TIMES OF MIZORAM

Volleyball Federation of India (VFI) chuan November 5 khan Ramada Chennai Egmore, Chennai-ah Annual Genral Body meeting an nei a, VFI chuan season thara an kaldan tur ṭhenkhat duangin Mizoram chu Mini National Volleyball Championship thlen an phal sak.

VFI hian ramchhunga inelna lian paruk buatsaih a tum a, Mini Nationals bakah hian Sub Junior, Senior National, Junior leh Youth bakah Federation Cup te chu khawpui lian hrang hrangah a nghat dawn - Mini national hi a neih hun tur tak a la chiang lo.

VFI vice president Lalmalsawma chuan, "VFI hian Senior National leh Mini National hi a ngai pawimawh hle a, tun hma lama kan la thlen phak ngai lo thlen min phalsak hi a lawmawm hle," tiin Vanglaini a hrilh.

Mizoram Volleyball Association hian tualchhung volleyball-in hma a sawn theih nan kawng hrang hrangin hma an la a, International coach leh International referee ten Mizoramah coaching course te pawh an rawn buatsaih tawh a ni. MVA president Lamalsawma hian ProVolleyball League an buatsaih ṭhin chu state dang pawhin ṭha an tiin entawn an tum thu a sawi bawk. -Vanglaini

Mizo tleirawl hockey khel thiam Lalremsiami chuan Asian Cup khelh zawh takah India chu champion nomawi a chawipui. Pathianni khan Kakamigahara, Japan-ah final khelh niin India hian penalty shoot out-ah China 5-4 in an hneh. India hi nakkuma khelh tur Hockey World Cup atan an tling nghal.

India leh China te hi hun pangngaiah 1-1 in an inhnehtawk a, penalty hmanga chak zawk zawn niin India goalkeeper Savita Punia chuan Chinese nula vuak a dan sak bakah Indian skipper Rani Rampal chuan chakna goal a khung a ni. 

Asian ranking-ah India hi palina niin world ranking-ah chuan 12-na an ni a, final-a an hneh tak China hi Asian ram zinga chuan ranking sang ber (8) an ni thung. India hian final an luh theih nan hian inelna thlengtu leh hockey thiam ram Japan an hneh bawk avangin Asia khawmualpuiah chuan team ṭha ber an ni rih tih a chiang.

Kum 2004 hnua India nulaten Asian Cup an chawi theih nan sulsutu pawimawh coach Harendra Singh chuan, "Tournament ṭantir aṭangin kan khel ṭha nghal em em a, final-ah pawh hlauhthawnna nei loin kan khel. Kan duh leh tum ber nomawi kan chawi a, chumi bakah World Cup kan khelh dawn avangin lawmna tur hlir a ni," tiin a sawi.

Mizo tleirawl

Kumin Asian Cup-ah hian Kolasib tleirawl duhawm Siami hian inkhel zawng zawngah bul ṭanin a inlan kim vek a, goal hnih a khung zinga pakhat zawk chu Japan an hneh ṭumin a ni hial; a goal hmasa zawk pawh group match lamah Singapore an hneh ṭumin a khung bawk a ni.

India player pasarih inzir chhuah tawhna Thenzawl Women Hockey Training Centre aṭanga zir chhuak Siami hi a tirah chuan Bangalore lamah India Junior team training zingah a tel; training-na hmuna a chetla hmutu India coach Harendra Singh chuan Siami hi Senior team zinga khel tlakah ngaiin a ko.

Coach berin a thiamzia a hrechiang a, Siami tana hna pawimawh chu rim taka thawh chhunzawm a ni. September thla khan Netherlands-ah test match khel tura hruai a ni a, chumi hnuah player 33 awmna Senior team-ah telh niin Asian Cup khel tur hian player 18 thlan chhuah zingah a tel leh thei a ni.

India senior team zinga naupang ber Siami chuan, "Lawmthu sawina tur hlir a ni. Hockey Mizoram, min kaihruai tawh ṭhintu coach hrang hrang, kan senior player leh ka tan ṭhahnem ngai taka min ṭawngṭai puitute chungah ka lawm a, Pathianin ka thawhrimna mal a sawm a ni," tiin Vanglaini a hrilh.

Hmasawn a tum thu sawizuiin Siami chuan, "India tan inlan chhunzawm zel thei turin ka bei zui dawn a, tunah chuan Junior camp lamah ka awm leh rih phawt dawn a, heta ṭang hian hmasawn ka tum. Nakkuma neih tur Hockey World Cup-ah ram aiawha inlan ngei theih nan theihtawp ka chhuah zui ang," tiin a sawi.

Sports and Youth Services (SYS) coach Lalrampari leh Lalroṭhuami (Btei) te kaihhruaina hnuaiah Mizo tleirawl ten hockey huangah hma an sawn chho mek zel a, India tana inlan phak tam tak an chher chhuak tawh. Nikum khan Lalruatfei Hnialum chu Rio Olynmpic-ah a inlan tawh a, tun dinhmunah Siami bakah hian Lalrindiki chu India Junior camp lamah a awm mek bawk a ni. 

-Vanglaini

Ṭhazual Award 'Gospel Artist of The Year' dawngtu,  Sawmtea chuan Krismas lam a hawi a, award a dawn hnua a music video hmasa ber tur chu vawiin hian a tichhuak dawn. A hla thar hi 'Krismas ni lawmawm' tih a ni a, Rawngbawlliana, Tahan phuah a ni. 

Hun eng emaw chen a buaipui hnuah tunah chuan engkim a peihfel tawh a, zaninah Zonet-ah pekchhuah a ni ang a, youtube lamah en tur a awm dawn bawk. 

Music hi Kima Chhangte siamsak a ni a, recording hi Foster Record-ah tih niin, Mawitea Hauchhum (RDS Shots) chuan video hi a siamsak a ni. 

Sawmtea hlaah hian Feli Thangluah aw hriat tur a awm dawn a, backing vocal a lo pe. A hla hi nung leh ṭang ṭha tak a ni a, sakpui nuam tak tur a ni. Sawmtea chuan, "Krismas hla kan neihte hi cool tak leh mittui kochhuak thei an ni deuh fur. Krismas a ni a, hlim taka hmang tur kan nih avangin hlimna leh lawmna lam hla hi ka thlang a ni" tiin, a hla thlan chhan a sawi. Miten hlimna leh lawmna rei lote an lo neih phah a beisei thu a sawi bawk. 

Sawmtea hian kuminah music video pahnih a tichhuak tawh a, tuna mi hi a pathumna tur a ni. A hla hmasate hian Ṭhazual top chart-ah hmun pawimawh an luah phak a, tuna Krismas hla a tichhuah leh tur pawh hi a hit leh viauin a rinawm. Krismas hla bik chu tuna mi hi a vawi khatna tur a ni. -Vanglaini

Vawiin tlai khan Chief Minister Pu Lal Thanhawla leh NITI Aayog Vice Chairman Dr. Rajiv Kumar te chu Chief Minister Bangla-ah an inkawm a. Inkawmna an neih zawhah Minister te leh sawrkar mi pawimawhte Chief Minister's Conference Hall-ah an kawm leh nghal a ni.

Chief Minister Pu Lal Thanhawla chuan NITI Aayog Vice Chairman Dr. Rajiv Kumar chu lo lawmin tunhnaiah Central Sawrkar hotulian ber ber ten hmarchhak state an rawn tlawh ngun ta chu thil lawm awm tak a ni a ti a. Mizoram mipui ten hunrei tak chhung enhran nia kan inhriatna pawh a reh tan a, state hmalakna thuam chak turin central sawrkarah state mipui ten beiseina sang tak an nei mek a ni a ti. Chief Minister chuan Mizoram chu kum 20 rambuai vanga mi dangte umphak lo a ni chungin phur takin thiante ruala pen ve turin theihtawp a chhuah a ti a. Mi harsa zawk te chawikang turin NLUP kalpui a nih dan leh NEDP hmanga NLUP hmalakna te sawhngheh chhoh tum a nih dan te NITI Aayog Vice Chairman hi a hrilh a. Boder trade chungchang, kawngpui siam, rel kawng laih, Kaladan Multi Modal Transit Transport Project (KMMTP), solar power project, Food Processing, Skill Development, entrepreneur development, oil and natural gas exploration leh power project a hmalakna te Chief Minister chuan sawichhuak in NITI Ayog chu state hmalakna a puitu atan a sawm a ni.

NITI Aayog Vice Chairman Dr. Rajiv Kumar chuan Chief Minister Pu Lal Thanhawla chu theihtawp chhuahpui tiam in Prime Minister in India hmarchhak bial a ngaih pawimawh thu a hrilh a. Mimal tak pawhin India hmarchhak bial hmasawnna ngai pawimawh tu a nih thu sawiin state dang te nen khai khin in mihring tlem zawk leh state te zawk an nih avanga hmasawnna tura thawhpui tul bik an nihna te a hriat chian thu a sawi a. India ram state dang a tlawh hma in hmarchhak bial tlawh chu hman atanga a lo tum lawk tawh a nih thu a sawi a ni. Dr. Rajiv Kumar chuan Chief Minister Pu Lal Thanhawla chu Delhi a zinah sawmin Ministry dawr a tul pawhin a kalpui tur thu a tiam a; tuialh thei zawn kawngah leh Skill development kaltlanga hmalakna bawhzuinaah Petroleum Ministry pawh dawr pui a inhuam tih a sawi a. Mizoram chuan JICA nen thawhhona tha tak an nei chu lawmawm a tih thu sawiin Japan Organisation tho, JETRO leh JBIG pawh thawhpui se Mizoram in a hlawkpui zual dawn niin a sawi a, chumi atan chuan kawngdap pui a lo inhuam thu sawiin   NITI Aayog chu Mizoram leh hmarchhak bial tan 'Development Partner' a ni a ti. Chief Minister Pu Lal Thanhawla'n Central sawrkar a Mizoram sawrkar ruahmanna thehluh tawh la tangkhang mek a sawilan te pawh Mizoram in sawrkar lehkha a thawn thlak hunah lo bawhzui a ni ang a ti.i.

Minister leh Official te Chief Minister nen an kawmna ah Dr. Rajiv Kumar chuan Mizoram chu inthlunzawmna tha - kawngpui, boruak leh digital ah tang se a duh tih a sawi a. Private investor sawmluh dan kawng dap leh ngaihtuah chu Mizoram hmasawnna a nih tur thu sawiin Japanese leh Malaysian bakah khawchhaklam ram te sawm luh theih ni se a tha a tih thu a sawi a. Food Processing leh Tourism-ah Mizoram in hmabak eng tak a nei a ti a. Education chungchangah Mizoram chu ziak leh chhiar thiam tamna ni mahse mithiam chhawrtlak chherchhuah kawngah midang te hnungah a awm mek a, a tan a ngai a ti.

UD&PA Minister Pu Zodintluanga rawtna -  mobile leh telephone hruipui -OFC Cable te  Electric Hruipui ban ah te thlun ve leh leihnuaia phum loh rawtna chu rawtna tha tak leh bawhzui nghal chi a nih thu a sawi a. Leimin leh kawnglaihchhiat  a tih tlem dawn avang leh senso a hautak loh zawk dawn avangin tlangramah chuan tih vek theih ni se a tha zawka a rin thu a sawi a, Demi Official(DO) Letter a hnena thehluh a ni veleh lo bawhzui nghal a tiam a. NITI Aayog chuan hmarchhak bial tan bik Forum hran buatsaih thuai a tum a, kawngpui design chungchangah pawh General design chu hmarchhak tlangram ruahtui tamnaah a rintlak lo tih Hmarchhak state zawng zawngin an hrilh chu ennawn dan kawng dap a ni ang a ti.

Chief Minister Pu Lal Thanhawla leh NITI Aayog Vice Chairman Dr. Rajiv Kumar ten joint address Chief Minister Conference Hall a an neih ah hian i minister zingah Pu H.Rohluna, Pu Lalsawta, Pu Zodintluanga, Pu Lal Thanzara leh Pu KS Thanga te an tel a. Mizoram Sawrkar Secretary lian te, Director te leh official pawimawh te pawh an tel a ni. - DIPR Mizoram

Vawiin khan I&PR Director Pi Lalnithangi chuan Mizo film thar “Mangchhia” I&PR Auditorium-ah a tlangzarh.

I&PR Director Pi Lalnithangi chuan Mizo film-ah hmasawnna nasa tak a awm chho zel chu lawmawm a tih thu a sawi a. Mizo thalaite zingah football a lara, football-a tuite an in tawiawm that avangin hma a sawn chak thu sawiin film society pawhin hma a sawnna atan film lama tuite in tawiawm that a pawimawh thu a sawi a. Film siamtuten Mizo mipuite thinlungah ngaihhlut tur dik an ngaihhlut a, ngaihsan tur dik an ngaihsan theih nan an ngaihtuahna seng a, film tha siam zel turin a sawm a ni.

He hunah hian khual zahawm  I&PR Joint Director leh Nodal Officer MFDS(Mizo Films Development Society) Pi Lallianpuii chuan MFDS te nen thawhhona hnuaia film hmasawnna chu chhuanawm a tih thu a sawi a. He thawhhona hnuaia talk show-te neia awareness nasa taka kalpui a nih hnuah a ruka film copy chhawna thehdarh (piracy) a tlem ta deuh chu lawmawm a tih thu a sawi bawk a. Film siamtu ten ram siam kawngah mawhphurhna an neih thu sawiin film ten thalaite thinlungah thu tam tak a sawi, a ti a. Ram leh hnam inlaichinna titha theitu, sual do na kawnga tangkai leh mizo culture pholang thei film siam thin a pawimawh thu a sawi bawk. 

Film tlangzarhna hi MFDS President Pu Lalawmpuia Khiangte chuan a kaihruai a. Film Director leh Producer, Pu Lalmuanpuia Renthlei chuan film siam dan tlangpui a tarlang a,  tlangzarh zawhah hian film hi thlirho nghal a ni. He hunah hian film changtute leh MFDS bakah I&PR thawkte an tel a ni.   - DIPR Mizoram

Vawiin khan Chief Minister Pu Lal Thanhawla chuan AOC Veng Serchhipah District Education Complex a hawng. He hunah hian School Education Minister Pu H.Rohluna leh Sericulture Minister Pi Vanlalawmpuii Chawngthu te pawh an tel a ni.

Chief Minister Pu Lal Thanhawla chuan Education chu ram hmasawnna atana rahbi pawimawh ber pakhat a nih thu leh sawrkar pawh in education a hmasawnna chu a dah pawimawh hle tih a sawi a. Chuvangin zirna tihhmasawnna kawnga fawng vuantu zirlaite kaihruaitu, zirtirtute leh zirtirtute enkawltu, Educationa Department a thawk te chu chu entawn tlaka an awm hmasak a ngai a ti. Zirtirtu leh sawrkar hnathawk dang hrim hrim pawh mahni duhna hmuna hnathawk tura lak an ni lo tih an hriat angai a.Mahni duhna hmun apiang hnathawh  tum sawrkar hnathawk an awm hian sawrkar tan a buaithlak thin hle a, mipui tan harsatna lian tak a lo awm phah thin a ni a ti a. "Ramhruaitute chu mipui chhiahhlawh an ni a, sawrkar hnathawk te pawh sawrkar mi chhawr leh sawrkar duhdan a mipui rawngbawltu an ni tih kan hriat nawn thar a ngai . Chuvangin sawrkar hnathawk chu sawrkar duhdan a rinawm taka a thawh a ngai a ni", a ti.

Chief Minister chuan Education Reform Commission rawtna anga quality education kalpui mekah export quality nei mithiam tam tak chherchhuah tum a nih thu leh zirna khawvelah thalai te tan khawvel thar buatsaih mek zel a nih thu a sawi a. Thangthar mithiam tam zawk mahni a dinchhuah tuma hma la, self employment tuipui an tam deuh deuh nan NEDP hnuaiah Entrepreneur Development Schemes kalpui mek a ni a ti a. Sawrkar hmalakna pawh chung entrepreneur te ah a innghat deuh deuh dawn a, kuthnathawktute tharchhuah te pawh hlawk zawkin entrepreneur ten an peipun sak thei dawn a. Eikhawp thar thin economy atanga intodelh econmy ni ni turin NLUP atangin NEDP ah zuankai mek a ni a ti. 

Sawrkar in hmasawn tumin hmalakna hrang hrang leh hmachhawp a nei teuh a, a innghahna bul erawh chu Education bawk a nih thu sawiin mithiam leh khua leh tui tha chherchhuah chu hna hmasa a ni a ti a. Thangthar ten rual elna chang an hriatna tur leh all India Services, central service, army leh service tha zawkah te luh an tum nan zirtirtu ten kawng an kawhhmuh a pawimawh hle a. "Nasa zawka tan kan lak  loh chuan nakin lawkah chuan kan chhehvela kan kawmngaih em em loh te chu sawrkar hna pawimawh ber ber chelhtute an ni dawn a. An thuhnuaiah hreh taka kan kun a tul dawn a. Chutiang thil thleng lo tur chuan thalai te, a bikin zirlai ni mek ten rual elna chang an hriat a ngai takzet a ni", a ti. Midang elpha tur erawh chuan tawng thiam tam a pawimawh a, Hindi leh Saptawng nal taka tawng thiam lo tan phei chuan hnathawh tur a awm tawh lo a ti a. Incheidan phung hriat, hawihawmna leh hnamdangte khawsak phung hriat leh nun in uluk a pawimawh tih hriat tel pawh a pawimawh hle a ni a ti.

Khualzahawm, School Education Minister Pu H.Rohluna chuan office thar luahtute chu thinlung thar nen an hna phur taka thawk tur leh anmahni dawrtu mipui leh zirtirtute tan hawihhawma that chhuah turin a chah a. Zirna huanga hmalakna leh hmasawnna hrang hrang tarlangin zirnaah hlawhtlinna a awm theihnan zirtitute bakah khawtlang hruaitu, nu leh pa te thlenga  zirlaite tan an thawhho vek a ngai a ti. Education pawimawhna sawrkarin a hriat avangin zirna in leh educational infrastructure tam tak buatsaih a ni a nakin lawkah phei chuan satellite hmanga zirtirna pekchhuah thlengin tum a ni a ti.

Thusawitu dang Fisheries Minister Pi Vanlalawmpui Chawngthu chuan zirtirtu te chu politician ang lo takin pension thlenga ram siamthatna hna thawktute an nih avangin an mawhphurhna hria an hna an la thuthak a ngai a ti a.  Nung chang leh incheinaah pawh sawrkar hnathawkte aia in uluk zual tura chah in zitirtute chu zirlaite hnenah zirna kawnga thiamna pek bakah an nun kaihhruai leh an thlarau nun thlenga kaihhruaina petu an ni a ti.

Serchhip District Education Complex hawnna puala programme hi Serchhip P & E Veng YMA Hall-ah neih a ni a. School Education Commissioner/Secretary Pi Esther Lalruatkimi chuan a kaihruai a; School Education Director Pu K.Lalthawmmawia'n Technical Report a pe a. District Education Complex hawnna inkhawmah hian Serchhip District Bawrhsap Pi Sangchhin Chinzah, School Education Addl.Director Pu K.Laldingliana, Pu Lalhmachhuana, SPD, SSA, Serchhip SP Pu  Lalringdika, District Official te, zirtirtute, zirlaite leh School Education Department Official te leh khawtlang mipui te an tel a ni.

Serchhip District Education Complex hi Special Central  Assistance(SCA) sum,  Rs. 122 lakh senga sak a ni a. He building hi chhawng 4 a sang ni in a building pumpui zau zawng chu Sq.Ft 5112.136 a ni. - DIPR Mizoram