Freida-i Pa
He chanchin hi kar hmasa lawk a ka thil tawn a ni a, hming leh khua ka rawn tarlang lem lo a, ziaktu phalna lo chuan chhuahchhawn phal a ni lo bawk.
Tuk khat chu chiang vak lo a ka harh rual hian ka pu (ka nu pa) tawng ri hi ka hre ruai ruai a, "mau (hnang tur) i va la lawk teh ang," a tih chu ka hre ruai ruai a, ka nau a bia tih pawh ka mumang hriat tel deuh bawk a, ka pu hi hnang tah nuam ti chi niin, eizawnnan a hmang nilo mahse mi thenkhatten ka pu tah hi an duh deuh kher thin avangin tlawmngaiin a lo tah sak thin a ni.
Chutia ka pu tawng ka hriat ruai hnu chuan ka lo muhil leh a, ka harh meuh chuan zing dar 6:30 hi a lo ni tawh. choka lamah chuan thingpui in a ka thut lai chuan ka nu phone hi a rawn ri ral ral, ka pu in a rawn call a, Chem a lo ken theihnghilh niin, phur lo fahran chuan chem pe tur chuan ka kal ve ta.
Ka pu awmna ka va thlen chuan ka nau ka hmu silo, ka pu khan put chhawk tur chauh a atih avangin nakin deuh a lo kal tur a ni a, kan pahnih chuan ramhnuai pilril lam chu kan pan ta a. Ka pu hi thil duh uluk chi anih avangin hnang tur pawh hi mau satliah a duh lo a, ramhnuai pilril deuh a mau chang tha ngat a duh avangin kan kalna tur pawh hi a hla dawn hle tih ka chiang. Ka pu hi kum lamah a upat deuh tawh avangin a hnang lakna tur hi chhuk un lutuk mai, mau hnah tla nuai, kawng mumal awm lo, vawikhat ke chhehsual pawh a vanram leh meidil ban phakna anih avanga ka pu ka ngaihtuah deuh a, chuvang a hnathawh thawmhnaw pawh inbel lo a, awmhmun dress nena zui ta chu ka ni, ka tho hlim ka tih tawh kha.
Thui fe kan chhuk hnu, mau pawh tam tak kan kal pelh hnu chuan mau hung (mau awmkhawm) pakhat hi a melh vang vang a, a lu a thing nghut, a duh lo, kan chhuk leh ngat ngat, hla hi ka'n ti tawh khawp a aw...kal leh ka huphurh ai mah chuan haw lam tur a ni ka huphurh ni. Put theih a ni dawn lova, chho zawng a hawlh chhoh a ngai dawn, kawngthlang a mau sat thin chuan a harsat zia in hriat ka ring.
A duh loh zawk a hmuh na chen zet kan kal leh hnu chuan a duh a hmu ta. Phone ka keng lo nain zing dar 8 bawr vel anih ka ring. Ka pu chuan "hetiang anga mau (hnang) tha hi a vang asin" ti rilru ni awm tak hian lian tha tak mai chu a sat a, sei tawkah chuan a tan a, ka va han huphurh rilru tak. Mahse tlawn khat hi a tawk ang atih avang chuan ka huphurh dan a nep deuh.
Tichuan le, ka hnuk chho a, a chang leh thlang lam atangin ka nawr a, ka thlan fim hi a luang zawih zawih. Ka hah buai lutuk na lamah ka pu pawh chu ka ngaihsak hman lo, min rawn zui emaw ka tih kha ka hmu ta reng reng lo, ka tha ka ui deuh avang chuan au ta lem lo chuan ka mau rit tak chu ka buaipui a, reife ka buaipui hnu chuan mi Dil bul, kawng pawh pangai deuh awm tawhna ka thleng ta, ka chau lutuk chu ka thu ta vang vang a, ka thaw ang tak hlawi hlawi ah.
Reife ka chawlh hnu pawh chuan ka pu chu a lo la lang reng reng lo, ka ngaih a tha ta hauh lo mai. Hman hmawh leh fimkhur tak chuan ka pu zawng tur chuan ka kal leh ta a, ka ko thla ta mawlh mawlh a, min chhang bawk si lo, rilru in a chhe ber thleng ka dawn a, mahse chutiang em thleng tur chuan ka phal bik silo, a hma a kan sahna ka zuk thlen thlak pawh chuan ka pu chu ka la hmu chuang lo, a ruk tak chuan ka mangang tawh a ni. Ka rilru te te chuan ka pu hi a chak tawh silo a, a rawn chhoh lamah rap sual palhin a tleng ta vak anga, a hmun hi a awih ropui sia, thui tak lumin chutah chuan (tawngthu chheloah) thiin a lo let reng ang, nge thi silo, hliampui tuarin a lo awm ang tih te chu ka ngaihtuah nasa, nikhat a ka fanu hming ka lam zat let sawm chuang ka koh hnu pawn min chhangtu awm silo, ka ngaihtuahna chu ka piantirh ata ke a ka kal aia thui fe a kal hman ang chu. Ka rilru ah thildang a lo lut thut, kan kalna hmun hi a pilril si a, ramhuai te hi a awm anga! Mahse ka pu lah Kristian tha tak a ni si, ka ring chiah silo, mahse kei hi huaisen zawk zawk ka nih loh avang chuan chu chuan ka rilru a luahkhat rang kher mai. Ka hlau ru ta em em mai a, ka pu chu ka zawng zel a, ka thlang 200ft bawr velah chuan thawm ka hre ta, chu lam pan chuan ka kal a, mahse hlauh ka nei tlat, ka pu hi a bengngawng silo, ka hnaih riau tawh tihah pawh ka han au a, min chhang miah lo, hre tur chu ani, ka hnaih ngam tawh lo, ka ding nghal chawt a, ka hmul thi hi a ding nghal sung sung thei. Hlau chung chung chuan ka han au leh a, mahse thawm ka hriat pawh chu a reh hmak. Ka hlau tawh takzet a ni. Mahse ka pu lo ni ta se, na tuar tawng chhuak thei loin lo awm ta se, chutia din reng ringawt chuan tlai palh thei ka ni tih in hre reng chung chuan muang changin hmalam ka pan leh a, ka khur chhe lo choh a ni.
Tlanchhiat ngai thut pawh nise tlanchhe tura inring chungin tlanchhiat pah a invawn tan na tur chu pariat vel chu ka hual ru hman. Ka hnaih zel, thawm chu a ri leh buan buan, tlanchhiat mai kha ka duh rum rum, mahse tlanchhe turin ka zawn ber ka pu ka la hmu tlat lo, tlanchhe thei ka nilo. A tawpah chuan thih leh thih tiin thawm awmna chu ka pawh ta...awiiii ka reiiiii......ka duh thei lo, ka rilru pawh a ka suangtuah tel phak loh chu he ka chhingmit ngei hian hmun leh hmunah ka va hmu ta..ka bing mup mup a, ka mit sulh ni berin ka hria. Ka zawn lai ka pu chu ka va hmu ngei, mahse ka hmuh dan erawh heti hi a ni.
"A HMA AIA MAU LIAN LEH SEI, A HMA AIA HLA AH LEH NGHAL" ....awi ka kawng a na lutukk...ka chhuk lama kawng mumal pawh awm lo, hla bawk si kha..ka mitthla chhuak vek hialin ka hria, "pakhat ka hnukchho tawh a, hei chu nangman" tih chi ni silo, tlawm ngaih hmel tawwk a "ka pu khawi keiman" tih pah chuan nui chungin ka tap ni berin ka hria. Ka koh vak vak a a "Eih" loh nachhan pawh ka zawt peih tawh lo. Thei leh thei lo chuan ka pu min puih tumna pawh hnarin Mau lian hnuh chhoh nawr chhoh chu ka tran leh ta. Hahthlak tak a ni.
Chutah pakhat ka dahna ka thlenpui hnu chuan ka nau, kei aia tharum ngah, san zawngah pawh a beng ka thleng lo, thahrui pawh pahnih ka neih chuan sawm pariat nei tur zawk chu a rawn thleng. A lian zawk chu a pu haw ta luah luah a, In a thlen chuan thaw hlawp hian a mu chawl der, ani pawh khatiang a ahah chuan ka hah tur zia chu ngaihtuah ve mai ru.
Ka sawi duh tak zawk chu ka pu hian a Pai em leh Hnam tah ho te hi a ti tlawm em em a, Pai em ₹.250/- a tia, Hnam lah ₹.80/- chauh a ni. A hmanraw lakkhawmna leh a tha sen ngaihtuah chuan a tlawm lutuk mah mah a ni. Chuvangin hei aia man to deuh zawk hian lo leisak ve hram teh u, whatsapp leh facebookah biak theih reng ka ni e. Ka lawm e.
Post a Comment