-Tluangpuia Hilthang
Tlangval hriat tan tirh, chungte pawisa kan han dil a, Cheng sawm vel, min han pek pah a, lenchhuah dawn a piang a, pawisa ti reng mai, min han ti zui kha chu, rilru a, a tlem tih tawk nak a lai khan, inthlahrung tak a, lak tho kha a ngai thin si a. Chungte avang chuan, mahni pocket money tur thawk chhuak a, inhlawh kha, ka ti ve leh zauh thin a. Inhlawhna remchang, kan han hmuh ve pawh khan, patling rate kha chuan, min chhawr duh hlawm lo a. Tlem khan, kan hlawh kha a tlem deuh a, kan lungawi ve em em tho thin.
Tumkhat chu, kan veng VC in challui veng ah, inhlawhna an siam a. Kapa chuan, i thawk ve duh em, a ti a. Kei pawisa men a lo meng chuan, duh lutuk e ka ti a, ka thawk ve ta a. A nikhat na a lo thleng a, hnathawk tura lokal ve. Hmeichhe tleirawl, kum 18 vel tur chuan, ka mit a la nghal chat a. A nu lian lo a, a ngo thung a, hmai bial lam pang niin, a leivung zawn vel chu, ka lo thlir leh vung vung thin a. Ka thlir a ni tih, a hria ang tih hlau chuan, a lo hawi chhuah ve leh, hmundang ka melh loh pawn, titi tui hmel zet in, ka lo tawng zuah zuah thin a. A tuk a lo thleng ta, vawin ah a lo thawk leh ang em aw tih chu, ka thil hriat chak ber a ni ta. Hma deuh ah kal in, hnathawk tur a lokal zing ah chuan, Ka mit lo len in, ka lo zawng ru char char a. A hmel reng reng a lang ve ta lo. Beidawng deuh tak a, kal sawn ka tum lai tak chuan, kalpui pawh nei lo in, a rawn kal ve ta chhat chhat a. Inhlawh a, hnathawk tur e ti lo chuan, ka va han lawm tak em. A hnung ah chuan, ka zui ru nghal a. Hna kan han thawk tan ta a, a bul hnai ah chuan thawk in, ka be ngam chuang hlei lo a. Chutah leivung kan han zawn dawn ta. Ka bula patling pakhat chuan, ka vanneih ai tur nge ni. Vala, hei kan nula hi nang han zawn pui teh, an ti hlauh mai a. Kalpui a nei lo tih ka hriat avang a, a bul hnai a ka thawh chuan, ka zawnpui theih tak hlauh in, ka tih rilruk chu, a lo thleng dik ta phawt a. Phur lutuk a lan hreh si chuan, kan zawnpui ta a. Kan hah deuh hnu chuan, chawlh kan rawt a. Chawlh lai remchang ah la in, a hming leh awm na lai vel kan zawt a. Min hrilh pah chuan, kei chuan ka hria che, VCP fapa ti raw i nih, min han ti a. Aw ni e, tih pah chuan, engtin nge min hriat a, kan ti zui a. Nimin khan, ka thianpa in min hrilh a, kan bul hnai a, i thawh lai khan an ti a. Tlai a lo ni a, atuk kan thawk tawh dawn lo a. Zanin ah ka lo leng dawn, phal em kan ti hram a. Aw pawh a ti lo, ai pawh a ti chuang lo a. A la nopang em a, a zak a nih hi. Leng ve tawp ila ni mai ti chung chuan ka haw ta a.
Zanriah eikham chuan, ka thianpa ka sawm a. Nula chhe lo deuh mai, vawin kan hnathawh na ah, a lo thawk ve a, zuk rim ang. Amah pawh, ka hrilh lawk vek tawh, ka tia. Phur tak chuan, an in lam pan chuan, kan kal ta a. An in kan va thleng chu, thleng a lo sil a. A thleng sil zawh pawh chuan, choka lam ah chuan, a la tap a la tap a. A la nopang bawk a, a la zakzum hle mai a, tichuan, ka la inhnem zel a. Nakin ah chuan, kan piah deuh ah chuan, a rawn thu ve ta a. Han Biak vel pawh chuan,u pawh, a inthlahrun awm a ti a.
Thian hlui te nupui ruk, inneih tawh mai tur kha, phur takin kan lo rim ve a. A la nopang em a, a la zakzum a nih hi, kan tih kha, pasal um ngam khawp in, a lo puitling tawh si. I puitlin har avang khan, midang puitling lo tur ah, ruat kher suh. Mi hre chiang hmasa lo in, ngam lutuk suh. Inchhirna leh zahna, a thlen ve ang che.
Post a Comment