Briefly written by Rohmingliana Jahau
Pathianin he khawvel hi a siam a ni tih kan pawm a, khawvel tawp dan tur Pathianin a lo sawi pawh hi kan pawm a tul bawk a ni. Khawvel tawp dan tur chungchangah hian Pathian hi a ngawi ral mai mai lova, chiang leh fiah takin Bible-ah min lo ziahchhuah sak a ni. A hun leh a ni erawh kan riat a phal lo, amaherawh chu a lo kal a hnai tawh a ni tih erawh chu kan hrait loh a phal lova, kan hai lohnan, chutiang khatiang chu a lo thlen hunah tiin chhinchhiahna erawh chu chiang leh fiah takin Bible-ah min lo ziah sak a ni.
12 th Sept 1960 -a USA Presidential candidate John F Kennedy-an campaign-naah, Catholic rinna pawm tu chuan thiam takin, "...These are the real issues which should decide this campaign. And they are not religious issues — for war and hunger and ignorance and despair know no religious barriers. But because I am a Catholic, and no Catholic has ever been elected president, the real issues in this campaign have been obscured — perhaps deliberately, in some quarters less responsible than this. ..." tiin a insawifiahna chu pawmin thlan tlin a ni. Catholic duh lo pem khawmin ram an va siam leh an ram constitution in Catholic kohhran mi tan hmun a awm lohna ram ni si kha, "pope nen inkutsuih lehin hun hnuhnungah chuan pope a chawimawi dawn," tia an lo thlangau pui lai kha chuan awih a har hle ngei ang Pathian thu a nih hi chuan a thleng dik zel a ni tih kan mit ngeiin 23rd Sept 2015-ah leh "Isua lo kal leh tur hi a rin ngam em," tih thu ziah tawi chhiarte chuan chianna fumfe tak kan hre thei ang. Daniela leh Johana ten an lo sawina eng atanga rawngbawltu hmasa mualliam tawh ten USA-in pope a la chawimawi tur thu huai takin an lo sawi thin kha, thleng dik tura hmalakna hmasa pawimawh tak chu a thleng der tawh a, tunah chuan chu lo thleng tur anga lo thlir thin chu thawnthu (history) a ni ta. Tunah chuan pope leh USA inthian thatna rah lo lang tur chiah kan nghak ta a ni ber e. Hun bi nei hrilhlawkna rei ber Dan 8:14-a kan hmuh ni 2300 bak hun bi nei hrilhlawkna dang Bible-ah kan hmu tawh si lova, tawpna hun chungchang vek a ni tawp tawh mai a ni.
Tumkhat chu, Isua leh a zirtirte chu Solomona sak temple-ah chuan an ding ho va. Sala an tan lai zawng zawng pawh a, chu temple lam hawia an tawngtai thin, an chhuan em em chu Isuan Luk 21:6 "Heng in thil hmuh hi, tihchim loh va lung intiang reng reng hetah a awm lo vang; chutiang ni chu a lo thleng ang," a ti a. 7"Zirtirtu, chung chu eng tikah nge a lo awm ang le? Chung chu a lo thlen dawn hunah chhinchhiahna eng nge awm ang? tiin an zawt a." Khawvel a tawp te a nih ngawt loh chuan chu temple chu chhe thei a an rin loh avangin biakin chhiat hun tur leh Isua lo kal hun tur chu ngaih pawlhin an zawt kawp ta a ni ber a. 8 Isuan, "An tihder loh nan che u fimkhur rawh u,. Mi tam tak, 'Krista chu ka ni,' 'A hun a thleng dawn ta e,' tiin keima hming chhalin an lo kal ang; chu mite chu zui suh u. 9Tin, indo thu leh buai thu in hriat hunin hlau suh ang che u; chung chu a thleng hmasa tur reng a ni, tawpna erawh chu a thleng nghal rih lo vang," tiin an zawhna ang chiahin a chhang kawp ta a ni.
Dan 12:4 Mahse, nang aw Daniel, thu chu thup la, lehkhabu chu char tlat rawh, tawpna hun thlengin; mi tam tak an tlan vel ang a, hraitnate a pung dawn a ni," a ti a. Amo 9:2 Mitthi khaw thlengin lai tlang mah sela, chuta ta chu ka kutin ka la chhuak ang; vanah lawn mah sela, chuta ta chu ka hnuk thla ang. Tunah hian khawvel mifing (scientist) kan tih zawng zawngte, khawvel pian tirh atang a belhkhawmin, scientist thi tawh hi 20% vel chauh an ni ang tiin, tuna kan khawvel hman mek hi chung scientist 80% vel la dam te finna in kan khawvel hmasawnna hi thuam mek a ni a, kan kal chak hle mek a ni. Thu 5:9 Tin, "Nang, lehkhabu chu laa, A chhinchhiahnate phelh tlak i ni e; talhin i awm tawh a, chi tina mi te, hnam tina mi te, Pathian tan i thisenin i lei a, ..." tiin Thupuan ziah a nih hun meuh chuan lehkhabu char tlat chu phelh a nih tawh thu kan hmu a ni.
Kum 10 kal ta, kum 20 kal ta te han ngaihtuah chuan kan lo changkang tawh zia hi a mak lutuk a ni ringawt mai a ni. Chung zawng zawng a lo thlen hunah, tawpna chu a lo thleng ang tihah hian Chanchin Tha hril hi kan hmaih thei lo a ni. Tir 2:17 'Pathianin, Ni hnuhnungahte chuan heti hi a ni ang a, Mi zawng zawng chungah ka Thlarau ka leih ang a; Tichuan, in fapate, in fanuten ka thu an hril ang a; In tlangvalten inlarnate an hmu ang a, In putarten mumangah an mang ang a. 18A ni, chung niahte chuan ka bawihpate, ka bawihnute chungah pawh, Ka Thlarau ka leih ang a, ka thu an hril ang. Hmeichhe Chanchin Tha hril kan tam ta hle bawk.
Isua zirtirten chawfak hun a nih tawh avangin ei tur zawngin an kal a, an lo let leh chuan Isuan, Juda mi ni lo hmeichhia a lo bia an hmuh chuan mak an ti hle a. Ei tur an ken chu ei turin Isua an pek chuan Joh 4:32 "Chaw in hriat loh ei tur ka nei e," a ti a. 25 Tin, hmeichhia chuan a hnenah, "Messia, Krista an tih chu a lo kal dawn tih ka hria, ani chu a lo kal hunah engkim min la hrilh ang," a ti a. 26Tin, Isuan a hnenah, "Keimah a betu che hi amah chu ka ni asin," tiin Chanchin Tha an lo inhrilh a. Isuan, 34"Mi tirtu duh zawng tih leh a hna thawh zawh tur hi ka chaw a ni." tiin Chanchin Tha hril hi Isua chaw tui ber a ni. Isua chu Galilee atangin Jerusalem Biakin-ah, mikhual niin a kal a, inthawina a hman tur ran te pawh kha sum zawnnan lo hmangin leh sum zawnnan a biakin hmangtute zawng zawng chu 'ka pa in chu tawngtaina in a ni tur a ni' tiin a hnawt darh ta vek mai a, Isua chu an haw em em mai a ni. A thil tih apiangah harsatna siam tumin mi fel tak chu an vil ta reng a nih kha! An zinga pakhat dan thu hre hneh em em leh zirtirtu Nikodema avangin puithiamte kha an duh angin an che thei lo mai chauh zawk a ni. Isua zirtirna leh chanchinte an ngaihthlakin Nikodema chuan la thalai tak Isua chu kawm a chak ta tlat mai a, Nikodema leh Lal Isua inbiakna atangin kum upatnate, kohhran hruaitu nihnate leh rawngbawltu nih ringawtnate hian Pathian ram min hruai thleng dawn lo a ni tih a chiang hle a ni. Nikodema kha kum upa tawh tak, mi zahawm tak a ni a, a fa rual lek Isua a va biak khan, Isuan a pian thar loh chuan vanram a kai loh tur thu a lo hrilh dawt mai a, Nikodema inngaihtlawmna leh insum theihna bakah Pathian thu anga nun a thlak thei kha a entawntlak hle a ni.
Thlemna kan tawh reng reng hian Pathianin ramri a lo kham vek mai a, tlan chhuahna min lo siam sak ziah hi a lo ni a, kan tawrh theih chin bak thlemna kan chunga a thlen hi a lo phal reng reng lo hi a lo a ni. Joba chunga thlemna kha Pathian phal vang chauh a ni tih Pathian thu in min hrilh a ni. Chuvangin, thlemna kan tawh changa kan tluk hian Pathian kan mawh chhiat thei reng reng lo a ni. Vawi tam tak i tlu tur ka chelh che a, thinlung inchhirin vawi tam tak mi au va, tanpui ka tum thin che a, i duh lo va, i sum leh hun tha zawng zawng i hmang ral tawh a, tunah manganna vawrtawpah i lo dang ta a, sum leh pai i nei tawh lova, hun tha pawh i khawhral tawh vek tawh a, i hrisel tawh bawk lo, hmangaihtu thenrual tha pawh i nei tawh lo, i mangan hnuah ngatinge min rawn koh leh tiin Pathianin vawikhatmah min ti ngai lo a ni.
Israel faten van mana, chaw tui tak mai, vitamin tha lutuk chu, 'hetiang chhang tenawm hi kan ning tawh a ni tiin Pathian an sawi chhiat khan, Lalpan a humhimna a lakkian sak a. An sualnate phawrhin Mosia ngaihdam min dil sak rawh an ti leh a, Pathianin an dilna chu chawp leh chilihin a chhan sak leh nghal a nih kha. Misualte ngaidam tur chuan hmanhmawh takin a che thin a, misualte chunga hremna lekkawh tur chuan muang chang takin a che thin a ni. Abrahama'n Sodom leh Gomorrah boral mai tur chhan tumin, he khaw chhungah hian mi 50 chauh mifel awm se i hal lo ang em a tih chuan inngaih muang lovin 'ka hal lovang,' a ti nghal mai a ni. mi 40,30,20, 10 Mosia hnenah pawh tui let tur Chanchin Tha hril nan kum 120 lai mai pek a ni. Luk 15:2 Tin, Pharisaite leh lehkhaziaktute chu, "He mi (Isua) hian mi sualte a pawl a, an hnenahte chaw a ei ve thin," tiin an phunnawi ve ve a. Beram bo chu za atangin pakhat a ni, duli bo chu sawm atangin pakhat a bo va, fapa thlan bo erawh chu pahnih atangin pakhat a bo a ni; 17mi fel 99 sim chuan tur nei lote chungah ai chuan, mi sual pakhat sim chungah hian vana mi an lawm zawk ang.
Jer 8:20 "Buh seng hun a liam ta, Nipui a tawp ta, chhandamin kan la awm lo!" He thu lungchhiat thlak tak mai hi Lal Isua lo kal leh huna mi tam takin an au chhuah pui tur hrilhlawkna a ni. Chhandamnaah hian tumah a in thawh kep theih loh tih Eze 14:14 heng mi pathum - Nova, Daniela leh Joba-te meuh pawh hi lo awm ta ang sela, an felnain anmahni nunna chauh an chhan him ang," tih hi LALPA Pathian thuchhuak a ni. Lal Isuan kraws ler atangin, 'an thil tih sual hi an hre lo a ni, ngaidam ang che,' tia a dil sakna kha thinlung khar tlat te tan Isua meuh tawngtaina pawh chu a hlawhtling tlat lo a ni. Judate tana khawngaihna hapta pek belh ral dawnah Stephana'n Pathian hriattirna vaukhanna Chanchin Tha a hril chu ngai thei lovin, Judaten lunga an den tumah pawh khan lunga dengtute zinga thinlung khar lui tlat te tan Pathian Thlarau Thianghlima khat Stephana'n ngaihdam a dil sakna pawhin awm zia a nei lo a ni.
Hebrai 9:24 Krista chu kuta sak hmun thianghlim, atak anpuiah chuan a lut si lo va; tunah Pathian hmaah kan aia ding turin vanah ngei a lut ta zawk a. Thupuan 3:5 A hnehtu apiang chutiangin puan varte sintir an ni ang; tin, Nunna Bu ata an hming chu ka thai bo tawp lo vang a, ka Pa hmaah leh a vantirhkohte hmaah chuan an hming ka tan zawk ang. Rome 8:33 "Pathian mi thlante chu tuin nge hek ang? Thiam chantirtu kha Pathian a ni si a. 34Tuin nge thiam loh chantir ang? Thia kha krista Isua chu a ni si a; a ni, tho leh ta zawk a, Pathian ding lama awma min sawisaktu bawka kha a ni. Chhandam ni turin Isua rin kher a ngai tih Johana 3:18 Tu pawh amah ring chu thiam lohvin an awm lo vang; tu pawh ring lo chu tun apangin thiam lohvin an awm, Pathian Fapa mal neih hming an rin loh avangin. Isua chu hmun thianghlimah a awm tawh tih kan hmu a, chu hmun thianghlim ber atanga a lo chhuah hunah chuan sual ngaihdamna atana inthawina (sawipuitu/palai) kan neih tawh dawn loh avangin kan hriat lar em em tawngkam 'khawngaihna kawngkhar' kan tih hun chu a ni tawh dawn a ni.
Bible hrilhlawknate Pathian thu angin a tleng famkim ta thup mai si a, Setana ze thup loh hun chiah kan nghak ta. Hun bi nei hrilhlawkna pawh Bible-ah hmuh tur a awm tawh loh hun, hun hmawr tawh takah kan cheng ta; Khawngaihna kawng khar hnan kan nih loh nan sual thupha chawi a, inchhira inlamletin, Pathian kan hmangaihna leh Pathian mite kan nihna avanga Pathian fate nungchang, Thu 12:17 Pathian thupekte zawma Isua hriattirna thu pawmte kan nih a hun tawh tak zet a ni.
Post a Comment