Two wheeler taxi vai liam
Transport minister John Rotluang­liana chuan Inrinni chhun khan Transport directorate tual aṭangin two wheeler taxi a vai liam. John Rotluangliana chuan, two wheeler taxi chu Transport department hlâwkna tur ni loin, mipuite awlsamna leh malsawna ni tura din a nih thu a sawi.
Image result for TWO WHEELER TAXI
Transport Minister chuan, two wheeler taxi neitute chu mahni tana hlâwkna ringawt ûm lo a, an awm chhan, mipui hmakhua ngaia thawk ṭhin tur leh sorkarin rate bituk a siamte zâwm turin a chah a, "Two wheeler taxi hi India ramah Goa leh Mizoramah chauh a awm. Kan ramah thil thar ni mah se, nakin lawka ram hmél lanna tur a ni," a ti.
Permit pek kawngah duhsak bik an awm loh thu sawiin John Rotluangliana chuan, "Permit thar pawh pek zel tura ruahman a ni. Kan ramah hna thawk peih lo kan tam ta lutuk hi a veiawm hle a, a bik takin mipate kan inenfiah leh zual a ngai," a ti a; Two Wheeler Taxi Association (ATTA) member kalkhawmte chu an kal zelna turah duhsakna a hlan.
Transport department hian two wheeler taxi permit hi September 2016-ah a pe ṭan a, tun thlengin permit 200 pek chhuah a ni tawh. Sorkarin rate a bituk dan chu - tlan chhuah ṭanna aṭanga km. 1 chu Rs. 10 a ni a, chumi hnu aṭang chuan km. khatah Rs. 5 belh zel tur a ni.
Aizawl  Two Wheeler Taxi Association (ATTA) hi February 5, 2017-ah din a ni a, member 61 an awm mek. Sorkarin stand 19 a siamsak a, chu'ng zinga stand 10-ah an ding ṭhin a ni.

Post a Comment

Powered by Blogger.