LUNG KA LO MAWL EM E!

Ziaktu: H.Zate, Hmar Rûn.

Model: Ramrami Khiangte

Ka țhiannu nen chuan kan tih dan ngaia Night Club Party a tel tur chuan kan insiam a. Kan ngaihzawngte chu min lam turin kan ti ve bawk a. Thawmhnaw thehlep leh sexy thei ang bera inthuamin, kan inchei a. kan insiam lai reng chuan ka bialpa chu ka roomah chuan lo lutin, “I nalh lutuk!”tih leh min rawn kuah a rual nghal a. A mitmeng ațang chuan mawi min ti tih chu hai rual a ni lo.

Duhthawh taka infawpin, kan inkuah mawlh mawlh a. Ka țhiannu pawh a bialpa a lo thlen tawh avangin kan kal ta a. Kei chu ka bialpain a Bike-in min phur a, ka țhiannu pawh a bialpain a phur ve a. Zei fahran a chuangin, ka bialpa chu ka kuah a. Night club kan thlen chuan an lo ri mup mup tawh a.  In theih zawng zawng a awm emaw tih mai awl khawpin a tam a,  kan duh zawng chu lamin kan han in a, lam lamah kan thawk ve țan a. Kan lam lai chuan ka bialpa chuan min kuah reng a, mi pawh kan zah zo lo, kan infawp deuh reng a, nuam kan ti ngei mai.

Ka bialpa hi hnam dang tlangval niin, tuna night club ațang veka inhria leh inchhar  hi kan ni. Min duh a, min bêm a, min kherh a, Min bêm tak rengah chuan sum a lo nei ve si a, ka chhang a, ka nihpui ve ta a ni. Min ngaihsakin min duat thiam em em mai a. Ka țhiannu pawh a țhianpa nen inngaizawng vein nuam an tiin nuam kan ti tlang ngei mai.

Nula hmel țha, pian nalh ve tawk tak, mipa tam takin ît ngawih ngawih melh a an melh ve țhin ka ni. Tuna ka bialpa pawh hian chu thu chu vawi tam tak min hrilhin, duhawm min tih zia leh sexy min tih zia hi a sawi chamchi țhin.

Hnam dang kan ngaizawng a ni tih an hriatin kan awmna khawpuia kan hnam hruaituten min zilhin, a țhat loh thu min hrilh a, bansan turin min hrilh fo țhin. Mahse, he nun, mahni zalenna duh nun hian, ‘ka nun a ni a, in sawi tur a awm lo’  tia chhangin, ‘hmeichhe â chuan a chhiatna tur a pan țhin!’ an lo tih angin sim a hnêkin runluih lamah kan țang a, ka kawng zawh lam chu ka zawh zel a,  a aia nasain ka zawh ta hlauh zawk a. Ni e, khawvel kan chen ve a ni mai a, an sawi tur a awm lo!

Kan chipui tlangval pakhat hian min duh em em țhin a. Min hmangaih tak zet tih pawh ka hria; Mahse, ka duh ngai lo. Ka țhiannu hnenah pawh a sawi fo țhin. Ka nun dan țha a tih loh thu thlengin min hrilh țhin a. Mahse, ‘i sawi tur a awm lo!’  tia chhangin ka nuna buai lo turin ka ti zui a. Mahse, min ngaihsak reng tho si. Ka ngei reuh lutuk hi ka bialpa nena kan thlalak te ka thawn țhin a. A rilru a na thei hle.

Khawpui liana mahnia in luaha awm nula 2, mahni duh zawng a tal ta na na na chu nuam kan ti dun ngei mai. Kan bialpate chuan min ngaihsak a, nuam kan tiin, Zu nen nuam kan chen ve hle țhin. Kan tana inphal ta na na na chu an tan pawh kan lo inphal a. Sex pawh kan hmang zing tawh hle. Sex kan hman hnu phei chuan kan inpawhin kan induh leh zual a. Kan inah hial kan bialpate chu an riak țhin!  An rawn riah zan hi chuan tu mah mah hi kan mu mang lova, nawmchenna khumah kan tal tlang mai țhin a. A tir chuan inzah tawn mahin, a lo rei deuh hnu chuan ka țhiannu leh a bialpa nen kan vai chuan kan inzahpah vak tawh lo. Room hrangah Tu thawm nei țha țha ah kan inel hi a ni deuh ber a. A rei deuh hnu phei chuan room hranah pawh mu lovin, room khatah kan 4 chuan inhmu reng ten nuam kan chen ta vel mai mai țhin. Beer hi ka in nasa em em a, zu hi chu in tho mahila, ka in tam lutuk lova, bakah ka ngaina lutuk lo hrim hrim.

Bialpa hausa deuh neih chu a nuamin thawmhnaw thar pawh ka nei zing a. Mahse, thawmhnaw thar min lei apiang erawh chuan zan lamah ka rulh ziah  a ngai thung si.  Mahniin nuam ti bawk, thawmhnaw thar lawmna leh neih belhna a tan ba ka tlak a, a thar ngen nan pawh ka hmang fo reng a ni. An rawn riak fova, ka țhiannu a zin chang pawhin an pahnihin an rawn riak a, ka zin chang pawhin an 2 thovin an riak mai țhin. Țhian inkawm fuh ve tak kan niin, an ni pawh an ni awm e!

kha zan a club a kan kal pawh kha nuam kan ti lehin, engkim inhmuhsak tawh na na na chu kan inzahpah vak tawh lova, kan inkeih mial mial reng mai. Zan dang ang lo takin kha zan zet kha chu zu kan in țeuh mai a, kan haw lam pawh kan kai țha khawp mai. Kan in luah kan thlen chuan zing lam dar 1 a pel tawh a. Kan han inthlak a, inbual ka tum chu ka bialpa chuan min zui lut a, kan pahnih chuan kan inbual dun a, inbual ringawt lo na fam chu kan rei khawp mai. Kan inbual zawh chuan ka țhiannute pawh an inbual ve a. Ei turte eiin, in turte kan in leh a, kan kai leh ta hle mai. Mahse, he zan a kan awm dan erawh a danglam tlat! Kan hai chiai chiai a, nuam kan ti veng veng. Mut kan rem a, kan muhil ta a.

Zing kan harh chuan kan bialpate chu an dan pangngai bawkin mi thawh tam hmain an lo haw tawh a. Mak deuh maiin ka țhiannu nen chuan Bra kan lo hreng lo ve ve a. Mak kan tiin kan nuih a za bawk si, “He mite pahnih hnute lawm hi chuan kan muthilh hlanin an lo phelh ve ve a nih hi” kan ti a. 

Ka nute nen kan inhmuh loh rei tawh em avangin kan khuaah ka haw a. Vairam lama a țawp hnawk thei ang bera nung a, hnam dang ngaizawg țhin kha khuaah chuan tihlan a rem tawh lo. Bakah, mi thianghlim emaw min ti emaw tih mai turin kohhran ah lah hun pawimawh leh tih tur te min han tuk ve leh ang lawp lawp a. A zia lovin a nuam chiah lo țhin. Mahse, han sawi chi lah a ni der si lo.  Ka awmna lama kan nun dan nen a inmil lo lutuk a, khuaah pawh ka awm rei peih lo.  Bakah, ka taksa ah danglam a awm a, ka rai no deuh tlatin ka hria a, thi lah ka nei si lo. Ka bialpa erawh ka la hrilh duh lo. Hmai chhana hrilh ngei ka tum a ni. Min duh em emtu khan a fa ka pai mek a ni tih a hriat huna a lawm dan turte ka ngaihtuahin a rukin ka hlim veng veng a. A hmel hmuh hlan mawlh ka nghakhlel tawh. Thla 2 hun hmang tura haw si kha thla 1 leh a chanve pawh a liam hmain ka hna chhuanlamin ka awmna lamah ka haw leh ta a.

Kan awmna ka thlen zan chuan ka bialpa chu lo lengin, a riak ve nghal a. Thla 1 aia rei inhmu lo chu kan inthlahlel ngei mai. Zu leh beer in in, Inlawmna’n kan tih țhin ang bawk chu kan ti leh a, thawmhnaw thar duh vang ni lovin inthlakhlel vang a ni. A awma bei hnapin ka ngaih zia ka hrilh a, min ngaih thu sawi vein, chutah, ka rai tlata ka hriat thu ka sawi chuan a tuka finfiah turin min ti a. Kan muhil ta a.

A tuk chuan a sawi ang ngeiin ka finfiah a, ama hmuh lai ngeiin  ka zun chu ka han test a. Mahse, a lawm ka rin tehreng nen a lawm hmel vak lo tlat mai. ‘Engtin nge kan tih dawn?” ka tih chuan zana min lo hrilh tur thua min chhangin an in lamah chuan min hawsan ta a.

Zan a ni a, min rawn bia a, a fa ka pai mek chu titla turin min ti a. Ka duh loh thuin ka chhang a, “Min nei mai rawh.” ka tih chuan a duh loh thuin min chhang a.  Min hmangaih a min duh ve nia ka hriat țhinin chutia min chhang chu mak ka ti kher mai. Mahse, chu chu a la nep zawk a, a ințanna ang chauh a la ni zawk si! A țhianpa nen kan țhian dun chu nawmchenna atan chauha min lo hman țhin thu leh kan hriat lovin kan țhian dun chu min lo theih ve ve tawh thu a sawi a. Mak ka tiin na ka ti kher mai. Ka awm loh a an lo riah te, ka țhiannu awm loha an lo riahte khan min lo hrai ruiin min lo kawp țhin thu leh, khami zan, a tuk kan thawh a Bra kan lo hren loh ve ve țum te khan min lo ințawm thu a sawi zel a. Ka nain ka awih lova, dawt nise ka va ti si em! Mahse, dawt a ni lo. “I awih loh chuan” tih pahin an hmel leh kan hmel lang si lova video an lak chu min rawn thawn a, hmel lang lo mahse, mahni leh mahni bialpa bakah chenpui, mahni țhiannu ngei hriat loh thu awm suh! Ka zakin ka nâ a, ka pum hian ka khur ngawt ngawt mai niin ka hria. “Nangni ang mi hur kha tu mahin nupui atan an duh lo ang che u. Easy si! Hnam hur in nih hi!” a va na teh lul em! Khang țawngkam ka dawn hnu  leh video ka en hnu kha chuan min hmangaih thu sawiin min lo hmangaih tak tak pawh nise, ka pawm tawh awm kher love! ka va zak tak em! “Nau kha i tihtlak loh chuan Video hi ka tidarh ang.” a ti a. Min vau leh ta nghal a.

Ka thinrimin ka rilru a nâ a, mahse, a sâwt tawh si lo. “A hmangaih tak tak lo che. Kei min duh lo a nih pawhin, a ni hi chu kalsan rawh.” tia min ngentu, min hmangaih em em tu ka hnawl dan leh țawngkam na tak taka ka biak dante, ka bialpa nena kan thlalak ka thawn chiam leh a hmuh lai ngeia ka bialpa ka fawh te ka rilruah a rawn lut zut zut a. Hruaitute’n min zilh laia ka lo awih lo te kha ka inchhir leh hnuhnaw a. Ka inngaihtuah a, a nat hian ka na ngawih ngawih mai a ni. Kei chauh zawng ni ila ka nat dan a zia deuh tur a ni a, ka țhiannu lehzel a tel si a ka na lehzual a ni.  Ka thinrim leh rilru na lutuk chu ka puak keh thei mai dawnin ka hria a. Bathroom-ah lutin tuiin ka inleih huh a, ka țap tlawk tlawk mai a ni.

Ka țhiannu ka hrilh dawn nge Video vang leh ka chhung a naute vang hian Court-ah ka kal dawn ka inngaihtuah a. Ka țhiannu ka hrilh chuan a na mai mai dawnin ka hria a. Court-a ka kal chuan a thinrimin tidarh ta se, ka mualphona a punlun mai mai dawnin ka hria a. Enga mah chu ka ti ngam ta lova.

Tumah ka hrilh ngam lova, mahniin ka tuar a, ka țhiannu meuh pawh ka hrilh ngam lo. Mahse, Ka bialpa nen ințhen a, a chhan min zawh laiin, “Hnam dang aiin mahni hnampui ngei le!” ka tih chu a lo la fuh deuh nge ni a bialpa chu eng tin tin emaw a lo țhen ve ringawt a, mak ka ti kher mai.  Ka tan beih vak aiin tlawm zawka țan kha ka mualphona dâltu zawk a ni tih hriain ka naupai titla a, a niin video thaibo turin kan intiam ta a.  A va na kher em!

Chutia, beidawng leh lungngai taka hun ka hmanlai chuan, ka hnawl hnu ngei mai kha ka tan a lo par chhuak a. Ka tan a inpe a, hmangaihna dik taka min pawmin, ka ngaihzawng nih beisei hauh lovin min pui a. Nau ka tihtlak dawn pawhin a țhat loh thu leh Pathian pawi sawina a nih thu min hril mathlawn lo, Mahse, ka awm danin a zir tawh ngang si lo. Ka titla ta nge nge a,  pa hmingah a hming kan ziak ringawt a. Chuti ang teh nuaih karah pawh chuan min fuihin min țanpui reng a. Țawngțaina nena min fuihin Pathian thu min hrilh țhin. Chu a hmangaihna vang chuan, tunah chuan nun thar neiin pangngai takin ka nung tawh a. Keimah mai ni lovin, ka țhiannu pawhin nun phung pangngai a zawh ve tawh!

Tunah chuan a hmangaihna nena min nghak reng țhintu nen ngei chuan nupa niin a tan fapa duhawm tak ka hrinsak tawh a. Kan hlimin ka hlim hle țhin. Mahse, a ni, Mipa thianghlim lakah hian ka insit a, tlawm ngawih ngawih hian ka inhre țhin. Chumi avang chuan keimah vanga a  nat ka phal lova, a tan ka engkim hlanin a hlimna atan ka nun pum hi ka hmang a, ka zah em em țhin. Khang ka  nun lo hman tawh leh thil tam tak ka lo tih tawh te ah khan inchhirin, ‘Lung Ka Lo mawl em e!’ ka ti leh țhin. Heti ang khawpa min hmangaih a, ka nunhlui zawng zawng hnawla nun thar min neihtir a, Pathian min hnaihtirtu Ka pasal hi  Ka ngaisang takzet a ni!

Tu mah Ka tawn ang tawngin, ka vanduai angin vanduai ve lo se ka ti țhin.

26 May 2017 | EFCI Mission Center, Pillangkata.