PRISM president Vanlalruata chuan, kum 2018-a Assembly inthlanah bial 40-ah candidate an nei dawn tih a sawi a, "Kan camndidate-te chu Zo hnahthlak vek an ni ang," a ti.
PRISM hruaitute hian August 26, Inrinni khan Aizawl Press Club-ah thuthar thehdarhtute an kâwm a; Vanlalruata chuan, kum sorkar chhung sorkara thil dik lo siamṭhat tuma an beih tawh thu sawiin, "Sorkar nawrtu nih reng ai chuan, sorkar siamtu nihi kan tum ve ta a ni," a ti a; tun dinhmunah candidate siam ngai thut se, an inpeih thawkhat thu a sawi.
Zawhna chhangin Vanlalruata chuan, khaw hrang hrangah unit neih an tum lo tih sawiin, chu chu ṭha zawka an hriat vang leh mipui duh dan zawk nia an hriat vang a nih thu a sawi a, "Branch 400 chuang kan neih sa pawh kan ṭhiat vek dawn," a ti. Kum 2018 inthlan tur thlirin pawl hrang hrang nen an inkawm fo thu a sawi a, "Mahse, ziaka thu thlunpui kan la nei lo," a ti.
PRISM President hian election manifesto an tlangzarh tawha huaisen taka hmalak ngaihna bik nia an ngaih a sawi lang a; chungte chu - Assam enkawl lai Inner Line Reserved Forest lak let te, hmang ṭangkai si loa ram zau tak tak neite chhuhsak te, eiruk hmangte man leh an eiruk sa chhuhsak te, sorkar hnuaia awm ṭhenkhat mimal kuta hlan te, inawp leh inrêlbàwlna ramri siam ṭhat te, department awm dan ennawn te, RTI Act Section 4 tihpuitlinte a ni.
Mizoramin hma a sawn chak loh chhan bulpui chu eirukna a ni tih sawiin, MLA leh minister-te chu eirukna laka fihlim tura an beisei dawn thu sawiin Vanlalruata chuan, "Minister leh MLA nih chakawm loh rawk khawp a ni ang," a ti. Minister leh MLA-te hlawh leh hamṭhatna tihtlem, kum tin an thil neih puanzar, Constituency Development Committee dina an thu anga MLA fund hman leh sport association vela hruaitu ni thei loa dahte an tum thu a sawi.
PRISM manifesto tihpuitlin a nih chuan, Mizoram chu ram zau zawk, chenna nuam, him leh ṭhang chak zawk a nih tur thu te, kawlphetha leh inkalpawhna kawng a ṭhat tur thu te, hnam intodelh a nih tur thu te, sorkar chak leh dan kenkawhna ram a nih tur thu te, corruption a bo tur thute an sawi bawk.
Vanglaini.org
Post a Comment