(Kum tam liam tawh mah nise kha thilthleng chanchin kha dahthat hrim hrim ka duh avangin ziakin ka dah a, REOPRT a thui tham deuh a..Chhiar peih te tan..)
 |
| Representational Image |
Kum 2006 vel kha ni tain ka hria, Cachar phai leh Mizoram inrina, Cachar ramchhunga an Sai chhawr chuan a pu a phin hrep mai a, thilo aruangin damdawiinah an dah lut a. He Sai hian pawi a khawih takah chuan a thlunna chain tal chatin ramhnuaiah a tlanbo ta a ni. He Sai hel hi a pa a ni a, an sawi dan chuan Sai pa te hian a nu mamawh zual lai an nei a, chutiang huna an mamawh an hmuh loh chuan an hel thin niin an sawi a, a nu, a kawppui tur awm se a lungawi leh theih mai beiseiin a awmna hnaivai ramhnuaiah chuan a nu an chhuah ve ta a, an inhmu thuai a, mahse a pa zawk hian a nu chu a kaihruai ta hlauh si a ni. A pa zawkin a tih ang apiang chu a ti ve ta zel a, a pa in mihraing chenna In a thiah chuan a thiah pui mai a, pawi an khawih dawn reng rengin a pa zawk chuan a khawih hmasa thin a, chutah a nu hi a che zui ve ta chauh thin niin an sawi.
Cachar phaizawl leilet enkawltu tamberte khuan leilet phaizawl fur tuilianin a chim phak loh hmunrem laiah daprap In pahih pathum te neiin an hnathawhna leilet an chenchilh mai thin a, chutiang chuan khua tih tham meuh siloh-in inhlat tak takin phai leilet hmuah an cheng thin. Heng Sai kawlh pahnih te hian chung mihring chenna In te chu phin darhin an buh te an ei sak a, tarchaklo insaseng hmanlo te phei chu an chil hlum bawk a, mipui an ralkhel a, chung sai kawlh te chu hnawh bo tumin a then phei chuan tualchher silai te pawhin an kap bawk. Chutianga mihringin an beih tak zel bawk si avang te chuan an kawlh tawlh tawlh mai a, mihring an hmuh apiang an bei a, chutiang chuan Mizoram dep Cachar leilet phaiah khuan ni 7 chhung vel Saikawlh hi an vak kual a, mihring sawm vel bawr nunna an la hman niin an sawi.
MIZORAM AN RAWN LUT TA:
Sai kawlh pahnih chu hlauin Mizoram lamah hnamdang nunau tamtak an rawn tlan lut a, Saihapui V leh Phainuam velah mi tamtak an rawn tlan chhia a ni. Cachar phai humchhungah pawi tamtak an khawih hnuin heng sai kawlh te hian Mizoram an rawn hnaih ta hle mai a..Mipui an chi ai a, vantlang mike-in saikawlhin an khua a rawn hnaih thu leh mipui awmdan turte an puang a, chu Saikawlh chuan Mihring awmna an zawnga an pan ruak ruak zel mai bawk si..Cachar ramri depa awm Saihapui V an rawn thleng hnai ta hle mai. Chungtin te chu himna zawngin an phili buai hle mai a, tlai nitlak hnu unauhmelhai velah Mizoram chhung an rawn lut ta!..Henglai ram hi leilet phaizawl zau pui pui awmna a ni a, tlakdeng lam chu tlangram a ni thunga. Saihapui tlangval pakhat chuan hmanhmawh takin khawchhung lam a pan mek a, a hlauh ang ngeiin sai kawlh chuan a rawn hmufuh ta hlauh mai! Theihtawp chhuahin a tlan a, saikawlh lah chuan a rawn hnaih hle tawh mai si. Khua athim chhulh tawh a, kawngsir hnimbuk hnuaiah chuan a bawk lut tlawp a, a kawng chin chunglam taksa chu tlangsam buk hnuaiah pilbo mahse a kawngchin hnuailam chu kawng atang chuan alang chiang hle. Mahse a che ngam tawh lo! Saikawlh chu a rawn thleng phei chawpchilh a ni nghal mai. Chutih mek laichuan an awmna lam panin vai putar pakhat bengngawng henglai vela chetla thang em em chu hmanhmawh takin a rawn phei ve mek bawk a, chupa lam ngaihven chuan saikawlh chu a insaseng ta a ni. Putar hian sikul tualzawl zau lai a rawn thleng phei mek tihah chuan saikawlh nen chuan an intawng ta! Putar chu rang takin a theh thal a a chil zui a, a pherh chhe hneh khawp mai!
MIZO PASALTHA NEN AN INTAWNG:
Pasaltha pakhat chuan Saihapui luhchhohna kawngpui sira vantlang zuninah lo changin mipui venhim tumin awmhmun a lo khuar a, sai kawlh chu a rawn thleng hnai ta hle mai..zunin cement bang phenah chuan silai kau sa nen chuan pasaltha chuan a lo chang a. He sai kawlh hi a fingin a fimkhur thiam hle mai!..beng ti parhin a nawn a ti kanga, ngawirengin chaktak si hian khawchhung lam chu a rawn pana, pasalthain a beisei aiin a rawn thleng hma tlat mai! Sai kawlhin zunin awmna a rawn thlenga hmun leh hmunah a silai cheng chu a han hmet pera, a puak ta tlat lo mai le!..Sai kawlh lah chu thil chezeuh apiang pan nghal ruak ruak a ni bawk a, chupa chu a nawn sei leh chak tak mai chuan a nawr leng nghal lawp a. Zunin thlang mai chu mi huan leilet buhchinna atana an hman a ni a, tui tamlai a nih vangin a dum thuk ngang mai. Pasaltha chu buhhmun dumah chuan a tlulut a, sai chuan a rawn bawhzui bawk. Buh hmun dum a chhah avangin sai pawh a che hleithei bik lo. A rih em avangin dumah chuan a duh aiin a ke kha a tlum thuk ta thin ni ngei tur hi a ni a, a talbuai ve hle mai a ni. A bawksawp a, a tho a, a tan nasat poh leh dumah chuan a ke a pil thuk ting a ni mai si. Pasaltha chu Sai ke hma leh a nawn inkarah bawkkhup zawngin a awm a, buh hmun dum-a sai talbuai chu a inthiar fihlim san thei ta hram a ni. Sai kawlh chuan pasaltha ngal sirah khap chenvel zet vunpui chat khawpin a lo pirthler hmana, hliam natak tuar chungin khawchhung lamah sahimna zawngin a chho ve ta a ni. (He Mizo Pasaltha huaisen hi tunge a hming ka hre mai ta lo a pawi ka ti khawp mai)
Saihapui V hi mual awihtlana khaw awm a ni a, in tam zawk hi di In a bang dap an ni hlawma In tha pawl pawh thing In pangngai a chung rangva te an ni hlawm. Mualdungah chuan kawngpui a chho a, a sirtuakah In a tlar chho a, khaw hmun rem leh nuam tak a ni. Sai kawlh pawh chu dum atanga rawn chhuakin khawdung chu a rawn fang chho ta ngoh ngoh mai a ni. Mihring awmna a zawnga a nawn ti kangin a len vel ruai ruai a, chu kawtthler kawngpuian-a in pakhat chu chhawng khat a ni a, a chhawng hnuai kawng-an chu dawr angreng atana hmangin achung lam chu riah nan an hmanga, chu thing In chhawngchhung inchhungah chuan nunau leh thenawm ho an tawm khawm thap mai a ni. Saikawlh chuan an awmna zawn a rawn thleng chho ta! Khuhchhuak pawh khuh phal a nilo. Naupang thlengin hlauh vanga tahrik awih a nilo hrim hrim bawk. Dik tak chuan thawk pawh an thaw tha ngam lo a ni ber mai! Saikawlh lah chuan chulai hnaivaiah chuan mihring an awm tih a hrethiam ni ngei tur a ni. Chak tak taka tlan thuak thuak thin kha a dinga, a hnar a lenkual a, tawmkhawmna lehlam chiah kawt zawlah te chuan a hniak a pherh veng vung mai a ni. Tuman thawm an nei ngam lova, a huaisen deuhin bangawng atangin an bih ngam tawk a ni..Engemaw chen chulai hmuna a awm hnu chuan veng lulam panin a chho leh ta nghoh nghoh a...kawng kama ar inah chuan ar engemaw zat an lo awm a, saikawlh rawn kal te hrethiam ve heklo le thawm an lo neih zeuh ni ngei tur hi a ni a, sai chuan ar in chu hnehtak mai hian a phin darh nghal a. Veng lu lam a pan chho zel a, chutih lai chuan tlangval pakhat hian sai rawn hnaih leh hnaih loh a lo thlithai mek a, thil ri khut a hriatna lam a han en chuan Saikawlh chuan a awmna piah lawk chu arawn thleng hman der mai. Hmanhmawh taka a tlan chhe tur chu electric ban pawhnghehna thirzai a pala a tlu bawk khup thlawrha. Sai kawlhin a thawm a rawn hria a, rang takin a rawn pan nghal vut a..chu tlangval chu thingkungah a lawn hman hram. Sai rawn thlen chhoh hma hian thingkung bula lei chhuat ring In pakhatah chuan kawtchhuaha lo changtu pasaltha kha hliamtuar chungin a lut a, a hliam kak chhunga chirh dum lut te chu a kuta kawm faiin chu inchhungah chuan rei pawh a awm hman bik lo. A hliam atanga thi chhuak te chu inchhung chhuatah chuan a far thluah hlawma. Sai nena an inbeihna lamah a silai lah chu a thlauh bo tawh bawk si. A sahimna zawngin thingkungah chuan a lawn ve ta ngawt mai a ni. Tlangval insaseng tur tlu thawm hria a vir vut vut hnu chuan chu inchhunga thisen thang rim chu a hria ni ngei tur a ni. Inbang chu thiatin in chhungah chuan a lut ta a, tutthleng leh bungraw engemaw zat a ti chhia a, a duhber mihring a hmuh tak si lohah chuan in chu a chhuahsan ve leh ta mai a. Thingkunga mihring lawn khan a rilru a luah leh ta zawk a ni nei ang. Thingkung chu a lian thama sai tan pawh nawrtluk zawh rual a ni bik lo. Thing hnuaiah chuan a vei ruai ruai a, a kalsawn tha duh mang tlat lo.
Khaw lu lama in tawp ber chu kawtzawl zau angreng tak nei hi a ni a, a chhuat thingphel, a bang dap, a chung rangva hi a ni a, in chhuat chu kawtzawl atanga feet 4 vela sang a ni. In sei angreng tak a ni. An chhungkua bakah thenawm engemaw zat chu inah chuan an tawm khawm a, sai chu a rawn thleng ve ta!..inchhungah mi an awm tih a hria ningei tur a ni..inchhung luh tumin sai chuan kailawn a han rapa, thingzaia siam kailawn chu a vawi khat rahah a chim sawm nghal vek a. Bathlar varanda thingzai chhuat chu a thiat ta a ni. Inchhung lama awm te chu inchhung kawmchar lam hnaihah an tawm khawm a, a ngaihna a awm ngang dawn lo a nih chuan kawmchar lama zuanthlaka huan lama mahni shimna zawnga tlan darh chu an tihtur awmchhun a ni mai!..In dung sei tak a nih avangin mihring awmna lai tak chu sai chuan a hre mai thei bik lova chulai hmun atang chuan a insaseng ve leh ta a ni. Hetianga a chet lai hian sai nu zawk hian khawpawnah a nghak a ni maithei a, Sai Nu hian Saihapui V khawchhung hi a rawn lut ve lo niin a lang.
Saihapui V atanga a chhuak chu an sulhnu atangin a nu nen an inhmu thuai tih a hriat theih a, kawngpui dungah kalin Phainuam lam an pan dun zel a. Sai hian kawr te lei hi an zawh duh ngai mang lo a, lei sirah tui an daikai mai thin niin an sawi. Saihapui atanga Phainuam an panna kawngah hian kawrte a awma cement a siam lei tha angreng tak lian vaklo hi a in dawh a. A nu zawk hi chuan lei sirah tui a daikai mai niin a langa a pa zawk erawh thinrimnaa a khah tlat vangin a ngaihtuahna a pangngai zan tawhlo te pawh a ni mah na, cement a siam lei chu a zawhtlang ngei tih an sulhnu atang chuan a rin hriat theih bawk. Heng sai kawlh te hi Mizoram leh Cachar inrina vela cheng Mizo te tibuai tur hrim hrima hnamdangin damdawi hmanga an chiu at a nih ring an tam hle a, chutiang ngaihdan leh ti ti chu a darh nasa hle bawk. Chutianga kawrte lui chunga lei a zawh ve duh tlat avang te chuan he sai hi damdawia chiau at ngei nia an rinna pawh a nasat phah lehzual hle mai a ni.
SAI CHUAN PHAINUAM AN THLENG PHEI TA:
Saihapui V leh Phainuam hi khaw inhlat lo te an ni a, Phainuam hi a lian zawk a inlehlo pawh tlem chuan a tha ve deuh. Cachar phai atanga tlanchhia te pawh he khuaah hian tamtak an tlanlut hlawm a, Biakin leh sikulah te an tawm khawm hlawm a. Inchhung tih en ngam a ni lova, mei de zeuh pawh hmuhtur a awm lo. Khawchhungah chuan mihring an awm lo emni tih mai turin a reh thuap mai a, hlauhna hmunah tak tak chuan naupang takngial pawh tap ri ngam an awm reng reng lo, Christian biakin chhungah chuan ringtu leh ringlo mi ten rilru hmunkhat puiin thinlungin Pathian an au hlawm a ni. Phainuam khaw hmar chhak lam atangin Sai pa kawlh chuan khawchhung a rawn lut a, khaw daido a, in pakhat kawta tlangban thing ban leh dish TV antenna ban te chu a rawn kalpah a..khawchhungah chuan thawm dim thiam takin a limlut ta thuak thuak mai a ni. Nunau tawmkhawmna Biakin tlang kal pelin kawnah a tlang thla nghal a, hetah tak hian Phainuam tlangval ho huaisen zia leh remhriat zia a lo lang ta a ni.
Saihapui V ang tho khan Sai pa zawkin Phainuam khawchhung a rawn luh hian a nu zawk hi khawdai leilet phaiah a awm thung niin alang. Khawchhung a rawn lut ve tlat lo. Saikawlhin Mizoram lam an rawn pan thu an hriat hlim khan Vairengte Police lam te phone-a biain mipui thlabar mangan dan leh tanpui an ngaih thu te an lo han thlen tawh a, an ni an rawn thlen hma a, mipui tawmkhawmna Sikul leh Biakin te Sai kawlhin a phindarh mai chuan mihring an inchan hnem lutuk dawn tih a chiang reng mai. Tlangval huaisen te chuan Sai kawlh chu an lo chhaih penga, a rilru lak pen tumin theihtawp an lo chhuah ve ta a ni.
An khawchhung pengthuam lunlai kawngsirah chuan cement concrete-a siam tuizem hi a awm a, kawng lam dep tuizem bang chu feet 8 dawn laia sang hi a ni ve a, tuizem chung lam chu mual zawl nen chuan a inzawl thunga. Chu tuizem chung atang chuan Sai kawlh lo kal chu tlangval ho chuan brick bung leh lungtum nen theih ang angin an lo hmachhawn ve ta a ni. Sai lah chu a'n thinrim em em khawp a, tuizem chunga han lawna han phin darh vel chu a chak hle ni ngei tur hi a ni a, amah lianin a nawn te chu sei fu mahse tuizem chunga tlangval ho chu a han khawih phak si lo. Tuizem bang sir lei ko chinah chuan lawn a han tum ve ngial thina, a tawlh thla leh thin. A thinrim inhrosa chuan kopang te chu a nawn chaktak chuan a nawr khawk tawp tawp a, mahse a a mual awmdan a hrethiam thuai a, tlangval ho awmna thleng tur chuan a helna a awm tih a hrethiam vat mai a ni. Mualdung leh tuizem chung chu a inzawl tih a man thiam thuai a, phur takin mualdung atang chuan tuizem chung chu a pan ta a ni. Tuizem chung thlen hmaah chuan huanpal a awma Sai kawlh chuan a kalpah hmiah a. Tuizemchung a rawn thleng hnai ta tihah tlangval ho chuan an zuanthlak san leh vek si. Tlangval ho zuanthlakna-a han zuan thlak ve ngawt lah a tan a tihchi si loh!..hmanhmawh takin a rawn hel luhna lamah a let leh tuang tuang a, chutiang reng reng chuan mipui awmna lam sai kawlhin a thlen mai loh nan theihtawp an lo chhuah ve hlawm a ni.
Sai te hi an hriatna a lo tha em em mai a. Chaktak taka kal chungin an beng an ti parha thawm ri an ngaithla a, thli awmdan atangin mihring rim hriat an tum niawm tak a ni..an nawn an ti kang vu vu mai a..thawm awmna an bawh ruak ruak zel mai a ni. In an thiat a, buzem an ti chhia a, an fairelbel thlengin an phin darh leu zel mai a ni.
Tlang mual nuam tak mai chung zawlah biakin a ding a, biakin hnung thlang lam chu kawngpui a ni mai a, kawngpui kopang hi feet 20 vel zeta sang chu a nih hmel..biakinah hian Cachar phai atanga rawn tlanchhia nunau tam tak an awm tel ve a, chutah chuan mi an awm a ni tih an thawm leh rim atangin a hria ni ngei tur a ni Sai kawlh chuan biakin lam chu a pan ta ngut ngut mai a!..Biakin bang chu brick rem a ni a, la plaster loh a ni. A tukverh te chu thingphela siam a ni hlauh mai a, mahse sai tan chuan engthammah a ni chuang lo..Biakin tual a rawn thleng ta! chhung lamah hlau leh khur chungin thinlungin Pathian an au a, Sai kawlh chuan a nawn sei tak mai chu ventilation-ah te chuan a rawlh lut a, a hram tuarh tuarh bawk a..Biakin chhunga awm te chu an thla a bar takzet ani! Nupui fanau te thlabara kuah ngawt mai chu an him phah dawn lo tih hriain pa thenkhat chuan thihngam lupuin biakin tukverh atangin pawnah an chhuaka an nupui fanau te him nan saikawlh chu hruaikawi an tum leh ta. Pa pakhat chuan biakin hmalam atangin sai kawlh chu rawn phei turah a ngai a, a rin loh lamah sai chu a lo awm si. A hnung lam a hawi chiah chu sai chuan a rawn ban phak hman teuh lutuk! Biakin hnung kopangah chuan a zuangthla ta ngawt a. Saikawlh pawh a inngaihtuah fim hman bik lo aniang feet sawmhnih vela sang kopang awih ah chuan a bawk liam ve ta mai a..Hemi zana Saihapui leh Phainuam ho buai dan kha chu an kumkhaw sawi chu a tling ve chiang ngawt ang.
VAIRENGTE ATANGIN KAN HNAM SIPAITE AN RAWN THLENG TA:
Mi mangang te thlamuan tur leh heng Sai kawlh te hmachhawn tur hian Vairengte atangin MAP leh IR te an silai tha ber ber nen, a mu thun khat tentawnin Phainuam an rawn thleng thla ta.
Sai pa zawk khaw chhunga a chet kual viau hnu chuan a nu awmna zawngin khaw dai leilet phai lam a pana chutah chuan kan hnam sipai huaisen te chuan an zuk kap hlum a, a nu pawh chuan a pa awmna lam khawchhung a rawn pan mek laiin an lo kap hlum ve leh ta bawk a ni. Heng sai ruang te hi mipuiin an chandarh mai loh nan IR leh MAP te hian engemaw chen chu an veng a, chutih lai chuan Saikawlh dangin Mizoram an rawn pan leh tawh tih thuthang a awm ta a, Sai ruang venga din reng theih ni ta hek lo le. Chung saikawlh Mizoram rawn pan mek te lo hmachhawn tur chuan Cachar nena kan inrina lam panin an liam leh ta a, an liam chiah tihin heng sai ruang te hi mipuiin kar loah an chandarh ta a ni.
Cachar ram chhungah ni 7 vel heng sai kawlh te hi an sapa tal a, in leh lo leh mihring nuna tamtak an chan hman bawk a, Mizoram chhung an rawn luh hian tlai thim dawnah an rawn luta zinglam dar khat velah kahhlum nghal an ni..Mizo nih hi a nuamin a thlamuan thlak bik teh asin!..
Mizoram chhung an rawn luh atanga darkar 6 chhung velah kan sipai huaisen ten mipui chhan nana Sai kawlh pahnih an lo hmachhawn dan te, an lo kahhlum tak dan te an han hriat chuan Cachar leilet phaizawla cheng hnamdang unau te chu an Sate sorkar thuneitute lakah an lungawi thei lo..an sorkarin a mipuite a ngaihsak tawk loh zia te an ngaihtuah a, chutih rualin Mizoramah mipui thlabar ngaihsaka venghimtu police te chet ran si zia te an hriatin an lung a awi thei mawlh lo a ni..Ni 7 chhung vel zet chhantu neilovin an awm a, an inlehlo leh buh leh bal tamtak an chan bakah nunna tamtak an chan hman a ni si a..mipui thinrim pungkhawm chuan lei te tichhia in an Forest RO quarter leh office te an hal hial reng a ni.
KUM TAMTAK HNATHAWKA AN CHHAWR TAWH NISI ENGVANGIN NGE SAI KHAN A PU KHA A KHAWIH NAT TAK MAI LE..
Hei hi zawhna liantak chhuizui ngei chi a ni. Pa pakhat chuan Sai khelbawr ti hlawm liantak a chang a, chang fuh pawh a inti khawp mai..hlim takin inah a hawna, a nupui fanau te nen a then an ei anga a then a repin an hralh bawk ang...phur takin a chan darh vel a..a sahrang chanah chuan thil mak leh tenawm angreng tak a hmu chhuak ta tlat mai a ni. Pan hnai ti trektruak patling kutum tiat vel tur bawk hi Sai khel bawr ti hlawm tha laiah chuan alo awm tlat mai..chumai a nilo inchiuna hriau lian tak perek inchese hnih tiat vel tur hi a awm tel bawk a, chu hriau kawrawng chhung chu pan hnai khal chuan a hnawh ping vek tawh a. Chu a sahrang chana a thil hmuhchhuah chu min hmuh duhin report siama kan vak vel chu min rawng zawng kual a, in pakhatah kan inhmu ta a ni. A ni chuan vai ho hian Mizoram min tibuai turin heng sai te hi damdawiin an chiau a ngei ni a a hriat thu uar takin a sawi a. Nia, Sai kawlh rawn luh chungchanga ti ti lengvel pakhat chu Cachar phai vai ho hian ramri-a mizo te min hnawh darh nan sai te hi damdawiin an hrai rui a, chung sai rui thinrim chu Mizoramah an rawn chhuah thin niin an sawi a chu thawm chuan chulai vel boruak chu a chiah hneh khawp mai tih kan sawi lan tawh kha.
Nguntakin thil kan ngaihtuah a ngai a, kan finfiah loh thil rindan tamtak hian vantlang rilru a hruai sual thei em em a ni.
Sai puitling te hi cheng nuai nga man lai te an tling thin niin an sawi a, a neitu te hian sum tam tak tak lakluh nan an hmang a, an tan an hlu em em a, an thih chuan uiawm tham an tling. Hriau chu ka han en chianga a kawrawng chhung chu hnai khal hian a khat tlat a, sai khel pan chhungah reitak a inphum tawh tih a rin theih. Heng sai te hi a neitu ten tangkai taka an hman te an ni a, an mamawh vaccine te pawh regular takin an pe thin turah ngai ta ila..ti hian ka ngaihtuah ta a ni....
Sai neitute hian vaccine pe tur hian vety field staff emaw an ruai anga, sai chu ran lian tak a nih avangin damdawi pawh tamtham tak kah luh a ngai dawn a, a hriau pawh a len a ngai reng a ni. Sai pu chuan a sai chu a bawh hniam tir a nga, Vety field staff hian a tih fo thin dan angin sai khelah chuan a jectionna hriau chu a chum tlum pawp anga, Sai nati chu a ding phut anga, hriau chu syringe-a a in vuahna bulah a bung hmawk anga chu a hriau bung chu hling angin a khelah chuan a pai zui ta a ni ngei ang..Vety field staff pa lah chuan hlauthawng ru tak siin a tihsual chu a zep bo ta a, Sai lah chuan mihring tawng a thiam ve tawh si lo..Hriau liantak pai chungin a pu chuan a hna ngai a thawh tir renga, na nei chungin hreawm ti takin a thawk ve zel a..a na chu a zual zela chhung lamah hnai a la a, a pu lah chuan a hriat pui loh a vangin a vin fo reng mai bawk si..enkawl loh na na na chu a na tawrh lah chuan zual lam a pan zel a, a khel chung mawngtam pheng lai a nih avangin a ke a bai phah lo na a, teak thing hnuka a han tan zawng te chuan a tur na ngut ngut thin anga, a pu lah chuan a ngaihsak ngai der bawk si lo..a pu a ngainat em em kum tamtak akawi angila a thu a lo zawm thin chu a tan ninawm a chang a, a ngei ve ta hle mai a ni. Na tuar reng a nih avang chuan a lung a awi thei lova a pu chu kut a thlak ta hial mai. Chutia pawi a khawih takah chuan tlanbo daih a duh a, a chain chu tal chatin ramhnuai lamah a inthiar fihlim ta a nih hmel..
Chutia ramhnuaia a inthiarfihlim ta chu a pu te chuan bialnu a mamawh a nih ringin a kawppui tur a awmna hnaivaiah an va chhuah a, rang takin chunu nen chuan an inhmua an inzui ta zel a. Mi te chuan a pu sawisa tu a nih avangin an hlau hle a, an kalna lam apiangah chhepchher nen an lo hnawt a, a then phei chuan silai ten an lo kap bawk a. Mihring reng reng chu an hmelma en ta mai niin a lang..Heng Sai kawlh te hi chhaih kawlhin an awm a, an sual vang nilovin an vanduai vang liau liau a ni a, an mahni avanga inlehlo leh nuna chan te ka tuarpui em em rualin heng sai te hi ka lainat ta em em mai a ni...A TAWP TA.
Post a Comment