar hawn belh tur­in an ngen a, hmalakna a awm loh chuan October thla aṭangin tiam chin awm loa lung­awi lohna lantir an tum thu an hrilh tih an sawi.

Bangalore Mizo Association (BMA) chuan, nimin khan Union Theological College (UTC), Bangalore-ah Vângpui Kût 2017 an hmang a, minister Lal Thanzara'n a hmanpui.

Lal Thanzara chuan, India ram khawpui leh hmun hrang hranga awm Mizote chu Mizo ram leh hnam tan darthlalang pawimawh tak an nih thu a sawi a, "Mizoram aṭangin hla takah hnam hrang hrang kara awmte'n Zo nun ze mawi, a bik takin tlawmngaihna an chawi nung zel ṭhin hi a ropui hle. Mizo infiamna te, hnam làmte leh Mizo ṭawnga intihsiakna in buatsaih hian BMA-in hnam ziaráng leh nih­phung in hlutzia leh in dah pawimawhzia a tilang chiang hle a ni," a ti.

Mizoram páwna awm, a bikin India ram khawpui liana awmte’n welfare leh association an din chuan Zo fate inpumkhatna leh inunauna a tichak a, a tiphuisui hle tih sawiin Lal Thanzara chuan, chincháng hriat loh vanga kawng hrang hranga harsatna tawkte an buaipui leh ṭanpui ṭhin chu Mizo tlawmngaihna dik tak lan chhuahtirna a nih avangin, chhawm nung zel turin BMA member-te a chah. 

BMA hi April 8, 1984-ah din niin, Bangalore leh a chhehvela Mizo awmte an tel a, member 2,000 chuang awmin, section pangaah an inṭhen a ni.

Lal Thanzara hian Bangalore-a Banasawadi HR Br Layout-a Mizo­ram House sakna tur hmun, Bangalore Develop­ment Authority-in an ngaih­tuahsak chu a hmunah a tlawh nghal a ni.

Zoram Peoples' Move­ment (ZPM) - Ṭangrual Pawl chuan nimin khan Chanmari YMA Hall-ah inpuanchhuahna leh hruaitu thar hlanna hun an buatsaih a; ZPM hruaitute leh ṭhalaite ram leh hnam thawk turin an intiam.

Inkhawm hi ZPM Stee­ring Committee chairman Lalliansawta'n a kaihruai a, general secretary K Sap­danga'n ZPM din chhan, din dan leh a thil tumte a sawifiah. Rev.Dr K Thanzauva'n hruaitu tharte Pathian hnenah a hlan a, MPC vice president Vanlalhlana'n ṭhalaite thu ram leh hnam tana thawk turin thu a tiamtir. 

K Sapdanga sawi danin, Mizoram kal­phung thar hmanga mipui sorkar, hnam damna tling din duhtute'n August 15, 2017-ah thawhhona thutlung ziakin Ṭangrual Pawl hi an din a; kum 2018 Assembly inthlanah leh hun lo kal leh turah ṭangrual chhunzawm zel turin thu an thlung a ni. 

ZPM hi political party te, ram vei pawl hrang hrangte leh mimal tu pawh, Mizorama sorkar ṭha piantir duh apiangte tel theihna a ni a, a duh tan pawl ṭhiat kher loa zawm theih a ni. 

Inkhawmah hian MPC president Lalhma­ngaiha Sailo, ZNP president Lalduhoma, MPC MLA Lalthanliana, writer PL Lian­dinga, Lengzem editor Vanneihtluanga, ZPM Val Upa Council chairman Lalfakzuala, vice chairman F Lalremsiama leh member Bualhranga ten thu an sawi.

Lalhmangaiha Sailo chuan, ZPM-in hma a sawn a, an kal tluan zel thu sawiin, "Kum 30 chhung rorelna chak lo zet kalpuina hi kan duh tawh lo tih a lang chiang a, kan ram tluchhe tawh tungding leh turin ke kan pên chhuak a ni. Rawn pên chhuah ve châk mi fel tak tak an awm a ni tih kan hria a ni," a ti a; ram rorelna ṭha lo thlak turin ZPM a inpuah chah mek thu a sawi.

Lalduhoma chuan, Congress party leh MNF-te chu an policy khârchhâwngah puhin, "NEDP leh SEDP-te hi ZNP policy an lak chhawn leh mithiamte duansak a ni. Hruaitu ṭha chuan policy ṭha an nei tur a ni a, mahni policy lo chu a tuipui tak tak theih loh. Kum 30 vel state dang hmasawnna ngaihtuahin, kan ram dinhmun a lungawithlak loh hle. State sum lak luhna ber min zawhin, chhanna tur a awm lo," a ti. 

Tunlai media lama hriat tur awm ber chu inpuhmawhna a nih thu sawiin MLA Lalthanliana, MPC chuan, "A lehlam lehlamin insawifiahna an siam a, mipui tan thu dik hriat a har ṭhin hle. Inpuhmawh vak vak hian ram a la pawhin ka hre lo. Engtin nge ram kan siam ang tih ngaihtuah zawk tur a ni," a ti a; tuna sorkar mek hnathawh leh dinhmun chu mipuiin an hriat chian thu a sawi. 

Val Upa Council chairman Lalfakzuala, IAS (Rtd.) chuan Mizoram state kum 30 chuang a ni tawh tih sawiin, "Party pahnihin sorkarna an inchelh chhawk a, ram dinhmun, sorkar kalphung leh tun dinhmun thlirin a lungawithlak lo. Mizoramin sorkar thar a mawmawh a, chu chu ram dana thlen tur sorkar, mipui sorkar a ni. Mipui pawhin sorkar ṭha an duh a, rinngam leh rintlak pawl ding se an duh a ni," a ti.

PL Liandinga chuan, political party-ah awmna a neih loh thu sawiin, "Kawng ṭha leh zirna ṭha ka duh a, chuvangin, thu sawi tur hian ka rawn kal a ni. Kan ram hruaitute hi mi fel tak an ni a, an zahawm pawh ka ti. Mahse, min hruai danah ka lungawi lo. Sem policy-te hi kan duh ve lo a ni," a ti a; mi 

ṭha an nih chuan tling dawn lo tih chiang mah se, a vote tur thu a sawi. 

Vanneihtluanga chuan ZPM-ah hian hruaitu ṭha an awm dawn a, tu nge ni ang tihah a buai loh thu sawiin, "Heng mite hi kan rin ngam loh chuan tute nge kan rin chuan ang? He Ṭangrual Pawl hi vote khat a hmu dawn a nih chuan ka vote hi a ni ang. Mizoram ṭhatna tur hria kan tam a, mahse, rorelna lai tak hi a buaithlak ṭhin, Mizoram tan i ṭangrual ang u," a ti.

F Lalremsiama, IPS (Rtd.) chuan ram hmangaihtu nia a hriatte chu a theihnghilh theih loh thu sawiin, "Tun hma chuan Chakma pakhatin Tuikuk 10, Mizo pakhatin Chakma 10 a ngam tih ṭhin a ni. Tun dinhmunah hi chuan kan zirlai pawlte hi an khawngaihthlak ngawt mai. Pawl pahnih hi chu mikhual chám rei minister an neih reng hi kan hmu rei tawh lo ang," a ti a; ram leh hnam hmangaih a pawimawh thu a sawi.

Bualhranga chuan Val Upa Council pawimawhna sawiin, "Tu mah mifel famkim an awm lo. Hnam fingte chuan hruaitu fel tak tak an thlang ṭhin a, anmahni veng tur dan ṭha tak an nei ṭhin. Kan ramah chuan chief minister leh party preisident nih an kawp a, dîpdâl ngam an awm lo. 'Pathian lo chu tu mah ka ráwn lo' te an ti ngam tawh. Sorkar veng turin Val Upa Council hi a awm dawn a ni," a ti. 

Mimal leh sorkar lirtheite an number tawp ní zela Aizawl khawpui chhunga tlan phal lohna thupek chu hman ṭan ni aṭanga ni hnih chhungin dan bawhchhia mi 589 man a ni.

Lirthei intlan chhâwk ni hmasa ber, October 2 khan dan bawhchhia 518 man an ni a, October 3 khan dan bawhchhia 71 man leh a ni. Dan bawhchhiate hi MV Act Section 179 hmanga hrem an ni a, he dan hi thupek zâwm lote man theihna niin, Rs. 500 thleng chawitir theihna a ni.

Traffic Police aṭanga thu dawn danin, MV Act Section 179-ah hian inngaihnathiam theihna a awm tho avangin, lirthei intlân chhâwkna thupek zâwm lote chu pawisa chawi theih sang ber Rs. 500 aia tlem deuhte chawitir an ni ṭhin.

Intlân chhâwkin a huam loh zingah 'medical duty' tih ziah tel a ni a; hemi chungchangah hian Vanglaini palai zawhna chhangin Traffic police hotute chuan, ngaihhnathiam chin a awm a, Traffic police duty-te'n damdawi-ina duty tura kal an nih leh nih loh an zawtfiah zel tih an sawi a, "Fimkhur a ngai a, medical mi an nih anga ID card nei, duty tur ni lem lote pawh an awm thei a ni," an ti.

Hetih lai hian, damdawi-ina duty tura kal doctor leh nurse zingah mana pawisa chawitir an awm nual tho nia thu dawn a ni.

Mizoram Chief Information Commissioner (CIC) hlui, Robert Hrangdawla, IAS (Rtd.) chu khehpuam (pseudoephedrine) lei leh hralh thubuaiah man a ni a; Court thupek angin nimin khan Central Jail-ah dah luh a ni.

Thu dawn danin, Robert Hrang­dawla lakah Health department-a Food and Drugs Administration (FDA) chuan pseudoephedrine lei leh hralh chungchangah Court-ah criminal complaint an thehlut a; Vanlalenmawia ṭhutna Special Court (Drugs & Cosmetics Act) chuan nimin khan Robert Hrangdawla bail dilna hnâwlin, judicial remand turin a ti a, Central Jail-ah thawn nghal a ni. A rual hian a sumdawnnaa a thurualpui Lalchhanmawia pawh Central Jail-ah thawn a ni bawk.

Thu dawn danin, February 22, 2017 khan Lengpui Airport-ah Cetri-P mûm nuai 10 man a ni a, Dehraduna-a Cooper Pharma Limited-in Aizawl Luangmuala R&R Medicare-a thleng tura a rawn thawn a ni. R&R Medicare hi Robert Hrangdawla ta a ni.

Health Services joint director (FDA) Lalsawma sawi danin, khehpuam neitu nia hriat Robert Hrangdawla chuan license nung lai a nei a, a leiin a hralh thei. Mahse, a tihral dan (a hralh chhawnna) FDA-in an hre duh a, a neitu hian a hralhna record a neih loh avangin a tihral dan hriat a ni lo.

Pseudoephedrine chu a hlawma hralh a nih pawhin, license holder vek hnenah an hralh tur a ni a; Robert Hrangdawla'n a tihral dan hriat theih a nih loh avangin a lakah FDA chuan assistant director Thanchungnunga hmingin Drugs and Cosmetics Act hmangin Court-ah complaint an thehlut a ni.

FDA hotute dawi danin, Taxation hnathawkte'n khehpuam an mansak hma pawhin Robert Hrangdawla hian license hmangin kumin tir lam khan thla tin vawi thum aṭanga vawi nga vel khehpuam tam tham tak a chah lut tawh bawk.

Court-in a koh angin Robert Hrangdawla chu April 7, 2017 khan Aizawl District Court-ah a inlan a; a laka FDA-in complaint an thehluh chu ziakin pek/hriattir niin, thla khat hnuah a chhanna Court-a pe tura tih a ni.

Robert Hrangdawla hi July 25, 2017 khan Aizawl District & Session Court-ah a inlan leh a; chumi ṭum chuan a ukilte chuan criminal complaint titawp turin Court an ngen. An ngenna chungchangah hian Court-in sorkar ukil-te chu an ngaihdan August 17, 2017 hmaa ziaka thehlut tur leh an chhanna chu Robert Hrangdawla ukil-ten an zir chian theih nan August 11 hmaa pe turin a ti.

Court order-a a lan danin, Robert Hrangdawla hian drugs retail license no. 0101110283 & 1010110284 leh wholesale license no. 0201110233 & 0201110234 a nei. A lakah thubuai an ziah luhna dan hi bail theih lohna a ni a; Robert Hrangdawla hian nimin vek khan bail dil mah se, Special Court chuan a phalsak lo a ni. 

Source: http://www.vanglaini.org