Minister of state aṭanga báng ta Dr BD Chakma chuan, minister aṭanga bànna chu ama thutlukna vang liau liaua thehlut a nih thu a sawi. Dr BD Chakma bànna hi Chief Minister-in a pawm hnuah Ningani khan Governor pawhin a pawm a ni.Thuthar thehdarhtute'n an kawmnaah BD Chakma chuan, Joint NGO-te'n pressure an pek vanga báng a nih loh thu sawiin, "Min bàntir tura ngenna Chief Minister hnenah an thawh a, báng turin keimah bik tumahin kan inah rawn kalin emaw, telephone emaw hmangin min be lo," a ti a; a duhthlanna vang liau liaua bànna thehlut a nih thu a sawi.
Dr BD Chakma chuan, an party hotute aṭang pawhin báng tur nawrna a dawn loh thu sawiin, "Ka bàn leh bàn loh chu ka thutluknaah an dah a ni. 'Hetiang hian boruak a awm a, i bàn leh bàn loh chu i thuneihna a ni,' min ti a ni," a ti.
MBBS leh BDS zir tur thlan chungchangah Higher & Technical Education (HTE) minister R Romawia a dem tak zet tih sawiin Dr BD Chakma chuan, "Court-in rules a stay laiin, press statement siamin Mizoram quota-a MBBS leh BDS zir tur atana 'Zo ethnic' chiah thlan an nih tur thu a tarlang a, a tih loh tawp tur a ti a ni," a ti a; HTE Minister thil tih dan chu a pawm theih loh thu a sawi.
BD Chakma chuan Joint NGO-te'n India danpui bawhchhiaa an puh chungchangah, "Tu pawhin eng ang pawhin issue an siam thei a, an dikna chanvo vek a ni," a ti.
Dr BD Chakma chuan, dan loa Chakma pêmlutte electoral roll-a an chuan theih loh thu sawiin, "Roll-a inthun luh a nih dawnin, document endiktu leh hearing-a officer ṭhute Mizo vek an ni a, Chakma pakhat mah an awm lo. Anni hian Chakma dan loa pémlutte roll-a an thun duh ka ring lo," a ti a; electoral roll-a Mizo officer-te'n thun luh tlaka an ngaihte chu dan loa awm an nih theih loh thu a sawi.
Post a Comment