----------------------------------------
🔰
Kawlkil ațanga zingni chhuak eng phût chuan Darkhuang khaw in 200 nufa chenna chu a rawn chhun êng leh siar siar tawh mai a, nidang anglo takin chungleng savate pawh an hlim tlangin, thingkung ler sang tak takah lo fuankhawm in an chiar nak nak hlawm a. Khuanu'n alo duan lawksa angin 'Lengi bahsamthlah thiami' tia ngaih phak chin tawhte chuan sumhmun ah buh dengin anlo inrawn dap dap a, tuium khirh rual hmeichhe tleirawl te pawh chu tui chawi turin Êm leh hmanrua chikim nen tuikhur lam an pan liam sung sung a. Chu tihlai chuan lal Mawii fanu mal neih chhunin fa paiin a hring chhuak dawn tih hriat tak mai hian, a hmel dâng in a chau hle a han en reng reng pawn fa a hring mai dawn ani tih hairual lohvin a țe ruai ruai mai a. Kar loah naute țap thawmin lal Dailova in chu a luah zui ta! ka hmu ve lo ang tih hlau niawm tak hian chhungtin te chuan lal chhungkua aţanga naute ţhar lo piang hmel hmuh ngei tumin, hmanhmawh takin lal inah chuan an va chuangkai sap sap hlawm a. Mipui lam pawn Darkhuang khaw lal fanu in a anpui fanu a hring chu lawm in, an hlim tlang dar dar kher mai, duhsak takin zo ar tui lai leh artui te an rawn paipawn hlawm a. Lal Dailova pawh chu mi ni kher kher chuan a lawm hle mai, chuti taka a rorelna hnuai a awm, a mi leh sa ten duhsakna chikim a anlo duhsak a han hmuh chuan a hnuk a ulh țeuh thei hial ani. Lal Dailova hi, lal dang ang lo takin rorel a thiamin michhia pachhia leh hmeithai te ang khat vek a duhsakin,thlei bik nei lovin an chungah ruah a surtir țhin vang pawh ani thei ang, an duhsak em em na chhan pakhat pawh...🔰Hun leh ni alo liam zel a 'lung delh loh' nafam chu lal tunu Rinzuali pawh a tleirawl ve awrh tawh a, a pian en reng reng in a nu a phawk fuh zia a hmelthat dan leh a nulen dan a țangin hairual anilo, Rinzuali pawh hi a chhungte ang tho in, a nun a nemin a zawiawi a, mi harsa leh puih ngaite chu a phak tawkin a pui zel țhin a, Darkhuang khaw nula chhuanvawr pawh ani reng a, tlangval tinten perh tlak tumin an theih tawp chhuahin an khaw daingul tan that an chhuah a, Rinzuali mit tih tlai nan an bei nasa mup mup ngei mai. Tuk khat chu Lal Upa min pu Hlimpuia chuan lal tunu ngilneih zia leh a hmuh dan ti hian a han sawia; "Kan lal fanu Rinzuali hi ka fapa neih chhun Hluna nupui atan ka awt na meuh mai, Rinzuali hi zawng naupang tuium khirh rual a nih ațang tawh khan a chhungten Tui chawi, buh den, buhthlei, vawk chaw pek, ar lawi, an zirtir chikim vek a, chu mai ala nilo asin, alo tleirawl chho-a inlam sekrek zawng zawng a chhungte thawh hlau in Aman ati vek mai zel a, rim rual alo ni ve tawh bawk nen zâna lo rim tlangval te chungah lah mitthip khawpin midangte melh leh biak bik a nei lem lova, ang khat vek a kawmin hawihhawm takin țawngkam thain 'sial aman' tih hre ve niawm tak hian 'hawn hma in va tum ve leng haw ar pawh ala khuang em hleinem mawle, ati mai țhin a nih kha ahan tia. Pu Hlimpuia Nupui Pi Vawri pawn ti hian afapa chungchang chu ahan thingfak khat ve-a "ka fapa hi Lal tunu pasal tan ka awt tak zet ani, mama pawh hi kawng tin rengah a inpek na a zau-a khawi ilo chhuah naah upa ho tih tur tul tul awm apiang te chu hreh lovin ati zung zung zel mai țhina. Ram an vah chang lah sa kaptu ni țhin mahse upa ho thlang hmasak loh chuan a thlang duh ngai lova, khaw chhungah lah upate phurh alo rih deuh chuan a lo chhawk zangkhai zel anih kha, mama tlawmngaih zia thu hi lal beng pawh a verh țhin teh ang chu mawle mamapa?" tiin thu a duhtawk rih a. Pu Hlimpuia lah titi khawchang ala tui dawn chauh ania nge ti hian ahan puak chhuak leha." Lal tunu Rinzuali leh ka fapa Hlunate kum hi a in rual deuh awm a, an in mil viau ka ring a sin mama nu? tiin ahan nui leh var vara, zante alo rei takah chuan Pu Hlimpuia te pawh chuan titi kham lo viau mahse mut chhuak in lo zem riai riai in kar loah an mu ve ta a.
🔰Zing takah Rinzuali chu a tho-a thangkhat vel chauh amu ani awm e a thawh hma danah a hriat ani, meite chhem in zing tui a chawi leh nghala tui te a chawi zawh chuan eirel siam in a buai ve hle a, chaw te chhum in an tuallai chu a lo phiat fai hman leh diama, chumi tuk chuan Rinzuali te chuan mikhual an nei a, chawte lo buatsaih sak in ei hmasa tu nih a chuh duh ngai lova. an mikhualte leh a chhung ten an ei zo thawkhat tawh tih chuan Rinzuali pawn țam hnemah tiin, changel hnah alak sa chu thuah hnihin ahan thuaha chutah chuan buh sakhi hmui zet mai hi a buna, alai ti kua in chawhmeh ther hlo eng ilo mauthei ami chu ahan bun leha tui tak in a ei mial miala. Rinzuali chuan ei 'bawrh bawrh' chu a rilru takin mikhual an awm bawknen mawi ati thei lova tlawmngai lo leh mi ang zan lo te tih rual lek ani tih hria in a mawi tawk lek a bar zawh chuan akham ve maia. Ani tak meuh mai hman lai kan pi pute hun lai kha chuan nula tlawmngai leh taima nungchang ţha te chuan mikhual an neih in mikhual te mit hmuhah an bar bawrh bawrh ngai lo a; thenkhat lah "kan khaw nula te chu heti taka an thawk hah nisi chaw lah an ei tlem nalaileng khawpa! eng tia dam thei zawk nge maw an nih le? an tih țhin kha.
🔰"Rizual kha i awm maw?" Rinzuali țhian khawmngeih ber Tharbawihi chuan alo ti lut phawnga. Rinzuali pawh chuan hawihhawm takin lo bia in. "Tharbawihi lah lo ni reng-a lo leng rawh lo leng thu rawh tiin thut hmun alo kawh hmuh a. Tharbawih chuan. " Thu hman pawh ka nilo thing phur tur in lo sawm ka tum che a sin ka țhiante pawh an in peih têp tawh ang, i hman chuan min lo zuive dawn em mawni" ahan tia, Rinzuali lah a phur zawng lo ni tak. A lo "aw" vata Tharbawihi leh kal ve tur Lawmsangi leh Sangzuali te chu zui ve in, an in zui chhuak ve nat nata, kar loah Vamaita ngaw an khaw dai ngul lawk ah chuan thing phur tur in an lut ve ta der mai, an phurh ngah tawk an fawm hnu lawk reiloteah chuan an piah lawk hruipui kar atang chuan keipui lian zet mai chu a rawn lang ta zul zul maile. Rinzualite țhian ho chuan keipui anhan hmuh meuh chuan an hamhaih lutuk chu che lo chang lo in an thlir țhup ringawta. Keipui lah chu a țam chawl ani tih hriat tak mai hian a cher hian ahan cher khawp a. Keipui pawh chuan vawiin na na na chu puar elh awlh takin in hnawh puar ang aw ti niawm hian Rinzuali lam hawi chuan a awp hniam tasut a, a mei chu tiphu auh auh chung chuan Laltunu Rinzuali chu a tawp nan ti niawm fahran hian a han rum khum a. Keipui chu a taksa chu tlema titawm in a hmaa Chaw tuihnaitak awma chu pawhsawm vek tum chuan a han zuan ta phut mai a. Chu mitak chu Khawnbawl min Pu Hlimpuia fapa Hluna rin leh lo nghah reng a nih a vangin, a zuan nghala Rinzuali chu a sir lamah nem zawk pah in a chempui chuan Keipui chu a theihtawpa na hian a han vai pawp a, Keipui ke hma lam chu a tliak nghal rawp a. Keipui pawh thlanglam mau hmunah chuan a lum thla ta buan buan mai a. Va Hnaihchilh leh nghal in Hluna silai chu apuak leh ta dur-a Keipui chalah tak chuan Hluna Silai chu a lut kaw pawp mai. Keipui pawh peih lo viau mahse akap tu in azir bawk nen a vir nawka luikawr lian vakloah chuan lumthla in a khur nghal char chara. Hlunan alo vah chem hriam zet mai chu phawrh chhuak zal zal nghal in Keipui chu ava hnaih chilh nghal a, Mahse Keipui chuan chak nareng neitawhlo chuan a zal zuita a ni....
Post a Comment