Tlai thim thet thet a mual kil upa Zathanga tupa sial thlah lo haw chuan an sepui rai lai a hmuh zawh loh thu a rawn sawi làr làr a. Apu, Zathanga chuan chek tluk tluk chung chuan a rum nghut a. Engdanga chhang ta lo chuan"zanriah siam ru", ati bul leh nghut a. Chutih lai chuan thli athaw vúk vúk a, ruah rawn thleng mai tur avang chuan hmanhmawh takin Zathanga tupa chuan sehuangah sial ho chu a khalh lut mawlh mawlh thung a. In chhung atanga"Chaw ei kan peih e"tih thawm ahriat chuan Zathanga chu a lut nghal thuai a. Atupa pawh chuan arawn zui lut ve nghal bawk a. Zathanga chuan chaw a eikham thuai a, ngawirengin a chaw eikham veleh chuan lal in lam panin a tek chhuak nghal vat a. Lal in ahan thlen chuan lal te pawh chuan zanriah an lo eikham ve chiah a. An lalpa Tlangzaluaha chuan"Ekhai Tuaka pa lo leng teh khai, kan zanin khua mai mai chu zandang ang lo riauva ka hriat le."alo ti nghal thuai thuai a.Upa Zathanga chu lal bula thuthmun rem pah chuan"I lo chuti ve bawk maw? Chu chu ania ka rawn lan hma nachhan tak pawh, ka sepui chi tha ber a rawn haw ve lo nen zanin chu ahmeichhe thukhaw chang, rilruin arbo a zawng ruai mai ka ti."ahan ti a. An lal chuan,"Zenga ni? I sepui rai lai kha maw haw lo itih ni? Teh hlauh thin chuan aw! Kha ngawi teh Puii nu Tuaka pa hi ituibur al tha ber kha han theh phawt mai teh. A sepui a bo anihawm lehnghal chu."a han ti chuar chuar a.
"Aw haw haw! Ava han zia lo thin ve maw Tuaka pa le,"tih pahin atuibur al tha ber chu a pe nghal a. Zathanga chuan,"Nia mawle, tunlai chu sa leh ral hi an hnai dawn niin ka hre tlat reng a ni."alo ti a. "Hmannia Thangluaia sial sehtu bawk kha ava ni mai awm em?"tiin zawt pah deuh titih hian lal chuan Zathanga chu a en hâ a. Zathanga chuan"Ka ring chiah lo."a lo ti bauh a. Lal chuan"Uai! Anih chuan hmelma i neih awm lah kan lo hre ve hlei law, engtia han tih chi nge nita ngai ang a?"tiin a han rawn leh a. Zathanga chuan"A...rinthu mai chu ani naa adik loh erawh ka ring phal hauh lo thung a."tiin thu ahan khuh hmasa leh te te a. A sawizawm leh hma chuan upa dang pathum ngawt mai an lo luh ve tak avang chuan titi dang an vawrhsan ta rih a. Zathanga erawh chik taka lo entu tan chuan zandang a ang lo tih chu hai rual a awm awm love.
Leng hawn ar a rawn khuang al al a, tlangval lengho pawh an nula rim theuh te chu la kham lo ru hlawm viau mah se zawlbuk lam panin an lenna theuh atang chuan an tin sang sang a. Tlangval hoin zawlbuk an thlegkim tawh ang tih hun velah chuan ruah chu a rawn sur tam ta tak tak mai a. Asur hnem kher mai le. Zawlbukah chuan meilum an ai kual laih a, valupa te titi chu ngaihnawm ti takin an ngaithla thap a. Mut alo hun chuan mutna siamin an mu ta sang sang a. Tui taka tlangvalho an mut sâk sâk lai chuan zawlbuk bawhbel chu mipakhat hian rawn bawh liamin zawlbuka tlangval muho chu"Ekhai, Khualian tlangvalte u tho teh u tho teh u. Chhingi zun zung a bo daih mai a. Kan lalpain azawng turin tlangvalte in tlawmngai thei em a tia nih chu."a rawn ti ta mai a. A sawi zawh hma chuan tlangvalho chu an tho kim vek hman a, ruahsur bur bur karah chuan tlanchhuah nghal mai tum pawl pawh an lo awm hman a. Mahse, valupate chuan an lo khap hman a. Chutia Chhingi zan zung, han bo ngawt mai chu mak an ti tlang hlawm viau mai a, râl em ni ang? Nge sapui zawk? Ngaihdan han siam dan mai pawh an hre lo tlang tak zet a ni. Engpawh nise valupate chuan ro an han rel zung zung a, zanthim anih mai bakah ruah asur hnem si a, meichher takngial pawh a chhit theih dawn loh avangin mahni inlam theuha tlan haw phawt a, hmanrua leh silai mahni neih ang ang thawhchhuah puia zawlbukah bawk tlan let leh theuhah tiin ro an han rel a. Chu veleh tlangvalho chu zawlbuk atang chuan ruahsur hnuaiah mahni in lam pan chuan phur takin an tlan darh nghal sung sung a. Valupa pahnih chu Chhingi te in lamah thil chinchang hrechiang turin an chhuak ve nghal bawk a.
Tlangaupa pawh huh hnuang chungin zawlbuk atang chuan lal in lam panin atlan let ve leh nghal bawk a. Rei vak loah chuan tlangvalho pawh an rawn let leh tan ta a. An rawn thlen kim leh meuh chuan ruah pawh alo ziaawm ta hle a. Rei vak lo an han nghak leh hlek a, chumi chhung chuan meichher an siam lawk vek a, tlema ruah ahan leh deuh hnu chuan meichher chu an nun ta a, tichuan lal in lam an pan ta hlawm a. Lal tualzawlah chuan ngawirengin an ding khawm a, lal leh upa thenkhat chu luhkaah rawn chhuakin lalpa chuan a aw ahan thian kharh kharh a."Ka khaw tlangval tlawmngai leh huaisente u, nangmahni avang chauha kei leh ka khua hi awm thei a ni."a han ti hmasa te te a. "Nangmahni avangin khua hi kan him a, kan thlamuang a, nangmahni avang chauha khaw dangte awh leh hlauh, an ngam loh kan ni. He khaw ropuina leh nawmna zawng zawng chu nangmahni hi in ni."a han ti a. Tlangvalho chu an lo au rual nghal dual a. "Tunah pawh hian inzarah nula Chhingi hi inzawng hmu ngei ang tih kan ring a, khawiah pawh awmse, tukutah pawh awmse ka khaw tlangvalte hi hlawhchhama an lo hawn ka ring lo."a han ti leh chiah chu tlangvalho an lo au ring kher mai.
"Tlawm ngai lo, zam ngai lo. Tlanchhe ngai lo ka khaw tlangval chhuanvawr te u, kal ta ula, inhuaisenna, intlawmngaihna, in inpekna mamawhtu ka khua leh tui te zawng zawng tan hian bei zel ang che u."a han ti leh a, ring tak mai hian tlangval ho chu vawi thum ngawt an hawhaw a. Tichuan Chhingi te in lam pan chuan an inzui chhuak ta a Chhingi te in hi khaw hmawr leh dai bul deuh anih avangin an in an thlen chuan a chhungte pawhin rin tur leh sawi tur an hre tam lo hle mai. Ruahsur hnuaiah zung turin a chhuak a, chu chu a lo let leh lo tih zawng chu an hriat chhun a ni ve tho mai le. Valupate chuan ro an han rel leh nghal vat vat a. Rin zawn tawp tur anih avangin hmun thuma inthen a, kawtchhuah lam, an kawmthlang lam leh tuikhur lam zawn chu an ti tlu ta a. Tichuan an han insem darh ta a, uluk tak leh fimkhur taka che tur chuan an infuih ngun hle a, valupa pahnih zelin hoin an chhuak darh ta hlawm a. An chhuah atanga rei vak lo ah chuan ruah arawn tam leh ta tlat mai. Mahse, ruahsur mai mai indan tir chu an tum lo nasa mai a. An zinga valupa pakhat chuan,"Upa pawhin ruah leh râlte chu kan do pangngai alawm an lo ti ngai ania."ati duh lek a.
Kawtchhuah lam zawngte chuan kawtchhuah an pel fel awrh tihah chuan hmeichhe natuar te rawng rawng thawm an hre ta tlat mai. Valupa chuan ama hriat tawk lek chuan"Ekhai aw!"Ahan ti sap a. Tlangvalho hnenah chuan,"Chu le, khawilam nge ingaithla chiang ang aw."ahan ti a. Thawm ngaithla chuan an reh nghal duk a. Mahse, thawm chu areh leh ta daih mai, rei tak an nghah vang vang pawh chuan areh ta reng mai si a. Tichuan ramhnuai lam pan chuan an kal ta zel a, thui fe an kal leh hnu chuan an hre leh ta... Ahma aia chiang mah chuan hmeichhe natuar thawm chu an hria a. Mah se an hriatna lam chu a in an loh tak nuai avang chuan valupa chuan insemdarh leh ahan rawt a. Tichuan pahnih khat tete in an insemdarh leh ta a.
Hmeichhe natuar thawm chu a ring telh telh a, Chhingi aw ngei ani tih pawh an hre chiang ta hle a."Awi ka nu, ka duh lo min chhan rû! Min chhan rawh u ka hlau lutuk.."a ti tuarh tuarh a. Upa Zathanga tupa tlangval la naupang tak Lâia an tih mai chuan"Lo mangang reng reng suh, kha, keimah Zathanga tupa ka rawn kal e."tih leh ahma lama tlan chu a rual ta mai a. A kalpuipa Chhawra chuan"Lâia"tih leh um a rual ve nghal a. Chumi rual chiah chuan silai a puak ri nghal thuai thuai a...
Silai chu hmuntin atangin apuak thuai thuai mai a. Lâia lah chuan silai puak hre lo ang maiin akut leh lamin meichher akeng a, akut leh lamin apu Zathanga silai chhuan em em mai chu akeng bawk a, hmeichhe awri ahriatna lamah chuan atlan char char mai a. Ahnungah athianpa Chhawra chuan amah rawn au lauh lauh chung chuan arawn um ve zel bawk a. Thui zet mai atlan hnu chuan Lâia chuan hruiduk lei a zâm chu palin a tlu ta thlawrh mai a. A meichher ken lai chu adarh nghal chuai a, athim nghal hmuk bawk a, asilai lah chu hlam thum zeta hlaah atluk pah chuan a paih daih mai bawk si. Lâia cu thawh tumin ahan inbeng kang dawn chiah tih chuan tù tih hriat loh hian a chhak lam atang chuan arawn zuan ta tlat mai. Lâia ding kang tur chu a tlusawp leh ta nuaih a. "Uai..! Khawilam râl nge nita mai ngai? Keimah Zathanga tupa Lâia ka ni ngai e, sa leh râl hmaa ka tlan ka hre ngai lo." tih pahin arawn tho leh nghal a. A sahmima a chem ah chu aphawrh dawn chiah tih chuan arawn zuantupa chuan arawn bawh chilh leh hman chiah a, Lâia chuan "Ehe he! I duh tak tak vei ani maw?" tih pahin a lo pawm bet ve nghal chawt a. Apawm beh rual chuan hriam ahum ani tih ahre nghal bawk a. "Khai aw! Kei mah Lâithuama" tih pahin a'n keuh ta thuai mai a. A pawm beh tlat loh chuan abeih puipa chuan hriam ahum avangin achan achhe dawn tih ahriat avangin thlah a tum hauh lo. Leiah chuan hmel inhmu thei lo ve vein an inchai ta thial thial mai a. Abeih puipa hriam humna lam banrekah chuan nghet takin achelh tlat a, reife chung leh hnuai a an intan chhawk zak zak hnu chuan tan an khawhna lamah an thlang awihah chuan an tawlh thla ta a. Chhawra chu hah thaw huam huam chungin Lâite awmna chu a rawn thleng ve chiah a. "Lâia" ahan ti vaka, chu athianpa aw ri chu Laia chuan ahria a, mahse achhan hman hmain an thlang lam awihah chuan an lum thla ta buan buan a. Chhawra chuan "Laia, Lâia.." tiin ahan ko vak vak a. Mahse, athiante lum thla, ri zawi thla tial tial bak chu chhanna a hre ta lo. Hrilhhai takin thimthamah chuan a ding ran a.
Tuikhur lama Chhingi zawngtu te chu an kal thui tawh hle mai a. Mahse, mihring hnuhma emaw sa hnu emaw reng reng hmuh an la nei chuang lo. An zinga valupa pakhat chuan "Hetiang ringawt zawngin adik dawn love, insem darh ila, tlangval panga vel khan tuikhur lui hi zawh ula, athen belrawh mual lamah hian kal bawk se, abak zawngin kan hmalam hi pan ila atha ang. Fimkhur leh uluk takin zawng ila, kan lalpa min beiseina san zia kha hre tlang vek ang u. Hlawhchhamin kan haw thei lo tih kha hriat vekah.." ahan ti a. Chu veleh an inthen darh ta nghal a. An inthen darh atanga rei vak loah belrawh mual lama kalte chuan chhun lama mualkil upa Zathanga sepui haw lo ruang chu an hmu ta mai a. An han enchiang vel a sapui seh hlum ngei niin an hre theuh a. A then lai lai alo ei then tawh nghe nghe a. Mahse, valupa chuan ngun leh zualin a'n en leh a, mihring sulhnu ningeia lang ahmu tel ta tlat mai. Chu chuan angaih ati tha lo ru hle mai a. Tlangvalho hnenah chuan "Kan zavaiin i fimkhur leh zual ang u. Kan upa Zathanga sepui hi sapui khawih ringawt a ang lo deuh riau mai a. Thawm i dim deuh tlang ang u." ahan tih chuan tlangvalho chu ati ti nghal deuh titih a. A awmzia zawt fiah ngam chiah si lovin valupa thusawi chu mak an ti tlang hle a. Dilchhut taka thil zawh chu mipa zia lo leh puitling tih chi a ni lo tih hrerengin hlauhawm ahnai ani tih chu an hrethiam tlang nghal vek a.
An kal zel dantur te sawia an valupa a tawng dap dap lai chuan an chhak hlam thum vela tanga enge mawni rawn rum ham ham ri chu an hre ta a. An valupa tawng lai chu atawp chat a, chhak lam chu an hawi chho nghal thap a.
An meichher chu an han tialh tha leh zual a, han enfiah tur chuan silai keng pasaltha pakhat chu meichher nen a han kal hnai ta nghal a. Inring ren rawnin midang chuan an lo nghak thap mai a, rei vak loah chuan pasaltha silai chu apuak ta thuai mai a. An rin loh lutuk thil anih avangin an phu nasa hlawm ngiang mai le... Silai puah rual rual chuan keipui chu ahram tuarh a. Chu veleh midangho chu an pasaltha awmna lamah chuan an tlan chho ve nghal huk bawk a. Mahse, an rin loh tak mai thil athleng leh ta! Pasaltha ina akah loh zawk sakei pa chuan pasaltha chu arawn zuan ta mai le! Mah se pasaltha chuan a lo bum hman hlauh mai a. Midang tlan chho zinga tlangval pakhat chu ahap fuh ta thung a, an thlang hnimbuk pik zet maiah chuan azuanthlakpui ta mai!.. Pasaltha khan sakei kha pakhat chauh alo hmuh avangin akap ta mai kha a ni a, mah se nupa an lo ni tlat mai si a. A kah hliam zawk pawh chu kawr ruam lung lian zet mai phenah thisen nena inchiah piah nuaihin tan akhawh ve ta thung.
Valupa chuan "Ekhai pahnih an ni tlat mai fimkhur rawh u, fimkhur taka chet a tul e." ati tuarh tuarh a. A sawi zawh rual chiah chuan sakeiina a zuanthlakpui tlangval chuan harsa tak mai hian "Chhan tlak ka la awm e, ka chemtum kha min han theh thlak teh u thiante u..." a rawn ti tawk tawk a. An thianpa ala dam miau avang chuan han kah rawn mai chu a remchang si lo, an thianpa chhan tlak la awm tih hriat bawk si leh chhan ngei an duhna thinlung chu a buai ngei mai. Han zuan luh ve ngawt lah chu thihna ani tih an hre chiang si. Kawr ruama hliam tawm zawk chu atheihtawp chhuahin a han inhrosa ve ta tak tak mai a, a thawm ringawt pawh dawihzep deuh tan chuan khurhpui tham zeta rapawm a ni. Valupa chuan "Pakhat zawk khi pathumin lo beih rawn ula adang zawng chu zuanthlak vek tur" tih pahin sakeiin an thian pakhat a zuanthlakpui na pik bawn chu akawk ta mai...
"In silai kha dah ula, mikawlh sakawlh hmaa zam ngai lo, thian chhan thih ngam innih kha hrereng rawh u." tih pahin a silai chu apaih lawk a, a chemtum phawrhin "Kha keimah Liankaia, thiante chhan tur ka lo kal e." tih leh zuanthlak chu a rual ta mai... Midangho pawh chuan, "Khawra lo zam reng reng suh, kha kei pawh ka rawn kal e." tih pahin an zuangthla ve ta phawk phawk mai a. Sakei thinur lo inhrosa leh thian chhan thih ngam tlangval rual hanin khuainuai tak tak mai chu an thawm ana rem rem ngei mai. Lungpui phena sakei hliam pawh akah fuh theih miau tawh loh avangin luhchilh ve mai loh chu tih ngaihna dang a awm ta lo. "Tikhan lo chang ula ka han luh chhuah ang e." tih leh pasaltha chu kal a rual nghal a. Chu chu athiante ríl rem zawng ani ta hauh lo. "Keimah zawk hian le," tih leh pasaltha zui chu an rual nghal a. Chemtum nen sakei hliam tuar chu an han bawhchilh ta mai a, an thawm chu ramhnuaiah chuan a khawk ri rum rum mai. Khawvar ahla vak tawh lo tih chuan Chhingite kawmthlang atanga zawngho chuan thawm makpui pui an hre ve ta thung... Za em em maia hmeichhe nui uar uar thawm chu beng tun hrâin an ngaithla thap a. Nuiri uar uar kara silai puak ri leh thuai thin te, sakei hâhum khawk ri ruah ruah kara mihring aw niawm takina apawlh te chu angaihna hre lo zetin an ngaithla kar a.
Valupa chuan "Engpawh nise keini zawnna lam hi a dik lo ani phawt ang a, heta tang hian thinglubul mual kan pan ang a, chuta tangin belrawh mual kan kai leh ang a, khamrâng zawhin kawtchhuah mual ipan teh phawt ang u. Kan thawm hriat atang chuan kan thiante hian enge maw tak zawng an tawk a ni." ahan ti charh charh a. Valupa sawi ang chuan kal zel tawh lovin thinglubul mual lamah chuan an inher ta a. Thinglubul mual an kai tan tih chuan tawng nawk nawk thawm an hre ta a, an thiante an nih ngei ringin an han ngaithla chiang a. Mahse, an tawngri hriat chu lusei tawng ani ta tlat lo mai! Valupa chuan zawite hian, "Râl an ni e inring ru." ahan ti sa sa a. An meichher chu an timit nghal vek a, valupa bawk chuan "Kan awmna lam hi an rawn pan mek ania, heti laiah hian kan lo chang ang a, silai hman arem dawn loh avangin inchem kha humsa vek ula. Kan inhai palh loh nan kan inbeih laiin keimah, keimah kan ti char char tur a ni ang. Ka chet hma chuan tumah chet loh tur." ahan ti leh a. Tichuan remchang laiah chuan an lo chang ta a. Thawm chu arawn hnai zel a, an thawm atang chuan an tam hmel viau mai lehnghal a. Zanrehah pawh rampalailengah lehnghal chuan thawm dim vak ngaiin an hre lo nge an rawn tawng phei nawk nawk hlawm a. An hmaah enge thleng dawn a? Enge an hmachhawn dawn tih hre map lo leh thlamuang zeta an rawn inzui duah duah chu ngawi renga chemtum nena lo chang rengtute tan chuan nghahhlelh awm tak an ni.
An hmahruai chuan an zawn a rawn thleng ta, valupa ala che lo tlat...an kal zel a, ahnung ber arawn thlen ve dawn tepah chuan "Kha le keimah"tih leh mihring insat ri chu a inpawlh ta sawk mai!.. Chu ve leh hmuntin atang chuan "Keimah, keimah..."tih ri chu arawn chhuak ta sup sup mai. Tumah inhmu thei lo mah se mihring natuar leh insat ri sawk sawk chu a inpawlh ta nuaih mai. Inring leh inring lo an ni bawk a an chan a inthat hleih ngei mai. Mahse, an chiai zualpui areh hnu chuan engtawng nge tih hriat loh nen an rawn tang ve ta thung. An hmanraw neih ang ang nen thim thamah chuan an insam ta thawt thawt mai le. Akhawi lam ve ve mah tlanchhiat tum lo han inbei mai chu an thawm pawh ana rawh e, mahni tawng ve ve chu an inhriat hran theihna awmchhun anih miau avangin arik hian an ri nuai nuai mai. An inbeihna hmunah chuan thisen chu aluang kawi zei zui mai. Khawvar rual chuan tlem zawk nimah se a lambuntu zawk nana chu adingchangah an tang ta hram a. Khawéna an han en chian chuan khawchhak pawih râl ni tih an hre ta chauh a. Anni lam pawh mi pathum lai an lo inchan ve tho mai. Khua a var chiang ta, Lâia chu fiah lo tak hian arawn meng a. Khawiah nge a awm tih reng reng a hre lo, muangchangin a han thu chhuak chu aharh chiang ngei mai. A awmna pawh hrilh a ngai lo kher mai le, a lo dangtu thingbul chu lo awm lo sela chuan adam kher angem tih ngaihtuah tham tak a ni.
Zawi zawiin a han insang mar a. Adar chu ahan chet zawng chuan thip zawk hi ahria a, a'n khawih nak chuan kutzungtang chen vel hian alo thler duai mai chu niin... Thi a chhuah nasat avang leh athi kharin a hnawh vun bur avang chuan chet ati har hle a. Mahse, chuta awm reng thei ani lo tih inhriain atheih ang angin a han insiam rem a. Mahse, a chau lutuk chu a thu leh hnawk a. Zan lama a thil tawn chu ahan ngaihtuah let leh a, athin chu arim thar leh ta phat mai. Hachang thial rap rapin tuphiangsen nge inih? Ila dam anih ngai chuan ka rawn zawng hmu dawn khawp che ati nghat nghat a. Asualpuipa kha a lum hlum nge ala dam tih hriata, tunge anih chian aduh tak tlat avang chuan athlang lam awih zet maiah chuan tawlh thlak a rilruk ta a. Tichuan a hlauhawm lo lai deuh nia ahriatah chuan atawlh thla ta a. Ahlauhawm laiah chuan a chang leh akal a, achang leh a tawlh a. A chang leh a'n lum leh rih thin. Mahse, a tum tawh chu tum nghet bur chi anih avangin let leh emaw, thulh phah leh tawpsan atum chuang reng reng lo. A tawp a tawpah chuan kawrte hi a thleng thla ta ve hlawl mai a. Tuisik chu a in nghal khawlh khawlh a, mihring hnu ningeia ahriat ahmuh chuan a ding mar nghal zawt a. "Ila thi bik lo tawp a ni maw? Ka rawn um pha thuai angche ati chhuak sap a. Abul vel chu a'n hawi kual vat vat a. Mihring hniak niawm tak ahmuh nalamah chuan akal ve ta nghal a. Chu hnuhma chu a chhui ta ngat ngat a, achang leh ahnu a hloh thul, achang leh ahnu chhui chu a kal let vak a, kual em em mai te hian akal bawk a. Chawhnu her zet a chhui hnu chuan a hnu hmuh chu athar lam ta hle mai. Umphak dawn hnai nia a inhriat avang chuan Lâia chu a hlim kher mai le!.. Mahse, khua ahan chuan a, a awmna lai chu an khaw ram chin alo ni tawh hauh lo mai! Ahnu chhui ringawt a ngaihtuah aleiah an leido Bawihchina khua, râl ram chinah a lo awm daih tawh ani tih a hrechhuak ve ta chauh a.
Thil a fel dawn lo tawp mai. Tupawh hmu se atan chuan râl an ni vek tawh tlat mai a. Ani lah ahmutu apiang tan râl a ni ta bawk a. Mahse, mipa a ni a, hei leh chen a chhuiin ahahpui tawh a, tunah a umphak ani ruai tawh bawk a. Tupawh nise, khawi hmun pawh nise kirsan leh aichuan thihchilh ve law law chu athlang ta zawk tlat mai le! Nî pawh suk chen vel a ni ta, a hnuchhui lai chu khawen lai ngeia umphak tumin akal leh ta a. Thuife akal hnu chuan ahma lama thawm ri ahriat avang chuan ading chawt a. Fimkhur taka kun hniamin a veh ta a. An hmel leh tawng atang chuan pawih râl an ni tih ahre nghal mai a. Kawrte pakhat kama mi pali lai mai lo inbe mawlh mawlh chu ahmu ta a, fimkhur takin apan hnai zel a, an zinga pakhat chuan silai aken avangin chupa chu thah hmasak ber atha tih ahrethiam nghal vek a. Tichuan an chhak kopang lam atang chuan aveh kual leh ta them them a. An chung zawn athlen chuan lu tiat zet mai lung lo awm chu a chawi nawlh a, silai kengpa lu zawnah tak mai chuan a'n thlak ta mai a. "ih.." pawh ti hman lovin chu pa chu a hlawm nghal nawk a, che zui tur a awm map lo. An chiai lai tak mai chuan Lâia chu a chemtum nen chuan a zuangthla zui ve nghal a, lei athlen thlak rual chuan pakhat kokiah chuan an sat ngheng mai a, chu pawh chu hniak phawi eih lovin a tlu ve leh a.
Pakhat chu a'n vai leh nghek mai a. Mahse, alo thle hman tlat. A chem sei chuan a rawn vai ve ta thung a. Lâia chu a lo tawlh hnung dawrh a, mahse achem hman asei that em avangin a awm chu a vai thler ve duai hman tho mai. Lâia chuan tanhmun ahan siam rem dawn a. Mahse, chem keng lo zawk chuan leia silai chu a chuh ta tlat mai le, va bawh chilh a tum lai tak chuan chem keng zawk chuan arawn vai ve ta bawk si. Lâia chu akun zawk a, chupa chem vai chuan Lâia sam chu a sat thla thawt a. Lâia chuan kun pah chuan rawn vai thelhtu kaihza tha chu an sat chat hmawk mai a. Chupa chu a rak nghal thawt a, rang takin Lâia chuan akeuh thlu nghal a. Lâiate pahnih an leh dun tawp tawp lai chuan silai a puak ta thuai mai le!.. Lâia leh a sualpui pa chu an eu nghal awrh a... A kaptu chuan tu zawk nge akah fuh tih pawh ngaihtuah lova silai mu athun leh mawlh mawlh lai chuan Lâia rawn tho mek chu a hmu ta mai! Chu chuan atum loh zawk akap ani tih ahriat chian phah kher mai. Lâia'n a chem tla a chhar lai chuan kap leh hman dawna a inhriat loh avang nge silai chu paihin a tlan ta chiam mai a. Lâia chuan a mithahte lu chu a tan sawk sawk a, a sahmima ah pah chuan silai chu a chhar a, tlanchhepa chu a um zui leh ta a.
Zan thim hnuaia an insual laia abanrek amansak tuma abanreka ser atang khan hepa ngei hi ani tih a chiang hle a. Chuvang chuan dama chhuah a tum lo bur mai a ni. Rei vak lo a um hnu chuan a hnu chu atawp ta tlat mai. A'n zawng ngial thin a ahmuh zawh tak loh avang chuan a beidawng hle a. Khua a han hawi a, alo tlai tawh viau mai bawk si. Riahna tur ngaihtuah paha van lam a'n hawi chho chu a rin loh thil ahmu leh ta tlat mai!.. Adinna bul thingkung lera a mium pa lo tawm ran mai ahmuh chuan mak a ti kher mai. Chupa lah chuan a rawn hmu ang tih hlau em em hian thing hnah chuan ahmai alo inhliah tir ve tawk tawk chu niin... A hmela hlauhna lo lang chhuak chu thinglubula zawng dan chep ai pawhin akhawngaih thlak zawk hial awm e. Lâia chuan silai mu chu ahan thun a, ahan sawh muk sawk sawk mai a. Chutih lai a kah tur pa mangang leh hlau lutuk chuan zun acheh zawih zawih mai. Mahse chutiang mai mai Lâia chuan engatan mah a ngai ther lo. Muangchangin thinglera thu tawm chawih chawih chu a'n tin ta a. Chupa chu atap chhuak ta ruah ruah mai. Mahse, Lâia chuan arilru athlak leh ta tlat mai. Chuti taka mi che thei lo hlau han kah luih chu mipa tih turah a ngaih loh avangin amah chu koh thlaka leia sawisak hlum a tum ta zawk a. Lâia chuan "Lo chhuk rawh." ahan ti tuarh a. Mahse asawi chu a hrethiam tlat lo. Akut chuan a'n hui a, zaizir chuan leiah lo chhuk la insual ang a han ti a. Chutah a hrethiam ta, mahse amah chuan hetah lo chho la insual zawk ang, zaizir bawk chuan arawn ti ve tlat thung mai le... Pakhatin hui thlak atum a, pakhatin hui chhoh atum bawk a. Atawpah zawng "chuti nana chu i ngamna hmun apiangah ka ngam zawngchhepa" tih pahin Lâia chuan a silai chu dahin chem sei leh a chemtum nen chauh chuan a lawn chilh ta nge nge a.
Chutah zet zawng, chupa hmela lawmna leh beiseina rawn lang chhuak chu hmuh hmaih chi rual a ni lo. Lâia rawn lawn laite chuan posi alo la ziai ziai mai. Zawng aipawhin thing athiam ang e tih palh awl khawpa thing thiam ani tih chu a che vel atang chuan alang chiang hle mai. Ani Lâia lah dar leh awm a hliam tuar, thisen chhuak zawih zawih reng mai tan chuan huphurh awm tak a ni. Mahse, chupa chona hmachhawn ngam loh chu a duh bau mai si lo. Lâia chu a lawn chhuak ta. A chem sei zawk chu abeihpui tur pa lamah chuan atheh phei a. Ani chuan zei fahran mai hian alo dawng chat a, tichuan thinglerah chuan an inveh dun ta tham tham mai le!. Lâia chuan a'n vai nghek mai a, mahse a lo bum chiang ngei mai. Lâia tanhmun siam rem leh hma chuan arawn bawh ve ta thung a, mahse ani pawn asah nat tum luatah a vai thelh ve ta tho mai. Tanhmun an han siam rem dun leh te te a, Lâia bawk chu a che hmasaah atang leh ta, a'n vai leh vak mai a. A lo tawlhsawn leh hman tlat mai, Lâia chu a bu dawrh a, achem chu hum nghet hman tawh hek lo, athlauh ta tlat. Amah pawh inham tang hman lovin a vir thla nawk a. Mahse, vanneih thlak tak maiin ahnuai zarah chuan azu tla uai hnawp a. Chutah chuan a inham tang leh thei ta hram a.
A vai thelh pa pawh atawlhsawn nalamah chesual ta tlat mai, rinchhan atana ahman thingzar chu aro lo niin, a ri tuarh a ahnuai kham sang zet lamah chuan hreh zet maiin a vir thla ta nawk nawk a. Harsa takin Lâia chu lei achhuk thleng hram a. A chau lutuk chu leiah chuan a mu nghal tawp a. Rei vak lo a chawlh hahdam hnu chuan a chem tla chu chharin a insaseng ta a. Engmah inei puar lova let leh chu thil tih chi anih tawh loh avangin khawthim chian hmaa athui thei angber kal tum chuan a pen sauh sauh a. A awm chu a diar chuan a tuam a, thisen chhuak pawh aziawm phah deuh a. Khua athim chian chuan mi chul thlamah a lut ta a, vaimim char leh belte a tui awm chu inhnawhpuar nan ahmang a. Râl ram anih avangin mei nun ngam a ni si lova, chutah chuan ngawi rengin khua a nghak var ta a. Lei lung lan veleh Lâia chu akal leh ta vang vang a, an khua aia an hmelma khua a hnaih tawh zawk miau avangin an hmelma khaw lam chu apan ta zel a. Nau riltam hun awm velah chuan an hmelmate khaw dai chu athleng ta a. Chhun pachanga khaw luh ruk tum chu fel bera ahriat loh avangin daiah khuah chu a nghak thim ta a.
Khua athim chian veleh khuaah chuan a lut ta a. Fimkhur takin akal zel a, veng hmawr lam in lo awm hmasa ber chu a ngaichang ta ran a. Thawm a hriat meuh loh avang chuan a lut ta thut a. Pitar pakhat la alo kai mawlh mawlh chuan Lâia hmel hmuh leh "Râl..." tih chu arual nghal a. Mahse, a aurin hmain Lâia chuan akâ a hupsak nghal a. "Min hlau suh, chaw puar takin ka ei anga ka kal leh nghal dawn. Ka tina lovang che" a han ti a. Pitar hlau lutuk chu akhur nghal zawih zawih a. Lâia chuan pitar kâ chu zawi zawiin athlah dul hret hret a. "Au miah suh, au lo la i him a ni mai" a'n tih leh chuan pitar chu a bu nghauh a. Lâia chuan chawbel a zen rawk rawk a, hmanhmawh zet chuan a ei nghal ta sawk sawk a. A eikham chuan dawhthlenga bapui chhumsa chu asahmimah a thun nghal vek a, chutih lai chuan pitar chuan khawih hlauh em em Lâia che vel chu a lo thlir zak zak a. Lâia chu chhuah leh mai atum lai tak chuan pitar chuan "In khaw nula chhanchhuak leh tura lo kal i ni ngei ang maw vala?" ati ta reuh a. Lâia chu a ding chiang ngei mai. "In khaw lal man maw lo ni a? Tih ahan tum zet a, mahse a rilru chu thlakin "Aw ni ngei e. Khawiah nge an dah i hria tiraw?" a ti leh ta zawk a. Pitar chuan "Hre ve nang le!.. Naktukah pawih hoin an ramah an hawn dawn e an tih tak kha mawle." a ti leh ta zel a. Lâia chuan rum nghut pah hian "An hawn lo tawp ang. Ka lo kal thu hi i sawi chhuah vaih chuan ka rawn that hmasa ber ang che" a ti chhum nghut a. Tichuan a chhuahsan ta nghal a.
Lâia chhuak chu hmanhmawh takin veng thlang lam a panding nal nal a. Khawlaiah mi an awm vak loh avang leh athim em avangin a lo hmu chhunte pawhin khawmi emaw an ti ve mai zel a. Veng thlang in tawp ber a thlen chuan a'n ding dat a. In chu a thim thiap avangin an awm lo nge ni ang an mu tawh zawk aw!" tih ahan ngaihtuah vang vang a. Tichuan muang chang lovin meichher asiam a, asiam zawh chuan mi an lo hnaih leh hnaih loh a'n en kual leh vat vat phawt a, an lo hnai lova ahriat avang chuan mei chu ala kai ta nghal a. A alh tha ta maw tihah chuan in tawp ber atanga tanin in chung chu a'n hliau ta a. In hnih in thum vel a deh hnu chuan meichher chu in chungah a vawm kai ta nghal a. Tichuan hmanhmawh takin veng chung lam chu a pan chho ta hmawk hmawk a.
Hmun remchang laiah chuan a biru ta a, a bihruk atanga darkar chanve awm velah chuan "In a kang e!!!" tia mipui mangang au thawm chu a hre ta a. Veng mawng ber atanga in kang chuan a rawn man chho zel a, rei lo teah khaw mipui zawng zawng chu an phili buai ta vek mai a. Kang thelh tum te, mahni insaseng tum te chu an insulpel ta noh noh mai. Khua chu an phek buai ta luai luai mai a. Chu hun remchang chu chuhin Lâia chu abihrukna tang chuan arawn chhuak a, lal in lam chu a pan ding ta nalh a. A rin ang ngeiin lal in ah pawh chuan awma mumal pawh an lo awm lo reng a. Lal in a luh rual chuan tlangau pa lo awm chu a'n sat nghing lawih mai a. An lalpa rawn ding chhuak chu a silai kawm chuan alo chhu leh bur bawk a, lalnu leh lal fanu nula erawh chu tukverhah an zuang chhuak hman hlauh thung a. Lâia chuan kil khata hmeichhe pakhat an lo phuar beh chu a pan nghal a, an phuarna chu a zai chat hmawk a. Hmeichhia chuan "Laia," a lo ti a. Lâia chuan "Engmah sawi na hun a awm lo." tih pahin a kai chhuak nghal dawr dawr a. Upa Zathanga leh upa dang ho chu lal inah an thu thap mai a. Chhingi bo dan leh azawng tura chhuakte thil tawn chu hriatthiam har an ti tak zet a. Chhingi hmu bawk si lo, a zawngtute nunna pariat lai mai an chan nen, Lâia ruang an hmu zo lo leh zel nen an hmel hmuh pawh nuam lo tak a ni. Mahse, an khaw sial sehtu ber sakei pahnih ngawt mai an that thung a. Pawih râl sawmhnih chuang leh silai tamtak an man sak bawk a. An hlim viau rualin an lawm erawh akim tlat lo a ni.
Khua pawh a ngui phah ruai mai. Chhingi nu leh pate hlei hlei chu an khawngaih thlak a, an fanu vanga chuti zat zat an tlangvalte nunna an chan leh khawtlang an buai phah dan chu pawi an tiin zahthlak an ti em em a. Khaw hawi ngaihna pawh an hre meuh lo a ni. Lâia leh Chhingi te tlan chhuak chu thui tak an kal tawh a. Mahse, an khaw ram chin an thlen phawt loh chuan ngaihtha leh lung muanga kal chi erawh a ni hauh lo. Kal kawngah pawh inbe mang lovin an kal mawp mawp a. Nakinah chuan Chhingi chau lutuk chu a tlusawp ta nuaih mai a. Chutah chuan Lâia chuan a chawlhpui ta a. A bapui ah leh tuisik chu a eitir a. Mahse, ralkhat hla taka an lam pan a meichher chhi rawn inzui duah duah an hmuh meuh chuan Lâia hlauhthawn ang ngei ngei chuan an rawn umzui ani tih an hre ta a. Hmanhmawh takin an kal leh ta sawk sawk a. Theihtawp chhuahin kal ve bawk mah se hmeichhe tha nge nge chu a rei lo si a, an rawn hnai tual tual a, atawpah phei chuan Chhingi chu akal thei ta ngang lova. Lâia chuan apu ta nawlh a, tichuan chak takin akalpui ta hmawk hmawk a. Lâia chu chau tawh hle mah se atha neih zawng zawng sawm khawmin a pen hram hram a, an khaw ram chin pawh an hnaih ta kuar mai. Mahse, a umtu te lam pawhin an khaw ram chin ngei a umphak hman tumin an rawn hnaih ta ruak ruak mai. Lâia pawh a mangang ve takzet ta. An rawn hnaih chilh zel a, silai ah ngai bawk, meichher ken ngai bawk, Chhingi put ngai bawk, amah leh amah chu "Vala tang rawh, valnema tang rawh." a inti mawlh mawlh a. Chengrang a au leh ta...silai chu a puak ta thuai thuai mai le. Lâiate bul lawk lawka thing leh maute chu an rawn kap ther ta sawk sawk mai.
An ram chin an thleng tep. Silai chu a puak zawt zawt a mah se Lâiate chu an la him hram hram zel. Atha tawp tak meuh a'n chhuah leh a. Mahse, silai puak ri leh thuaiah chuan Lâia chu paih ang thlawrh hian a tlu nghal a. A meichher ken leh Chhingi chu a thlauh nghal hnawk bawk a. Chhingi chu ahan bia a, mahse nikhaw hre loin a lo awm leh zel si. Lâia malpui hnung lam atanga silaimu lut chu amalpui hma lamah atlang a. Lâia chu a theihtawpa ringin a han au vak a, ha chang thial rawp rawpin arawn ding chhuak leh a. Chhingi chu apu leh nawlh a, meichher chhar pah chuan a kal leh ta a. Amalpui atanga thisen chhuak nguai nguai pawh chu pawisa duh lovin atha neih zawng zawng chu a'n sawm khawm nawn leh a. Au ruai ruai chungin a tlan ta hlawk hlawk a. Tichuan a tawpa tawpah zawng an khaw ram nena a inthenna luite chu an thleng ta rawih a.
Luiah chuan a meichher chu a chiah hlum nghal vat a, an khaw ram chin chu a hriat chian tawh em avangin thim thamah pawh abuai dawn lo tih ahre chiang em a ni. Khua avar meuh chuan a umtu te pawh beidawnga hawn leh mai loh chu tih theih dang nei hek lo. Lâiate pahnih pawh bapui thial pawng talh talh chungin an innuih var var a. An khaw lan theihna tlang atang chuan Chhingi chuan lawmna mittui nen an khua chu a thlir vawng vawng a......... A tawp ta e.....
Ka kutchhuak tlawm tak min hlutsak thintute zawng zawng chungah thinlung takin lawmthu ka sawi e.....
@Dwm Pachuau
Post a Comment