-Tluangpuia hilthang






Author
Pa daw thei an sawi ang mai a, thu ziah apiang a, Shillong han tih reng mai chu, inthlahrun chang, a tam duh khawp mai. Kum thum awrh chauh, awm mah ila, ka tan chuan, ka hringnun bul tan na, tun thlenga ka rilru zah ve zet, awm na a ni tlat si. FB vel ah, kan thalai rual eizawnna vang a, India ram pawn Dubai, Singapore, Malaysia leh Thailand vel a awm ten, an thlalak nalh tak tak, an rawn dah te, ka hmu ve fo a. An vanneih zia, ka ngaihtuah rual in, Golfling, Hyderi park leh Wards lake te, ka dah hniam phah chuang lo. A bul mai ah, khawvela ruahtui tlak tam na ber hmun, Cherapunjee leh Mawsynram te, Asia ram thingtlang fai ber, ni a an sawi, Mawlynong te chu, la tlawh ve lo mah ila. Ka tlawh ve chhun, Elephant Fall leh Shillong Peak, tuipui zawl atanga, Metre 1600 zet a sang te chuan, ka mit a ti tlai ve hle tho mai. 
Pu Rosangliana(Zorock) in, Shillong khawpui atanga, Kolasib a ngaih viau lai hian. Chu mi let ling chiah a, Keiin Kolasib atanga, Shillong ka lo ngai viau mai hian. Mihringte kan thuhmun loh zia, min hriat chhuah tir a. Kan lunglenna hmun pawh, a mihring a zirin, a danglam hle tih, ka hmuh fiah phah bawk. India ram hill station, nuam ber pakhat a an sawi. He khawpui hi, Pa ho ai a nu ho, an lal zawkna khawpui, a nih vang nge. Hnamdang nupui pasal nei, an tam hle a. Tun hnu ah, ILP neih ve tha a, an hriat meuh chuan, an lo tlai hman nasa tawh si. Kan ram vanneih bik zia, ILP hmanga kan lo inhung tlat that zia, ka hmu nasa hle.
India ram President hlui ropui tak, Dr APJ Abdul Kalam thih zan a, Bethany Hospital kawt a, Ka va thut ve ringawt thu te, Mizo girld band lar tak, Afflatus te chawrchhuahna hmun leh Mizo parlour changkang tak, Mapuii Beauty Parlour, awmna a nih thu te, sawi zui ka tum lem lo. 




Scotland ram nen a, a in an em avanga Scotland of the east, tih hming an lo put tir, chhum zinna ram, an tih bawk ah hian, saptawng a tual lengin, sap culture an la hle a. 2012 Krismas ni a, kan in luah na te nula, Madanrting Presbyterian School Vice Principle, nula hlei tling tak mai in, Biang pahnih fawh zeuh pah a, an nuih sang chuan, min ngaizawng ta a maw ni, tih a awl hle. He nula bawk hian, ka pasal tur chu Sailova, fiamthu a an tih chuan, Sailova lo lar ve zia, Mizo te hi ngaihsan tlak chu, an ngaisang ve hle in ka hria. Vai tawng thiam ta lo chu, vawikhat kan veng Nongrim atanga, Motinagar kan kal dawn in, Ka thian ten, nang a hma ah thu la an ti a, ka thu chiah chu a tlan ta a. Ka thiante an la chuang si lo. Cholo tih kha, ding rawh tihna khan, ka hre pek a. Cholo this side kan ti a, Ka kawhna lam vei lam ah chuan, a kual chho ta a. A tlan ta zel tho si, jau tih zawk kha, ding rawh tihna a niang, kan ti leh a, jau jau jau kan ti a. A tlan chak sauh sauh bawk si. A tawp ah, Ka au nasa lutuk kha a ding tawp. Ka thiante an lo thleng a, ka tih dan kan sawi mai chu, kan nui nasa ngei mai. Cholo Ka chawl ang maw, jau a zau lai ah maw, tih ka lo hriat thin vang vek. 
Shillong MSU hruaitute hi, zirna lam ah, an result a tha thei hle a. Mizoram anga, Politics luh rilruk avanga, hruaitu an nih loh vang, a ni mai thei. NEIHGRIMS hospital a, Mizo thawk ho te pawh hi fel tak an ni. Doctor zirlai ho lah an fel, an Mizo pui, an hriat ngai reng reng loh pawh, an buaipui nasa thin hle. Rampawn a Mizo nih ti nuam tute an ni. An KTP hruaitute pawh, an fak awm hle. Ka awm tirh hian, an branch Treasurer Tv Israel Pachuau of Bawngkawn, zai thiam leh hla phuah thiam hian, in ah min rawn sawm ziah peih. Zonuni nen thingpui sen programme a, ka lo hmuh te hian, hlawhtling tlak a ni, ka ti thin. Tv Jeremy Hauhnar, miss Mizoram te thla laksak tu. A thlalak te instagram lam ah, nalh tak tak kan hmuh pawh hian, in then awm chiah awm, in luah dun kan ni bawk a. A tuina kawng taka, an hlawhtling chho niin ka hria.
Zikpuii Pa thawnthu, CC coy no 27 a a changtupa, Ralkapzauva pear thei lawh rukna, ka zawnna thin. A mah tanpui thin tu, gorkhali putar, Bhadura hmuh thut, ka in rin thin na. Sialton official thawnthu a, C Thuamluaia'n a hmangaih Dorothy, a hmuhna phul zawn pah a. Dorothy thingpui dawr, ka zawn ruk ruk na thin. Kum thum chuang awr ka awm na, Shillong khawpui chu, ka chhuahsan a lo tul ta a. Ti te hian, kan thlah nang che. 
Zofate thiam zirtirtu
Ka thinlung ah, nghilh i har mange
Thiamna duh a, i run rawn bel te
Lungchim ten, lo pawm zel la
Mi tamtak zirtirtu lo ni zel ang che.

[Ziaktu phalna kan dil hran lo a, hriatthiamna kan ngen]

Post a Comment

Powered by Blogger.